Avbe Ọbuohiẹn

17 Ọ mwẹ okpia ọkpa na tie ẹre Maika, nọ ghaa rre ikinkin ne oke ye vbe Ifrem. 2 Ọ na tama iyẹe wẹẹ: “Ọ mwẹ asẹ ọkpa, ne ọmwa ya do ruẹ igho esiliva iyisẹn yan arriaisẹn ọkpa (1,100) viọ, I vbe họn wẹẹ u tie ihẹn ne nene ọmwa. Nene esiliva gue mwẹ. Mẹ ẹre ọ viọ ọre.” Ẹre iyẹe na tama rẹn wẹẹ: “Te Jehova gha fiangbuẹ ovbi mwẹ.” 3 Ọ na ghi viọ igho esiliva iyisẹn yan arriaisẹn ọkpa (1,100) nii werriegbe ne iyẹe, sokpan, iyẹe na tama rẹn wẹẹ: “I gha ya enene esiliva fiohan ne Jehova. I hoo ne u yae ru amazẹ na kaa re, kevbe amazẹ na ya ematọn ru.* Ọghuẹ ẹre esiliva na ghi khin.”

4 Ọ ghi viọ esiliva nii werriegbe ne iyẹe, iyẹe na viọ igho esiliva iyisẹn vbe ihe eva (200) vbọ, ne ogiogun esiliva. Ọ na yae ru amazẹ na kaa re kevbe amazẹ na ya ematọn ru;* a na viọ ọre ye owa e Maika. 5 Okpia na ighẹ e Maika ghaa mwẹ owa ẹbọ, ọ na vbe ru ẹfọd* kevbe avbe amazẹ etẹrafim,* ọ na we ne ovbi ẹre ọkpa gha re ohẹn ọghe irẹn. 6 Ivbi Izrẹl ma gha mwẹ ọba vbe ẹghẹ nii. Dọmwadẹ ọghẹe na gha ru emwi nọ rhirhi khọn rẹn.*

7 Ọ mwẹ igbama okpia ọkpa nọ ghaa rre Bẹtlẹhẹm nọ rre otọ e Juda; Ovbi e Livai nọ ke ẹgbẹe Juda rre ghaa nọ. Ọ vbe gbe ẹghẹ eso nẹ vbe Bẹtlẹhẹm. 8 Te okpia na kpa vbe Bẹtlẹhẹm nọ rre otọ e Juda, nọ ya gualọ ehe nọ khian dia. Ọ ghi zẹ khian, ọ na do sẹ owa e Maika, vbe ikinkin ne oke ye vbe Ifrem. 9 E Maika na nọ rẹn wẹẹ: “De eke ne u ke rre?” Ẹre okpia nii na wanniẹn wẹẹ: “Ovbi e Livai nọ ke Bẹtlẹhẹm nọ rre otọ e Juda rre, ẹre I khin. Eke ne I khian dia, ẹre I gualọ khian.” 10 E Maika na tama rẹn wẹẹ: “Tota ke mwẹ, ne u gha re ọbude* mwẹ kevbe ohẹn. I ra gha ha ruẹ igho esiliva igbe vbe ukpo, I ra gha viọ ukpọn eso nuẹn, I ghi vbe gha rhie evbare nuẹn.” Ẹre Ovbi e Livai nii na la owa. 11 Ovbi e Livai nii na ghi kue yọ wẹẹ irẹn gha dia owa e Maika ya, ọ na do yevbe ọkpa vbe usun ivbi e Maika nikpia. 12 Deba ọni, e Maika na we ne Ovbi e Livai na gha re ohẹn ọghe irẹn; owa e Maika ẹre ọ ghi gha ye. 13 Ẹre Maika na ghi kha wẹẹ: “Nian, I rẹnrẹn wẹẹ, te Jehova khian gha ya obọ esi mu mwẹ, rhunmwuda, ohẹn mwẹ ẹre Ovbi e Livai na ghi khin.”