Avbe Ọbuohiẹn

16 Vbe asẹ ọkpa, e Samsin na gha rrie Gaza, ọ ghi sẹ evba, ọ na miẹn igbiragia ọkpa, ẹre ọ na lele ẹre la owa. 2 Emwa eso na do tama Ivbi e Gaza wẹẹ: “E Samsin rre ẹvbo ima.” Ẹre iran na lẹga ẹvbo nii hia, iran na gba khẹ ọre vbe onurho ẹvbo nii, asọn ohoho ẹre iran ya gha khẹ ọre. Iran ma gbe owogho vbe asọn nii hia, iran na gha tama egbe wẹẹ: “Ẹdẹ gha wa gbe, ma ghi gbe ẹre rua.”

3 Sokpan, e Samsin keghi lovbiẹ ye evba ya sẹ ogiasọn. Ọ ghi rre ogiasọn, ọ na kpaegbe, ọ na dobọ mu ẹkhu ọghe ẹvbo nii kevbe erhan na kan rẹn mu, ọ na vu ẹre hin otọ rre, erhan na rhie lae na vbe lele ẹre. Ọ na mu ehia ye izabọ gha rrie uhunmwu oke nọ mu aro daa e Hẹbrọn.

4 Iyeke ọni, ẹmwẹ okhuo ọkpa na do gha yẹẹ ọre. Eni okhuo na ọre Dẹlaila, Iya* Ọghe Sorẹk ẹre ọ ghaa ye. 5 Ẹre avbe ọkaolotu ọghe Ivbi e Filistia na bu e Dẹlaila, iran na tama rẹn wẹẹ: “Rẹrẹ ọre,* ne u mieke na rẹn emwi nọ yae kakabọ mwẹ ẹtin vberriọ, kevbe vbene ima gha ya sẹtin khọnmiotọ yan rẹn, ne ima gbalọe, ne obọ ima vbe ke ukhunmwu nẹẹn. U gha ru vberriọ, dọmwadẹ ima gha viọ esiliva iyisẹn yan arriaisẹn ọkpa (1,100) nuẹn.”

6 Ọ ghi zẹ kpẹẹ, e Dẹlaila na tama e Samsin wẹẹ: “Tama mwẹ emwi nọ ya ruẹ kakabọ mwẹ ẹtin, kevbe emwi na gha sẹtin ya gbalọ ruẹ, ne obọ emwa mieke na vbe ke ukhunmwu nuẹn.” 7 E Samsin na tama rẹn wẹẹ: “Deghẹ a na ya irri uhanbọ ọghe ọgbọn ihinrọn, ni ma he kaka gbalọ mwẹ, I i khian ghi gha mwẹ ẹtin, I ghi do yevbe ikpia nikẹre.” 8 Ẹre avbe ọkaolotu ọghe Ivbi e Filistia na viọ irri uhanbọ ọghe ọgbọn ihinrọn, ni ma he kaka ne Dẹlaila, ọ na yae gbalọ e Samsin. 9 Iran na gba khẹ e Samsin vbe ughugha nọ ke uwu ẹre, ẹre Dẹlaila na go tie ẹre wẹẹ: “E Samsin, Ivbi e Filistia rre o!” Ẹre Samsin na giagia avbe irri uhanbọ nii kua, vbene oru* vbe giagia vbe erhẹn gha dekaan rẹn. Rhunmwuda ọni, iran ma sẹtin rẹn emwi nọ rhie ẹtin nẹẹn.

10 Ẹre Dẹlaila na ghi tama e Samsin wẹẹ: “Ghee ẹre! U mu mwẹ rẹrẹ, u na vbe ta ohoghe ma mwẹ. Lahọ, tama mwẹ emwi na gha ya sẹtin gbalọ ruẹ.” 11 Ẹre Samsin na tama rẹn wẹẹ: “Deghẹ a na ya avbe irri ọgbọn na ma he ya winna gbalọ mwẹ, I i khian ghi gha mwẹ ẹtin, I ghi do yevbe ikpia nikẹre.” 12 Ẹre Dẹlaila na viọ irri ọgbọn, ọ na yae gbalọe, ọ na vbe go tie ẹre wẹẹ: “Samsin, Ivbi e Filistia rre o!” (Na kha na, iran gba khẹ Samsin vbe ughugha nọ ke uwu ẹre.) Ẹre Samsin na giagia avbe irri na ya gbalọ ọre obọ kua, vbene a miẹn wẹẹ oru nọ.

13 Iyeke ọni, e Dẹlaila na tama e Samsin wẹẹ: “Do fie vbene a guan na, te u ye rẹrẹ mwẹ, te u ye ta ohoghe ma mwẹ. Tama mwẹ emwi na gha sẹtin ya gbalọ ruẹ.” Ẹre Samsin na tama rẹn wẹẹ: “Ya oru* saa ititi eto ihinrọn na mọẹn, nọ rrọ mwẹ uhunmwu.” 14 Ọ na gele ru vberriọ, ọ na vbe ya ovbi erhan* kinnọẹn kugbe, iyeke ọni, ọ na go tie Samsin wẹẹ: “Samsin, Ivbi e Filistia rre o!” Ẹre Samsin na gua kpaegbe vbe ovbe, ọ na wio ovbi erhan na ya do ukpọn, kevbe oru nii hin uhunmwu rre.

15 Ẹre Dẹlaila na ghi tama e Samsin wẹẹ: “Vbọzẹ ne u na kha wẹẹ u hoẹmwẹ mwẹ, vbene u ma na mu ẹtin yan mwẹ? Igba eha ẹre u he mu mwẹ rẹrẹ na, u ma he vbe tama mwẹ emwi nọ ya ruẹ mwẹ ẹtin.” 16 Ẹdẹgbegbe ẹre Dẹlaila ya gha vian gbe Samsin, ọ na gha kpikpi ẹre, egbe na do wọọ e Samsin sẹrriọ wẹẹ, kherhe ẹre ọ ghi te kẹ nọ wu. 17 Vbe okiekie, e Samsin na ghi fannọ otọ ẹko ẹre ma e Dẹlaila, ọ na tama rẹn wẹẹ: “A ma he gbe mwẹ eto ẹdẹ, rhunmwuda, e Nazarait ọghe Osanobua ẹre I khin, ke na ya biẹ mwẹ gha dee.* A gha gbe mwẹ eto, I i khian ghi gha mwẹ ẹtin, I ghi do yevbe ikpia nikẹre.”

18 E Dẹlaila ghi miẹn wẹẹ e Samsin fannọ otọ ẹko ẹre ma irẹn nẹ, ọ na zẹgiẹ ya tie avbe ọkaolotu ọghe Ivbi e Filistia, ọ na tama iran wẹẹ: “Wa gha dee nian, rhunmwuda, ọ fannọ otọ ẹko ẹre ma mwẹ nẹ.” Ẹre avbe ọkaolotu ọghe Ivbi e Filistia na gha dee, iran na vbe mu igho ne iran ve ẹre lele egbe. 19 E Dẹlaila na bọ e Samsin ye ovbe vbe ekuawẹ ọre; ẹre ọ na tie okpia ọkpa, ọ na we nọ giagia ititi eto ihinrọn nọ mẹ ye uhunmwu. Erriọ obọ e Dẹlaila ghi ya vba e Samsin, rhunmwuda, e Samsin ma ghi gha mwẹ ẹtin. 20 Iyeke ọni, ọ na go tie Samsin wẹẹ: “Samsin, Ivbi e Filistia rre o!” Ẹre Samsin na gua kpaegbe vbe ovbe, ọ na wẹẹ: “I gha ladian vbene I ka ru ẹre, I ghi vbe fan egbe mwẹ.” Sokpan, ọ ma rẹn wẹẹ e Jehova fi iyeke gbe irẹn nẹ. 21 Ẹre Ivbi e Filistia na muẹn, iran na wọlọ ọre aro kua. Iyeke ọni, iran na muẹn gha rrie Gaza, iran na ya ọgiọrọ eva na ya ekọpa ru rrọ ọre; ewit* ẹre ọ ghi gha lọ vbe eghan. 22 Sokpan, eto nọ rre ọre uhunmwu na werriegbe suẹn gha sọn.

23 Avbe ọkaolotu ọghe Ivbi e Filistia keghi si egbe koko ne iran do ugie, ne iran vbe zọ ese ni bun gie Degọn ne ẹbọ ọghe iran, rhunmwuda, iran kegha tae wẹẹ: “Osa ọghe ima rhie Samsin ne oghian ima ye ima obọ nẹ!” 24 Iran ghi bẹghe ẹre, iran na gha rho ẹbọ ọghe iran, iran na gha kha wẹẹ: “Osa ọghe ima rhie oghian ima ye ima obọ nẹ, irẹn* ẹre ọ fuẹn ẹvbo ọghe ima rua, ọ na vbe gbele emwa ima ni bun rua.”

25 Rhunmwuda ne ẹko na gha sẹ iran ọyẹnmwẹ, iran na wẹẹ: “Wa tie Samsin rre, ne ima yae gbogiẹ.” Ẹre iran na ya rhie Samsin ladian vbe eghan, ne iran yae gbogiẹ; iran na rhie ẹre mudia ye adesẹneva ọghe orrẹ eva. 26 Ẹre Samsin na tama ọmọ okpia nọ rhie ẹre obọ khian wẹẹ: “Lahọ, rhie mwẹ obọ ye avbe orrẹ ni da owa na yi, ne I mieke na ya egbe gọ yan iran.” 27 (Na kha na, te ikpia vbe ikhuo wa vuọn owa nii. Avbe ọkaolotu hia ọghe Ivbi e Filistia ghaa rre evba, ikpia vbe ikhuo ni re odẹ arriaisẹn eha [3,000] vbe gha rre uhunmwu owa nii, iran na gha ke evba ghee Samsin, iran na vbe gha yae gbogiẹ.)

28 Ẹre Samsin na ghi tu tie Jehova wẹẹ: “Enọyaẹnmwa ighẹ Jehova ne Udazi, lahọ ye mwẹ rre. Eo Osanobua, lahọ rhie ẹtin mẹ uhukpa na, ne I mieke na rri Ivbi e Filistia oya ye ọkpa vbe aro mwẹ eva ne iran rhu.”

29 Iyeke ọni, e Samsin keghi viọ obọ ye orrẹ eva ni rre adesẹneva ọghe owa nii, ọ na gha ya obọ erha ọmwa sua ọkpa vbọ, ọ na vbe gha ya obọ iye ọmwa sua enọkpa. 30 E Samsin keghi datu wẹẹ: “Gi imẹ* vbe Ivbi e Filistia gba wulo!” Ẹre ọ na ya ẹtin ẹnrẹn hia sua orrẹ eva nii, nene owa keghi siẹn rhu avbe ọkaolotu ọghe Ivbi e Filistia, kevbe emwa hia ni ghaa rre nene owa. Emwa nọ gbele vbe ẹdẹ nọ wu, na do bun sẹ nọ gbele vbe ọ rre agbọn.

31 Ẹghẹ eso ghi gberra, etiọnrẹn nikpia kevbe emwa hia ni rre ẹgbẹe erhae na rre do mu ikun ẹnrẹn. Iran na ya ree ẹre ye ẹkpo e Zora kevbe Ẹshtaọl, vbe idin ọghe Manoa ne erhae. Ukpo ugie (20) ẹre ọ ya bu ohiẹn Ivbi Izrẹl.