Avbe Ọbuohiẹn

15 Ẹghẹ eso ghi gberra, vbe ẹghẹ na ya rhọ ewit, e Samsin na ya miẹn ọvbokhan rẹn, ọ na vbe mu ovbi ẹwe lele egbe. Ọ na wẹẹ: “I hoo ne I bu ọvbokhan mwẹ gha rrie ughugha.”* Sokpan, erha ọvbokhan rẹn ma kue nọ bu ẹre gha khian. 2 Erha ọvbokhan rẹn na wẹẹ: “I te wẹẹ ẹmwẹ ọnrẹn i yẹẹ ruẹ. Rhunmwuda ọni, I na rhie ẹre ne ọkpa vbe ikpia ni lele ruẹ rre. Ẹ i re ọtiọnrẹn nekherhe ẹre ọ mose sẹ? Lahọ, wẹ wa rhie ọni.” 3 Vbọrhirhighayehẹ, e Samsin na tama iran wẹẹ: “I gha ghi rri Ivbi e Filistia oya vbe ẹghẹ na, I ma ru emwi dan.”

4 Ẹre Samsin na ya munọ umuọkhọkhọ iyisẹn vbe ihe eha (300), ọ na vbe viọ erhan eso nọ khian ya ru uwerhẹn.* Iyeke ọni, ọ na viọ umuọkhọkhọ eva, ọ na gbalọ ẹrhunrhunmwu ọghe iran kugbe, ọ na vbe gbalọ erhan ọkpa ginna ẹrhunrhunmwu eva nii; erriọ ẹre ọ ru avbe umuọkhọkhọ nii hia. 5 Ọ na rhu erhẹn ye avbe erhan na ya ru uwerhẹn* nii, iyeke ọni, ọ na viọ avbe umuọkhọkhọ nii la uwu ugbo ewit na ma he fian ọghe Ivbi e Filistia. Ọ na mu erhẹn ye emwi hia, ke ewit na fian nẹ, ke na ma he fian, ya sẹ egbe ugbo evaẹn* kevbe avbe erhan oliv.

6 Ivbi e Filistia na nọ wẹẹ: “De ọmwa nọ do ẹki na?” Ẹre a na tama iran wẹẹ: “E Samsin ne orruan Ovbi e Timnah, ẹre ọ ru ẹre, rhunmwuda ne erha ọvbokhan rẹn na rhie ọvbokhan rẹn ne ọkpa vbe usun ikpia ni lele ẹre ya rhie okhuo.” Ẹre Ivbi e Filistia na ya giẹn okhuo nii kevbe erhae rua. 7 E Samsin na ghi tama iran wẹẹ: “Deghẹ erriọ uwa ya yin, I i khian hẹwẹ, vbe ẹ i re te I rria ikhi ye emwi ne uwa ru nẹ.” 8 Ẹre Samsin na suẹn gha gbele iran rua ọkpọkpa, iyeke ọni, ọ na tuorre gha die uvun nọ rre uwu okuta na tie ẹre Itam, ọ na fẹko dia evba ya.

9 Ẹghẹ eso ghi gberra, Ivbi e Filistia na ya bu agọ ye Juda, iran na gha hẹ yo hẹ rre vbe Lihai. 10 Ẹre ikpia ni rre Juda na nọ iran wẹẹ: “Vbọzẹ ne uwa na gha dee do gu ima khọn?” Iran na wẹẹ: “Te ima rre do mu e Samsin,* ne ima vbe ru ẹre emwi nọ ru ima re.” 11 Ẹre ikpia arriaisẹn eha (3,000) ni rre otọ e Juda, na bu e Samsin gha rrie uvun nọ rre uwu okuta na tie ẹre Itam, iran na tama rẹn wẹẹ: “U ma rẹn wẹẹ Ivbi e Filistia ẹre ọ kha yan ima ra? Vbua ghi gu ru ima vbenian?” Ẹre ọ na tama iran wẹẹ: “Emwi ne iran ru mwẹ re, ẹre I vbe ru iran re.” 12 Sokpan, iran na tama rẹn wẹẹ: “Te ima rre do mu ruẹ* gie Ivbi e Filistia.” Ẹre Samsin na tama iran wẹẹ: “Wa yan ma mwẹ wẹẹ, wa i khian ru mwẹ emwi rhọkpa.” 13 Iran na tama rẹn wẹẹ: “Ma i khian ru ruẹ emwi rhọkpa, te ima khian gbalọ ruẹ kẹkan, ne ima mu ruẹ gie iran, sokpan, ma i khian gbuẹ rua.”

Ẹre iran na ya irri ọgbọn eva gbalọe, iran na muẹn ladian vbe uwu uvun okuta nii. 14 Ọ ghi sẹ e Lihai, Ivbi e Filistia hia na mu wee vbe iran miẹn ọnrẹn. Ẹre orhiọn e Jehova na rhie ẹtin nẹẹn, irri na ya gbalọ ọre obọ na do yevbe oru elinẹn ne erhẹn giẹn rẹn, ọgiọrọ nọ ghaa rre ọre obọ na vbe ranran kua. 15 Ọ na do miẹn ugboloko ọghe agbanmwẹ ekẹtẹkẹtẹ* nọ da wu; ọ na guae rhie, ọ na yae gbele ikpia arriaisẹn ọkpa (1,000) rua. 16 Ẹre Samsin na wẹẹ:

“Ugboloko ọghe agbanmwẹ ekẹtẹkẹtẹ, ẹre I ya gbele avbe eghian, I na silo iran yan egbe yan egbe!

Ugboloko ọghe agbanmwẹ ekẹtẹkẹtẹ, ẹre I ya gbele ikpia arriaisẹn (1,000) rua.”

17 Ọ ghi guan fo nẹ, ọ na fi ugboloko ọghe agbanmwẹ ekẹtẹkẹtẹ nii fua, ọ na do gha tie evba nii Remat-lihai.* 18 Iyeke ọni, ovbamẹ na do kakabọ gha gbe ẹre, ẹre ọ na ghi tu tie Jehova, ọ na wẹẹ: “Wẹ ẹre ọ ru iyobọ ne ọguọmwadia ruẹ ya khọnmiotọ. Lahọ, ghẹ gi ovbamẹ gbe mwẹ ruan. Ghẹ vbe gi obọ ikpia na ni ma rhuẹ vba mwẹ.” 19 Ẹre Osanobua na va ugboghodo ọkpa nọ ghaa rre Lihai ye ihe eva, amẹ na suẹn gha ladian vbọ. Ọ ghi wọn vbe amẹ nii, orhiọn na la ẹre iwu. Ọni ẹre ọ si ẹre nọ na do gha tie evba nii Ẹn-hakore;* ọ wa ye rre Lihai do fi ẹdẹnẹrẹ.

20 Ukpo ugie (20) ẹre ọ ya bu ohiẹn Ivbi Izrẹl, vbe ẹghẹ ne Ivbi e Filistia ya gha kha yan Izrẹl.