Avbe Ọbuohiẹn
14 Ẹre Samsin na* gha rrie Timnah, ọ ghi sẹ evba, ọ na miẹn okhuo e Filistia ọkpa. 2 Iyeke ọni, ọ na tama erhae vbe iyẹe wẹẹ: “Ọ mwẹ okhuo e Filistia ọkpa ne I miẹn vbe Timnah, nọ viẹn yọ mwẹ aro. I hoo ne uwa gu mwẹ ru emwamwa nọ khẹke, ne I mieke na rhie ẹre rọnmwẹ.” 3 Sokpan, erhae vbe iyẹe na nọ rẹn wẹẹ: “U ma miẹn okhuo rhie vbe uwu ẹbu etuẹn kevbe emwa ima ra? Uwu ẹbu Ivbi e Filistia ni ma rhuẹ, ẹre u khian na ya rhie okhuo ra?” Sokpan, e Samsin na tama erhae wẹẹ: “Wa gu mwẹ ru emwamwa nọ khẹke, ne I mieke na rhie ẹre rọnmwẹ, rhunmwuda, te ẹmwẹ okhuo nii wa yẹẹ mwẹ.” 4 Sokpan, erhae vbe iyẹe ma rẹn wẹẹ, e Jehova ẹre ọ ghaa rre iyeke ẹmwẹ na, rhunmwuda, te Osanobua ghaa gualọ ẹkpotọ nọ khian ya rri Ivbi e Filistia oya. Ivbi e Filistia ẹre ọ ghaa khaevbisẹ yan Izrẹl vbe ẹghẹ nii.
5 E Samsin keghi lele erhae vbe iyẹe gha rrie Timnah. Ọ ghi sẹ ugbo evaẹn* ni rre Timnah, ọ na miẹn oduma ọkpa,* nene oduma ghi bẹghe ẹre, ọ na suẹn gha davan. 6 Orhiọn e Jehova keghi rhie ẹtin nẹẹn, ọ na ya obọ kẹkan yanghan oduma nii ye ihe eva, vbene a miẹn wẹẹ ovbi ẹwe nọ. Sokpan, ọ ma ta emwi nọ ru na ma erhae vbe iyẹe. 7 Ẹre Samsin na gha rrie Timnah, ọ na ya gu okhuo nii guan, rhunmwuda, te ẹmwẹ okhuo nii wa ye gha yẹẹ ọre.
8 Ọ ghi werriegbe khian nọ ya rhie okhuo nii rọnmwẹ, ọ na van obọ ghee odẹ eke ne ikun oduma nii ye, ọ na do vba wẹẹ, owọn wa ma rhu ikun oduma nii, iran vbe ro yọ. 9 Ẹre ọ na zẹ ipapa owọn nii ye obọ, ọ na gha rriọẹ khian vbe odẹ. Ọ ghi sẹ eke ne erhae vbe iyẹe ye, ọ na vbe rhie ne iran vbọ ne iran re. Sokpan, ọ ma tama iran wẹẹ, ikun oduma ẹre irẹn na zẹ ipapa owọn nii.
10 Erha e Samsin na bu okhuo nii gha khian, e Samsin na le evbare ọbọbọtizọ ne emwa ni rre evba, rhunmwuda, erriọ ẹre avbe igbama ikpia ni rre evba ghaa ru ẹre vbe ẹghẹ nii. 11 Iran ghi miẹn ọnrẹn, iran na viọ ikpia ọgban (30) rre, ne iran lele ẹre. 12 Ẹre Samsin na tama iran wẹẹ: “Lahọ, gu mwẹ mu ibo ọkpa ne uwa, ne uwa san. Deghẹ uwa na sẹtin san rẹn, wa na vbe rhie ewanniẹn mẹ, vbene ikpẹdẹ ihinrọn na khian ya rri evbare ọbọbọtizọ na te gba, I gha viọ ukpọn elinẹn ọgban (30), kevbe ukpọn ọgban (30) ọvbehe ne uwa. 13 Sokpan, deghẹ uwa ma na sẹtin rhie ewanniẹn mẹ, wa ghi viọ ukpọn elinẹn ọgban (30), kevbe ukpọn ọgban (30) ọvbehe mẹ.” Iran na wẹẹ: “Ta enene ibo ma ima; ma hoo ne ima họẹn.” 14 Ẹre ọ na tama iran wẹẹ:
“Uwu emwi nọ rri emwi, ẹre emwi na re ke ladian,
Uwu emwi nọ wegbe, ẹre emwi nọ rhiẹnrhiẹn na vbe ladian.”
Iran ma sẹtin san enene ibo vbe ọwara ikpẹdẹ eha. 15 Ọ ghi rre ikpẹdẹ nogie enẹ, iran na tama ọvbokhan e Samsin wẹẹ: “Rẹrẹ ọdafọn, nọ mieke na ta emwi na ya ibo nii kha ma ima. Vbe ẹ i re erriọ, ma ghi giẹn ruẹ giẹn owa erhaa sẹ otọ. Te uwẹ tie ima gha die emwa, ne iran do viọ ima emwi ra?” 16 Ẹre ọvbokhan e Samsin na suẹn gha viẹ gbe ẹre, ọ na gha tama rẹn wẹẹ: “Ẹmwẹ mwẹ i zẹdẹ yẹẹ ruẹ, u ma vbe hoẹmwẹ mwẹ. U mu ibo ne emwa mwẹ san, sokpan, u ma ta emwi na yae kha ma mwẹ.” Ẹre Samsin na tama rẹn wẹẹ: “Vbọzẹ ne I gha na tae ma ruẹ? I ma he kue tama erha mwẹ vbe iye mwẹ! Ẹre u na we ne I tama ruẹ.” 17 Ọvbokhan e Samsin na gha viẹ, ke ẹghẹ nọ ya wẹẹ ne Samsin san ibo nii, ya sẹ ikpẹdẹ nogie ihinrọn ne iran ya gha rri evbare ọbọbọtizọ nii. Vbe okiekie, e Samsin na ghi tama ọvbokhan rẹn emwi na ya ibo nii kha vbe ikpẹdẹ nogie ihinrọn, rhunmwuda, ọ ma gi egbe rọkhọ ọre. Ẹre ọvbokhan rẹn na ghi ya ta emwi na ya ibo nii kha ma emwa rẹn. 18 Rhunmwuda ọni, vbene ẹdẹ te mu* vbe ikpẹdẹ nogie ihinrọn, ikpia ni rre ẹvbo nii na tama e Samsin wẹẹ:
“Emwi nọ rhiẹnrhiẹn sẹ owọn rrọọ ra,
Emwi nọ wegbe sẹ oduma vbe rrọọ ra?”
Ẹre ọ na tama iran wẹẹ:
“Akpawẹ, wa ma ya ovbi ẹmila mwẹ gua,
Wa i ghẹ te sẹtin san ibo na.”
19 Iyeke ọni, orhiọn e Jehova keghi rhie ẹtin nẹẹn, ọ na gha rrie Ashkẹlọn, ọ na gbele ikpia ọgban (30) rua vbe evba. Ọ na viọ ukpọn iran ne emwa ni san ibo nii. Ọ ghi werriegbe rrie owa erhae, ohu na gha muẹn.
20 Ẹre iran na ghi rhie ọvbokhan e Samsin ne ọkpa vbe usun ikpia ni lele Samsin vbe ọ khian ya rhie okhuo.