Cara na Denggan Paboahon Hasittongan

1. Aha do na ikkon taulahon asa boi gabe keluarga ni Jahowa?

TIKKI parjolo sahali hita pajuppang dohot akka dongan sahaporseaotta, biasana tasukkun do nasida, “Sian dia do diboto hamu hasittongan?” Adong do na mandok, nungnga diajari natua-tuana nasida mulai sian na gelleng. Na asing mandok, adong na pasahatton barita na uli tu nasida. Lomo pe rohatta mamboto taringot i, ala massai balga do pengaruh ni Hata ni Debata di ngolutta. Taboto do ikkon tahaholongi jala taulahon do hasittongan i asa boi hita gabe keluarga ni Jahowa. Misalna ikkon jujur do hita di sasude.—Ps. 15:​1-3.

2. (a) Aha do na diboto akka halak taringot Jesus? (b) Songon dia do tanggapan ni akka halak tu hasittongan na dipasahat Jesus?

² Akka na sittong do na sai dihatahon Jesus. Jala diakkui akka musuna do i, nang pe dang lomo roha ni nasida tu hata ni Jesus. (Mat. 22:16) Dipaboa Jesus do tu akka siseanna songon dia tanggapan ni akka halak tu hasittongan na diajarhon ibana. Didok Jesus, “Mambahen parbadaan do au ro: Sahalak bawa mangalo bapakna, sahalak borua mangalo omakna, jala parumaen mangalo simatuana boru.” (Mat. 10:35) Sebenarna dang lomo roha ni Jesus molo adong na marsogo ni roha tu hasittongan. (Mat. 23:37) Diboto ibana do pasti adong na marsogo ni roha tu hasittongan, alai adong do tong na makkaholongi hasittongan.—2 Tes. 2:​9-11.

3. Aha do na lao tabahas di artikel on?

³ Dos songon Jesus, lomo do rohatta asa toktong makkatahon na sittong nang pe sipata gabe sogo roha ni akka halak mangida hita. Jala tapasahat do hasittongan na sian Bibel, nang pe sipata dang lomo roha ni halak mambege i. Alai, ikkon tapikkirhon do boha cara na denggan lao pasahatton barita na uli jala andigan i tapasahat. Di artikel on lao tabahas ma akka sukkun-sukkun on: Didia do boi tadapot hasittongan? Boasa ikkon tapaboa i tu na asing? Songon dia cara na denggan lao pasahatton i, jala andigan i tapasahat? Alus ni akka sukkun-sukkun on, boi mangurupi hita asa lam denggan caratta pasahatton hasittongan jala paboahon i di tikki na pas.

DIDIA DO BOI TADAPOT HASITTONGAN?

4. Boasa pos rohatta Mual ni hasittongan do Jahowa i?

⁴ Jahowa do Mual ni hasittongan. Sittong do sude na didokkon Ibana. Misalna, sittong do sude aturan na dilehon Jahowa taringot dia na denggan dohot na sala. (Ps. 19:9; 119:​142, 151) Saut do sude na didokkon Ibana. (Jes. 55:​10, 11) Sai ditepati Ibana do janjina. (4 Mus. 23:19) Jala didok di Bibel, dang boi Jahowa margabus. (Heb. 6:18) Jadi sian on taboto ma, “Debata na makkatahon na sittong” do Jahowa.—Ps. 31:5.

5. Boasa dang maol mananda “Debata na makkatahon na sittong”? (Ulaon ni Apostel 17:27)

⁵ Godang do halak na mandok, dang adong Jahowa jala molo pe adong, maol do mananda Ibana. Alai dang tutu i. Godang do bukti na patuduhon, tutu do adong Jahowa. (Rom 1:20) Tikki makkatai Apostel Paulus tu akka halak Junani di Atena, didok ibana lomo do roha ni Debata asa “dilului akka jolma Ibana”. Jala “dang dao Ibana sian ganup hita on”. (Jaha Ulaon ni Apostel 17:27.) Jadi, lomo do roha ni Jahowa jonok tu akka halak na serep marroha dohot tu halak na mangalului hasittongan taringot Ibana.—Joh. 6:44.

6. (a) Hasittongan taringot aha do na disurat di Bibel? (b) Boasa las rohamuna mamboto sudena i?

⁶ Sada cara lao mananda Jahowa, i ma marsiajar Bibel. Tondi parbadia ni Debata do na manogu-nogu akka halak na manurat isi ni Bibel. (2 Ptr. 1:​20, 21) Jadi, hasittongan do sude na disurat di Bibel jala boi tahaporseai. Misalna, boi do tahaporseai taringot songon dia alam semesta on ditoppa jala songon dia mula ni portibi on. (1 Mus. 1:​1, 26) Boi do muse tahaporseai na didok Bibel taringot boasa mardosa sude jolma, boasa susa hita jala mate. (Rom 5:12; 6:23) Asing ni i, porsea do hita Jesus na dipillit Jahowa lao padenggatton akka na sega dibahen Sibolis, “ama ni gabus”. (Joh. 8:44; Rom 16:20) Porsea do tong hita tu janji ni Debata na lao ripassonon ni Jesus akka na jahat, paheheonna akka na mate, bahenonna tano on gabe Paradeiso jala urupanna hita gabe sempurna. (Joh. 11:​25, 26; 1 Joh. 3:8) Jadi mandok mauliate do hita tu Jahowa ala nungnga diajarhon tu hita taringot on, jala dilehon do hasangapon tu hita lao paboahon i tu na asing.—Mat. 28:​19, 20.

BOASA IKKON TAPABOA HASITTONGAN?

7-8. Penting do di Jahowa alasanta paboahon hasittongan? Bahen ma contoh. (Markus 3:​11, 12) (Ida gambar.)

⁷ Songon naung tabahas nakkin, asa boi gabe keluarga ni Jahowa, ikkon sai na sittong do na tahatahon. Alai dang cukkup holan i lao mambahen las roha ni Jahowa. Massai penting do di Ibana aha alasanta paboahon na sittong. Parrohahon ma na masa tikki di tano on dope Jesus. (Jaha Markus 3:​11, 12.) Tikki marbarita ibana di jonok ni Laut Galilea, godang do halak na ro manjuppangi ibana. Adong do piga-piga sian nasida na disonggopi suru-suruan na jahat. Marsomba ma nasida di jolo ni Jesus, jala gogo ma didok nasida, “Anak ni Debata do ho.” Memang sittong do na didok akka suru-suruan na jahat i. Alai aha do alasan ni nasida mandokkon i? Ra didokkon nasida pe songon i, asa porsea do akka halak na disi tu nasida. Jala asa nasida na diihutton, dang Jahowa be. Alani i, dang lomo roha ni Jesus mangida nasida. Bahkan, dipasingot Jesus do nasida asa unang dipaboa-boa be taringot tu ibana.

⁸ Parsiajaran aha do na tadapot sian on? Massai penting do di Jahowa alasanta lao paboahon hasittongan tu akka halak. Alani i, tapaboa ma hasittongan i alani holongta tu Jahowa. Jala molo adong halak na mamuji hita alani barita na tapasahat, tapasahat ma pujian i tu Jahowa!—Mat. 5:16; bandingkon tu Ul. 14:​12-15.

9. Aha do na ikkon taingot, jala boasa?

⁹ Bayakkon ma situasi on: Adong ma sahalak sintua na paboahon sada hatorangan tu hita jala didok ibana rahasia do i. Hape tapasahat ma hatorangan i tu akka dongan na asing. Tikki diboto akka donganta i sittong do na tapasahat i, olo do ra gabe terkesan nasida mangida hita. Jala dianggap nasida ma hita halak na penting ala godang rahasia na taboto. Alai dang lomo roha ni Jahowa mangida hita. (Poda 11:13) Boasa? Alana nang pe sittong na tadokkon i, dang marhak hita paboahon i jala alasanta mangulahon i pe sala do. Jadi taingot ma, unang ma talului hasangapon tu diritta sandiri.

BOHA CARA NA DENGGAN LAO PASAHATTON HASITTONGAN?

10. Aha do lapatanna ikkon “lambok” begeon akka hatatta? (Kolosse 4:6)

¹⁰ Jaha Kolosse 4:6. Didok Apostel Paulus tu halak Kristen na di Kolosse, ikkon ‘sai lambok do begeon akka hata ni nasida’. Aha do lapatan ni i? Di bahasa Junani hata on lapatanna dang holan pasahatton akka na marguna. Alai caratta pasahatton i pe ikkon sopan jala mambahen las roha ni halak.

11-12. Boasa ikkon denggan caratta paboahon hasittongan? Bahen ma tudosan. (Ida gambar.)

¹¹ Taihutton ma nasehat ni si Paulus i. Sai lambok ma hatatta tikki paboahon hasittongan tu akka halak. Di Bibel dipatudos do hasittongan i songon podang na massai tajom, na boi manirang hosa sian daging. Lapatanna, boi do hasittongan i patuduhon aha na adong di roha dohot di pikkiran ni sasahalak. (Heb. 4:12) Alani i ikkon manat do hita mamakke Bibel tikki mangajarhon hasittongan, asa unang haccit roha ni halak manang gabe muruk nasida tu hita. Boasa boi tadok songon i?

¹² Bayakkon ma situasi on. Tikki marbarita, pajuppang ma hita dohot sahalak bawa na martangiang mamakke patung. Jala dirayahon ibana do Natal dohot Paska rap dohot keluargana. Sasittongna boi do langsung tapatudu sian Bibel, dang adong lapatanna molo martangiang ibana mamakke patung. Jala tadok tu ibana, perayaan ni akka sipelebegu do Natal dohot Paska. (Jes. 44:​14-20; 2 Kor. 6:​14-17) Memang sittong do molo tadokkon songon i. Alai molo songon i tabahen, hape i dope pajuppang hita dohot ibana, on patuduhon dang denggan caratta mamakke Hata ni Debata.

13. Aha do na ikkon taulahon asa songon na disirai hatatta?

¹³ Didok si Paulus do muse, ikkon songon na disirai do hatatta. Dang na berarti gabe dang apala takkas tapaboa hasittongan i, manang gabe tatabunihon. Alai caratta paboahon hasittongan i pe ikkon tabo do begeon ni akka halak. (Job 12:11) Memang dang sai mura mangulahon i. Pikkirhon ma tudosan on: Sada sipanganon na tabo di hita, belum tentu i tabo di halak na asing. Dos songon i ma, caratta makkatai belum tentu mambahen las roha ni sude halak. Misalna di piga-piga budaya, biasa do akka halak terus terang tikki makkatai, bahkan tu halak na uttua sian nasida. Alai di akka budaya na asing, dang sopan songon i, bahkan boi mambahen haccit roha. Alani i ma didok si Paulus, ikkon boi do hita mangalehon “alus na denggan tu ganup halak”. On berarti ikkon tasesuaihon do caratta makkatai asa tabo dibege akka halak, dang holan tabo di hita.

ANDIGAN TAPASAHAT HASITTONGAN I?

14. Tikki di tano on Jesus, pittor diajarhon ibana do sude na diboto ibana tu akka siseanna?

¹⁴ Sai lambok do Jesus makkatai tu akka siseanna, jala godang do na diajarhon ibana tu nasida. (Mrk. 6:34) Alai dang pittor sude na diboto Jesus diajarhon ibana tu akka siseanna. Memang godang dope na ikkon diparsiajari akka siseanna, alai diboto Jesus do keterbatasan ni nasida. Diboto ibana adong do piga-piga hasittongan na so tikkina dope diboto nasida jala dang tolap dope nasida mangattusi i. (Joh. 16:12) Aha do parsiajaranna tu hita?

15. Cocok do molo pittor tapaboa sude na taboto tu parsiajar Bibelta? (Poda 25:11) (Ida gambar.)

¹⁵ Aha do na taparsiajari sian Jesus? Unang ma pittor tapaboa sude na taboto tu halak na tajuppangi. Ikkon tapikkirhon do songon dia situasi ni nasida. Taingot ma muse sahalak bawa na mangarayahon Natal dohot Paska na tabahas nakkin. Memang taboto do perayaan ni akka sipelebegu do i, jala dang lomo roha ni Jahowa mangida i. Alai bayakkon ma molo marsiajar Bibel hamu dohot bawa i saminggu manang dua minggu andorang so perayaan Natal. Cocok do molo pittor dibahas hamu aha na didok Bibel taringot perayaan i, jala diharappon hamu asa unang marnatal be ibana? Memang adong do piga-piga parsiajar Bibel na pittor mangulahon na diparsiajari ibana. Alai adong do na porlu tikki lao paubahon cara marpikkir dohot tindakanna. Jadi taurupi ma parsiajar Bibelta mambahen kemajuan. Carana tapaboa ma hasittongan i di tikki na pas tu nasida, lapatanna tikki nungnga sanggup nasida manjalo i.—Jaha Poda 25:11.

16. Aha do na ikkon taulahon asa boi parsiajar Bibelta “mangihutton hasittongan”?

¹⁶ Massai las do rohatta ala boi mangurupi akka halak marsiajar taringot Jahowa. Alani i, taurupi ma nasida “mangihutton hasittongan”. Carana gabe sitiruon ma hita tu nasida. (3 Joh. 3, 4) Tapatudu ma sian akka keputusan na tabahen na porsea hita tu akka janji ni Debata. Ikkon denggan do alasanta tikki paboahon hasittongan. Lambok ma hita tikki paboahon i, jala tapasahat ma hasittongan i di tikki na pas tu akka halak. Jala molo dipuji hita, tapasahat ma pujian i tu Jahowa. Molo taulahon songon i, on patuduhon na tasomba do Jahowa, Debata na makkatahon na sittong.