Cara lao Patuduhon na Diargai Hamu Tobusan

1-2. Ala nungnga dilehon Jesus ngoluna lao paluahon hita, aha do na ikkon taulahon, jala boasa? (2 Korint 5:​14, 15) (Ida gambar.)

MOLO tarhapit hamu di akka batu ni bangunan naung maruppak jala adong sasahalak na paluahon hamu sian i, boha do perasaanmuna? Pasti mandok mauliate situtu do hamu tu ibana jala dipaboa hamu na so tarhalupahon hamu bantuanna i.

² Songon naung taparsiajari di artikel na sebelumna, dang boi hita sandiri na paluahon diritta sian dosa dohot hamatean. Alai ala diparade Jahowa tobusan, gabe boi ma (1) diampuni akka dosatta, (2) sempurna hita di tano na imbaru, jala (3) mardame muse hita tu Debata. Hasilna, gabe adong ma harapanta lao mangolu salelengna. Asing ni i, tobusan patuduhon holong ni Jesus tu akka jolma. Massai holong do roha ni Jesus tu jolma bahkan andorang so ro ibana tu tano on. (Poda 8:​30, 31) Didok Apostel Paulus, ‘Holong ni Kristus i do na mangonjar rohatta.’ (Jaha 2 Korint 5:​14, 15.) Aha do maksudna? Tapatudu ma na mandok mauliate hita tu Jesus, jala unang tahalupahon sude na diulahon ibana lao paluahon hita.

3. Boasa dang sai sarupa caratta taringot patuduhon na taargai tobusan?

³ Aha do na porlu diulahon hamu lao patuduhon na diargai hamu tobusan? Ra dang sarupa caramuna patuduhon i dohot halak na asing. Bayakkon ma adong tolu halak na naeng lao tu sada inganan na sarupa, alai nasida borhat sian kota na marasing-asing. Jala dalan na dilewati nasida pe marasing-asing do. Dos songon i ma hita. Memang sada do tujuanta, i ma lao patuduhon na taargai tobusan. Alai dang sai sarupa caratta lao patuduhon i. Di artikel on lao tabahas ma songon dia (1) parsiajar Bibel, (2) akka halak naung tardidi, dohot (3) akka halak na mandao sian Jahowa boi mangulahon i.

AKKA PARSIAJAR BIBEL

4. Boha do perasaan ni Jahowa mangida akka halak na marsiajar Bibel?

⁴ Molo marsiajar Bibel dope hamu saonari, rimangi ma on: Ala olo hamu manjalo barita na uli, on patuduhon termasuk do hamu akka halak na ditarik Jahowa asa gabe ale-alena. (Joh. 6:44; Ul. 13:48) Didok di Bibel, “Jahowa do na mamareso roha ni ganup halak.” Diparrohahon Jahowa do sude upayamuna lao mananda Ibana. Jala las do rohana mangida akka perubahan na dibahen hamu lao mangihutton lomo ni rohana. (Poda 17:3; 27:11) Jala ingot hamu ma, boi pe hamu marale-ale tu Jahowa ala diparade Ibana do tobusan.—Rom 5:​10, 11.

5. Aha do na porlu diulahon akka parsiajar Bibel lao mangihutton nasehat di Pilippi 3:16?

⁵ Hamu akka parsiajar Bibel, aha do na porlu diulahon hamu lao patuduhon na diargai hamu tobusan? Sada carana, i ma mangihutton nasehat ni Apostel Paulus tu halak Kristen di Pilippi. Didok ibana, “Molo nungnga togu haporseaotta, toktong ma taulahon songon naung taulahon saleleng on.” (Plp. 3:16) Terjemahan ni Bibel na asing mandok, “Saonari, tauduti ma i mangihutton aturan naung tadalani.” Songon na dipaboa di ayat i, unang ma pasombu manang aha pe mangabbati hamu mambahen kemajuan di dalan tu hangoluan.—Mat. 7:14; Luk. 9:62.

6. Aha do na porlu diulahon akka parsiajar Bibel, molo maol dihilala nasida mangattusi manang mangulahon na diparsiajari nasida? (5 Musa 30:​11-14) (Ida gambar.)

⁶ Boha do molo maol dihilala hamu mangattusi sada ajaran sian Bibel? Bahen ma riset taringot i jala pangido ma tu Jahowa asa diurupi hamu mangattusi ajaran i. (Ps. 86:11) Alai molo maol dope hamu mangattusi ajaran i, dang pola boha i. Tetap ma hamu marsiajar Bibel, annon boi do diattusi hamu i. Asing ni i, boha do molo maol dihilala hamu manadikkon hasomalan na maralo tu lomo ni roha ni Jahowa? Ingot ma, dang hea dipangido Jahowa hita mangulahon na so tolap taulahon. Pos ma rohamuna, pasti boi do hamu marhasil mangulahon lomo ni roha ni Jahowa. (Jaha 5 Musa 30:​11-14.) Alana nungnga marjanji Jahowa lao mangurupi hamu. (Jes. 41:​10, 13; 1 Kor. 10:13) Alani i, unang ma menyerah. Unang ma pamarsakhu hamu mamikkiri akka tantangan na diadopi hamu. Pikkirhon ma akka na denggan naung dilehon Jahowa tu hamu, termasuk ma tobusan. Molo lam tamba holongmuna tu Jahowa, pasti diboto hamu ma “dang maol mangulahon akka parettana i”.—1 Joh. 5:3.a

7. Aha do na porlu dirimangi akka na poso na Saksi Jahowa natua-tuana?

⁷ Boha do molo hamu akka na poso, na Saksi Jahowa natua-tuamuna? Hamu do parsiajar Bibel na diutamahon natua-tuamuna. Didok di Bibel, “Pajonok hamu ma tu Debata, dung i pajonokonna ma tu hamu.” (Jak. 4:8; 1 Kron. 28:9) Molo olo hamu pajonokkon diri tu Jahowa, pasti dipajonok Ibana do dirina tu hamu. Ingot ma diparrohahon Jahowa pe hamu, dang ala na Saksi Jahowa natua-tuamuna. Alai ala na lomo do rohana marale-ale dohot hamu. Aha do na mambahen boi hamu gabe ale-ale ni Jahowa? Tobusan. Unang ma lupa hamu tu hadiah na luar biasa on. (Rom 5:​1, 2) Jadi andorang so ro hamu tu Borngin Parningotan, rimangi ma aha do manfaat ni tobusan i tu hamu. Dung i, pikkirhon ma aha do tujuan ni ngolumuna manang aha do na naeng diulahon hamu lao patuduhon na diargai hamu tobusan i.b

AKKA HALAK NAUNG TARDIDI

8. Hamu akka naung tardidi, akka aha do naung diulahon hamu lao patuduhon na diargai hamu tobusan?

⁸ Molo nungnga tardidi hamu, nungnga dipatudu hamu na diargai hamu tobusan. Misalna berupaya do hamu asa jonok tu Jahowa, jala mangulahon akka parettana. Dioloi hamu do paretta ni Jesus asa marbarita na uli tu akka halak. Dilehon hamu do dirimuna tu Jahowa jala tardidi. Alai, olo do ra adong tantangan ala gabe Saksi Jahowa hamu. (2 Tim. 3:12) Nang pe songon i, toktong do setia hamu tu Jahowa. On patuduhon na holong do rohamuna tu Ibana jala diargai hamu do tobusan.—Heb. 12:​2, 3.

9. Boasa ikkon toktong dijaga hamu holongmuna tu Jahowa?

⁹ Molo nungnga leleng hita gabe Saksi Jahowa, olo do gabe hurang taargai tobusan i. Boasa tadok songon i? Parrohahon ma na masa tu halak Kristen di Epesus. Setia do nasida tu Jahowa jala dipuji Jesus do nasida. Alai didok Jesus tu nasida, “Hupasingot ma ho, ai dang dihaholongi ho be au songon na parjolo i.” (Pgk. 2:​3, 4) Na didok Jesus i patuduhon olo do dang sian nasa rohana be sasahalak manomba Jahowa. Ra martangiang do ibana, marpungu, jala marbarita na uli. Alai holan formalitas nama i diulahon ibana, dang alani holongna tu Jahowa. Molo songon i do situasimuna, aha do na porlu diulahon hamu?

10. Songon dia do hamu mangulahon nasehat ni si Paulus na tu si Timoteus? (1 Timoteus 4:​13, 15)

¹⁰ Dipaingot Apostel Paulus do si Timoteus asa ‘dirimangi’ ibana songon dia ibadatna tu Jahowa, jala asa ‘diulahon ibana i sian nasa gogona’. (Jaha 1 Timoteus 4:​13, 15.) Hamu pe, ulahon ma na didok si Paulus i. Pikkirhon ma akka aha do na boi diulahon hamu asa “lam semangat” manomba Jahowa. (Rom 12:​11, surat na di toru) Misalna persiapan ma hamu andorang so ro marpungu. Tujuanna asa lam fokus hamu tikki di parpunguan. Manang tikki dibahen hamu pelajaran pribadi, boi do lao hamu tu inganan na tenang asa lam dinikmati hamu parsiajaran Bibelmuna. Hasilna dapotmuna ma godang manfaat sian i. Pikkirhon ma on: Boi do soban mambahen lam balga api. Dos songon i ma, molo diulahon hamu sudena i gabe lam diargai hamu ma tobusan dohot sude na dilehon Jahowa tu hamu. Asing ni i andorang so ro tu Borngin Parningotan, rimangi ma pasu-pasu aha do na dilehon Jahowa tu akka naposona. Molo diulahon hamu i, pasti lam diargai hamu do tobusan. Tobusan do na mambahen hamu boi marale-ale tu Jahowa.

11-12. Molo hira na hurang semangat hamu manomba Jahowa, na so dilehon Jahowa be tondi parbadiana tu hamu? (Ida gambar.)

¹¹ Molo dihilala hamu hira na hurang semangat hamu manomba Jahowa, unang ma didok rohamuna dang dilehon Jahowa be tondi parbadiana tu hamu. Hea do dihilala si Paulus songon i. Didok ibana tu halak Kristen na di Korint, “Nang pe terpaksa au mangulahon i, tong do pos roha ni Debata mangalehon tanggung jawab tu au.” (1 Kor. 9:17) Aha do maksud ni si Paulus disi?

¹² Si Paulus pe, olo do sipata dang semangat lao marbarita. Nang pe songon i, toktong do berupaya ibana marbarita dang soal songon dia perasaanna. Hamu pe boi do songon i. Toktong ma berupaya hamu mangulahon lomo ni roha ni Debata, nang pe hira na dang adong keinginanmuna lao mangulahon i. Pangido ma tu Jahowa asa dibahen hamu ‘rade jala margogo mangulahon lomo ni rohana’. (Plp. 2:13) Toktong ma ulahon akka ulaon na mambahen jonok hamu tu Ibana. Pos ma rohamuna molo diulahon hamu sudena i, pasti urupan ni Jahowa do hamu gabe margogo jala semangat muse.

13. Aha do na ikkon taulahon lao mamareso diritta?

¹³ Ikkon taratur do hita mamareso diritta songon na disurat di 2 Korint 13:5. Didok disi, “Toktong ma uji jala pareso hamu dirimuna, asa botoonmuna na diihutton hamu dope haporseaon ni halak Kristen manang na dang.” Boha ma caratta mangulahon i? Misalna tarimangi ma sukkun-sukkun on, ‘Huutamahon dope Harajaon ni Debata di ngolukku?’ (Mat. 6:33) ‘Sian akka pilihanku taringot hiburan, tarida do na sogo rohakku tu na jahat?’ (Ps. 97:10) ‘Gabe siboan dame do au dohot sada ni roha di akka dongan di huria?’ (Eps. 4:​2, 3) Di acara Borngin Parningotan ma tikki na pas lao mangarimangi sudena i. Molo tarimangi sude na dibahen Jahowa dohot Jesus tu hita, gabe lam taronjar ma rohatta lao patuduhon na taargai nasida. Jala gabe lam berupaya ma hita asa mangolu tu Kristus, dang tu diritta sandiri be.c

AKKA HALAK NA MANDAO SIAN JAHOWA

14. Boasa adong piga-piga donganta na so ro be marpungu?

¹⁴ Adong do akka donganta naung martaon-taon gabe Saksi Jahowa, alai di pudian ni ari dang marpungu be. Boasa? Adong piga-piga alasanna. Olo do ra ala ‘holsoan nasida mamikkiri akka na porlu di ngolu ni nasida’. (Luk. 21:34) Adong do muse na tartuktuk alani hata dohot pambahenan ni akka dongan di huria. (Jak. 3:2) Jala adong do na mangulahon dosa na balga alai maila mangido bantuan. Songon i do situasimuna saonari? Molo i do, aha ma na porlu diulahon hamu? Boasa ikkon dirimangi hamu taringot tobusan?

15. Sian dia do taboto na parduli Jahowa tu akka halak na mandao sian Ibana? (Hesekiel 34:​11, 12, 16)

¹⁵ Pikkirhon ma songon dia perasaan ni Jahowa tu akka halak na mandao sian Ibana. Dang muruk Jahowa tu nasida jala dang dihalupahon nasida. Gariada dilului Jahowa do biru-biruna na mago i. Diurupi do nasida mulak muse tu Ibana jala dilehon mangan. (Jaha Hesekiel 34:​11, 12, 16.) Songon i ma na lao bahenon ni Jahowa tu hamu. Tikki dijaha hamu artikel on, on gabe bukti di rohamuna dope hasittongan i. Jala ingot ma, diida Jahowa do akka na denggan sian dirimuna. I do na mambahen Ibana manarik hamu gabe naposona. Saonari pe diida Ibana do akka na denggan sian dirimuna. I do tong na mambahen Ibana manarik hamu mulak muse tu huria.

16. Aha do na diparade Jahowa lao mangurupi hamu asa mulak muse tu Ibana? (Ida gambar.)

¹⁶ Di brosur Kembalilah kepada Yehuwa adong didok songon on, “Pos ma rohamuna, pasti diurupi Jahowa do hamu asa mulak muse tu Ibana. Urupanna do hamu lao mangadopi akka sitaonon. Jala diubati do lukka na adong di rohamuna. Asing ni i, diurupi Jahowa do hamu asa ias muse panggora ni rohamuna, asa dame roha dohot pikkiranmuna. Alani i, olo do ra taronjar muse rohamuna asa manomba Jahowa rap dohot akka dongan na asing.” Ingot ma muse, rade do akka sintua mangurupi hamu. Boi do nasida “songon inganan partabunian sian alogo, songon inganan parlinggoman sian udan haba-haba”. (Jes. 32:2) Pos do rohanami, pasti diargai hamu do tobusan jala lomo rohamuna mambuktihon i tu Jahowa. Alani i rimangi ma on: Aha do na ikkon diulahon hamu lao ‘pasaehon parsoalanmuna tu Jahowa’? (Jes. 1:18; 1 Ptr. 2:25) Misalna olo do hamu ro marpungu tu Bale Harajaon? Olo do hamu manjuppangi akka sintua jala mangido bantuan sian nasida? Ra diatur nasida ma asa adong na mangurupi hamu marsiajar Bibel. Pos ma rohamuna, pasti dipasu-pasu Jahowa do sude upayamuna asa mulak muse tu Ibana dohot patuduhon na diargai hamu tobusan.

NA IKKON TAULAHON

17-18. Aha do na ikkon taulahon andorang so ro tu Borngin Parningotan?

¹⁷ Didok Jesus, disuru Jahowa do ibana tu tano on “asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna”. (Joh. 3:16) Ala dilehon Jesus ngoluna humokkop hita, boi ma dipalua Jahowa hita sian dosa dohot hamatean. Pasti massai taargai do tobusan i. (Rom 3:​23, 24; 2 Kor. 6:1) Jadi andorang so ro hita tu Borngin Parningotan, tarimangi ma sadia balga holong ni Jahowa dohot Jesus tu hita. Jala sai anggiat ma gabe taronjar rohatta lao patuduhon na taargai holong ni nasida i.

¹⁸ Songon dia do caramuna patuduhon na diargai hamu tobusan? Ra dang sai sarupa caramuna lao patuduhon i. Alai pos ma rohamuna, pasti dipasu-pasu Jahowa do sude upayamuna dohot akka dongan na asing asa “mangolu tu Kristus” dang tu diri sandiri be.—2 Kor. 5:15.