Sai Dipasaut Jahowa do Sude Janjina

1. Songon na dipaboa di Psalmen 31:​2-5, boasa boi pos rohatta tu Jahowa?

SAONARI di portibi na dirajai Sibolis on, godang do halak na margabus jala dang digohi nasida janjina. Misalna, godang do akka pengusaha na so jujur. Godang do iklan na manipu akka halak taringot barang na dijual nasida. Bahkan adong do piga-piga halak na merasa dang boi dihaporseai hata ni donganna. Alani sudena on, gabe maol ma akka halak porsea tu halak na asing. Alai molo hita, porsea do hita tu Jahowa. Ibana do “Debata na makkatahon na sittong”. (Jaha Psalmen 31:​2-5.) Dang hea margabus Jahowa. Sude do sittong na didokkon Ibana. Alani i pos do rohatta, pasti pasautonna do sude hatana.

2. Aha do na lao tabahas di artikel on?

² Di artikel on, lao tabahas ma piga-piga alasan boasa boi pos rohatta tu Jahowa. Dung i, tabahas ma songon dia annon Jahowa mangaripasson Sibolis dohot portibi on, jala aha do na diulahon Jahowa saonari lao pasautton sakkapna. Artikel on boi mangurupi hita asa lam barani paboahon hasittongan taringot Jahowa.

BOASA POS ROHATTA TU JAHOWA

3. Boasa boi pos situtu rohatta tu Jahowa?

³ Ala Jahowa do Sitoppa hita. Ibana do na mambahen langit dohot tano on. Jala Ibana do Mual ni hangoluan. (1 Mus. 1:1; Ps. 36:9; Pgk. 4:11) Dilehon Jahowa do sude na tahaporluhon asa toktong hita mangolu di tano on. Misalna, dilehon do alogo asa boi hita marhosa jala dilehon do aek siinumonta. Jahowa do na mengendalihon alam semesta on. Ala Jahowa do na manoppa hita, tapasahat ma ngolutta tu Ibana. Jala pos ma rohatta, pasti denggan do bahenonna ngolutta di ari na naeng ro.

4. Aha do buktina na holong roha ni Jahowa tu hita?

⁴ Ala holong roha ni Jahowa tu hita. Boasa ditoppa Jahowa jolma? Alana, lomo do rohana asa marlas ni roha jolma mangolu di tano on. Tikki ditoppa Ibana hita, dibahen do hita boi maniru akka sifatna. (1 Mus. 1:26) Asing ni i, dilehon Jahowa do tu hita hak lao mamillit. Massai uli do dibahen Ibana tano on asa boi hita tinggal disi. (Ps. 115:16) Jala dilehon Ibana do tugas na luar biasa tu si Adam dohot si Hawa, i ma mambahen tano on gabe paradeiso. (1 Mus. 1:28; 2:15) Dilehon Jahowa do gok sipanganon tu nasida, marragam suan-suanan, dohot akka binatang. Tujuanna, asa marlas ni roha nasida menikmati hangoluan di tano on. Sudena on gabe bukti na massai holong do roha ni Jahowa tu jolma. Jala “toktong do dipatudu [Ibana] holong ni rohana sahat tu saleleng ni lelengna”.—Ps. 103:17.

5. (a) Aha do na diulahon Jahowa dung mardosa si Adam dohot si Hawa? (b) Akka aha do janji ni Jahowa naung saut? (Ida kotak “Sai Dipasaut Debata do Janjina”.)

⁵ Ala sittong do sude hata ni Jahowa. Didok di Bibel, “Dang na lao marisuang [tano on] ditoppa [Jahowa], alai ditoppa do i lao diingani.” (Jes. 45:​18, 19) Ala mardosa si Adam dohot si Hawa, gabe mate do nasida. Jala hira na sundat ma sakkap ni Jahowa tu tano on dohot tu jolma. Alai, dang adong na boi mangabbati Jahowa pasautton sakkapna. Pasti pasautonna do i. (Jes. 46:​10, 11) Jala dang muba sakkap ni Jahowa tu tano on. Lomo dope rohana asa boi jolma mangolu salelengna di tano on. Alani i ma diloas Ibana si Adam dohot si Hawa marianakkon. Asing ni i, dilehon Ibana do Anakna na sasada i gabe tobusan lao paluahon akka pinoppar ni si Adam. Jala boi ma annon nasida mangolu salelengna.—Joh. 3:16.

NA DIULAHON JAHOWA LAO PASAUTTON JANJINA

6. Aha do na didok Jahowa dung mardosa si Adam dohot si Hawa?

⁶ Ise do na mempengaruhi si Adam dohot si Hawa mangalo tu Debata? “Ulok na parjolo i, na laos margoar Sibolis dohot Setan”.a (Pgk. 12:9; 1 Mus. 3:​4, 5; Joh. 8:44) Nungnga didok Jahowa, na lao ripassononna do Sibolis di ari na naeng ro. (1 Mus. 3:15) Alai andorang so terjadi i, godang do jolma na lao mangihutton Sibolis jala mangulahon na jahat. Nang pe songon i, adong do akka halak na toktong setia tu Jahowa.

7. Akka ise do na mangihutton Sibolis, jala aha do na lao masa tu nasida?

⁷ Akka ise do na mangihutton Sibolis? Akka suru-suruan na mangalo tu Jahowa. Asing ni i, akka jolma na so mangoloi Debata. Ala dialo nasida Jahowa, gabe marpihak tu Sibolis ma nasida. Alai, nungnga ditottuhon Jahowa na lao ripassononna do Sibolis dohot akka na marpihak tu ibana.—Dan. 2:44; Rom 16:20.

8. Aha do na diulahon Jesus di taon 1914? (Ida gambar.)

⁸ Di taon 1914, dilantik Jahowa ma Jesus gabe raja. Dung i, marporang ma Jesus mangalo Sibolis dohot akka suru-suruanna na jahat. Disappatton Jesus ma nasida tu tano on. (Pgk. 12:​7-9) Memang, di surgo do masa porang i. Alai, dohot do akka na tinggal di tano on makkilala akibat ni porang i. Didok di Bibel, “Marjea ma tano i dohot laut i! Ai nungnga turun Sibolis i tu ho, jala muruk situtu do ibana, ai nungnga diboto ibana otik nama tikkina.” (Pgk. 12:12) Mulai sian taon 1914, lam marsitutu do Sibolis mempengaruhi godang halak asa mangihutton ibana. Alani i ma lam godang taida hasusaan dohot hajahaton di portibi on. Alai satokkin nai, lao “ditaluhon” Jesus ma Sibolis dohot sude na marpihak tu ibana. (Pgk. 6:2) Dipabadia Jesus ma annon goar ni Jahowa. (Ps. 45:​4-6) Jala diboto sude halak ma Jahowa do Debata na sittong! (Hes. 38:23) Sudena on gabe bukti pasti pasauton ni Jahowa do janjina lao mangaripasson Sibolis dohot sude na mangihutton ibana.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

DIPAPUNGU JAHOWA DO AKKA HALAK TU HASITTONGAN

9. Akka ise do na dipapungu Jahowa saonari?

⁹ Saonari, dipapungu Jahowa do “saluhut na di banua ginjang dohot na di tano on di bagasan Kristus”. (Eps. 1:10) “Na di banua ginjang”, i ma akka na miniahan naung dipillit Jahowa lao mamaretta rap dohot Kristus di surgo. “Na di tano on”, i ma akka halak na lao mangolu salelengna di Paradeiso di tano on. Torus do sibuk nasida sude paboahon hasittongan taringot Jahowa, jala mambuktihon pargabus do Sibolis i.

10. Songon dia do Jahowa mangurupi akka halak mamboto hasittongan? (Pangungkapon 14:​6, 7)

¹⁰ Lao papunguhon akka halak tu hasittongan, dipangido Jahowa ma akka naposona asa marbarita na uli di liat portibi on. Di tikkitta on ma lam berkembang jala lam balga ulaon marbarita. (Jaha Pangungkapon 14:​6, 7.) Memang, jolma do na dipakke Jahowa lao paboahon barita na uli. Alai, dohot do tong akka suru-suruan papunguhon akka halak na marroha biru-biru tu hasittongan. Saleleng on, dipakke Sibolis do agama na so sittong lao paboahon gabus taringot Jahowa. Alani i tikki marbarita hita, tapaboa do tu akka halak dang sittong sudena i. (Pgk. 18:​2, 4) Satokkin nai, lao diripasson Jahowa ma sude agama na so sittong. Jala holan Jahowa ma na dipasangap.—Pgk. 17:16.

11. Sian dia do boi tarida ise na manomba Debata na sittong?

¹¹ Dipapungu Jahowa do akka halak sian marragam bangso tu hasittongan. (Pgk. 7:​9, 10) Tikki dibege nasida “barita na uli”, disadari nasida ma hasittongan do i. Gabe lomo ma roha ni nasida manomba Jahowa. (Mrk. 13:10) Saonari, lam takkas do tarida akka ise do na manomba Jahowa. Nungnga dipaboa Panurirang Maleaki, “Idaonmuna ma imbar ni halak na mangulahon na sittong dohot halak na mangulahon na jahat, imbar ni halak na manomba Debata dohot halak na so manomba Ibana.” (Mal. 3:18) Jadi, ise do saonari na manomba Debata na sittong? Saksi Jahowa. Tarida do i sian pangalaho ni nasida dohot sian ulaon marbarita.

12. Boasa boi tadok ulaon marbarita i pasautton sakkap ni Jahowa?

¹² Tikki tapasahat “barita na uli taringot tu Harajaon”, na mangoloi paretta ni Jesus do hita disi jala manggohi surirang ni Bibel. (Mat. 24:14; 28:​18-20) Ala marbarita hita, lam godang ma halak na gabe sisean ni Jesus. Jala boi ma hita rap dohot nasida manomba Jahowa salelengna. Massai las do rohatta ala dohot pasautton sakkap ni Jahowa!

DANG MABIAR HITA MANGADOPI ARI NA NAENG RO

13. Akka ise do na diserang Sibolis, jala boasa?

¹³ Muruk situtu do Sibolis, ala “diboto ibana otik nama tikkina”. (Pgk. 12:​12, 13) Alani i, marsitutu do ibana menyerang akka na miniahan, i ma “akka na mangoloi paretta ni Debata dohot na paboahon taringot tu Jesus”. (Pgk. 12:17; 14:12) Jala dianiaya Sibolis do tong akka halak na mendukung na miniahan.

14. Aha do na lao masa tikki diserang Sibolis akka naposo ni Jahowa? (Ida sampul.)

¹⁴ Dung dihancurhon sude agama na so sittong, ro ma akka na marpihak tu Sibolis menyerang naposo ni Jahowa. Dukkon i, dimulai ma porang Armagedon. (Pgk. 16:​13, 14, 16) Ro ma Jesus dohot akka tentarana na di surgo paluahon akka naposo ni Jahowa. Jala dihancurhon nasida ma sude ulaon ni Sibolis di portibi on. (Pgk. 19:​19-21) Dang adong be pargabus, akka parjahat, dohot panipu. (Pgk. 21:8) Gabe diboto akka halak ma Jahowa do Debata na sittong jala na tigor.

15. Boasa dang mabiar hita mangadopi ari na naeng ro? (Jesaya 65:​16, 17) (Ida gambar.)

¹⁵ Nungnga lam sursar be portibi on. Godang do halak na so mardomu jala dang boi be dihaporseai. Alai molo naposo ni Jahowa, toktong do marsada. Torus dope dipapungu Jahowa akka halak tu hasittongan. Dang adong na boi mangabbati Jahowa lao mamasu-masu akka naposona dohot akka ulaon na hombar tu lomo ni rohana. (Jaha Jesaya 65:​16, 17.) Alani i, dang mabiar hita mangadopi ari na naeng ro. Boasa? Alana, didok Apostel Paulus di Rom 8:​38, 39, “Ai pos do rohakku, hamatean, hangoluan, manang suru-suruan, manang pamaretta, akka na adong saonari manang na adong di ari na naeng ro, huaso, akka na adong di ginjang manang akka na adong di toru, manang toppaan na dia pe, dang adong na boi manirang hita sian holong ni Debata, na takkas tarida marhite Kristus Jesus Tuanta.”

16. Boasa boi pos situtu rohamuna tu Jahowa?

¹⁶ Godang do bukti na patuduhon boi pos rohatta tu Jahowa, Debata na makkatahon na sittong. Ibana do Sitoppa hita. Massai holong do rohana tu hita. Dipapungu Ibana do akka halak sian marragam bangso tu hasittongan. Gabe lam martamba-tamba ma godang ni punguan bolon. (Jes. 60:22; Sak. 8:23) Taboto do muse, pasti pasautonna do sakkapna. Jala satokkin nai, ripassononna ma Sibolis. Dukkon i, dang adong be gabus di portibi on. Jadi songon si Daud, tadok ma di tangiangta, “Sai dipuji ma Debata Jahowa, . . . holan Ibana do na mambahen akka ulaon na palongang roha. Sai anggiat ma dipuji goarna na sangap i saleleng ni lelengna, sai anggiat ma digohi hasangaponna tano on.”—Ps. 72:​18, 19.