Ikkon Sittong do Pandanganta Taringot Sitaononta

1-2. Boha do carana asa toktong setia hita tikki adong sitaonon? (Ida gambar.)

SAONARI, “gok do arsak dohot hasusaan” na dihilala akka naposo ni Jahowa. (Ps. 90:10) Misalna, ditentang keluarga ala marsiajar Bibel. Adong do na dianiaya jala dipenjarahon ala marbarita na uli. Adong do tong na marsahit-sahit jala nungnga matua. Adong do na sai marsak ala mate na dihaholongina manang alani akka na asing. Boha do molo hamu? Adong do sitaonon na diadopi hamu saonari?

² Boha do carana asa toktong hamu setia? Ikkon sittong do pandanganmuna taringot sitaononmuna i. Boasa? Bayakkon ma tikki mamboan mobil hamu, adong bahaya di jolomuna. Molo kotor kaca ni mobilmuna, dang boi takkas diida hamu bahaya i. Alai molo ias, takkas ma diida hamu bahaya i jala boi ma i dihindari hamu. Dos songon i ma, ikkon sittong do pandanganta taringot sitaononta asa taboto aha na porlu taulahon. Di artikel on, lao tabahas ma (1) pandangan na sittong taringot sitaonon, (2) aha do bahayana molo dang sittong pandanganta taringot sitaonon i, (3) akka aha na porlu taulahon tikki marsitaonon hita.

PANDANGAN NA SITTONG TARINGOT SITAONON

3. Boasa sai adong sitaonon na taadopi?

³ Sai adong do sitaonon di portibi on. Sude do jolma marsitaonon. Alana, dang sempurna dope hita jala Sibolis dope na mangarajai portibi on. Asing ni i, ala nungnga lam jonok panutup ni jaman on, pasti lam godang do sitaononta. Misalna, hona bencana hita manang dibahen halak na so denggan tu hita. (Mat. 24:8; 2 Tim. 3:13) Alai taboto, na lao disalpuhon Jahowa do sude sitaonon. Boasa dang saonari diulahon Jahowa i? Molo saonari do disalpuhon Jahowa sitaonon i, hira na diurupi Ibana ma Sibolis mangarajai portibi on. Jadi saleleng Sibolis dope na mangarajai portibi on, pasti sai adong do sitaononta.—Pjm. 9:12.

4. Sitaonon aha do muse na diadopi halak Kristen?

⁴ Na lao dianiaya do hita ala mangihutton Jesus. Didok Jesus do tu akka siseanna, na lao dianiaya do nasida alani haporseaon. (Mat. 24:9; Joh. 16:2) Jadi tikki dianiaya hita, dang tarsonggot be hita jala dang gale haporseaotta. (1 Tes. 3:​3, 4) Molo toktong setia hita tikki dianiaya, on patuduhon na tadukung do Jahowa jala tabuktihon pargabus do Sibolis. Didok Sibolis, olo pe hita manomba Jahowa ala na dipasu-pasu do hita. Alani i ma marsitutu ibana menganiaya naposo ni Jahowa. (Job 1:​9-11) Alai molo toktong hita setia tu Jahowa, las ma roha ni Jahowa. On patuduhon nungnga taulahon be na sittong jala holong rohatta tu Jahowa.—Poda 27:11.

5. Aha do na taparsiajari sian Parjamita 7:​13, 14? (Ida gambar.)

⁵ Diloas Jahowa do masa sitaonon. Dang hea Jahowa mangulahon na jahat manang manguji hita marhite na jahat. (Jak. 1:13) Alai, boasa didok Raja Salomo ‘hasusaan’ i “na binahen ni Debata na sittong”? (Jaha Parjamita 7:​13, 14.) Sasittongna, na dimaksud si Salomo dang Jahowa na mambahen hita susa. Alai, diloas Ibana do i masa tu hita. Alani i, adong dua na taparsiajari sian hata ni si Salomo: (1) Saleleng Sibolis dope na mangarajai portibi on, dang boi taharappon denggan torus ngolutta. Alai “tikki denggan” ngolutta, mandok mauliate ma hita tu Jahowa jala taanggap ma i songon hadiah sian Ibana. (2) ‘Dang taboto aha na lao masa’ di ngolutta. Dang taboto boi do denggan ngolutta manang na daong. Alana, boi do toppu masa hasusaan tu halak na burju dohot halak na jahat.

6. Boasa diloas Jahowa masa sitaonon tu hita? (Heber 12:​7, 11)

⁶ Lomo do roha ni Jahowa asa taandalhon Ibana, dang mangandalhon diritta sandiri. Takkas do diboto Jahowa sitaonon na masa tu hita. Jala parduli situtu do Ibana tu hita. Bahkan tikki sitaonon i mambahen hita hira na di bagasan “rura na massai golap”, pasti togu-toguonna do hita. Dipapos Ibana do rohatta na massai holong rohana tu hita. Jala lehononna do tu hita gogo asa boi martahan. (Ps. 23:4) Asing ni i tikki masa sitaonon tu hita, gabe taboto ma hahurangatta. Jala tapangido ma tu Jahowa asa diurupi hita padenggatton i. (Jaha Heber 12:​7, 11.) Misalna songon si Job. Disadari ibana do na porlu ibana patuduhon serep ni roha. Memang, dang Jahowa na mambahen susa si Job. Alai diloas Jahowa do i masa tu ibana. Jala dibahen Jahowa do i gabe dalan lao mangurupi si Job paubahon cara marpikkirna. (Job 42:​1-6) Alani i, dang soal sitaonon aha na diloas Jahowa masa tu hita, taingot ma holan parsatokkinan do i. Pasti urupanna do hita asa martahan, jala ujungna “boi do hita monang mangadopi sudena i”.—Rom 8:​35-39.

7. Boasa tadok boi hita toktong marlas ni roha nang pe dianiaya?

⁷ Boi do hita toktong marlas ni roha nang pe dianiaya. Molo dianiaya hamu alani haporseaon, unang ma didok rohamuna na so lomo roha ni Jahowa tu hamu manang dang dipasu-pasu hamu. Justru tikki dianiaya hamu, on patuduhon na dioloi hamu do Jahowa, jala pasti pasu-pasuonna do hamu. (Mat. 5:​10-12) Molo diingot hamu on, boi ma hamu toktong marlas ni roha nang pe dianiaya, dos songon akka apostel najolo. (Ul. 5:​40-42) Asing ni i molo toktong setia hamu, boi do on mambahen akka halak naeng mamboto hasittongan jala ‘mamuji Jahowa’. (1 Ptr. 2:12) Ingot ma muse si Josep. Tikki dipenjara dope ibana, diurupi jala dipasu-pasu Jahowa do ibana. Pasti bahenon ni Jahowa do tong songon i tu hamu tikki dianiaya hamu.—1 Mus. 39:​3, 23.

8. Aha do muse na boi mangurupi hita asa toktong setia nang pe dianiaya?

⁸ Pasti marujung do akka sitaononta. Sian pengalaman ni si Job, taboto ma na lao marujung do sitaononta. Didok di Bibel, “Gumodang ma dijalo si Job pasu-pasu ni Jahowa di ujungna sian na di mulana.” (Job 42:12) Memang saonari, godang do sitaonon na taadopi. Alai nungnga marjanji Jahowa, na lao pasu-pasuonna do hita “di ujungna”. Lehononna ma tu hita hangoluan na salelengna di ari na naeng ro. Unggodang do annon jalootta pasu-pasu sian na tajalo saonari. Alani i, toktong ma hita setia tu Jahowa asa dapotta pasu-pasu i!—Mat. 24:13.

BAHAYANA MOLO DANG SITTONG PANDANGANTA TARINGOT SITAONON

9. Aha do bahayana molo dang sittong pandanganta taringot sitaononta?

⁹ Bahaya do molo dang sittong pandanganta taringot sitaononta. Misalna, gabe tadok do ra Jahowa na mambahen hita susa. Songon i ma na hea dihilala si Job. Ala songon i perasaanna, gabe “sai naeng dipatudu si Job do na ussittong ibana sian Debata”. (Job 32:2) Jala songon i do tong na hea dihilala si Naomi. Jahowa do na disalahon ibana alani akka sitaononna. (Rut 1:​13, 20, 21) Molo torus songon i pandangan ni si Job dohot si Naomi, boi do gabe sega hubungan ni nasida tu Jahowa. (Poda 19:3) Alai, diurupi Jahowa do nasida asa sittong pandangan ni nasida taringot sitaononna. Jala dipasu-pasu Jahowa do nasida ala toktong setia nasida.

10. Sipata boha do perasaanta tikki marsitaonon hita?

¹⁰ Memang, takkas do taboto dang Jahowa na mambahen hita susa. Alai, olo do ra dang pos rohatta parduli do Ibana tu hita manang na daong. Boi do on mambahen hita marmetmet ni roha. (Poda 24:10) Songon i do na dihilala Raja Daud dohot Panurirang Habakuk. Tikki marsitaonon, sipata didok roha ni nasida hira na so ditangihon Jahowa do tangiang ni nasida. (Ps. 10:1; Hab. 1:2) Nang pe songon i, torus do nasida martangiang. Dialusi Jahowa do tangiang ni nasida i, jala diurupi do nasida. Pos ma rohamuna, bahenon ni Jahowa do tong songon i tu hamu.—Ps. 10:17.

11. Molo dang sittong pandanganta taringot tu sitaononta, aha do akibatna?

¹¹ Molo dang sittong pandanganta taringot tu sitaononta, olo do gabe tarsonggot hita jala dang tarjalo rohatta tikki masa i. (1 Ptr. 4:12) Marsiajar ma hita sian akka sisean ni Jesus. Tikki didok Jesus tu nasida na lao dianiaya jala dibunu ibana, dang porsea nasida. (Luk. 18:​33, 34) Misalna, si Petrus. Didok rohana, dang mungkin diloas Jahowa masa songon i tu Jesus. Alai, diboto Jesus do dang sesuai cara marpikkir ni si Petrus i tu lomo ni roha ni Jahowa. Alani i, dipissang ibana ma si Petrus. (Mrk. 8:​31-33) Bahkan dung mate Jesus, dang diattusi akka sisean i dope boasa ikkon marsitaonon ibana jala mate. Nang pe songon i, dang menyerah Jesus. Dung hehe ibana, diurupi ibana ma nasida asa muba cara pandang ni nasida. “Dipatorang ibana ma tu nasida sude na nidok ni Surat na Badia.” (Luk. 24:​25-27, 32, 44-48) Molo dirimangi nasida na diajarhon Jesus i, gabe rade ma nasida mangadopi penganiayaan na lao masa. Dos songon i ma hita. Boi do rade hita mangadopi penganiayaan molo tarimangi na diajarhon Bibel taringot i.

12. Aha do muse akibatna molo dang sittong pandanganta taringot sitaononta?

¹² Molo dang sittong pandanganta taringot sitaononta, olo do didok rohatta hita ma na ussusa sian sude jolma. Hape sebenarna dang songon i. Taida ma tudosan ni Jesus taringot akka parkarejo di ladang anggur. Marungut-ungut do piga-piga parkarejo i ala didok roha ni nasida dang adil upa na dilehon tu nasida. Alai, didok nappuna ladang i ma, “Ale dongan, dang adong salakku tu ho.” (Mat. 20:​10-13) Sasittongna, dang na so adil nappuna ladang i. Alai, cara pandang ni akka parkarejo i do na sala. Ala patimbohu na diharappon nasida, gabe marungut-ungut ma nasida. Saonari pe, adong do donganta na merasa songon i. Ala dang marna dilehon dope tugas na dihalomohon rohana, didok rohana ma dang adil i. Aha do na boi taulahon asa sittong pandanganta tikki adong situasi na maol?

NA PORLU TAULAHON TIKKI MARSITAONON HITA

13. Boha do sipata pandanganta tikki masa sitaonon tu hita?

¹³ Memang, nungnga diboto hamu aha na diajarhon Bibel taringot sitaonon. Bahkan jotjot do ra dipaboa hamu piga-piga ayat lao mangurupi akka halak na marsitaonon. Alai tikki hamu sandiri na mangadopi i, olo do ra dang sittong pandanganmuna taringot sitaonon i. Misalna tikki susa hamu, olo do ra didok rohamuna hukuman sian Jahowa do i, manang dang ditangihon Jahowa tangiangmuna. Molo songon i situasimuna, aha do na ikkon diulahon hamu?

14. Aha do na boi ditangiakkon hamu tikki marsitaonon hamu? (Pilippi 4:13)

¹⁴ Pangido ma bantuan sian Jahowa. Paboa ma tu Jahowa aha na diadopi hamu jala boha perasaanmuna. Pangido ma tondi parbadia asa diurupi hamu mambahen keputusan na denggan jala asa margogo hamu. Boi do tong dipaboa hamu aha na diharappon hamu sian Jahowa. Alai ingot ma, cara ni Jahowa mangalusi tangiangmuna olo do dang songon na diharappon hamu. (Eps. 3:20) Boi do urupanna hamu marhite akka suru-suruan manang akka dongan sahaporseaon. (Ps. 34:7) Manang songon dia pe cara ni Jahowa mangurupi hamu, jalo ma i. Pos ma rohamuna, pasti lehononna do tondi parbadiana asa sanggup hamu manaon sitaonon manang aha pe.—Jaha Pilippi 4:13.

15. Aha do na ikkon toktong diulahon hamu tikki marsitaonon hamu? (Ida gambar.)

¹⁵ Toktong ma ulahon ulaon manomba Jahowa. Tikki “marsitaonon”, olo do ra maol dihilala hamu mangulahon i. Alai, justru di tikki sisongon i do ikkon diulahon hamu i asa sarupa cara marpikkirmuna tu Jahowa. (Ps. 119:143) Alani i, toktong ma jaha, parsiajari, jala rimangi isi ni Bibel. Berupaya ma hamu asa toktong marbarita. Taratur ma hamu ro marpungu jala markomentar. Asing ni i, toktong ma jonok hamu tu akka dongan. Jala unang ma dipapulik hamu dirimuna sian nasida.—Poda 18:1.

16. Tikki marsitaonon, boha do sipata perasaanta jala aha do na ikkon taulahon? (2 Korint 10:​4, 5)

¹⁶ Bahen ma riset lao paubahon cara marpikkirmuna. Tikki marsitaonon, sipata ro do pikkiran na sala taringot diritta manang taringot Jahowa. Alai, ikkon tabolokkon do pikkiran sisongon i. (Jaha 2 Korint 10:​4, 5.) Boha ma carana? Bahen ma riset sian Bibel dohot akka publikasitta asa dapotmuna “parbinotoan taringot tu Debata”. Misalna molo didok rohamuna dang lomo be roha ni Jahowa mangida hamu, parsiajari ma pengalaman ni Apostel Paulus. Godang hian do sitaonon na diadopi ibana. Alai, justru sitaonon i do na mambahen lam pos rohana na tutu ibana parhobas ni Kristus, jala las do roha ni Jahowa mangida ibana. (2 Kor. 11:​23-27) Boha do molo didok rohamuna dang diampuni Jahowa dope kesalahanmuna najolo? Bahen ma daftar ni akka ayat na patuduhon olo do Jahowa mengampuni akka dosatta. (Jes. 43:25) Dung i, jaha jala rimangi ma akka ayat i. (Ps. 119:97) Asing ni i, boha do molo masa sitaonon na massai borat tu hamu manang tu keluargamuna? Olo do ra didok rohamuna na so dilinggomi Jahowa akka naposona. Molo songon i, bahen ma riset boasa diloas Jahowa susa hita, jala songon dia do cara ni Jahowa mangurupi hita asa toktong marale-ale tu Ibana. (Ps. 91:​9-12) Boi do muse dijaha hamu pengalaman ni akka dongan na berhasil mangadopi akka sitaonon na borat.a

17. Aha do na gabe tekadmuna?

¹⁷ “Denggan” do ra situasimuna saonari, jala dang adong masalah. Molo songon i, mandok mauliate ma hamu tu Jahowa. Jala bahen ma i kesempatan lao mangarimangi haburjuonna. (Pjm. 7:14) Alai molo marsitaonon hamu, bertekad ma hamu asa toktong sittong pandanganmuna taringot i. Jala toktong ma marhaposan tu Jahowa. Molo diulahon hamu i, “patuduonna do tu hamu dalan asa boi hamu sabar jala martahan manaon i”. (1 Kor. 10:13) Alai, boha do molo akka donganta na marsitaonon? Aha do na porlu taulahon lao mangurupi nasida? Tabahas ma i di minggu na ro.