Pos ma Rohatta tu Debata Natumimbul i

1. Sitaonon aha do na masa tu si Job?

GODANG do sitaonon na toppu masa tu si Job. Mate do sude gellengna, marsahit ibana, jala mago sude artana. Ala masa songon i tu ibana, gabe dang diargai akka halak be ibana. Jala adong do tolu donganna na sai mandokkon hata na mambahen metmet roha ni si Job. Bahkan istrina pe marsak hian do alani on. Sappe disuru ibana do si Job ‘mamburai Debata jala mate’. (Job 2:9; 15:​4, 5; 19:​1-3) Molo godang sitaonon na diadopi sasahalak, olo do ra didok rohana dang parduli Debata tu ibana. Songon i do ra na dihilala si Job.

2-3. (a) Tikki masa sitaonon, boha do perasaanta? (b) Aha do na lao taparsiajari sian bukku Job?

² Saonari, mangolu di “tikki hasusaan” do hita. (2 Tim. 3:1) Alani i songon na dihilala si Job, godang do ra sitaonon na taadopi. Tikki masa i, olo do ra marsak hian tahilala jala lungun rohatta. Bahkan ala godang ni sitaonon, adong do piga-piga halak na merasa dang tutu parduli Jahowa tu ibana.

³ Molo songon i do perasaanmuna, unang ma metmet rohamuna. Songon si Job, pos ma rohamuna dang tadikkonon ni Jahowa akka naposona na setia. Pasti urupanna do hita jala pasu-pasuonna. Asa lam pos rohatta, tabahas ma bukku Job. Tadapot ma annon dua parsiajaran sian i: Na parjolo, Jahowa do Debata Natumimbul. Na paduahon, holan Jahowa do na boi mengendalihon akka na masa lao pasautton lomo ni rohana. Jala pasti urupanna do hita asa toktong jonok tu Ibana.

DOHOT DO SIBOLIS RO TUSI

4. Songon na dipaboa di bukku Job, akka ise do na ro tu jolo ni Jahowa?

⁴ Di sada tikki, ro ma “akka anak ni Debata na sittong” tu jolo ni Jahowa. Didok di Bibel, “Dohot do Sibolis ro tusi.” (Job 1:6) On ma parjolo sahali disurat goar ni “Sibolis” di Bibel. Digoari pe ibana songon i, ala dialo ibana do Jahowa. Di tikki i, dang anak ni Debata be Sibolis. Nungnga gabe musu ni Jahowa ibana, musu ni akka suru-suruan, dohot musu ni akka naposona na di tano on. Songon na disurat di 1 Musa 3:​15, dang gabe bagian sian “borua i” be ibana, na lao manubuhon ‘pinoppar’ i. Lapatanna, dang bagian sian keluarga ni Jahowa na di surgo be Sibolis.

5. Aha do na taboto sian akka hata na didok Sibolis dohot alus ni Jahowa?

⁵ Lomo do roha ni Jahowa asa taboto aha na masa tikki na marpungu i nasida di surgo. Alani i ma dipastihon Ibana asa disurat taringot i di Bibel. Sian akka hata ni Sibolis, tarida do na pargabus ibana jala sogo rohana tu akka na manomba Jahowa. (Job 1:9; bandingkon tu Pangungkapon 12:10.) Asing ni i, gabe taboto ma massai balga do huaso ni Jahowa. Tikki dipakke Ibana huasona i, sai adil do Ibana jala patuduhon holong. Jala muse ala Jahowa do Debata Natumimbul, Ibana do na marhak manottuhon aha na boi dohot na so boi diulahon akka toppaanna.

MARHAK DO JAHOWA MANOTTUHON NA SO BOI DIULAHON TOPPAANNA

6. Aha do na patuduhon Jahowa na paling marhuaso? (Job 1:​7, 8)

⁶ Jaha Job 1:​7, 8. Tikki na marpungu i nasida, takkas do tarida Jahowa do na marhuaso disi. Didok Ibana tu Sibolis, “Diida ho do si Job naposokki?” Sian hatana i, tarida ma nungnga diboto Jahowa aha na lao diulahon Sibolis tu si Job. Saonari, tabahas ma songon dia Jahowa mamakke huasona lao mangurupi si Job.

7. Aha do na didok Sibolis taringot akka halak na manomba Jahowa? (Job 1:​10, 11)

⁷ Jaha Job 1:​10, 11. Jahowa do Debata Natumimbul. Boi do diulahon Ibana manang aha pe lomo ni rohana. Jala sai denggan do cara ni Ibana mamakke huasona. (Jer. 32:17; Dan. 4:35) Alai, didok Sibolis do dang denggan cara ni Jahowa mamakke huasona. Didok ibana muse, olo pe akka halak manomba Jahowa ala dilehon do godang pasu-pasu tu nasida, songon na dibahen Jahowa tu si Job. Jala didok ibana, olo pe akka halak manomba Jahowa holan asa dapotna do akka pasu-pasu i. Songon dia do tanggapan ni Jahowa?

8-9. Aha do na didok Jahowa tu Sibolis, jala boasa songon i dibahen Jahowa? (Job 1:12) (Ida gambar.)

⁸ Jaha Job 1:12. Memang, diloas Jahowa do Sibolis manguji si Job. Alai, adong do na so diloas Jahowa ulahononna. Didok Jahowa, “Unang ma dihahua ho [si Job]!” Sude do akka suru-suruan na marpungu i mambege hata ni Jahowa tu Sibolis. Jala ikkon dioloi Sibolis do hata ni Jahowa i. Dang boi diulahon Sibolis lobi sian i. Songon i do tong sahat tu saonari. Boasa dibahen Jahowa songon i? Asa boi dilinggomi Ibana si Job. On patuduhon Debata na adil jala parholong do Jahowa i.

⁹ Berhasil do Sibolis? Daong. Alana toktong do si Job setia tu Jahowa. (Job 1:22) Alai, dang menyerah dope Sibolis.

10. Boasa diloas Jahowa diuji Sibolis muse si Job? (Job 2:​2-6)

¹⁰ Jaha Job 2:​2-6. Kejam hian do Sibolis. Massai ngeri do dibahen ibana tu si Job dukkon i. Didok Sibolis, molo marsahit si Job pasti buraanna do Debata. Lao mambuktihon na sala do hata ni Sibolis i, diloas Jahowa ma ibana mambahen si Job marsahit. Alai, takkas do dipaboa Jahowa aha na so boi ulahonon ni Sibolis. Didok Jahowa, “Unang buat hosana!” Ala songon i na didokkon Jahowa, dang boi diulahon Sibolis lobi sian i. Ikkon dioloi ibana do na didok Jahowa i. Sian on takkas ma taboto, Jahowa do Debata Natumimbul.

DIPAUJUNG JAHOWA DO HASUSAAN NI SI JOB

11. Dung dipaujung Jahowa hasusaan ni si Job, pasu-pasu aha do na dilehon tu ibana? (Job 42:​10-13)

¹¹ Jaha Job 42:​10-13. Ala toktong do setia si Job, dang diloas Jahowa be Sibolis mambahen susa si Job. Pittor dipaujung Jahowa ma sude hasusaan ni si Job. Sian on takkas ma taida, dang boi Sibolis mangabbati huaso ni Jahowa lao mangalinggomi jala mamasu-masu si Job.

12. Paboa ma contoh na patuduhon dipakke Jahowa do huasona lao paluahon akka naposona.

¹² Di ari parpudi on, godang do pengalaman na patuduhon dipakke Jahowa do huasona lao mangurupi akka naposona. Misalna di taon 1945, dipaksa akka tentara ma 230 Saksi Jahowa mardalan sian kamp penjara di Jerman tu laut. Tujuanna, lao pamatehon akka donganta i. Massai dao do pardalanan i jala berbahaya. Alai, selamat do sude donganta i. Disurat nasida ma pengalaman ni nasida. Didok nasida, dipalua Jahowa do nasida dos songon tikki Ibana paluahon tolu halak Heber sian api na marnala-nala. Dung kaluar tolu halak Heber i sian i, bau timus pe dang adong. Songon i ma na dihilala akka donganta. Nang pe mangadopi sitaonon na massai borat, alai lam togu do haporseaon ni nasida. Dilehon Jahowa do tondi parbadiana tu nasida. Jala didok nasida, sarupa do nasida songon si Daniel na dipalua sian lubang singa. Mulai sian i, lam bertekad ma nasida asa toktong setia. Alana di nasida, pasu-pasu na luar biasa do boi manomba Jahowa sahat tu salelengna.—Bandingkon tu Daniel 3:27; 6:22.

13. Tikki taadopi sitaonon, aha do na porlu taingot? (Ida gambar.)

¹³ Sipata alani borat ni sitaononta, olo do ra tahilala hira na disappatton hita tu lubang singa. (1 Ptr. 5:​8-10) Jala sipata, hira na dipukkuli do tahilala. Gabe lam metmet ma rohatta, ala didok rohatta dang marnasae sitaononta. Molo songon i, taingot ma pengalaman ni si Job. Pos do rohatta, pasti dipakke Jahowa do huasona lao manalpuhon sude sitaononta. Boi do i diulahon Ibana saonari. Manang, tapaima ma saut i di tano na imbaru. Nungnga ditottuhon Jahowa andigan salpuhononna sude sitaonon. Jala pos do rohatta, dang na lao tarlambat i!

HOLONG DO ROHA NI JAHOWA TU AKKA NAPOSONA NA SETIA

14-15. Boha do perasaan ni Jahowa tu akka naposona na setia? (Job 14:15) (Ida sampul.)

¹⁴ Jaha Job 14:15. Setia do Jahowa tu akka naposona na setia. Massai arga do nasida di Jahowa. Bahkan molo mate pe nasida, pasti dipahehe Jahowa do nasida. Alana, masihol do Jahowa tu nasida. Dung dipahehe annon akka naposona di tano na imbaru, marlas ni roha ma nasida sude.—Jes. 65:17.

¹⁵ Dung dipaujung hasusaan ni si Job, memang tong dope ibana mangolu di portibi ni Sibolis na jahat on. Alai sian Bibel, taboto ma dilehon Jahowa do upa na luar biasa tu si Job. Dipamalum ma ibana jala dilehon godang pasu-pasu, unggodang sian na sebelumna. Jala unggodang do muse pasu-pasu na lao lehonon ni Jahowa tu ibana di ari na naeng ro. Lomo do roha ni Jahowa asa marlas ni roha akka naposona na setia, jala asa tabo ngolu ni nasida. I do alana, lao lehononna do ngolu na salelengna tu nasida di paradeiso. (Pgk. 21:​3, 4) Ala Debata Natumimbul do Jahowa, dang adong na boi mangabbati Ibana mangulahon i. Pasti gabe dipatogu do rohatta mamboto on, tarlumobi tikki masa sitaonon tu hita.

16. Aha do muse na lao ulahonon ni Jahowa, Debata Natumimbul i?

¹⁶ Memang ujungna, mate do si Job. Alai, lao dipahehe Jahowa do ibana annon. Alana, Debata Natumimbul do Jahowa jala Pargogo na so Hatudosan. (5 Mus. 32:39) Jadi haduan, lao paheheon ni Jahowa do sude halak na dihaholongi Ibana. Jala dang adong na boi mangabbati Ibana mangulahon i.—Rom 8:​38, 39.

POS MA ROHATTA TU JAHOWA

17. Aha do buktina dang marhasil Sibolis pamatehon sude naposo ni Jahowa?

¹⁷ Sian bukku Job, taboto ma boasa boi pos situtu rohatta tu Jahowa. Mandok mauliate do hita tu Jahowa, ala dang diloas Ibana Sibolis pamatehon sude naposona. Saonari, adong do hira-hira sia juta naposo ni Jahowa na toktong setia tu Ibana. Godang do bukti na patuduhon dang marhasil sinjata manang aha pe na dibahen lao mangalo hita. (Jes. 54:17) Nang pe marsitutu akka pamaretta dohot akka pamimpin agama lao pasohon ulaonta, alai dang marhasil nasida mangulahon i. Jadi, dang adong na boi mangabbati hita lao paboahon Jahowa do Debata na sittong jala pargabus do Sibolis. Bahkan molo mate pe hita, pasti paheheon ni Jahowa do hita.—Hos. 13:14.

18. Boasa dang mabiar hita mangadopi ari na naeng ro?

¹⁸ Molo tarimangi pengalaman ni si Job, pasti gabe lam dipatogu do haporseaotta jala dang mabiar hita mangadopi ari na naeng ro. Saleleng masa hasusaan bolon, olo do ra didok roha ni Sibolis dohot akka na mangihutton ibana, mura do naposo ni Jahowa diserang. Alai songon di tikki ni si Job, pasti dipakke Jahowa do huasona lao mangurupi hita. Jala dang pasombuonna Sibolis pamatehon sude naposona. Dung i, dipaujung Jahowa ma sude hasusaan na dibahen Sibolis. Jala dipamasuk ma Sibolis dohot akka suru-suruanna tu lombang na massai bagas saleleng 1.000 taon. (Luk. 8:31; Pgk. 20:​1-3) Dung marujung 1.000 taon i, dipamate ma Sibolis dohot sude na mangalo tu Jahowa, songon naung dipaboa Jahowa hian.—1 Mus. 3:15; Rom 16:20; Pgk. 20:10.

19. Pasu-pasu aha do na lao lehonon ni Jahowa tu akka halak na marhaposan tu Ibana? (Ida gambar.)

¹⁹ Tarpaima do hita boi mangolu di tano na imbaru. Disi annon, tahilala ma las ni roha na sasittongna. Marlas ni roha situtu ma hita jala sempurna. Luar biasa do annon ngolutta disi. Alana nungnga didok Jahowa, “Ida ma! Hupaimbaru do saluhutna.” (Pgk. 21:5) Aha do lapatan ni i? Mulai sian najolo sahat tu saonari, nungnga godang hajahaton na dibahen Sibolis dohot akka suru-suruan na jahat. Alai annon disi, dang adong be na mambahen hita mabiar. Boi ma renges hita modom, alana dang adong na mambahen marsak rohatta. Jala dung malua hita sian Armagedon, boi ma taida akka mukjizat na dibahen Jahowa. Gabe sehat ma akka halak na marsahit, jala dipahehe ma akka halak naung mate. Di tikki i, marlas ni roha situtu ma hita. Alana, i do sakkap ni Jahowa sian mulana.

20. Aha do na ikkon torus taulahon?

²⁰ Di ari parpudi on, pasti lam godang do sitaonon na taadopi. Alani i, ikkon barani do hita asa boi toktong setia. Marhaposan ma hita tu Jahowa jala unduk ma tu Ibana. Alana, Ibana do Debata Natumimbul. Torus ma tahaholongi Jahowa, jala tabuktihon ma na sala do sude hata ni Sibolis taringot Jahowa dohot akka naposona. Jadi, toktong ma setia hita tu Debata Natumimbul i. Pos ma rohatta, pasti pasu-pasuon ni Jahowa do hita. Alana, i do na lao ulahononna tu akka naposona na setia!