Boi do Hamu Gabe “Guru na Malo Mangajari”

1. Aha do na ikkon toktong taupayahon, jala boasa? (2 Timoteus 4:2) (Ida gambar.)

DIDOK Jesus do tu akka siseanna, “Bahen hamu ma saluhut halak sian nasa bangso gabe siseanku. . . . Ajari hamu ma nasida mangulahon sude naung huparettahon tu hamu.” (Mat. 28:​19, 20) Hata ni Jesus on patuduhon, ikkon rade do sude halak Kristen mangajari na asing. Memang, Jahowa do na manarik akka halak “na marpangalaho na denggan”. Jala dohot do akka suru-suruan mangarahon hita asa pajuppang tu halak sisongon i. (Ul. 13:48; Joh. 6:44; Pgk. 14:6) Alai hita pe, ikkon taulahon do bagianta. Taparrohahon ma aha na diulahon Apostel Paulus dohot si Barnabas. Didok di Bibel, tikki marbarita nasida di sinagoga na di Ikonium, “denggan do dipasahat nasida barita i, alani i godang ma halak Jahudi dohot halak Junani na gabe porsea”. (Ul. 14:1) Jadi, marsitutu do si Paulus dohot si Barnabas asa “malo mangajari”. (Jaha 2 Timoteus 4:2.) Hita pe, tatiru ma nasida.

2. Aha do na mambahen adong piga-piga donganta na merasa dang malo nasida mangajari?

² Adong do piga-piga donganta na merasa dang malo nasida mangajari ala dang parsikkola nasida. Manang, didok roha ni nasida dang adong bakatna tusi. Songon i ma na dihilala piga-piga halak na dipaboa di Bibel. (2 Mus. 4:10; Jer. 1:6) Adong do tong na merasa songon i ala dang adong parsiajar Bibelna. Manang, dang adong pengalamanna na denggan di ulaon marbarita. Memang, dang sude halak olo manangihon barita na uli. Alai dang soal songon dia tanggapan ni nasida, dang i na manottuhon malo manang na dang hita mangajari. Songon na dipaboa nakkin, Jahowa dohot akka suru-suruan do na mangurupi hita pajuppang dohot akka halak na lomo rohana tu barita na uli. Alai hita pe, ikkon taulahon do bagianta. Marsitutu ma hita asa denggan caratta pasahatton barita na uli. Di artikel on, lao tabahas ma tolu cara na ikkon taulahon asa lam malo hita mangajari.

PATUDU MA NA PARDULI HAMU TU AKKA HALAK

3. Boasa lomo roha ni godang halak manangihon Jesus?

³ Didok di Bibel, “Diboto [Jesus] do na di bagasan roha ni jolma.” (Joh. 2:25) Takkas do diboto ibana aha na adong di roha dohot pikkiran ni halak. Alani i ma diattusi ibana kebutuhan ni nasida. Takkas do diida ibana, susa do akka halak alani akka hasomalan dohot aturan na dibahen pamimpin agama. Alani i, porlu do nasida diapuli jala diurupi asa jonok tu Jahowa. (Mat. 9:36; 23:4) Jadi tikki Jamita di Dolok, diurupi ibana ma nasida mamboto boha carana asa marlas ni roha. Godang do halak na lomo rohana manangihon Jesus. Alana, marguna do sude na diajarhonna i jala hona tu roha ni nasida.

4. Aha do na boi taulahon lao patuduhon na parduli hita tu akka halak? (Ida gambar.)

⁴ Tapatudu ma na parduli hita tu akka halak. Carana, pikkirhon ma aha na dihaporluhon nasida. Saonari, godang do hajahaton. Jadi, sude do halak na tajuppangi susa jala marsak alani i. Molo taingot on, gabe boi ma hita marasi ni roha tu nasida jala lomo rohatta mangurupi nasida. Pikkirhon ma sukkun-sukkun on: Aha do na masa baru-baru on na mambahen khawatir akka halak? Mabiar do akka natua-tua mamikkirhon gellengna di sikkola? Maol do akka halak mangalului karejo? Bayakkon ma songon dia ngolu ni akka halak saonari di “tikki hasusaan” on. Jala ingot ma, dang diboto nasida dope na adong harapan di ari na naeng ro.—2 Tim. 3:1; Jes. 65:​13, 14.

5. Aha do na patuduhon beda hian Jesus tu akka halak Parise? (Mateus 11:​28-30)

⁵ Parduli do Jesus tu akka halak. Jala boi do i dihilala nasida sian cara ni Jesus maradoppon nasida. Beda hian do Jesus tu halak Parise. Leas do roha ni halak Parise mangida akka halak, jala jotjot do dibahen nasida na so adil tu akka halak. (Mat. 23:13; Joh. 7:49) Alai molo Jesus, burju jala diargai ibana do sude halak. Asing ni i, “lambok jala na serep roha do [ibana]”. On ma muse na mambahen ibana gabe guru na malo mangajari. (Jaha Mateus 11:​28-30.) Tatiru ma Jesus. Tapatudu ma haburjuon tu akka halak jala taargai ma nasida.

6. Boha do tanggapanta molo adong halak na marsogo ni roha tu barita na tapasahat?

⁶ Adong do halak na so lomo rohana tu barita na tapasahat, bahkan muruk do nasida tu hita. Boha ma tanggapanta? Dipaingot Jesus do hita asa unang taalo akka halak na marsogo ni roha tu barita i. Alai, adong do muse na ikkon taulahon. Didok ibana, “Bahen ma na denggan tu halak na marsogo ni roha tu hamu, hatahon hamu ma hata na denggan tu halak na mamburai hamu jala tangiakkon ma halak na mangaleai hamu.” (Luk. 6:​27, 28) Asa boi hita mangulahon i, tapikkirhon ma boasa songon i tanggapan ni nasida. Memang, adong do halak na marsogo ni roha tu barita i. Alai na asing dang olo manangihon, mungkin ala adong masalah keluargana manang akka masalah na asing. Ra tikki ro hita tu jabu ni nasida, pas lagi marsak hian nasida. Alai manang songon dia pe situasina, toktong ma taingot poda on, “Sai lambok ma begeon akka hatamuna songon na disirai, asa diboto hamu mangalehon alus na denggan tu ganup halak.” (Kol. 4:6) Molo parduli hita tu akka halak jala taattusi songon dia situasi ni nasida, boi ma taboto boha carana mangurupi nasida.

PAKKE MA HATA NI DEBATA

7. Aha do na dipakke Jesus lao mangajari akka halak? (Johannes 7:​14-16)

⁷ Tikki mangajari akka halak, dang diandalhon Jesus pikkiranna sandiri. Alai, Hata ni Debata do na dipakke ibana. Denggan do cara ni Jesus mangajari. Alani i, mura do akka ajaranna i diattusi jala diingot. Didok di Bibel, “Longang do roha ni nasida mambege ibana tikki mangajari. Ai mardongan huaso ni Debata do ibana tikki mangajari akka jolma, dang songon akka siboto surat.” (Mrk. 1:22) Molo akka siboto surat, ajaran ni jolma do na dipakke nasida. Alai molo Jesus, Hata ni Debata do na diajarhon ibana. Memang, hea do Jesus tinggal di surgo jala godang do dapotna parbinotoan sian Debata. Alai dang berupaya ibana mambahen akka halak terkesan tu godang ni parbinotoanna. Jala dang olo ibana mambahen akka halak merasa dang diboto nasida manang aha. (Jaha Johannes 7:​14-16.) Sitiruon na massai denggan do Jesus tu hita.

8. Songon dia do si Petrus maniru Jesus?

⁸ Akka sisean ni Jesus pe mamakke Hata ni Debata do tikki mangajari. Misalna, taida ma songon dia jamita na dipasahat si Petrus di ari Pentakosta 33 M. Dipakke ibana do Hata ni Debata lao patorakkon Jesus do na manggohi akka surirang na dipaboa Debata. Nang pe dang parsikkola si Petrus, alai hona do na diajarhonna i tu roha ni akka halak. (Ul. 2:​14-37) Aha ma hasilna? “Adong do halak na marlas ni roha manjalo hatana i. Ujungna, tardidi ma nasida. Di bagasan sadari i, adong ma hira-hira 3.000 halak na tamba gabe sisean.”—Ul. 2:41.

9. Boasa ikkon tapakke Hata ni Debata tikki taajari halak na asing?

⁹ Holan Hata ni Debata do na boi paubahon roha ni jolma. (Heb. 4:12) Alani i, tapakke ma Bibel tikki taajari halak na asing. Lomo do rohatta ‘mambaritahon hata ni Debata’, dang pikkiranta sandiri. (2 Tim. 4:2) Didok di Poda 2:​6, “Sian Jahowa do bisuk, jala sian pamanganna do kaluar akka hata na boi mambahen halak mandapot parbinotoan jala boi mangattusi.” Alani i tikki tapakke Bibel, hira na tapaloas ma Jahowa na makkatai tu nasida. (Mal. 2:7) Lomo do rohatta asa diboto akka halak dao do undenggan bisuk na dipaboa di Bibel sian bisuk ni jolma. Alana, sian Debata do sude na dipaboa di Bibel. Jala marhite Bibel, gabe taboto ma aha na ikkon taulahon asa boi marlas ni roha jala mambahen las roha ni Debata.—2 Tim. 3:​16, 17.

10. Boha do carana asa diboto sasahalak Bibel do na gabe dasar ni parsiajaranna?

¹⁰ Andorang so diurupi hamu sasahalak marsiajar Bibel, bahen ma persiapan. Pikkirhon ma akka ayat na dia na lao dijaha hamu asa diattusi ibana parsiajaranna. Urupi ma ibana mangattusi Bibel do dasar ni parsiajaranna. Nang pe dipakke hamu gambar dohot video, urupi ma ibana mandapot parsiajaran sian ayat na dibahas hamu. Alai, unang ma pagodangku hamu patorakkon manang ikkon dijaha hamu ganup ayat di parsiajaran i. Tikki dijaha hamu sada ayat, lehon ma tikki tu ibana lao mamikkirhon i jala jaha ma muse ayat i molo porlu. Molo diulahon hamu songon i, on patuduhon Bibel do na diajarhon hamu, dang bukku, gambar, manang video.—1 Kor. 2:13.

11-12. (a) Songon dia do carana patuduhon na sabar hita tu parsiajar Bibelta? (Ulaon ni Apostel 17:​1-4) (Ida gambar.) (b) Molo dang diboto parsiajar Bibelta dope isi ni Bibel, aha do na porlu taulahon lao mangurupi ibana?

¹¹ Sipata, adong do parsiajaran na maol diattusi parsiajar Bibel. Molo songon i, toktong ma ‘sabar hamu mangurupi ibana mangattusi hata ni Debata’. Dang sai sarupa kemampuan ni ganup halak. Adong do halak na pittor boi mangattusi na diparsiajarina. Alai na deba, porlu do tikki lao mangattusi i. Taida ma na diulahon si Paulus. Tikki marbarita ibana tu halak Jahudi na di Tessalonik, dang pittor diattusi nasida na diajarhon si Paulus. Alai, sabar do si Paulus mangurupi nasida jala dipatorang do aha na dimaksud di Surat na Badia i. Hasilna, adong do piga-piga halak na mangattusi na nidokna i.—Jaha Ulaon ni Apostel 17:​1-4.

¹² Asing ni i, bahen ma sukkun-sukkun tu parsiajar Bibelmuna. Jala lehon ma tikki tu ibana lao mangalusi i. Denggan ma tangihon ibana jala berupaya ma hamu mangattusi cara marpikkirna. Dung i, jaha jala bahas ma akka ayat na boi mangurupi ibana mangattusi perasaan ni Debata taringot na diparsiajarina i. Ingot ma on: Adong do piga-piga halak na so hea mangida Bibel, jala dang diboto nasida aha na dipaboa disi. Molo songon i parsiajar Bibelmuna, patudu ma tu ibana Bibel na tercetak. Pakke ma bagian “Na Boi Taparsiajari sian Hata ni Debata” na adong di Bibel Terjemahan Tano na Imbaru, lao patorakkon akka aha do na dipaboa di Bibel. Dukkon i, jaha ma akka ayat na adong di sukkun-sukkun 15. Tujuanna, asa diboto ibana boi do Bibel mangurupi hita asa marlas ni roha. Jadi, urupi ma parsiajar Bibelmuna mamboto manfaat ni Bibel. Molo diulahon hamu songon i, gabe taronjar ma ibana mangulahon na diparsiajarina jala gabe penasaran ma ibana lao mamparsiajari na asing.

URUPI MA NASIDA ASA LAM MANANDA JAHOWA

13. Tikki taajari halak na asing, tu ise do taarahon perhatianna? Bahen ma tudosan.

¹³ Tujuanta mangurupi parsiajar Bibel, i ma asa ditanda nasida Jahowa jala marale-ale tu Ibana. (Jak. 4:8) Ulaonta mangajari halak na asing boi do dipatudos songon halak na karejona mangarahon lampu di pertunjukan teater. Saleleng pertunjukan, pasti dang tu dirina diarahon ibana lampu i, alai tu halak na di panggung do. Dos songon i ma hita. Tikki taajari parsiajar Bibelta, arahon ma perhatianna tu Jahowa, unang tu diritta.

14. Boha do carana mangurupi parsiajar Bibelta asa mambahen las roha ni Jahowa?

¹⁴ Urupi ma parsiajar Bibelmuna asa makkaholongi Jahowa. Molo diulahon hamu i, gabe taronjar ma ibana mambahen las roha ni Jahowa. (Poda 27:11) Asa boi ibana muba, unang ma holan mangajarhon dia na sittong dohot dia na sala. Alai urupi ma ibana asa mangattusi aha tujuanna lao muba, i ma mambahen las roha ni Jahowa. Molo maol dihilala ibana pasohon hasomalan na so denggan, sukkun ma on: “Boasa sogo roha ni Jahowa tu hasomalan i? Boasa dipangido Jahowa asa unang diulahon hamu be i? Boasa on patuduhon na holong roha ni Jahowa tu hamu?” Molo diurupi hamu ibana mangarimangi taringot Jahowa dohot akka sifatna, gabe pos ma rohana Ama parholong do Jahowa i. Dung i, gabe holong ma rohana tu Jahowa jala lomo rohana mambahen las roha ni Jahowa.

BERUPAYA MA ASA LAM MALO MANGAJARI

15. Aha do na porlu diulahon hamu asa lam malo mangajari?

¹⁵ Tangiakkon ma tu Jahowa asa diurupi Ibana hamu lam malo mangajari. (1 Joh. 5:14) Alai dung martangiang, ulahon ma bagianmuna. Di parpunguan, diparade Jahowa do akka bahan na mangurupi hamu asa lam malo mangajari. Denggan ma parrohahon jala ulahon ma i. Asing ni i, togihon ma akka dongan na malo mangajari asa mandongani hamu tu parsiajar Bibelmuna. Sukkun ma aha do na porlu dipadenggan hamu sian caramuna mangajari. Jala ingot ma, nang pe nungnga takkas diattusi hamu bahan parsiajaran i, alai molo parsiajar Bibelmuna dang diattusi dope i. Jadi, coba ma bayakkon songon dia perasaanna tu bahan i. Dung i, urupi ma ibana asa pos rohana marguna do sude parsiajaran i jala sian Jahowa do i. Molo diulahon hamu on, gabe lam jonok ma ibana tu Jahowa jala marlas ni roha.—Ps. 1:​1-3.

16. Boasa ikkon marsitutu hita asa lam malo mangajari?

¹⁶ Massai las do rohatta boi mangajari akka halak taringot Jahowa. Di tano na imbaru pe annon, godang dope halak na porlu taajari. Alani i mulai sian saonari, berupaya ma hita asa lam malo mangajari. Carana, tapatudu ma na parduli hita tu akka halak, tapakke ma Hata ni Debata, jala taurupi ma nasida asa lam mananda Jahowa.