Bukku Job Boi Mangurupi Hamu Tikki Masa Sitaonon

1-2. Boasa penting taparsiajari bukku Job?

HEA do dijaha hamu bukku Job? Bukku on disurat 3.500 taon naung salpu. Nang pe songon i, godang do halak na mandok molo bukku on, bukku na luar biasa. Sada referensi paboahon, “malo hian” do na manurat bukku on. Alana mura do diattusi isina, tabo dijaha, jala hona hian tu roha. Memang, si Musa do na manurat bukku on. Alai taboto, Debata Jahowa do na manogu-nogu ibana lao manurat i.—2 Tim. 3:16.

² Termasuk bagian na penting do bukku Job on di Bibel. Boasa? Alana, di bukku on dipaboa do sada masalah na mempengaruhi sude suru-suruan dohot jolma, i ma taringot pabadiahon goar ni Jahowa. Asing ni i, dipaboa do taringot akka sifat ni Jahowa na luar biasa, songon holongna, bisukna, hatigoranna, dohot huasona. Misalna di bukku Job, adong 31 hali dipaboa molo Jahowa i “Pargogo na So Hatudosan”. Jala di bukku on ma unggodang dipaboa taringot i. Dung i muse, dipatorang do di bukku on boasa dipaloas Debata masa hasusaan. Dipaboa do tong alus ni akka sukkun-sukkun na rikkot taringot parngoluon on.

3. Aha do manfaatna molo taparsiajari bukku Job?

³ Molo nakkok hita tu sada dolok, boi ma takkas taida sude na adong di sakalilingta. Dos songon i ma, molo tajaha bukku Job, boi ma takkas taboto songon dia pandangan ni Jahowa taringot akka sitaononta. Saonari, tabahas ma aha do manfaat ni bukku Job tu halak Israel najolo dohot tu hita. Tabahas ma muse songon dia do hita boi mamakke bukku on lao mangurupi halak na asing.

DILOAS DEBATA DO SUSA SI JOB

4. Aha do beda ni si Job tu halak Israel na di Mesir?

⁴ Si Job tinggal di Us, sada inganan di jonok ni Arab. Di tikki i, gabe hatoban do halak Israel di Mesir, jala adong do piga-piga sian nasida na manomba debata na so sittong. Alai molo si Job, setia do ibana manomba Jahowa. (Jos. 24:14; Hes. 20:8) Alani i ma didok Jahowa taringot si Job, “Dang adong na songon ibana di tano i.”a (Job 1:8) Mamora hian do si Job di tikki i. Ibana ma na ussangap jala na ummora martimbakkon sude halak di daerah Timur. (Job 1:3) Jadi, bayakkon ma si Job halak na mamora, terkenal, jala toktong setia tu Jahowa. Alani i ma sogo hian do roha ni Sibolis mangida ibana.

5. Boasa diloas Jahowa susa si Job? (Job 1:​20-22; 2:​9, 10)

⁵ Didok Sibolis, molo susa si Job, pasti dang olo be ibana manomba Jahowa. (Job 1:​7-11; 2:​2-5) Memang holong hian do roha ni Jahowa tu si Job. Alai, diloas Jahowa do Sibolis lao mambuktihon sittong do hatana taringot si Job i manang na daong. (Job 1:​12-19; 2:​6-8) Alani i, dibuat Sibolis ma akka binatang na dipiaro si Job, dipamate ma sappulu gellengna, jala dibahen ma marsahit na posi si Job. Nang pe borat hian sitaonon ni si Job dibahen Sibolis, alai tetap do setia si Job manomba Jahowa. (Jaha Job 1:​20-22; 2:​9, 10.) Di pudian ni ari, dipamalum Jahowa ma si Job. Dibahen ma muse ibana mamora jala tubu ma muse sappulu nai gellengna. Gabe sangap ma muse si Job di tikki i jala dibahen Jahowa ma ganjang umurna. Mangolu dope si Job 140 taon nai. Jadi, sanga do diida si Job akka pinopparna sahat tu sundut na paopatton. (Job 42:​10-13, 16) Aha do na boi diparsiajari akka naposo ni Jahowa najolo sian si Job? Jala aha do manfaat ni pengalamanna i tu hita saonari?

6. Molo dirimangi halak Israel pengalaman ni si Job, aha do manfaat ni i di nasida? (Ida gambar.)

⁶ Manfaatna tu halak Israel. Susa hian do ngolu ni halak Israel di Mesir. I ma na dihilala si Josua dohot si Kaleb. Gabe hatoban do nasida disi saleleng martaon-taon. Dung i, ikkon tinggal di padang belantara do nasida saleleng 40 taon alani kesalahan ni halak Israel. Autsugari ma diboto halak Israel taringot si Job, pasti gabe dipatogu do nasida dohot akka pinopparna. Boi ma diboto nasida Sibolis do na mambahen susa jolma, dang Debata. Diboto nasida ma tong boasa diloas Jahowa susa jolma jala massai arga do di Jahowa akka halak na setia.

7-8. Aha do na taparsiajari sian bukku Job? Paboa ma pengalaman.

⁷ Manfaatna tu hita. Saonari, godang do halak na so mangattusi boasa diloas Debata susa halak na burju. Akibatna, dang porsea be nasida tu Debata. Taida ma pengalaman ni sahalak borua na margoar si Hazelb na sian Rwanda. Mulana porsea do ibana tu Debata. Alai muba ma situasi ni ngoluna. Marsirang do natua-tuana. Menikah ma muse omakna, jala jahat hian do bapak tirina tu ibana. Tikki remaja ibana, adong do na memperkosa ibana. Didok roha ni si Hazel, molo lao ibana beribadat pasti tarapul do rohana. Alai dang dapotna i. Jadi dibahen ibana ma surat tu Debata. Didok ibana, “Debata, martangiang do au tu Ho. Huulahon do na denggan. Alai, boasa ma songon on pambahenanmu tu au? Dang olo be au manomba Ho. Lomo ni rohakku nama na huulahon.” Lungun hian do rohatta mangida akka halak na songon si Hazel. Dang diboto nasida ise na mambahen nasida susa.

⁸ Alai dang songon i molo hita. Sian bukku Job, taboto do dang Debata na mambahen susa jolma, alai Sibolis do. Dung i taboto do muse molo adong halak na susa, dang ala na adong dibahen ibana kesalahan. Alana didok di Bibel, boi do masa “akka na so diharappon di tikki na so panagaman”. (Pjm. 9:11; Job 4:​1, 8) Dung i, taboto do molo toktong hita setia tu Jahowa tikki marsitaonon, gabe boi ma tabuktihon sala do hata ni Sibolis i. Jala gabe dipabadia ma goar ni Jahowa. (Job 2:3; Poda 27:11) Jadi, las hian do rohatta ala taboto dang Jahowa na mambahen susa akka halak na burju. Si Hazel na dipaboa nakkin, ujungna marsiajar Bibel do ibana dohot Saksi Jahowa. Diboto ibana ma, dang Debata na mambahen ibana susa. Didok ibana, “Martangiang ma muse au tu Debata. Hupaboa ma sude na di rohakku tu Ibana. Memang, sanga do hudokkon tu Debata dang olo be au manomba Ibana. Alai sebenarna dang sian rohakku i. Hudokkon pe songon i, ala na so hutanda dope Ibana. Alai saonari, nga huboto be holong hian do roha ni Jahowa tu au. Las hian ma rohakku jala puas.” Saonari, tabahas ma songon dia do pengalaman ni si Job boi mangurupi hita tikki masa sitaonon.

PENGALAMAN NI SI JOB BOI MANGURUPI HITA MARTAHAN

9. Songon dia do situasi ni si Job tikki na marsitaonon i ibana? (Jakobus 5:11)

⁹ Bayakkon ma sitaonon na diadopi si Job. Bisulon do sude dagingna jala haccitan do ibana. Asing ni i, marniang hian do ibana jala gale. Hundul ma si Job di orbuk huhut digaruti ibana dagingna mamakke ponggol-ponggol ni gucci. Jala dipapuas ibana do sude na di rohana. Alai nang pe songon i, toktong do martahan jala setia si Job tu Jahowa. (Jaha Jakobus 5:11.) Boasa boi toktong martahan si Job?

10. Aha do na patuduhon na jonok hubungan ni si Job tu Jahowa? Patorang ma.

¹⁰ Massai jonok do hubungan ni si Job tu Jahowa. Alani i ma dipaboa ibana sude na di rohana tu Jahowa. (Job 10:​1, 2; 16:20) Contohna di bindu 3, dipaboa ibana do borat ni sitaononna jala didok rohana Debata do na mambahen i. Jala di tikki i, didok tolu donganna i do ala na adong dibahen si Job kesalahan umbahen na susa ibana. Alani i ma sai didok si Job, halak na tigor do ibana. Jala sian akka hatana, hira na didok si Job do ussittong ibana sian Debata. (Job 10:​1-3; 32:​1, 2; 35:​1, 2) Diakkui si Job do tong, ‘asal dipandokkoni pe hatana’ ala naeng mambela dirina do ibana. (Job 6:​3, 26) Di bindu 31, dipangido si Job do tu Debata asa didok ibana halak na sittong jala dang patut dihukum. (Job 31:35) Dipangido ibana do muse asa dipatorang Debata boasa marsitaonon ibana. Alai sasittongna, dang marhak si Job manuru Debata mangulahon i. Jadi molo tarimangi, hata ni si Job i patuduhon na jonok do hubunganna tu Jahowa. Jala pos do rohana, dianggap Jahowa do ibana halak na setia.

11. Songon dia do Jahowa menanggapi hata ni si Job i?

¹¹ Dung sae si Job makkatai, dibahen Jahowa ma haba-haba jala makkatai ma Ibana tu si Job. Alai, dang dipaboa Jahowa boasa susa si Job. Asing ni i, dang dihukum Jahowa ibana alani akka hatana i. Gariada dos songon sahalak bapak na burju, lambok do cara ni Jahowa mangurupi si Job asa dipauba cara marpikkirna. Massai denggan do cara na dibahen Jahowa on. Alana gabe diakkui si Job, godang do na so diboto ibana jala disolsoli ibana do akka hatana i. (Job 31:6; 40:​4, 5; 42:​1-6) Songon dia do pengalaman ni si Job on boi mangurupi akka halak di tikki naung salpu dohot hita saonari?

12. Aha do manfaat ni pengalaman ni si Job tu halak Israel?

¹² Manfaatna tu halak Israel. Godang do halak Israel na boi mandapot manfaat sian pengalaman ni si Job. Pikkirhon ma taringot si Musa. Borat do di ibana lao mamimpin bangso Israel. Alana jotjot do halak Israel mangalo tu Jahowa jala mambahen jut roha ni si Musa. Tikki susa, sai marungut-ungut do halak Israel tu Jahowa. Alai molo si Musa, sai diandalhon ibana do Jahowa. (2 Mus. 16:​6-8; 4 Mus. 11:​10-14; 14:​1-4, 11; 16:​41, 49; 17:5) Asing ni i, pengalaman ni si Job boi do mangurupi si Musa tikki dipissang Jahowa ibana. Tikki naeng sahat nama halak Israel tu Tano na Dijanjihon, sanga do muruk si Musa tu bangso i. “Dang manat be ibana mandok hatana” jala dang dipabadia ibana goar ni Jahowa. (Ps. 106:​32, 33) Akibatna, dang diloas Jahowa masuk si Musa tu Tano na Dijanjihon. (5 Mus. 32:​50-52) Pasti dang mura on di si Musa. Alai, serep do rohana jala marsiajar do ibana sian kesalahanna i. Pengalaman ni si Job on pe boi do mangurupi halak Israel na asing na mangolu dukkon si Musa. Molo dirimangi nasida pengalamanna i, boi ma nasida songon si Job. Gabe mura ma nasida paboahon sude na di rohana tu Jahowa, jala dang merasa ussittong nasida sian Ibana. Asing ni i, gabe marsiajar ma nasida asa marserep ni roha jala olo manjalo pissang-pissang sian Jahowa.

13. Aha do manfaat ni pengalaman ni si Job tu hita? (Heber 10:36)

¹³ Manfaatna tu hita. Saonari, mangolu di tikki na gok hasusaan do hita. Ra marsahit do hita, depresi, adong masalah di keluarga, mate na tahaholongi, manang adong masalah na asing. Jala sipata, lam susa do tahilala molo dang denggan hata dohot pambahenan ni halak tu hita. (Poda 12:18) Jadi porlu do hita diurupi Jahowa asa boi toktong setia tu Ibana. (Jaha Heber 10:36.) Sian bukku Job, taboto ma boi do tapaboa sude na di rohatta tu Jahowa, jala pasti tangihononna do hita. (1 Joh. 5:14) Bahkan molo pe sipata ‘asal tapandokkoni hatatta’ songon si Job, dang gabe muruk Jahowa. Pos ma rohatta, pasti dilehon Jahowa do gogo tu hita dohot bisuk asa boi hita martahan. (2 Kron. 16:9; Jak. 1:5) Sipata, olo do dipissang Jahowa hita songon na diulahon Ibana tu si Job. Sian bukku Job, marsiajar do hita asa olo manjalo nasehat manang pissang-pissang sian Bibel, organisasi, dohot sian akka dongan na togu haporseaonna. (Heb. 12:​5-7) Songon si Job, serep ma rohatta manjalo pissang-pissang i. Alana pasti dapotta do manfaat sian i. (2 Kor. 13:11) Godang hian do parsiajaran na dapotta sian bukku Job. Saonari, tabahas ma songon dia do hita boi mamakke bukku Job on lao mangurupi halak na asing.

PAKKE MA BUKKU JOB LAO MANGURUPI NA ASING

14. Molo adong na manukkun boasa susa hita, boha do caratta mangalusi i?

¹⁴ Tikki marbarita, godang do halak na manukkun boasa susa halak na burju. Boha do caramuna mangalusi sukkun-sukkun i? Ra dipaboa hamu do taringot na masa di Taman Eden. Dung i, dipaboa hamu do ra adong sada suru-suruan na jahat, i ma Sibolis na paboahon gabus tu jolma na parjolo. Akibatna gabe mangalo ma nasida tu Debata. (1 Mus. 3:​1-6) Dipatorang hamu do ra, ala dang dioloi si Adam dohot si Hawa Debata, gabe susa ma jolma jala mate. (Rom 5:12) Asing ni i, dipaboa hamu ma tu nasida dilehon Debata do tikki lao mambuktihon sala do hata ni Sibolis i. Jala gabe boi ma akka jolma mamboto barita na uli taringot janji ni Debata di ari na naeng ro. (Pgk. 21:​3, 4) On ma sada cara na denggan lao mangalusi sukkun-sukkun i, jala denggan do tong hasilna.

15. Boha do muse cara na asing lao mangalusi sukkun-sukkun sisongon i mamakke bukku Job? (Ida gambar.)

¹⁵ Cara na asing na boi dipakke hamu, i ma paboahon taringot si Job. Alai parjolo-jolo paboa ma tu na manukkun i, denggan do sukkun-sukkunna i. Dukkon i, paboa ma taringot si Job. Sahalak naposo ni Debata na setia do ibana. Hea do sukkun-sukkun rohana, boasa ma susa ibana. Jala sanga do didok rohana, Debata do na mambahen ibana susa. (Job 7:​17-21) Olo do ra songgot roha ni na manukkun i, dung diboto ibana adong do hape halak na manukkun taringot i najolo. Dung i paboa ma sian bukku Job, boi ma taboto dang Debata na mambahen susa si Job, alai Sibolis do. Didok Sibolis, olo pe jolma manomba Debata ala na dipasu-pasu do nasida. Alai molo susa nasida, pasti dang olo be nasida manomba Debata. Dukkon i, patorang ma lao mambuktihon na sala do hata ni Sibolis i, diloas Debata ma susa si Job. Boasa? Alana, pos do roha ni Debata pasti adong do jolma na toktong setia nang pe marsitaonon. Dung i paboa ma ala toktong setia si Job, dilehon Jahowa ma godang pasu-pasu tu ibana. Jadi tapapos ma roha ni akka halak, dang Jahowa na mambahen nasida susa.

16. Paboa ma sada pengalaman na patuduhon boi do bukku Job mangurupi halak na marsitaonon.

¹⁶ Taparrohahon ma songon dia bukku Job mangurupi sahalak bawa na margoar si Mario. Di taon 2021, adong ma sahalak donganta borua na marbarita sian telepon. Na parjolo ditelepon ibana, i ma si Mario. Dijahahon donganta i ma ayat na paboahon janji ni Debata di ari na naeng ro. Jala dipaboa do na olo Debata manangihon tangiangta. Dung i, disukkun ma tu si Mario boha pandapotna taringot ayat i. Dipaboa si Mario ma naeng bunu diri hian do ibana jala nungnga dibahen ibana surat tu keluargana. Didok si Mario, “Porsea do au adong Debata. Alai huhilala, dang parduli Ibana tu au.” Dung i, ditelepon donganta i ma muse si Mario jala dibahas nasida ma taringot hasusaan ni si Job. Gabe penasaran ma si Mario lao manjaha sude bukku Job. Jadi, dikirim donganta i ma link asa boi si Mario manjaha Bibel sian jw.org. Aha do hasilna? Marsiajar Bibel ma si Mario jala gabe pos ma rohana na holong do roha ni Debata tu ibana.

17. Boasa mandok mauliate hita ala disuratton bukku Job di Bibel? (Job 34:12)

¹⁷ Sian on taboto ma, marhuaso do Hata ni Debata paubahon ngolu ni akka halak, jala mangapuli roha ni akka na marsitaonon. (Heb. 4:12) Mandok mauliate do hita tu Jahowa, ala disuratton do taringot si Job di Bibel. (Job 19:​23, 24) Sian bukku Job, dipapos ma rohatta “tung na so bahenon ni Debata do na jahat”. (Jaha Job 34:12.) Taboto do muse, boasa diloas Debata masa hasusaan jala songon dia carana asa boi hita mangadopi i. Asing ni i, boi do tapakke bukku Job mangurupi akka na marsitaonon. Di artikel na mangihut, tabahas ma parsiajaran na asing sian bukku Job, i ma taringot mangalehon nasehat.