Boha do Carana asa Marbisuk Au Mamillit Sipanganon na Naeng Huallang Ganup Ari?

Ra diboto ho do molo dang marbisuk ho mamillit sipanganon na lao diallang ho, boi do gabe marsahit ho. Molo sian na poso dope dang marbisuk ho mamillit sipanganon, ra songon i do annon ho sahat tu na dewasa. Alani i, porlu do ho marbisuk mamillit sipanganon mulai sian saonari.

• Aha do maksudna marbisuk mamillit sipanganon?

• Boha do carana asa torus au marbisuk tikki mamillit sipanganon?

• Na didok akka donganmu

Aha do maksudna marbisuk mamillit sipanganon?

Di Bibel, dijujui do hita asa ‘boi mangarajai diri’. (1 Timoteus 3:11) Termasuk ma i taringot sipanganon na taallang. Aha do maksudna marbisuk mamillit sipanganon?

• Mangallang sipanganon na bergizi. Adong do lima jenis sipanganon na bergizi. Misalna produk susu, protein, buah, sayur, dohot biji-bijian. Alai adong do halak na holan mangallang deba sian lima jenis ni sipanganon i asa moru berat badan ni nasida. Akibatna, gabe kurang gizi ma nasida.

  Coba ma on: Lului ma informasi manang sukkun ma tu dokter gizi taringot manfaat ni tiap gizi na adong di sipanganon. Misalna:

  Karbohidrat i ma sumber energi. Protein boi mambahen lam kuat daya tahan tubuhmu, jala padenggatton akka sel na sega di dagingmu. Molo dang pagodangku diallang ho lemak, boi do i mangorui resiko sahit jantung jala mambahen ho tetap bertenaga.

  “Berupaya do au asa tetap seimbang tikki mamillit sipanganon. Hucoba do mangallang sude jenis ni sipanganon na bergizi. Alai menuruttu, dang sala molo sasahali taallang keripik dohot gorengan.”—Si Brenda.

  

• Tetap ma seimbang. Artina, unang ma sengaja hita sappe leleng hian dang mangan, gabe pagodangku mangan, manang gabe dang olo mangallang piga-piga jenis ni sipanganon.

  Coba ma on: Di bagasan sabulan, parrohahon ma akka sipanganon na diallang ho. Sadia jotjot do ho mangulahon akka kebiasaan na dipaboa nakkin? Adong do kebiasaanmu na porlu dipadenggan ho asa boi lam sehat?

  “Sanga do pagodangku huallang sipanganon na timbo kalorina. Sanga do muse holan sipanganon na rendah kalorina na huallang. Alai ujungna huputusson ma dang huetong be kalori ni sipanganon. Dang pagodangku be au mangan, jala so do au mangan molo nungnga butong. Memang dang mura mangulahon on, alai gabe lam marbisuk do au tikki mamillit sipanganon na naeng huallang.”—Si Hailey.

Boha do carana asa torus au marbisuk tikki mamillit sipanganon?

• Bahen ma rencana. Didok di Bibel, “Sai na saut do sakkap ni halak na ringgas.” (Poda 21:5) Alani i, bahen ma rencana lao mangallang sipanganon na bergizi.

  “Ikkon tabahen do rencana lao mangallang sipanganon na bergizi. Jala biasana ikkon taloppa do sipanganon sisongon i. Nang pe boi do mambahen ho gabe repot, alai boi do dihilala ho annon manfaatna, jala gabe hemat do ho.”—Si Thomas.

• Ganti ma sipanganon na so bergizi gabe na bergizi. Didok di Bibel, “Toktong ma ho marbisuk.” (Poda 3:21) Berupaya do halak na marbisuk mangalului cara asa boi mangallang sipanganon na bergizi.

  “Ganup ari, hugatti do sipanganon na so bergizi gabe na bergizi. Misalna apel do na huallang, dang coklat. Lam leleng, gabe bergizi do sude na huallang!”—Si Kia.

• Masuk akkal ma. Didok di Bibel, “Marlas ni roha ma ho mangallang sipanganonmu.” (Parjamita 9:7) Molo marbisuk ho mamillit sipanganon, pasti boi do dinikmati ho sipanganonmu jala dang khawatir taringot aha na naeng diallang ho. Molo tung pe naeng diet ho, diet ma ala naeng sehat. Unang ma paksahon dirim.

  “Baru-baru on, boi do turun 13 kilogram berat badanku. Alai dang hea husengaja sappe leleng hian dang mangan, dang hea au menghindari piga-piga jenis ni sipanganon, manang merasa bersalah ala mangallang na manis-manis. Huboto do porlu do tikki lao mangorui berat badan, jala ikkon marbisuk do au tikki mamillit sipanganon na naeng huallang.”—Si Melanie.