SUKKUN-SUKKUN NI AKKA NA POSO
Songon dia do Carana asa Unang Palojahu Au?
Jotjot do ho palojahu? Molo ido, cocok do artikel on tu ho!
Boasa boi masa i
Pagodanghu na diulahon hamu. Sahalak borua na margoar si Julie mandok, “Jotjot do hita dituntut asa mangulahon na dumenggan, ikkon gabe halak na unjago, jala mandapot hasilna terbaik. Loja do au molo sai torus dituntut songon i!”
Teknologi. Ala adong HP, tablet, dohot akka perangkat elektronik na asing, gabe dituntut do hita asa torus “aktif” jala ikkon boi dihubungi 24 jom sadari. On mambahen hita gabe stres jala lam leleng mambahen hita loja.
Hurang modom. Sahalak anak boru na margoar si Miranda mandok, “Ala sibuk di sikkola, karejo, dohot marmeam, godang do akka na poso na leleng asa modom di tikki borngin alai hatop dungo di manogotna i. Dang denggan kebiasaan sisongon i.” Molo hurang modom, gabe mura do hita loja.
Aha do bahayana
Di Bibel, dipuji do halak na ringgas. (Poda 6:6-8; Rom 12:11) Alai didok Bibel do tong, ikkon seimbang do hita mangulahon ulaonta jala mamikkirhon kesehatanta.
“Hea ma di bagasan sadari godang hian karejokku, sappe dang huingot lao mangan. Gabe husadari ma, ikkon masuk akkal do au. Dang olo au manjalo tugas na so sanggup huulahon. Ikkon hupikkirhon do kesehatanku.”—Si Ashley.
Didok di Bibel, “Dumenggan do biang na mangolu sian singa na mate.” (Parjamita 9:4) Olo do ra didok roham songon gogo ni singa gogom ala boi diulahon ho godang ulaon. Ra, di mulana i godang dope tenagam. Alai lam leleng, boi do ho gabe palojahu jala mambahen ho gabe marsahit.
Na boi diulahon ho
Ikkon boi do ho mandok “daong”. Bibel mandok, “Marbisuk do halak na serep marroha.” (Poda 11:2) Diboto halak na serep roha do kemampuanna. Jadi, dang olo ibana manjalo tugas na so sanggup ulahononna.
“Molo maol sasahalak mandok ‘daong’, pasti mura do ibana loja. Alana sude do dijalo manang aha pe tugas na dilehon tu ibana. Dang halak na serep roha songon i. Hatop manang leleng, pasti loja do annon dihilala ibana.”—Si Jordan.
Unang hurang modom. Didok di Bibel, “Dumenggan do sanggolom istirahat sian dua golom halojaon, na dos songon mangalele alogo.” (Parjamita 4:6) Asa denggan berfungsi otak, dang boi hurang modom. Ikkon modom do hita ualu sahat tu sappulu jom sadari. Alai godang do akka na poso na hurang modom.
“Molo godang hian karejokku, gabe hurang modom do au. Huboto do, asa boi denggan hukarejohon karejokku jala semangat marsogotna i, dang boi au hurang modom.”—Si Brooklyn.
Bahen ma jadwal. Didok di Bibel, “Sai na saut do sakkap ni halak na ringgas.” (Poda 21:5) Molo boi denggan diatur ho tikki dohot karejom, gabe taratur ma ngolum.
“Asa unang stres, ikkon tabahen do jadwal. Molo tasurat di jadwal akka aha na lao taulahon, gabe boi ma tapillit dia akka ulaon na uppetting asa unang palojahu hita.”—Si Vanessa.