SUKKUN-SUKKUN NI AKKA NA POSO
Boha do molo Dibahen Donganku Haccit Rohakku?
Na porlu botoonmu
Dang adong persahabatan na sempurna. Ala dang sempurna, olo do adong hata manang tindakan ni dongan kompak manang sahabatmu na mambahen haccit roham. Alai ingot ma, ala ho pe dang sempurna, pasti hea do dibahen ho haccit roha ni na asing.—Jakobus 3:2.
Internet boi do mambahen haccit roha ni halak na asing. Misalna, sahalak remaja na margoar si David mandok, “Tikki tabukka internet jala taida adong poto ni akka donganta di sada acara, olo do ra gabe sukkun-sukkun rohatta boasa dang diajak hita. Alani i, olo do gabe jut rohatta jala merasa dihianati.”
Boi do ho berupaya lao pasaehon masalah i.
Na boi diulahon ho
Pikkirhon ma aha na mambahen gabe haccit roham. Didok di Bibel, “Unang ma mura-mura haccit roham. Ai i do tanda ni halak na oto.”—Parjamita 7:9, surat na di toru.
“Sipata di pudian ni ari pe asa tasadari, sebenarna dang masalah na balga i.”—Si Alyssa.
Pikkirhon ma on: Mura do ho tersinggung? Boi do ho berupaya asa sabar tu hahurangan ni halak na asing?—Parjamita 7:21, 22.
Pikkirhon ma manfaatna molo olo memaappon. Didok di Bibel, “Dipuji do halak na olo manalpuhon hasalaan.”—Poda 19:11.
“Nang pe adong alasanta muruk, tumagon do tamaappon ibana sian ias ni rohatta. On berarti, unang be sai ingot-ingot hasalaanna di tikki naung salpu manang ikkon torus ibana mangido maap. Molo tamaappon ibana, unang be tataringoti taringot hasalaanna i.”—Si Mallory.
Pikkirhon ma on: Memang masalah na balga do i? Boi do dimaappon ho ibana jala toktong mardame?—Kolosse 3:13.
Molo torus diingot-ingot ho masalam dohot donganmu, sarupa ma i songon na mambukka pintu jala dipaloas ho alogo na massai ngali masuk tu ruangan na las
Pikkirhon ma pakkilalaan ni na asing. Didok di Bibel, “Unang ma holan mamparrohahon na porlu di hamu, alai parrohahon ma na porlu di na asing.”—Pilippi 2:4.
“Molo holong roham tu donganmi jala diargai ho ibana, pasti pittor hatop do dipasae ho masalahmuna. Alana massai arga do di ho donganmi. Ala nungnga berupaya ho saleleng on lao manjaga asa denggan persahabatanmuna, pasti dang lomo roham molo gabe hancur persahabatanmuna i.”—Si Nicole.
Pikkirhon ma on: Nang pe haccit roham, boi do diattusi ho boasa dibahen ibana songon i?—Pilippi 2:3.
Intina: Molo adong na mambahen haccit roham jala diboto ho songon dia carana mangatasi i, marguna do i sahat tu na dewasa ho. Jadi denggan do molo sian saonari i diparsiajari ho.