Aha do na Ikkon Huboto Sebelum Huposting Potokku di Media Sosial?

Las hian do roham tikki liburan, jala naeng dipaboa ho ma i tu akka donganmu. Songon dia do caram paboahon i tu nasida? Gabe

1. dikirim ho do surat manang kartu pos tu sude donganmu?

2. dikirim ho do e-mail?

3. diposting ho do akka potom di media sosial?

Tikki saumuranmu natua-tuam, ra holan pilihan “A” do na boi diulahon nasida.

Piga-piga taon naung salpu, ra “B” do na dipillit hamu.

Alai saonari, godangan akka na poso na dipaloas mamakke media sosial pasti mamillit “C”. Songon i do tong hamu? Molo sarupa songon i, artikel on boi do mangurupi hamu asa marbisuk mamakke media sosial.

• Aha do manfaatna?

• Aha do bahayana?

• Na boi diulahon hamu

• Na didok akka donganmu

Aha do manfaatna?

Ukkatop. “Tikki las hian rohakku menikmati liburan manang rap marmeam dohot akka donganku, pittor boi do huposting potokku di media sosial.”—Si Melanie.

Ummura. “Molo naeng hatop huboto kabar ni akka donganku, pittor huida do akka poto ni nasida na terbaru di media sosial. Ummura do cara sisongon i unang apala manukkun kabar ni nasida sian e-mail.”—Si Jordan.

Boi mangurupi hamu asa toktong jonok tu dongan dohot keluarga. “Piga-piga dongan dohot keluargakku, dao do inganan ni nasida. Molo jotjot diposting nasida poto ni nasida jala jotjot huida media sosial ni nasida, gabe hira na ganup ari ma au pajuppang dohot nasida!”—Si Karen.

Aha do bahayana?

Boi do gabe terancam keselamatanmuna. Molo adong fitur geotagging di kamera ni perangkatta, boi do poto na tabahen di media sosial mangalehon godang informasi na so tahalomohon. Situs Digital Trends mandok, “Molo tapakke fitur on, akka poto dohot akka na taposting di internet boi do paboahon didia lokasitta.”

Manang boi do i dimanfaatton akka halak na jahat lao mamboto andigan hamu dang di jabu. Didok Digital Trends muse, tolu halak panakko masuk tu 18 jabu tikki dang di jabu halak nappuna jabu i. Sian dia diboto nasida na so disi halak nappuna jabu i? Boi do diida nasida aha na diulahon halak na tinggal di jabu i sian internet. Berhasil do nasida manakko akka barang na argana lobi sian 100.000 dolar AS.

Boi do dang sengaja gabe diida hamu akka poto na so suman. Adong do piga-piga halak dang maila mambahen manang aha pe di internet, hape boi do sude halak mangida i. Sahalak remaja na margoar si Sarah mandok, “Bahaya do molo taida akun ni akka halak na so tatanda. Sarupa ma i songon na mardalani tu sada kota na so hea dope takunjungi. Boi do gabe lao hita tu akka tempat na berbahaya.”

Boi do gabe habis tikkimuna. Sahalak borua na poso na margoar si Yolanda mandok, “Molo ketagihan hita mangida akka poto dohot manjaha akka komentar ni halak, gabe torus ma hita naeng mangida HP lao mamboto aha na terbaru.”

Sahalak borua remaja na margoar si Samantha setuju do tu pandapot i. Didok ibana, “Ikkon hubatasi do waktukku lao mangida media sosial. Molo adong akunta di media sosial, ikkon takendalihon do diritta.”

Na boi diulahon hamu

• Bertekad ma hamu asa unang mangida akka na so suman. Didok di Bibel, “Dang bahenokku akka na so marguna di jolo ni matakku.”—Psalmen 101:3.

  “Manat do huparrohahon akka aha na diposting donganku di media sosial. Molo diposting nasida akka poto na so suman, dang olo be au mengikuti akun ni nasida.”—Si Steven.

• Unang ma mardongan hamu tu akka halak na so suman pangalahona, alana boi do hamu gabe terpengaruh. Didok di Bibel, “Molo mardongan hamu tu halak na so denggan, sega do pangalahomuna na denggan i.”—1 Korint 15:33.

  “Ikkon manat do hita molo adong poto na viral. Biasana akka poto na so denggan do na dibahen disi. Misalna, akka poto na so suman manang akka hata na so denggan.”—Si Jessica.

• Tottuhon ma tikki na lao dipakke hamu lao mangida akka poto di media sosial jala sadia jotjot hamu mambahen potomuna disi. Didok di Bibel, “Sai parrohahon hamu ma pangalahomuna. Unang ma songon halak na so marbisuk hamu, alai marbisuk ma hamu. Denggan ma pakke tikkimuna.”—Epesus 5:15, 16.

  “Dang olo be au mangihutton akka akun ni halak na sering mambahen potona di media sosial. Contohna, adong halak na liburan tu pantai, hape diposting ibana ma 20 poto alai holan sian sada kerang. Pahabis-habisson tikki do mangida poto sisongon i!”—Si Rebekah.

• Pastihon ma molo poto na dipostingmuna i dang mambahen halak marpikkir na lomo rohamuna gabe pusat perhatian. Didok Apostel Paulus, “Hupaboa ma tu hamu sude: Unang ma didok rohamuna na massai penting dirimuna.” (Rom 12:3) Unang ma dirippu ho na lomo roha ni sude donganmu mangida akka poto dohot aha na diulahon ho.

  “Adong do halak na sering mamposting poto ‘selfiena’. Ai donganmu do au, jadi nga huboto songon dia rupam. Unang pola sering paingot au taringot rupam!”—Si Allison.