Na lao Dame do Portibi on

Lomo do roha ni sude halak, asa dame ma nian keadaan ni portibi on. Saleleng marribu taon berupaya do akka pamimpin ni portibi on lao pasohon porang asa boi mambahen dame portibi on. Sipata hira na marhasil do upaya ni nasida i, alai biasana holan satokkin do i. Alana pasti marporang do muse jolma. Jadi, memang boi do dame portibi on? Boi! Taida ma aha na lao diulahon Jesus dohot na hea diajarhon ibana.

Na lao diulahon Jesus

Dipaboa do di Bibel akka aha na lao diulahon Jesus satokkin nai asa boi mambahen dame portibi on.

• “Digoari ma [Jesus] . . . Pamimpin ni Hadameon. Lam balga ma torus huasona, jala dang adong ujung ni hadameon.” (Jesaya 9:6, 7) Jesus do Raja ni Harajaon ni Debata. Molo nungnga mamaretta Harajaon i tu tano on, bahenon ni Jesus ma dame portibi on saleleng ni lelengna.

• “Paluaonna do akka halak na pogos na jou-jou mangido asa diurupi . . . dohot na so adong pangalu-aluanna.” (Psalmen 72:12-14) Molo nungnga mamaretta Jesus tu tano on, bahenonna ma na adil tu sude jolma. Hasilna dang adong be porang, kekerasan, dohot sitaonon.

• “Dang buaton ni akka bangso be podang lao mangalo bangso na asing, jala dang marsiajar marporang be nasida.” (Jesaya 2:4) Dung mamaretta Jesus tu tano on, marsiajar ma sude jolma asa toktong mardame dohot na asing. Jala dang marsiajar marporang be nasida.

Asa diboto hamu aha na lao diulahon Jesus lao mambahen dame portibi on jala boha carana asa boi hamu dohot tusi, tonton ma video Aha do Harajaon ni Debata I?

Na diajarhon Jesus

Saonari pe nungnga marjuta halak na boi toktong mardame dohot na asing ala mangihutton hata ni Jesus. Di jamita ni Jesus na di dolok, diajarhon ibana do akka prinsip na boi mangurupi akka halak asa toktong mardame. Taida ma piga-piga contohna.

• “Marlas ni roha ma sibahen dame.” (Mateus 5:9) Dijujui Jesus do akka halak na mangihutton ibana asa gabe siboan dame, dang holan asa unang marbada dohot na asing.

• “Lao ma ho mardame dohot donganmi. Dung pe i, asa ro ho muse pasahatton silehon-lehonmi.” (Mateus 5:23, 24) Didok Jesus molo adong parsoalanta dohot halak na asing, ikkon hatop do i tapasae. Alana dang boi denggan hubunganta tu Debata molo dang mardame dope tu halak na asing.

• “Unang be uhumi hamu halak na asing, asa unang diuhumi Debata hamu.” (Mateus 7:1) Dipaingot Jesus do hita asa unang manguhumi halak na asing manang gabe halak na munafik, alana boi do i mambahen parbadaan. Daripada holan na mangalului hasalaan ni halak, dijujui Jesus do hita asa ‘manalpuhon’ hasalaaan ni nasida.—Lukas 6:37.

Godang do halak di liat portibi on na boi mangihutton na diajarhon Jesus i. Nang pe adong sian nasida na tinggal di daerah na jotjot masa kekerasan manang konflik, berupaya do nasida asa dang mambalos, memaappon, jala tetap patuduhon holong tu halak na asing, termasuk tu halak na jahat tu nasida.

Asa boi diida hamu songon dia ajaran ni Jesus mangurupi akka halak makkilala dame ni roha, jaha ma artikel “Asa Boi Tahilala Dame ni Roha.”