Dang Boi Kekerasan Pasaehon Masalah

Lam godang do saonari on halak na marpikkir, holan kekerasan do na boi pasaehon parbadaan manang masalah. Alai maralo do cara marpikkir sisongon i tu ajaran dohot sitiruon na dibahen Jesus Kristus. Taida ma piga-piga contohna.

Na didok Jesus

Di jamitana na di dolok, takkas do diajarhon Jesus dang boi kekerasan manang muruk pasaehon parsalisian. Taida ma piga-piga hata ni Jesus.

• “Sude na dihalomohon rohamuna bahenon ni halak tu hamu, ikkon songon i do bahenonmuna tu nasida.” (Mateus 7:12; Lukas 6:31) Songon sada aturan do hata ni Jesus on.a Sian aturan i gabe taboto ma molo lomo rohatta dibahen halak na denggan tu hita, ikkon songon i do parjolo tabahen tu nasida. Molo dang lomo rohatta kasar pambahenan ni halak tu hita, ikkon burju do hita tu halak jala taargai ma nasida nang pe dang sappikiran hita tu nasida.

• “Molo adong na mamastap bohim na di sabola kanan, lehon ma nang bohim na di sabola kiri.” (Mateus 5:38, 39; Lukas 6:29) Hata ni Jesus on dang na patuduhon ikkon tapasombu halak mambahen lomo-lomona tu hita. Alai Jesus naeng patuduhon sala do ajaran ni akka pamimpin agama tikki i, na mandok boi do hita balas dendam. Ikkon toktong do tapatudu lambok ni roha nang pe dibahen halak na jahat tu hita.b

• “Toktong ma haholongi musum.” (Mateus 5:43, 44; Lukas 6:27) Didok Jesus ikkon burju do hita tu halak na jahat tu hita manang tu halak na mambahen na so adil tu hita. Alai on dang patuduhon na setuju hita tu pangalaho ni nasida na sala i.c Molo toktong burju hita tu halak na marsogo ni roha tu hita, boi do gabe dang sogo be rohana tu hita. Bahkan boi do gabe taronjar roha ni nasida mambalos haburjuotta.

Naung diulahon Jesus dohot na lao diulahon ibana

Takkas do diajarhon Jesus dang boi kekerasan pasaehon masalah, jala i do na diulahon ibana. Di borngin tikki ditakkup Jesus, adong ma sahalak siseanna na manittak pinggol ni tentara na manakkup Jesus. Alai didok Jesus do, “Pamasuk ma podangmi tu ingananna. Ai manang ise na manittak podang, mate do dibahen podang.” (Mateus 26:52) Olo do Jesus manalpuhon hasalaan ni akka halak na mambahen na jahat tu ibana. Bahkan ditangiakkon ibana do nasida. On patuduhon na holong do roha ni Jesus tu nasida.—Lukas 23:33, 34; 1 Petrus 2:23.

Takkas do dipaboa di Bibel satokkin nai lao dipaujung Jesus, Pamimpin ni Hadameon i ma sude kekerasan sian tano on. (Jesaya 9:6, 7) Asa lam godang na diboto hamu taringot on, jaha ma artikel “Songon dia do Ujung ni Porang Dohot Konflik Kekerasan?.”