Aha do na lao Masa tu Akka Agama?

Kecewa do hamu mangida agama manang sogo do rohamuna mangida i? Nang pe adong na denggan na diulahon agama tu piga-piga kelompok manang piga-piga halak, alai godang do halak na susa alani agama. Songon on ma na didok Encyclopedia of Religion and War, “Piga-piga porang na balga na hea masa di portibi on alani perbedaan agama do.” Jotjot do pamimpin agama manjujui akka jemaatna asa mendukung politik, dang asa manomba Debata. Adong do muse pamimpin agama na mangulahon pelecehan seksual manang korupsi, jala ditabunihon nasida do i.

Alani i olo do ra gabe sukkun-sukkun rohamuna, boha do pakkilalaan ni Debata mangida i. Molo tajaha di Bibel takkas do dipaboa disi, na sogo roha ni Debata mangida godangan agama alani pangalaho ni nasida. Marhite akka lambang, dipaboa Bibel do tong aha na lao diulahon Debata tu sude agama jala dang hea dope diulahon Ibana songon i.

Na didok Bibel taringot aha na lao masa tu akka agama

Surirang: Di bukku Pangungkapon adong do dipaboa taringot sahalak borua na so hasea na margoar Babel na Balga. Hundul do ibana di ginjang ni binatang buas na merah songon api. Alai dukkon i, dialo jala dipamate binatang buas i ma borua na so hasea i.—Pangungkapon 17:3, 5, 16.

Lapatanna: Borua na so hasea na margoar Babel na Balga i, manggombarhon sude agama na so sittong na mambahen muruk Debata.a Binatang buas na merah songon api manggombarhon Perserikatan Bangsa-Bangsa (PBB).b Ala hundul do borua na so hasea i di ginjang ni binatang buas na merah na songon api, on patuduhon berupaya do sude agama na so sittong mempengaruhi jala mangatur PBB. Alai na lao dipamate akka binatang buas i do borua na so hasea i, on patuduhon na lao hancur do sude agama na so sittong i dibahen PBB dohot akka pamarettaon na mendukung organisasi i. Pasti balga do pengaruh ni peristiwa on tu sude jolma ala dang hea dope masa na songon i.

Boru-boru na so hasea na dipaboa di bukku Pangungkapon, hundul di ginjang ni binatang buas na merah songon api. Di sabola kiri adong kantor pusat ni Perserikatan Bangsa-Bangsa, jala di sabola kanan adong akka tempat ibadah.

Ise do na lao manghancurhon agama na so sittong?

Surirang: “Sogo ma roha ni na sappulu tanduk dohot binatang buas na niidami tu boru-boru na so hasea i. Buaton ni nasida ma sude artana jala . . . tutungon ni nasida ma ibana dohot api. Ai Debata do na mangonjar roha ni nasida [roha ni akka pamaretta na adong di portibi on] lao mangulahon lomo ni rohana. Alani i, gabe saroha ma nasida mangalehon harajaon ni nasida tu binatang buas i . . . Di bagasan sadari masa ma jea tu ibana. Masa ma tu ibana hamatean, lungun ni roha, dohot haraparon. Tutungon ma ibana di bagasan api, ai Debata Jahowac na gogo i do na manguhumi ibana.”—Pangungkapon 17:16, 17; 18:8.

Lapatanna: Debata do na lao mangonjar roha ni sude pamarettaon di portibi on asa mangulahon “lomo ni rohana”, i ma mangalehon “harajaon ni nasida,” manang huaso ni nasida tu PBB. Ala nungnga lam gogo PBB i, dihancurhon ibana ma sude agama na so sittong na adong di portibi on. Hatop do peristiwa i masa, hira holan “di bagasan sadari”. Jala dang dirippu akka halak na lao masa i, on ma na mambahen nasida gabe tarsonggot.—Pangungkapon 18:21.

Boasa dihancurhon Debata agama na so sittong?

Surirang: “Nungnga martimbun dosana sahat tu langit jala diingot Debata do sude hajahatonna.”—Pangungkapon 18:5.

Lapatanna: Saleleng maratus taon diulahon agama na so sittong do godang ulaon na mambahen sogo roha ni Debata. On ma piga-piga ulaon na mambahen lao dihukum Debata nasida:

Gambar na patuduhon tangan ni pamimpin politik dohot pamimpin agama na marsijalangan.

Dohot tu politik. Nungnga didok Jesus Kristus tu akka siseanna asa unang dohot tu ulaon politik. Ikkon marhaposan do nasida tu Harajaon ni Debata, i ma harajaon na lao manggattihon sude pamarettaon ni jolma.d (Daniel 2:44; Mateus 6:9, 10; Johannes 6:15; 18:36) Alai dohot do agama na so sittong tu ulaon politik jala dang setia nasida tu Debata. Alani i molo tajaha di bukku Pangungkapon, didok do Babel na Balga i mangulahon “seks na so patut” jala gabe digoari ma ibana “boru-boru na so hasea.”—Pangungkapon 17:1, 2; Jakobus 4:4.

Gambar na patuduhon tangan ni pamimpin agama na maniop silang jala mamasu-masu akka tentara.

Mangulahon hajahaton. Agama na so sittong do na ikkon martanggung jawab tu mudar ni “akka na tarbunu di tano on”. (Pangungkapon 18:24) Godang do akka agama na so boi mangajari jemaatna asa mangalului hadameon. Gariada dijujui nasida do jemaatna asa dohot marporang jala gabe teroris.

Gambar na patuduhon tangan ni pamimpin agama na maniop godang hepeng.

Hisap. Holan ‘hamoraon’ do na rikkot di agama na so sittong jala dang maila nasida disi. (Pangungkapon 17:4; 18:7) Godang do hamoraon na dipapungu agama na so sittong ala balga do pengaruh ni nasida tu akka halak jala godang jemaatna. Sogo do roha ni Debata mangida pangalaho ni nasida na holongan di hepeng.—Titus 1:7.

Gambar na patuduhon sahalak pamimpin agama na makkatai.

Maralo tu isi ni Bibel. Dang sadalan ajaran dohot hasomalan ni agama na so sittong tu isi ni Bibel.e Gariada nasida do na mangajarhon ajaran dohot hasomalan na mangaliluhon akka halak jala na mambahen marlea Debata. Alani i ma didok Bibel nasida “ina ni . . . akka ulaon na dihagigihon di tano on.”—Pangungkapon 17:5; 18:23.

**Na lao dihancurhon Debata do sude agama?**

Daong. Adong do dipaboa di bukku Pangungkapon taringot sada kelompok ni akka halak na sian marragam bangso, na digoari “punguan bolon”. (Pangungkapon 7:9) Dipakke punguan bolon i do “jubah na bottar”, on patuduhon setia do nasida mangihutton aturan na sian Debata. Nasida do na malua sian “hasusaan bolon”, i ma periode waktu tikki dihancurhon Debata agama na so sittong dohot sude na mangalo Ibana. (Pangungkapon 7:13, 14; 19:11, 19-21) Akka halak na mangihutton agama na sittong do punguan bolon na mamakke jubah na bottar i. Agama ni nasida do na lao martahan saleleng ni lelengna.f

Akka bawa, borua, dohot dakdanak di sada punguan na bolon, marlas ni roha do nasida tikki mardalan. Di pudina adong akka tempat ibadah na kosong jala naung sega. — Tikki dihancurhon agama na so sittong na lao malua do punguan na bolon, i ma akka naposo ni Debata na mangulahon ibadat na sittong

Aha do manfaatna ala dihancurhon agama na so sittong?

Pasti gabe dame do rohatta mamboto na sogo do hape roha ni Debata mangida akka hajahaton na diulahon agama. Jala pos ma rohamuna, di ari na naeng ro dang na lao adong be agama na manusai jolma jala na mambahen marlea goar ni Debata.

Pos ma rohamuna adong do cara na sittong lao manomba Debata. Bibel mandok, “Sombaon ni akka sisomba Debata na tutu ma Ama i marhite panogu-noguon ni tondi parbadia dohot hasittongan. Ai halak sisongon i do dilului Ama i lao manomba Ibana.” (Johannes 4:23) Jala didok Debata do muse, “Kaluar ma hamu sian ibana [Babel na Balga], hamu naposokku! Asa unang dohot hamu mangulahon akka dosana jala asa unang dohot hamu hona hukum.” (Pangungkapon 18:4, 5) Dijujui Debata do akka halak asa manomba Ibana mangihutton ajaran na sittong na adong di Bibel. (1 Timoteus 2:3, 4) Jala marjanji do Debata molo olo hita mangihutton hatana i boi do hita mangolu saleleng ni lelengna.—1 Johannes 2:17.

a Asa taboto aha na didok Bibel taringot Babel na Balga, jaha ma artikel “Aha do Babel na Balga i?”

b Asa taboto ise do binatang buas on, jaha ma artikel “Manggombarhon Aha do Binatang Buas na Warna Merah na Disurat di Pangungkapon 17?”

c Goar ni Debata do Jahowa. (Psalmen 83:18) Jaha ma artikel, “Ise do Jahowa i?”

d Asa lam godang na diboto hamu taringot on, tonton ma video Aha do Harajaon ni Debata i?

e Contohna ida hamu ma kotak “Termasuk do agama ‘Kristen’ bagian sian Babel na Balga?”

f Asa diboto hamu ciri-ciri ni agama na sittong, jaha ma artikel “Songon Dia do Carakku Mamboto Dia Agama na Sittong?”