Sukkun-Sukkun sian na Manjaha
Aha do na dibahen Jahowa asa diulahon akka pamaretta di ari na naeng ro?
Di Pangungkapon 17:16, 17, dipaboa do taringot aha na lao masa di mula ni hasusaan bolon. Didok di ayat i, “Sogo ma roha ni na sappulu tanduk dohot binatang buas na niidami tu boru-boru na so hasea i. Buaton ni nasida ma sude artana jala bahenon ni nasida ma ibana dang marpakkean. Allangon ni nasida ma dagingna jala tutungon ni nasida ma ibana dohot api. Ai Debata do na mangonjar roha ni nasida lao mangulahon lomo ni rohana. Alani i, gabe saroha ma nasida mangalehon harajaon ni nasida tu binatang buas i.” Saleleng on didok publikasitta, di ari na naeng ro lao dibahen Jahowa do ‘taronjar’ roha ni akka pamaretta manghancurhon agama na so sittong.
Alai saonari porlu do disesuaihon pangattusionta on. Na lao dibahen Jahowa sasittongna, i ma “mangonjar roha” ni akka pamaretta lao “mangalehon harajaon ni nasida tu binatang buas i”. Asa taboto songon dia surirang on saut, tabahas ma akka sukkun-sukkun on.
Akka ise do na dipaboa di surirang i? “Boru-boru na so hasea” manang “Babel na Balga”, i ma sude agama na so sittong di tano on. “Binatang buas na merah songon api”, i ma sada organisasi na dibahen taon 1919. Najolo digoari do on Liga Bangsa-Bangsa, alai saonari Perserikatan Bangsa-Bangsa. Tujuan ni organisasi on dibahen asa boi toktong mardame akka bangso. (Pgk. 17:3-5) “Sappulu tanduk”, i ma sude pamarettaon na mendukung binatang buas i.
Boha do hubungan ni boru-boru na so hasea i tu binatang buas na merah songon api i? Boru-boru na so hasea i “hundul di atas ni” binatang buas i. Lapatanna, didukung ibana do binatang buas i jala berupaya do ibana mengendalihon i.
Aha do na lao masa tu boru-boru na so hasea i? ‘Sogo ma roha ni na sappulu tanduk dohot binatang buas i tu boru-boru na so hasea i.’ Dibuat nasida ma arta ni boru-boru i jala dipapatar ma sude hajahaton na dibahen ibana. Dung i, dihancurhon nasida ma ibana songon na didok Jahowa. (Pgk. 17:1; 18:8) Songon i ma annon ujung ni akka agama na so sittong. Alai andorang so masa i, dibahen Jahowa ma akka pamaretta mangulahon sada ulaon na so hea dope masa.
Aha do na lao dibahen Jahowa asa diulahon akka pamaretta i? Dibahen Jahowa ma gabe ‘taronjar’ roha ni akka pamaretta lao mangalehon “gogo dohot huaso ni nasida tu binatang buas i”, i ma Perserikatan Bangsa-Bangsa. (Pgk. 17:13) Diulahon nasida pe songon i, dang sian lomo ni roha ni nasida sandiri i. Jahowa do na mambahen nasida mangulahon i, songon naung disurirakkon. (Poda 21:1; bandingkon tu Jesaya 44:28.) Jala annon, toppu do on masa. Dung dilehon akka pamaretta sude gogo dohot huaso tu binatang buas i, dihancurhon binatang buas i ma sude agama na so sittong.
Attong, aha do na tapaima? Unang pola tapaima akka barita na paboahon naung lam didukung akka pamaretta do Perserikatan Bangsa-Bangsa. Toppu do annon dibahen Jahowa akka pamaretta mangalehon harajaon ni nasida tu binatang buas i. Molo masa i, ro nama hasusaan bolon. Jadi mulai sian saonari, “sai dungo ma hita jala toktong ma sadar pikkiranta”. Boasa? Alana satokkin nai, toppu ma masa akka perubahan di portibi on.—1 Tes. 5:6.