Janji ni Debata—Harapan tu Akka Pengungsi!

Ganup taon, marjuta do halak na ikkon mangungsi sian hutana. Songon i do situasimuna saonari? Molo songon i, pos ma rohamuna adong do na boi mangurupi hamu. Nungnga marjanji Debata lao mambahen lam denggan ngolumuna. Boi do dijaha hamu janji ni Debata i di Kitab Suci.

Molo adong harapan ni sasahalak, boi ma nasida gabe lam semangat. Songon i ma na didok si Christos Stylianides, sahalak Komisioner Uni Eropa,a “Dang holan bantuan sementara na dihaporluhon akka pengungsi dohot akka panoppang,b alai porlu do tong di nasida . . . kepastian tu masa depan ni nasida.” Asing ni i, porlu do tong akka pengungsi i diapuli asa malum roha ni nasida.

“Gabe putus asa do au ala ikkon mangungsi sian hutakku jala maninggalhon keluargakku. Mabiar hian do au, lungun do rohakku, jala marsak hian do au.”—Si Emmanuel, Haiti.

Songon i do tong na dihilala hamu saonari? Molo gabe pengungsi do hamu saonari, pasti porlu do di hamu harapan jala porlu hamu diapuli. Boi do Bibel mangalehon i tu hamu, alana Hata ni Debata do i.

Hata ni Debata na mangapuli roha

Bibel mandok, “Dihaholongi Jahowac do halak panoppang na sian bangso na asing.”—5 Musa 10:17, 18.

Didok Bibel, “Jonok do Jahowa tu sude halak na jou-jou tu Ibana.”—Psalmen 145:18.

Didok Bibel, “Dang tarbahen ni Debata na sittong i mangulahon na jahat . . . Manang papeolon ni Pargogo na So Hatudosan i na tigor.”—Job 34:10, 12.

Berarti dang Debata na mambahen hamu marsitaonon. Dang na lagi dihukum manang na diuji Debata hamu.

Harapan manang kepastian na sian Hata ni Debata

Dipaboa do di Bibel akka aha na lao diulahon Debata tu hita di ari na naeng ro. ­Ida ma manfaat na dihilala akka pengungsi dung mamboto on.

Didok Bibel, “Apusan ni Debata ma nasa ilu-ilu sian mata ni nasida. Dang adong be hamatean, nang arsak ni roha, nang angguk-angguk, nang na haccit, dang disi be.”—Pangungkapon 21:4.

Berarti na lao salpu do sitaononta. Marjanji do Debata lao pasohon sude sitaononta na mambahen hita mandele.

“Satokkin nai lao dipaso Debata do ketidakadilan dohot hajahaton na masa di humaliangta. Ala huingot janji ni Debata on, dang holan tu sitaononku be pikkiranku.”—Si Karla, El Salvador.

Didok Bibel, “Dang ingoton be akka naung salpu i, jala dang tarsunggul be i di bagasan roha.”—Jesaya 65:17.

Berarti dang na lao taingot be akka na haccit i. Marjanji do Debata dang na lao lungun be rohatta molo taingot akka na mambahen hita trauma.

“Dipaboa do di Bibel dang na lao ingototta be akka na haccit dohot na mambahen lungun rohatta. Gabe boi ma hami sabar ala huingot hami na lao salpu do sitaononnami.”—Si Natalia, Ukraina.

Didok Bibel, ‘Pajongjongon ni Debata na di surgo i ma sada harajaon. . . na lao manghancurhon jala mangaropukkon sude harajaon.’—Daniel 2:​44.

Berarti harajaon na mamaretta sian surgo do na lao mamaretta tu saluhut tano on. Satokkin nai hancurhonon ni Debata ma sude pamarettaon ni jolma jala holan harajaonna ma na mamaretta. Gabe dame, aman, adil, jala sonang ma ngolu ni sude jolma.—Mika 4:​3, 4.

“Gabe sabar ma au dung huboto holan parsatokkinan do penindasan, diskriminasi, dohot rasisme na masa saonari. Satokkin nai lao dipaso Harajaon ni Debata do sude sitaonon.”—Si Mustafa, Timur Tengah.

Akka poda na sian Hata ni Debata

Tikki berupaya hamu mambahen penyesuaian, pasti godang do manfaat na dihilala hamu molo diihutton hamu akka poda na sian Bibel. Boi do tong akka poda i mangurupi hita tikki muba situasitta, misalna tikki dang adong be manang aha di hita. On ma piga-piga prinsip na bermanfaat tu akka pengungsi:

Bibel mandok, “Nang pe godang arta ni sasahalak, dang sian artana i ngoluna.”—Lukas 12:15.

Manfaatna mangihutton poda on: Molo toppu mago sude na adong di hita olo do gabe tarsonggot hita jala lungun rohatta. Alai molo taingot ummarga do hosatta sian artatta boi do ra gabe moru lungun ni rohatta.

“Ummarga do ngolutta sian artatta. Alana di piga-piga situasi, dang boi hepengta manang artatta mangurupi hita.”—Si Natalia, Ukraina.

Bibel mandok, “Unang ma dokkon dumenggan do najolo sian saonari.”—Parjamita 7:10.

Manfaatna mangihutton poda on: Molo susa pe keadaanmuna saonari, unang ma banding-bandingkon i tu keadaanmuna najolo asa unang gabe metmet rohamuna.

“Ala boi tarjalo au keadaanku saonari, gabe boi ma positif pikiranku.”—Si Eli, Rwanda.

Bibel mandok, “Molo adong sipanganon dohot pakkeatta, las ma rohatta disi.”—1 Timoteus 6:8.

Manfaatna mangihutton poda on: Berupaya ma hamu asa puas tu na adong di hamu. Molo diulahon hamu songon i, boi do i mangorui arsak ni rohamuna jala boi do i mambahen tenang pikkiranmuna.

“Ala hujaha hami Bibel gabe dang holan tu artanami na mago i be pikkirannami. Boi ma au dohot istrikku marlas ni roha ala boi dope hami mangolu jala tinggal di tempat na aman.”—Si Ivan, Ukraina

Bibel mandok, “Sude na dihalomohon rohamuna bahenon ni halak tu hamu, ikkon songon i do bahenonmuna tu nasida.”—Mateus 7:12.

Manfaatna mangihutton poda on: Molo marsitutu hita asa boi sabar jala burju tu halak na asing pasti gabe ummura ma hita berurusan tu nasida. Halak na asing pe dang curiga be tu hita jala gabe ummura ma nasida manjalo hita.

“Lomo do roha ni godangan halak molo dihaholongi nasida, diargai, jala burju halak tu nasida. Molo tapatudu parange sisongon i tu akka penduduk di tempatta mengungsi, pasti gabe ummura ma hita mardongan tu nasida .”—Si Angelo, Sri Lanka.

Bibel mandok, “Pangido hamu ma saluhutna tu Debata; lehonon ni Debata ma tu hamu hadameon . . . na boi manjaga roha dohot pikkiranmuna.”—Pilippi 4:6, 7.

Manfaatna mangihutton poda on: Martangiang ma hamu tu Debata. Paboa ma tu Ibana kebutuhanmuna, na mambahen hamu mabiar, manang na mambahen hamu marsak. Boi do gabe moru arsak ni rohamuna tikki mambahen penyesuaian di daerah na baru molo dipaboa hamu i di tangiangmuna.

“Molo adong masalahku pittor mangalu-alu do au tu Debata. Sai dialusi Ibana do tangiangku. Jala gabe dame do rohakku dung huparsiajari Bibel.”—Si Yol, Sudan Selatan.

“Gabe dame do rohakku dung hurimangi akka poda na sian Bibel. Porlu do di au dame ni roha lao mangadopi situasi na maol on.”—Si Valentina, Ukraina.

Dung huboto janji ni Debata taringot ari na naeng ro, gabe lam semangat ma au.”—Si Emmanuel, Haiti

Godang nai dope dipaboa di Bibel janji ni Debata na boi mangapuli jala mangalehon harapan. Jala dipaboa do boasa boi pos rohatta tu akka janji i. Lomo do rohamuna mamboto i? Pangido ma asa dijuppangi sahalak Saksi Jahowa hamu. Pasti lomo do roha ni nasida mangurupi hamu jala gratis do i.