Nungnga 70 Taon Au Melayani Jahowa di Kuba

Jonok do jabunami tu jabu ni bapa udakku, namborukku, dohot oppungku. Cukkup do parhepengonnami. Jadi, tabo do ngolunami di huta i.

Tikki marumur hira-hira lima taon au, marsiajar Bibel ma natua-tuakku dohot donganta si Walton Jones. Sahalak Saksi Jahowa na semangat do ibana. Bayakkon ma, asa boi sahat tu jabunami, ikkon mardalan pat do ibana hira-hira sappulu jom. Molo ro ibana, godang do keluarganami na ro tu jabu ni oppung. Jala marsiajar Bibel ma hami sude dohot ibana, olo sappe marjom-jom. Lomo hian do roha ni bapak, omak, udakku si Pedro, dohot namborukku si Ela marsiajar Bibel. Ujungna, tardidi ma nasida gabe Saksi Jahowa. Saonari, nungnga naeng 100 taon umur ni namborukku, jala merintis dope ibana di Kuba.

Di tikki i, bebas do Saksi Jahowa marpungu dohot marbarita di Kuba. Ditanda akka halak do hami parbarita na uli. Alana, jotjot do hami marbarita sian jabu tu jabu. Jala diboan hami do koper dohot tas na marisi godang publikasi. Biasana, mardalan pat do hami marbarita. Godang do pengalaman na massai denggan dapotnami di tikki i. Alai, muba ma situasi di Kuba.—2 Tim. 4:2.

SUSA MA SITUASI DI KUBA

Tikki marumur lima taon dope au, lao ma bapak dohot uda tu luar kota lao mangihutton parpunguan wilayah. Hape di pardalanan, hona tipus ma halak i ala manginum aek na so ias. Dung mulak nasida, nga habis be obuk ni udakku. Alai molo bapak, mate do ibana. Hape marumur 32 taon dope ibana.

Dung mate bapak, diboan omak ma hami pinda tu jabu ni tulang di huta Lombillo. Gabe dao ma hami sian keluarga ni bapak, termasuk ma halak oppung. Nang pe songon i, toktong do hami sakeluarga setia manomba Jahowa.

Di tanggal 26 Agustus 1957, tardidi ma au di sada danau buatan di jonok ni Lombillo. Marumur sappulu taon ma au di tikki i. Alai di taon 1959, muba ma situasi di Kuba. Alana, Komunis nama na mamaretta disi.

Ala margatti pamaretta, gabe wajib militer ma di Kuba. Susa ma naposo ni Jahowa disi. Alana, dang olo hita dohot tu dinas militer jala tetap do hita netral di ulaon politik. Ujungna, diorai ma ulaonta di Kuba. Dipenjarahon ma marratus akka donganta disi. Piga-piga sian nasida jotjot do dipukkuli jala otik dilehon sipanganon. Bahkan sipata, dilehon do tu nasida sipanganon na margota.

Nang pe maol situasina, torus do hami marpungu. (Heb. 10:25) Bahkan dibahen hami do tong parpunguan wilayah di peternakan manang di inganan na asing. Hea ma sada tikki, dilehon donganta ma handang ni biru-biruna lao dipakke tu parpunguan wilayah. Ala dang adong tikkinami lao pakaluarhon akka biru-biru i dohot paiasson handangna, ba gabe dohot ma akka biru-biruna i marpungu!—Mik. 2:12.

Mandok mauliate do hami ala torus do berupaya akka dongan paradehon bahan na patoguhon hubungannami tu Jahowa. Misalna, direkam do acara parpunguan wilayah di kaset. Dung i, dikirim ma i tu akka dongan di Kuba. Sipata, holan dua do donganta bawa na ditugasson lao paradehon i, pasahatton jamita, dohot mangarekam i. Ala ikkon martabuni do mangarekam i, ikkon dilului hami ma inganan manang didia pe, asal ma aman. Makana, olo ma sipata masuk soara ni manuk dohot akka soara na asing tu rekaman i. Asing ni i, molo dang adong listrik di lokasi parpunguan wilayah i, ikkon adong ma sada donganta na manggowet sepeda na disambungkon tu dinamo. Boi ma mangolu alat pamutar ni kaset i jala boi ma dibege hami acarana. Memang, maol do situasinami di tikki i. Jala otik do publikasi na adong di hami, dang songon di akka negara na asing. Nang pe songon i, toktong do hami jonok tu Jahowa jala boi rap manomba Ibana dohot akka dongan.—Neh. 8:10.

MERINTIS JALA MARIANAKKON

Tikki marumur 18 taon, merintis biasa ma au di Kota Florida. Hira-hira sataon dukkon i, dilantik ma au gabe perintis istimewa di Kota Camagüey. Pajuppang ma au disi dohot donganta borua sian Santiago de Cuba, goarna si Emilia. Massai bagak do ibana. Marhallet ma hami, jala dang sappe sataon menikah ma hami.

Dung menikah, karejo ma au di sada pabrik gula appuna ni pamaretta. Memang, dang merintis be hami di tikki i. Nang pe songon i, torus do diupayahon hami asa toktong sibuk mangulahon ulaon manomba Jahowa. Jadi, huatur ma jadwalhu asa karejo au di pabrik i sian jam 3 manogot sahat tu jam 11 siang. Sebenarna, maol do au tibu dungo. Alai ala songon i hubahen jadwalhu, boi ma toktong taratur hami marbarita dohot marpungu.

Taon 1969, tubu ma anaknami siakkangan, goarna si Gustavo. Dung i, ditugasson ma au gabe pengawas wilayah. Di tikki i di Kuba, godang do pengawas wilayah na adong gellengna. Memang, tikki na pengawas wilayah i au, sibuk hian do hami. Alai, las do rohanami ala boi mangurupi akka dongan. Dukkon i, tubu ma muse gellengnami, i ma si Obed, si Abner, jala piga-piga taon dukkon i, tubu ma borunami, si Mahely.

Saleleng na gabe pengawas wilayah i hami, boi do takkas huida na dipasu-pasu Jahowa do akka naposona di Kuba. Jala boi do huhilala hami na diurupi Jahowa hami pagodang-godangkon gellengnami asa makkaholongi Ibana. Saonari, huceritahon pe tu hamu piga-piga pengalamannami.

DIORAI MA ULAONTA DISI

Di taon 60-an dohot 70-an, maol hian do situasi ni akka dongan di Kuba. Dang boi dipakke Bale Harajaon. Akka misionaris pe diusir sian negara i. Godang do donganta bawa na poso ditakkup jala dipenjarahon. Bahkan kantor cabang na di Havana pe ditutup.

Ala songon i situasina, holan di akhir pekan ma hami mengunjungi akka huria. Ro ma hami mengunjungi sada huria di akhir pekan, dung i ro ma muse hami tusi di akhir pekan na mangihut. Asa unang curiga akka halak, biasana otik do diboan hami barang jala marsepeda do hami. Dibahen hami ma hira na mengunjungi keluarga hami. Dang pola maol on diulahon, alana kompak do hami sude songon keluarga. Bahkan sipata, olo do lupa hami na lagi kunjungan pengawas wilayah hami. (Mrk. 10:​29, 30) Ikkon manat situtu do hami mangulahon tugas on. Alana, jotjot do hami diihutton polisi jala disukkun-sukkuni. Asing ni i, akka dongan na manjalo hami di jabuna pe olo do gabe ditakkup molo tarboto disi hami manginap.—Rom 16:4.

Nang pe sederhana ngolu ni akka dongan, burju-burju do nasida tu hami. Misalna di piga-piga daerah, godang do rongit. Alai, olo do nasida mangalehon kelambuna tu hami. Hape, holan i do kelambu ni nasida. Asing ni i, adong do na rade manjalo hami di jabu ni nasida. Hape, susa do nasida. Alani i, sipata hami do na mamboan sipanganonnami, jala dibagi hami ma i tu nasida.

Tikki mengunjungi akka huria, dang boi diboan hami sude gellengnami. Alani i, holan sada ma diboan hami, jala omakku dohot itokku ma na mangurus gellengnami na asing. Alai sebenarna, adong do untungna mamboan bayi tikki kunjungan pengawas wilayah. Misalna, ditabunihon hami do akka publikasi di tas na marisi popok na kotor. Jadi molo dipareso polisi barangnami, dang mungkin olo nasida mambukka tas i.

Jago hian do istrikkon. Boi do denggan diurus ibana gellengnami huhut mendukung au gabe pengawas wilayah. Jala boi do au torus karejo di pabrik gula i. Biasana sahali manang dua hali saminggu, lembur do au asa unang pola karejo au di akhir pekan. Alai di pudian ni ari, muba ma jadwal karejokku. Dipangido ma au mengawasi akka dongan sakarejokku, jala ikkon karejo ma au torus ganup ari. Ikkon huihutton do jadwal i. Alai molo boi do huatur asa torus adong karejo ni anggotakku sahat tu akhir pekan, boi ma au lao mengunjungi akka huria. Jala saleleng karejo au disi, dang diboto boshu na so hea au masuk di akhir pekan.

TOKTONG MARLAS NI ROHA NANG PE GODANG PERUBAHAN

Di taon 1994, dipangido akka dongan na manguluhon di Kuba ma asa sude pengawas wilayah ro tu pertemuan khusus di Havana. Tikki i, 80 halak ma hami pengawas wilayah disi. Las hian do rohanami ala ujungna boi hami sude pajuppang disi. Di pertemuan i, dipaboa ma adong piga-piga penyesuaian na dibahen organisasi. Dung i, didok akka donganta i ma na lao dipaboa nasida do goar ni sude pengawas wilayah tu pamaretta. Tarsonggot hian ma hami mambege i!

Didok nasida, adong do dibahen nasida rapat dohot akka pamaretta. Tujuanna, asa boi denggan hubungan ni Saksi Jahowa dohot akka pamaretta di Kuba. Jadi, dipangido pamaretta ma goar ni sude pengawas wilayah. Alani i, setuju ma hami dipaboa goarnami tu nasida. Mulai sian i, gabe denggan ma hubungan ni Saksi Jahowa tu pamaretta di Kuba.

Ujungna, bebas ma muse hami marpungu dohot marbarita. Alai memang, dang diakkui dope Saksi Jahowa di Kuba. Di pudian ni ari, diboto hami ma sebenarna nga diboto pamaretta goar ni piga-piga pengawas wilayah. Alai, tetap do i dipangido nasida.

Di bulan September 1994, diloas pamaretta ma asa dibukka muse kantor cabangta. Ujungna, kantor cabang naung ditutup saleleng 20 taon boi tapakke muse.

Taon 1996, diundang ma hami asa melayani di Betel. Tarsonggot do hami. Jala didokkon hami ma adong dua nai gellengnami na ikkon diurus hami. Nang pe songon i, toktong do dipangido nasida hami asa tu Betel. Jadi, dijalo hami ma undangan i jala pinda ma hami sakeluarga tu Havana.

Memang, di mulana dang pola menikmati au na karejo di Betel on. Ala nungnga leleng au gabe pengawas wilayah, dang biasa au karejo di jolo ni komputer. Alai dipatogu akka dongan na di Betel do au, tarlumobi ma istrikku si Emilia. Diurupi nasida do au asa menyesuaihon cara marpikkirhu. Jadi ujungna, boi ma hunikmati tugashu di Betel sahat tu saonari.

Nungnga matua be hami saonari. Alai, las hian do rohanami ala adong kesempatan boi mananda godang dongan sahaporseaon, jala rap melayani Jahowa dohot nasida. Alai na terutama na mambahen las rohanami, i ma boi diida hami sude gellengnami dohot pahoppunami manomba Jahowa. Sarupa ma pakkilalaannami songon Apostel Johannes na mandok, “Dang adong be las ni rohakku na umbalga sian na mambege akka anakkokku mangihutton hasittongan.”—3 Joh. 4.

Nungnga hampir 30 taon hami melayani di Betel. Memang, dang sai mura situasinami ala nga matua jala marsahit-sahit. Nang pe songon i, torus do hami berupaya mangalehon na terbaik tu Jahowa. Saleleng 70 taon on hami melayani di Kuba, godang do tantangan na diadopi hami. Alai, toktong do hami marlas ni roha ala boi manomba Jahowa, “Debata na marlas ni roha”.—1 Tim. 1:11; Ps. 97:1.