SUKKUN-SUKKUN SIAN NA MANJAHA

Songon na didok di Galatia 4:​24, dua parjanjian aha do na dimaksud Apostel Paulus?

Tikki dipaboa si Paulus taringot istri ni si Abraham, i ma si Sara dohot si Hagar, didok ibana ma, “Songon sada gombaran do i sude. Dua borua i manggombarhon dua parjanjian.” (Gal. 4:​22-24) Najolo didok di publikasitta, dua parjanjian na dimaksud si Paulus, i ma Parjanjian Hukum dohot Parjanjian na Imbaru. Alai dung bagas diparsiajari taringot on jala dirimangi, ikkon tasesuaihon do pangattusionta. Ra na dimaksud si Paulus disi, dang taringot Parjanjian na Imbaru, alai Parjanjian tu si Abraham. Tabahas ma piga-piga alasanna.a

Dipatudos si Paulus do si Hagar, hatoban i songon Dolok Sinai. (Gal. 4:25) Jadi si Hagar i, i ma Parjanjian Hukum na dilehon di Dolok Sinai di taon 1513 SM. (2 Mus. 19:​5, 6) Ala dang sempurna dope, dang adong nanggo sada pe halak Jahudi na boi sempurna mangihutton sude na didok di Patik ni si Musa. Jadi, parjanjian hukum i mangurupi nasida mamboto hatoban ni dosa dope nasida. Jala, parjanjian hukum i pe mangurupi nasida mangattusi ise do Messias i. Alana, holan Messias do na boi sempurna mangihutton sude na dipaboa di Patik i. Tikki dilehon Messias ngoluna gabe tobusan, boi ma sude jolma dipalua sian dosa dohot hamatean. (Gal. 3:​19, 24, 25) Dung dipasaut Jesus i, dang marlakku be Patik ni si Musa.—Rom 10:4.

Alai dibandingkon si Paulus do si Hagar tu si Sarah, “borua na merdeka” na manubuhon anak “alani janji ni Debata”. (Gal. 4:23) Janji na didok disi, i ma Parjanjian tu si Abraham. (Gal. 3:29; 4:28) Dipaboa ma taringot parjanjian i di 1 Musa 22:​18, “Mandapot pasu-pasu ma sude bangso di tano on alani pinopparmu [Abraham]. Ai nungnga dioloi ho hatakku.”

Ala adong parjanjian tu si Abraham i, gabe tamba ma hatorangan na taboto taringot janji ni Jahowa na di Taman Eden. (1 Mus. 3:15) Gabe taboto ma sian pinoppar ni si Abraham do ro ‘pinoppar’ i. Di pudian ni ari, dipatorang si Paulus ma Jesus Kristus do ‘pinoppar’ i. Alai, dang holan ibana. Dohot do tong akka “sisean ni Kristus”, i ma 144.000 halak na lao mamaretta rap dohot ibana di harajaonna. (Gal. 3:​16, 29; Pgk. 14:​1-3) Asing ni i, ala adong parjanjian tu si Abraham i, mandapot godang pasu-pasu ma akka halak na unduk tu Kristus.

Boasa dibahen si Paulus “gombaran” on? Didok ibana, molo Patik i do torus na diulahon halak Jahudi, torus ma nasida gabe hatoban ni dosa, dos songon si Hagar. Alai molo dijalo nasida ‘pinoppar’ ni si Abraham, i ma Jesus Kristus, gabe halak na merdeka ma nasida, dos songon si Sara. Gabe boi ma nasida malua sian dosa dohot hamatean. (Joh. 8:​32-34) Alai molo dang dijalo nasida Jesus, berarti dang diattusi nasida tujuan utama ni Parjanjian Hukum i, i ma mangurupi nasida mamboto ise do Kristus i.

Tu halak Kristen na di Galatia do dibahen si Paulus suratna on. Godangan sian nasida dang halak Jahudi jala dang hea mangulahon na didok di Patik ni si Musa. Alai, adong do piga-piga halak Jahudi di huria i na mamaksa akka dongan na so Jahudi asa mangihutton Patik i, termasuk ma asa marsunat. Didok si Paulus, dang masuk akkal pangidoan ni nasida i. Alana, nungnga “dipalua” be nasida jala nungnga gabe sisean ni Jesus. Alani i, dang porlu be diihutton nasida Patik ni si Musa.—Gal. 5:​1, 10-14.