Parrohahon ma Songon dia Hamu Manangihon

1-2. (a) Aha do na dilehon Jahowa tu naposona saonari? (Psalmen 23:​1, 2, 5) (b) Aha do na lao tabahas di artikel on?

SAONARI, dilehon Jahowa do godang parbinotoan tu hita marhite Bibel. Pasti setuju do hita tu si Daud na mandok, “Jahowa do Siparmahan di au. Dang hurangan manang aha au.”—Jaha Psalmen 23:​1, 2, 5.

² Sada cara ni Jahowa lao mangajari hita, i ma marhite parpunguan. Di parpunguan, jotjot do hita mambahas bahan na hea taparsiajari sebelumna. Nang pe ‘nungnga togu hita di hasittongan’, porlu do di hita sipaingot sisongon i. (2 Ptr. 1:12) Alai tikki tatangihon bahan naung jotjot dibahas di parpunguan, olo do sipata dang pola talehon rohatta manangihon i. Molo songon i do na tahilala, artikel on boi do mangurupi hita. Jadi lao tabahas ma boasa hita porlu mamparrohahon sude na dipasahat di parpunguan. Dung i, tabahas ma aha na porlu diulahon akka na mandapot bagian di huria asa lomo roha ni akka na ro manangihon bagian ni nasida. Tabahas ma muse piga-piga saran asa lam denggan hita mamparrohahon. Alai na parjolo, taalusi ma sukkun-sukkun on: Ise do sasittongna na mangajari hita di parpunguan?

TAINGOT MA JAHOWA DO NA MAKKATAI TU HITA

3. Songon dia do cara ni Jahowa makkatai tu hita, jala songon dia do akka naposona mamakke Hatana lao mangajari?

³ Tikki tajaha Bibel, songon na makkatai do Jahowa tu hita. (2 Tim. 3:​16, 17) Diattusi Jesus do i jala malo do ibana patorakkon Hata ni Debata. Alani i, gabe sukkun-sukkun ma roha ni halak na mambege ibana, “Boasa boi godang diboto ibana taringot tu Surat na Badia? Hape so hea ibana marsiajar di sikkola agama?” (Joh. 7:15) Kagum do akka halak na marserep ni roha tikki manangihon Jesus patorakkon Hata ni Debata. Jala halak Kristen di abad na parjolo pe, ditiru do na diulahon Jesus. Misalna, Apostel Paulus dohot si Apollos. Jotjot do dikutip nasida Surat na Badia tikki mangajari na asing. (Ul. 17:​2, 3; 18:​24, 28) Songon i do tong na taulahon saonari. Akka artikel, jamita, dohot video dibahen do mangihutton isi ni Bibel. Biasana, kagum do akka halak na parjolo sahali ro tu parpunguanta mangida caratta marsiajar Bibel. Jadi, akka donganta na mandapot bagian di parpunguan ikkon mamakke Bibel do tikki mangajari. Unang ma holan manjahahon ayat. Alai, ikkon diurupi nasida do akka na ro asa mangattusi jala mangulahon i.—Luk. 24:32.

4. Boasa massai penting mamparrohahon aha na dipasahat di parpunguanta?

⁴ Di Bibel, hata “manangihon” biasana lapatanna mangoloi sasahalak. Alani i tikki tajaha Bibel di parpunguanta, sarupa do i songon na manangihon Jahowa. Gabe taattusi ma aha na dipangido Ibana jala rade do hita mangulahon i. Pos do rohatta, pasti las do roha ni Jahowa molo tatangihon Ibana jala taulahon lomo ni rohana.—Poda 27:11.

BOASA IKKON MANAT TAPARROHAHON ACARA DI PARPUNGUAN?

5. Ala holong rohatta tu Jahowa, aha do na taulahon? (Johannes 4:​23, 24; 1 Johannes 5:3)

⁵ Ala holong rohatta tu Jahowa. (Mat. 22:37) Lam godang na taparsiajari taringot Jahowa, gabe lam balga ma holongta tu Ibana. Ala balga holongta tu Ibana, gabe lomo ma rohatta mamparrohahon aha na didok Ibana di Bibel, mangoloi Ibana, jala manomba Ibana hombar tu lomo ni rohana.—Jaha Johannes 4:​23, 24; 1 Johannes 5:3.

6. Di parpunguanta, aha do na taparsiajari lao mangurupi na asing?

⁶ Ala holong rohatta tu halak na asing. (Mat. 22:39) Di parpunguanta, diajari Jahowa do hita asa taurupi dongan sahaporseaon dohot akka halak na so mananda Ibana. Misalna, dibahen do brosur Haholongi ma Akka Halak—Urupi ma Nasida Gabe Sisean. Di brosur on, diurupi do hita asa tapatudu sifat na denggan tu akka halak di ulaon marbarita. Maol do dihilala hamu lao mamulai pakkataion tu halak na asing? Molo songon i, parrohahon ma akka donganta na pasahatton tugas siswa di parpunguan parsitongaan ni minggu.

7. Boasa massai penting mangoloi Jahowa?

⁷ Ala lomo rohatta asa marlas ni roha saonari sahat tu salelengna. Songon na didok Jahowa tu akka naposona najolo, asa marlas ni roha hita jala mangolu salelengna, ikkon taoloi do Ibana. (5 Mus. 32:​44-47) Molo manat taparrohahon acara di parpunguan, gabe dipatogu ma rohatta jala boi hita sabar mangadopi situasi na maol sahat tu na ro tano na imbaru. (Rom 8:25) Alani i, massai penting do manangihon Jahowa saonari jala torus sibuk mangulahon ulaon manomba Ibana.—Mat. 24:​42-44; Pgk. 1:3.

ASA LOMO ROHA NI AKKA DONGAN MANANGIHON

8. Boasa donganta na marjamita ikkon berupaya lam denggan tikki mangajari?

⁸ Aha do na porlu diulahon akka donganta na marjamita? Ikkon denggan do dipersiappon ibana jamitana i. Jala ikkon dipastihon ibana do sude hatoranganna sian Bibel. Molo diulahon ibana songon i, boi ma akka peminat mangattusi aha na diajarhon di Bibel. Asing ni i, akka dongan sahaporseaon pe boi ma lam mangattusi hatorangan sian Bibel jala boi mangulahon i. Ingot ma, bagian aha pe na dipasahat hamu di parpunguan boi do i mangurupi halak na asing. Jadi molo dapot bagian hamu, pikkirhon ma akka saran na di toru on asa boi lam denggan hamu mangajari. Memang, akka saran on dibahen tu akka donganta na mandapot khotbah umum. Alai, boi do tong tapakke saran on tikki pasahatton bagian na asing di parpunguanta.—2 Tim. 4:2; Tit. 1:9.

9. Aha do na porlu diulahon hamu asa mura diattusi jamitamuna?

⁹ Takkas ma patorang. Molo dilehon tu hamu tugas marjamita, pasti lomo do rohamuna asa mura i diattusi akka na manangihon. Alai molo dang sederhana caramuna pasahatton i, maol ma i diattusi nasida. Molo songon i situasina, aha do na porlu diulahon hamu? (1) Di mula ni jamitamuna, paboa ma gagasan utamana. (2) Patorang ma gagasan utamana i sada-sada. Alai molo dung sae hamu patorakkon sada gagasan, boi do hamu so satokkin asa diboto na manangihon na lao dilanjutton hamu ma gagasan na mangihut. (3) Di ujung ni jamitamuna, ulangi ma muse gagasan utamana.

10. Boasa ikkon lomo rohamuna tu bahan ni jamita na lao dipasahat hamu?

¹⁰ Ikkon lomo do rohamuna tu bahan i. Molo lomo rohamuna tu bahanna, gabe semangat ma hamu pasahatton i. (Poda 2:​4, 5; Ul. 4:20) Rimangi ma gagasan dohot akka ayat na adong di bahan i. Sahalak donganta bawa na marumur 70-an sian Amerika Serikat paboahon taringot sada jamita na hea dibege ibana tikki poso ibana. Didok ibana, “Di tikki i, jamitana paboahon massai penting do mangarimangi aha na tajaha sian Bibel. Boi do huida semangat do parjamita i pasahatton jamitana. Boasa? Pasti ala lomo do rohana tu bahan i. Jala diboto ibana aha manfaatna mangulahon i. Mulai sian i, gabe lam semangat ma au manjaha Bibel jala mangarimangi i. Hasilna, gabe lam jonok ma au tu Jahowa.”

11. Tikki marjamita, boasa porlu talehon saran na spesifik? (1 Timoteus 4:​13-16)

¹¹ Pikkirhon ma aha na dihaporluhon na manangihon jala paboa ma cara mangulahon i. Tikki paboahon cara mangulahon poda sian Bibel, lehon ma saran na spesifik. Unang ma holan paboahon akka naung diboto nasida. Tiru ma Apostel Paulus. Dipaboa si Paulus do piga-piga saran na spesifik tu si Timoteus asa toktong jonok ibana tu Jahowa tikki melayani di Epesus. (Jaha 1 Timoteus 4:​13-16.) Jadi, massai penting do mamikkirhon aha na dihaporluhon na manangihon jala paboa ma boha cara mangulahon i.

12. Boasa ikkon songon na makkata-hatai hita tikki pasahatton jamita?

¹² Marsoara ma hamu tikki marlatik. Tikki marjamita, marsitutu ma pasahatton i songon na makkata-hatai, unang holan manjahahon bahanna. Di brosur Cara Asa Lam Denggan Manjaha dohot Mangajari didok, “Makkata-hatai ma songon na somal. Unang ma songon na dibahen-bahen, asa diboto akka halak na holong do rohamuna tu nasida jala rikkot do barita i.” Molo diulahon hamu songon i, gabe manat ma diparrohahon halak jamitamuna jala olo ma nasida mangulahon poda na sian Bibel.

13. Aha do manfaatna molo tapangido saran sian donganta naung berpengalaman? (Ida gambar.)

¹³ Pangido ma saran sian naung berpengalaman. Andorang so marjamita, boi do dipatudu hamu catatanmuna tu ibana. Asing ni i, boi do dipangido hamu tu ibana asa dibege ibana hamu marlatik. Molo adong saran sian ibana, ulahon ma i. Sipata, olo do ra dang taboto bagian dia na hurang takkas sian jamita i. Alai halak na asing boi do mamboto i, jala boi do paboaonna tu hamu bagian dia na porlu dipatakkas. (Poda 1:5) Molo berupaya hita lam denggan marjamita, gabe mura ma i diattusi na manangihon. Jala boi ma diulahon nasida poda sian Hata ni Debata.a

CARA ASA LAM DENGGAN MANANGIHON

14. Boha do carana maniru panurat ni Psalmen 119? (Psalmen 119:​24, 111, 167)

¹⁴ Torus ma taingot na massai penting do akka sipaingot sian Jahowa. Porlu do di hita sipaingot sian Debata, tarlumobi di “tikki hasusaan” di ari parpudi on. (2 Tim. 3:1) Jadi molo tahilala adong parsiajaran songon na mulak-ulak dibahas, denggan ma i tatangihon. Tatiru ma panurat ni Psalmen 119 na torus mangargai sipaingot ni Jahowa.—Jaha Psalmen 119:​24, 111, 167.

15. Songon dia do asa taingot na massai penting do na diajarhon di parpunguan?

¹⁵ Torus ma taingot, massai penting do sude na diajarhon Jahowa di parpunguan. Taparrohahon ma na masa tu halak Israel di padang gurun. Di tikki i, dilehon Jahowa do tu nasida manna. (2 Mus. 16:​15, 31) Di mulana, las do roha ni nasida ala tabo do manna i jala bergizi. Alai lam leleng gabe bosan do nasida, ala holan i torus na diallang nasida. (4 Mus. 21:5) Aha ma parsiajaranna? Saonari, adong do piga-piga na diajarhon di parpunguanta naung hea tabahas sebelumna. Alai, unang ma bosan hita manangihon i. Taingot ma, sude na diajarhon Jahowa di parpunguan, hadiah do i sian Ibana. Ikkon tadok do di rohatta na massai penting do i sude jala nungnga manat be i dipikkiri naposo haposan. Sudena i boi do mangurupi hita mambahen keputusan na denggan, jala mandapot hangoluan saleleng ni lelengna—Poda 3:​13, 16-18; Joh. 17:3.

16. Aha do na diulahon piga-piga donganta asa toktong denggan mamparrohahon acara di parpunguan? (Ida kotak “Saran Asa Lam Denggan Manangihon”.)

¹⁶ Coba ma akka saran on. Parrohahon ma na diulahon piga-piga donganta on. Misalna, si Ashley naung melayani Jahowa lobi sian 30 taon. Ibana mandok, “Menuruthu massai penting do persiapan. Alana molo dang persiapan au, gabe dang boi au mangalehon komentar di parpunguan jala dang fokus be au na marpungu i.” Asing ni i, si József naung melayani Jahowa saleleng 52 taon mandok, “Molo adong sada topik naung jotjot hubege, sai berupaya do au mangalului parsiajaran aha muse na boi dapottu sian i. Nang pe adong donganta na so pola malo marjamita, berupaya do au asa fokus tu na dipasahat ibana, dang tu cara ni ibana paboahon i. Alana, sian Bibel do na diajarhonna i.”

17. Aha do muse na mangurupi hamu asa boi fokus di acara parpunguan? (Ida gambar.)

¹⁷ Boi do tong dicoba hamu akka saran on: (1) Unang ma pagodangku hamu mangan asa unang mondok-ondok tikki marpungu. (2) Tibu ma hamu ro, jala lului ma ingananmuna hundul. (3) Atur ma HP manang tabletmuna asa unang makkuling soarana. (4) Pikkirhon ma topik na naeng dibahas. (5) Manat ma parrohahon akka na mandapot bagian. (6) Bahen ma catatan manang bahen ma gambar taringot poin-poin na penting. (7) Dohot ma hamu mambukka Bibel, jala pikkirhon ma hubungan ni ayat na dijaha i tu topik na dibahas. (8) Pikkirhon ma songon dia hamu mangulahon na dibahas i tikki mangurupi akka dongan di huria dohot akka halak di ulaon marbarita. (9) Di parpunguan wilayah dohot regional, ida ma daftar acara dohot temana, judul ni akka jamita, dohot akka ayat kunci. (10) Andorang so dimulai dope acara, hundul ma hamu jala denggan ma tangihon musik dohot video presentasi.

TORUS MA TANGIHON JAHOWA

18. Boasa ikkon manat taparrohahon sude acara di parpunguan?

¹⁸ Jadi torus ma manat hita mamparrohahon sude acara di parpunguan. Alana, i do cara ni Jahowa manogu-nogu hita tu “dalan na sittong”. (Ps. 23:3; 31:3) Jala porlu do hita diurupi Jahowa asa toktong mangulahon na sittong. Alani i, “parrohahon ma songon dia hamu manangihon” jala ulahon ma sude na diajarhon di acara parpunguan. (Luk. 8:18) Taingot ma, molo olo hita diurupi Jahowa, marlas ni roha ma hita saonari. Jala di ari na naeng ro, boi ma hita mangolu saleleng ni lelengna.—Ps. 119:​2, 14.