Manfaat na Tadapot ala Adong Kelompok Dinas Lapangan

1-2. Boha do perasaan ni akka donganta ala boi gabe bagian sian kelompok dinas lapangan?

DIINGOT hamu dope tikki disetujui hamu gabe penyiar di huria? Pasti las hian do rohamuna di tikki i. Alana, nungnga gabe bagian sian punguan ni akka halak na mamuji Jahowa hamu. (Ps. 148:​1, 2, 12, 13) Jala hamu pe gabe bagian sian kelompok na ummetmet di huria, i ma kelompok dinas lapangan (KDL). Didok Jesus do tu akka siseanna asa dibaritahon nasida barita na uli “di liat portibi on”. Boi do KDL mangurupi hita mangulahon paretta ni Jesus i.—Mat. 24:14.

² Boha do perasaanmuna ala boi gabe bagian sian KDL? Sahalak donganta borua na margoar si Wendya mandok, “Godang hian do bantuan na hudapot sian KDL. Misalna, diurupi do au gabe lam denggan marbarita dohot mangajari, dijujui do au asa lam jonok tu Jahowa, jala lam godang do donganku.” Sahalak donganta bawa na margoar si Rich mandok, “Tugas na istimewa do di au boi gabe pengawas KDL. Molo akka penyiar, nasida do na mangurupi sasahalak asa boi tardidi. Alai molo pengawas KDL, bertanggung jawab do ibana mangurupi na baru tardidi i asa lam jonok tu Jahowa jala boi mangulahon akka tugas di organisasi.” Asing ni i, sahalak donganta borua na margoar si Dinah mandok, “Luar biasa do boi gabe bagian sian KDL. Nungnga huanggap be nasida songon keluargakku sandiri.”

3. Aha do na lao tabahas di artikel on?

³ Di artikel on, lao tabahas ma aha do tugas ni pengawas KDL dohot asistenna. Jala aha na porlu diulahon nasida lao mangurupi akka dongan di KDLna. Dung i, tabahas ma aha do na porlu taulahon lao mendukung KDLta. Jala tabahas ma manfaat aha do na tadapot ala adong KDL.

PENGAWAS KDL DOHOT ASISTENNA

4. (a) Aha do tugas ni pengawas KDL? (b) Akka aha do saran na boi diulahon pengawas KDL lao mangurupi KDLna? (Ida kotak “Saran tu Pengawas KDL”.)

⁴ Pengawas KDL, i ma sahalak sintuab na ditugasson punguan ni akka sintua lao mangurupi akka penyiar di KDLna asa lam jonok tu Jahowa. Aha do na porlu diulahon ibana? Na parjolo, ikkon botul-botul parduli do ibana tu ganup penyiar di KDLna. (Poda 27:23) Ikkon takkas do ditanda ibana nasida. Jala ikkon taratur do ibana menghubungi nasida lao mamboto situasi ni nasida. Molo dibahen ibana songon i, boi ma dipatogu ibana haporseaon ni akka dongan, boi gabe dongan di tikki susa, jala boi ma dilehon ibana bantuan di tikki na pas. (Poda 12:25; Jes. 32:2; Jak. 2:​15-17) Na paduahon, diurupi ibana do ganup penyiar asa toktong sibuk di ulaon marbarita. Marsitutu do ibana asa ro tu KDLna, tarlumobi di akhir pekan. Jala rap marbarita do ibana dohot ganup penyiar di KDLna. Tujuanna, lao patoguhon jala mangalatik akka penyiar i. Alai, olo do sipata dang boi ibana ro tu KDLna. Molo songon i, ikkon diatur ibana do asa asistenna manang penyiar na asing mangurupi KDLna. Na patoluhon, diurupi ibana do akka donganta bawa naung tardidi asa memenuhi syarat mangulahon akka tugas di huria. (1 Tim. 3:1) Dipuji ibana do nasida, dilehon ibana nasehat na sian Bibel, jala dilatik ibana do nasida asa memenuhi syarat gabe parhobas dohot sintua. Jadi, tugas na massai penting do on. Alani i, ikkon manat do punguan ni akka sintua mamillit sintua na dia na cocok mangulahon tugas on.

5. Aha do tantangan na diadopi piga-piga pengawas KDL?

⁵ Godang do tantangan na diadopi pengawas KDL tikki naeng mangurupi KDLna. Misalna, parrohahon ma pengalaman ni donganta si Jörg, pengawas KDL na sian Jerman. Dos songon akka sintua na asing, godang do tugas na ikkon diulahon ibana di huria. Didok si Jörg, “Dang sai mura mangulahon tugas ni pengawas KDL huhut mangulahon tugas na asing di huria. Ala sibuk au, gabe dang boi taratur au manghubungi ganup penyiar di KDLnami.” Adong do muse donganta si Abel, i ma sahalak sintua naung marumur 70 taon sian Uganda. Didok ibana, “Otik do sintua dohot parhobas di hurianami. Alani i, gabe godang do akka penyiar di sada-sada KDL. Gabe dang boi au jotjot manggembalahon nasida songon na huharappon.” Asing ni i, donganta si Obed, sahalak sintua sian Suriname mandok, “Lomo do rohakku mangalatik halak na asing. Alai, porlu do godang tikki dohot gogo lao mangulahon i. Jala sipata, dang pittor tarida hasil ni pelatihan i. Ala sibuk au, gabe jarang do au mangalatik halak na asing.” Attong, aha do na boi mangurupi akka sintua na mangadopi situasi sisongon i?

6. Aha do manfaatna di pengawas KDL molo otik penyiar di KDLna?

⁶ Molo boi, unang pagodangku akka penyiar di sada KDL. Tujuanna, asa boi akka pengawas KDL takkas mamboto situasi ni ganup penyiar di KDLna jala mangurupi nasida asa toktong jonok tu Jahowa. Alai, boha do molo otik sintua di huria? Daripada pagodangku dibahen penyiar di sada KDL, tumagon do dipillit punguan ni akka sintua sahalak parhobas lao mangurupi sada KDL. Molo otik penyiar di sada KDL, boi ma akka pengawas KDL mangulahon tugas ni nasida na uppetting, i ma mangurupi akka dongan asa toktong setia tu Jahowa.

7. Molo otik sintua di huria, aha do na porlu diulahon akka pengawas KDL lao mangurus KDLna? (1 Petrus 5:2) (Ida gambar.)

⁷ Molo ditugasson hamu gabe pengawas KDL jala dang pola godang sintua di huriamuna, aha do na porlu diulahon hamu? Marsitutu ma hamu mangalatik asistenmuna asa diurupi ibana hamu mangurus biru-biru ni Debata. (Jaha 1 Petrus 5:2.) Lehon ma tugas tu asistenmuna lao mangurupi KDLmuna. Misalna, pangido ma ibana sasahali memandu parpunguan lao marbarita (PDL) jala rap marbarita dohot akka dongan di KDLmuna. Hatai ma tu ibana aha na porlu diulahon hamu lao mangurupi KDLmuna. Togihon ma ibana mandongani hamu tu kunjungan penggembalaan. Andorang so kunjungan i, bahas ma boha carana patoguhon na lao dikunjungi i. Dung sae kunjungan i, puji ma ibana jala lehon ma saran na cocok tu ibana. Molo diulahon hamu songon i, boi ma annon asistenmuna memenuhi syarat gabe pengawas KDL. (2 Tim. 2:2) Asing ni i, pangido ma bantuan sian akka dongan na togu haporseaonna. Misalna, akka perintis manang akka dongan naung berpengalaman. Pangido ma nasida asa rap marbarita jala mangalatik akka penyiar na baru. Pasti boi do diurupi nasida akka penyiar na baru lao mamukka pakkataion, manjuppangi muse, manang manguluhon parsiajaran Bibel. Saonari, tabahas ma tolu cara na boi taulahon lao mendukung KDL.

DUKUNG MA KDLMUNA

8. Aha do na porlu diulahon hamu lao mendukung KDLmuna? (Rom 1:12)

⁸ Ro ma hamu. Molo rap marbarita hamu dohot akka dongan di KDLmuna, pasti boi do hamu “masipatoguan”. (Jaha Rom 1:12.) Asing ni i, gabe lam percaya diri ma hamu di ulaon marbarita. Alai, boha do molo dang boi ro hamu tu KDLmuna ala karejo hamu? Coba ma pangido tu bosmuna atik boha boi disesuaihon ibana jadwalmuna karejo. (Neh. 2:​4-6) Boha do molo hurang sehat hamu saonari, manang nungnga lam matua? Coba ma makkatai hamu tu pengawas KDLmuna. Boi do ra dibahen ibana Zoom asa marbarita hamu dohot akka dongan di KDLmuna marhite telepon manang surat. Boha do molo poso dope hamu jala sehat, alai maol di hamu mangatur tikki asa ro tu KDLmuna? Molo songon i, marjanji ma hamu lao marbarita dohot sasahalak di KDLmuna ganup minggu. Pikkirhon ma aha na uppetting di ngolumuna jala songon dia hamu mangatur tikki. (Rom 12:11; Kol. 4:5) Molo marsitutu hamu mangulahon i, pasti godang do manfaatna. Tangiakkon ma i tu Jahowa. Pos ma rohamuna bahenonna do hamu “rade jala margogo mangulahon i”.—Plp. 2:13.

9. Aha do na porlu diulahon hamu asa lam akrab dohot akka dongan di KDLmuna? (Rom 12:13)

⁹ Burju ma hamu. Molo ‘dipatudu hamu burju ni roha’, pasti gabe lam akrab do hamu dohot akka dongan di KDLmuna. (Jaha Rom 12:13.) Misalna, boi do ditawarhon hamu asa dibahen PDL di jabumuna. Asing ni i, biasana di piga-piga huria margatti-gatti do ganup KDL menjamu pembicara tamu. Molo pe dang dohot parjamita i, adong do piga-piga KDL na tetap mambahen acara ramah tamah jala rap mangan dung sae parpunguan. Sahalak perintis istimewa na margoar si Sarah mandok, “Molo naeng huundang akka dongan tu jabukku, bingung do au aha na lao huparade. Alai ala pergaulanna i do na uppetting, biasana sipanganon na sederhana do na huparade.” Jadi berupaya ma hita patuduhon holong, burju ni roha, jala tabahen ma akka dongan di KDLta songon keluargatta. Molo taulahon i, gabe lam jonok ma hita tu Jahowa dohot tu nasida.—Neh. 8:10; Ul. 20:35.

10. Aha do na porlu taulahon asa lam denggan marbarita dohot mangajari? (Poda 1:5; 27:17) (Ida gambar.)

¹⁰ Berupaya ma hamu asa lam denggan marbarita dohot mangajari. Molo lam denggan hita marbarita dohot mangajari, pasti gabe lam semangat ma hita marbarita dohot akka dongan di KDLta. Adong do na porlu diupayahon hamu asa lam denggan di ulaon marbarita? Coba ma sukkun pandapot ni sahalak perintis manang sahalak penyiar naung berpengalaman di KDLmuna. (Jaha Poda 1:5; 27:17.) Dung i, paboa ma tu pengawas KDLmuna taringot aha lao ditingkatton hamu. Pasti lomo do rohana mangurupi hamu. Jala, pangido ma muse bantuan ni akka dongan na asing di KDLmuna. I ma na diulahon sahalak donganta borua na margoar si Heather. Memang di mulana maila do ibana mangido bantuan. Alai didok ibana, “Hupangido ma bantuan tu sahalak perintis lao mangurupi au manjuppangi muse. Burju hian do ibana. Jala, diatur ibana do tikkina asa boi rap marbarita dohot au. Bahkan, diurupi do au lao manguluhon parsiajaran Bibel dohot sada kunjunganku. Alani i gabe lam semangat ma au di ulaon marbarita. Las hian do rohakku.” Takkas ma, godang do na boi taulahon lao mendukung KDLta.

MANFAAT ALA ADONG KDL

11-12. Songon dia do KDL mangurupi hamu asa toktong jonok tu Jahowa? Paboa ma sada pengalaman.

¹¹ Gabe lam jonok tu Jahowa. Taida ma akka aha do manfaat na tadapot ala gabe bagian sian KDL. Marhite KDL, diparrohahon Jahowa do akka donganta na porlu godang bantuan. Misalna, akka na mabalu, akka na so marama na so marina, dohot akka na matua. Boi ma nasida mandapot kunjungan penggembalaan na pas di tikkina sian pengawas KDLna. (1 Tes. 2:8; Jak. 1:27) Asing ni i, boi do tong tadapot godang pelatihan asa lam denggan marbarita dohot mangajari. Jala, akka donganta bawa naung tardidi pe dilatik do asa memenuhi syarat mangulahon akka tugas di huria.—1 Tim. 3:10.

¹² Parrohahon ma pengalaman ni donganta si Wendy na dipaboa nakkin. Godang do dapotna manfaat sian KDL. Didok ibana, “Sogo do roha ni bapak tikki gabe Saksi Jahowa au dohot omak. Alani i, gabe dang boi jotjot omak marbarita di akhir pekan dohot KDLna. Alai molo au diloas bapak do marbarita. Adong ma sahalak donganta borua naung matua na jotjot mandongani au. Perintis do ibana. Ibana do na mangalatik au asa lam denggan marbarita jala asa toktong aktif di huria. Hea do piga-piga hali pengawas KDLnami mangalehon poda na sian Bibel na mangurupi au sahat tu saonari.”

13. Aha do muse manfaat na tadapot ala adong KDL? (Ida gambar sampul.)

¹³ Gabe adong ma donganta na sai makkaholongi jala mangurupi hita. Molo jotjot hita marbarita dohot akka dongan di KDLta, boi ma lam akrab hita tu nasida. (Plp. 1:27) Ala dang pola godang penyiar di KDLta, gabe lam mura ma akka na parsip-sip manang parila mandapot ale-ale. (2 Kor. 6:13) Asing ni i, sai rade do akka dongan di KDLta mangurupi hita. Misalna, tikki marsahit hita, tikki lungun rohatta, manang tikki mate na tahaholongi. (1 Tes. 5:14) Jadi, porlu do di hita ale-ale tarlumobi ma ala nungnga lam jonok hasusaan bolon i. (Mat. 24:21) Memang dang pittor mago sitaononta. Alai, ala adong do akka dongan na makkaholongi jala mendukung hita, gabe sanggup ma hita mangadopi sudena i.—Poda 17:17.

14. Songon dia do KDL mangurupi hita tikki masa bencana manang situasi na maol?

¹⁴ Sai adong do bantuan tikki masa bencana manang situasi na maol. Pasti sude do hita porlu diurupi tikki masa bencana alam, sahit na menular, penganiayaan, manang susa di parhepengon. Molo masa i, rade do akka pengawas KDL mangurupi hita. Misalna molo masa bencana, dihubungi ibana do ganup keluarga na adong di KDLna. Jala disukkun ibana ma aha na dihaporluhon nasida, songon ubat, sipanganon, siinumon, tempat tinggal, manang pakkean. Molo nungnga diboto pengawas KDL taringot on, pittor diurupi ibana ma nasida. Bekerja sama do akka pengawas KDL dohot Panitia Dinas Sidang lao mambahas akka ise do na terutama porlu diurupi di situasi sisongon i. Jadi pos ma rohamuna, sai rade do KDL mangurupi hamu tikki masa bencana manang situasi na maol!

15. Aha do na porlu diupayahon sude naposo ni Jahowa?

¹⁵ Songon naung tabahas, massai godang do na manomba Jahowa di surgo dohot di tano on. Misalna di surgo, adong do marmiliar akka suru-suruan na setia. Di tano on, lobi sian sia juta halak na manomba Jahowa jala lam martamba dope i sahat tu saonari. (Sak. 8:23; Pgk. 5:11) Marsada do sude na manomba Jahowa lao pasahatton barita na uli taringot Harajaon ni Debata! (Pgk. 14:​6, 7) Alani i, torus ma tadukung KDLta. Alana godang do manfaat na tadapot sian i, jala diurupi do hita mamuji Jahowa sian nasa rohatta.—Ps. 111:1.