Cara asa Toktong Kompak tu Akka Dongan

1. Didia do boi dapotta dongan na burju?

“SUSA do na tahilala molo dang adong donganta. Takkas do diboto Jahowa porlu dongan di hita.” Setuju do hamu tu lirik ni ende na adong di JW Broadcasting na marjudul “Dongan na Burju”? Sada pasu-pasu do di hita boi mandapot dongan na burju di akka naposo ni Jahowa! (Ps. 119:63) Alana, sada keluarga do hita sude jala dipasada di bagasan holong.

2. Ikkon songon dia do hubungatta tu akka donganta?

² Pasti dang olo hita holan sekedar mananda akka donganta. Alai berupaya do hita asa kompak tu nasida jala takkas mananda nasida. Boi pe hita sude marsada ala holong do rohatta tu Jahowa dohot tu Jesus. (Joh. 13:35) Alai ikkon berupaya do hita asa boi kompak tu akka donganta. Ala dang sempurna hita, olo do sipata adong masalah na tahadapi na mambahen hita gabe maol kompak tu akka donganta.

3. Boasa dang sai mura toktong kompak tu akka donganta?

³ Memang adong do piga-piga donganta na kompak tu hita ala sarupa na tahalomohon manang mirip sifatta. Alai olo do ra maol hita kompak tu piga-piga dongan di huria. Sipata dang sapandapot hita dohot akka donganta. Manang dang sarupa sifatta dohot cara marpikkirta. On boi mambahen gabe dang nyaman hita tikki rap dohot nasida. Asing ni i, adong do donganta na marsahit na parah manang mengalami gangguan mental na mambahen hita gabe maol jonok tu nasida. Saonari tabahas ma contoh na dibahen Jesus na boi mangurupi hita asa toktong kompak tu akka donganta, nang pe adong tantangan na tahadapi. Alai na parjolo, tabahas ma akka sifat na ikkon tapatudu asa boi toktong kompak tu akka donganta.

BOI DO HITA TOKTONG KOMPAK MOLO TAPATUDU SIFAT NA DENGGAN

4. Boha do carana asa boi toktong kompak tu akka donganta?

⁴ Asa boi toktong kompak tu akka donganta, ikkon taida do akka na denggan sian nasida. Talehon ma tikkitta rap bergaul dohot nasida asa taboto akka sifat ni nasida na denggan. I ma na diulahon Apostel Paulus. Lomo hian do rohana asa boi rap dohot akka dongan sahaporseaon. Didok ibana tu akka halak na di huria Tessalonik, “Dibahen hami do sude cara lao pajuppang dohot hamu.” (1 Tes. 2:17) Godang do akka dongan na merasa asa boi kompak tu akka dongan na asing, ikkon pajuppang langsung do nasida jala rap bergaul. Boi do taulahon i tikki marbarita, di parpunguan, dohot di kebaktian. Alai molo dang denggan hubungatta tu sasahalak, dang cukkup holan bergaul. Adong do muse na ikkon taulahon. Aha ma i?

5. Aha do na boi mangurupi hita asa toktong kompak tu akka donganta nang pe adong masalah? Bahen ma contoh. (Kolosse 3:12)

⁵ Asa boi toktong denggan hubungatta tu akka donganta, ikkon tapatudu do akka sifat na denggan. (Jaha Kolosse 3:12.) Misalna serep ni roha, sabar, haburjuon, dohot asi ni roha. Molo tapatudu akka sifat i, boi ma toktong denggan hubungatta tu akka donganta nang pe sipata adong masalah na tahadapi. Pikkirhon ma contoh on: Ikkon adong do oli asa boi denggan karejo masin ni mobil. Dos songon i ma, ikkon tapatudu do akka sifat na denggan asa boi denggan hubungatta tu akka donganta. Saonari tabahas ma tolu situasi na boi manegai hubungatta tu akka donganta. Jala tabahas ma annon songon dia caratta maniru akka sifat ni Jesus songon serep ni roha, sabar, haburjuon, dohot asi ni roha. Molo tapatudu akka sifat i, boi ma toktong kompak hita tu akka donganta.

TIKKI DANG SAPANDAPOT

6. Aha do na boi masa molo dang sapandapot hita dohot donganta?

⁶ Boasa boi i gabe tantangan? Tikki adong dua halak na so sapandapot, biasana ganup halak pasti merasa pandapotna do na sittong. Misalna, adong ma dua donganta na mambahas taringot cara makkarejohon daerah dinas. Alai dang sapandapot nasida. Pasti nasida na dua merasa pandapotna do na sittong. Molo songon i situasina, boi do i manegai hubungan ni nasida na dua. Sai berupaya do ra nasida mambuktihon ise na sittong. Dang dipikkirhon nasida be hubungan ni nasida na dua. Molo dang pittor dipasae nasida parsoalanna, boi do gabe lam balga masalahna jala lam leleng dang denggan be hubungan ni nasida. Sudena on boi masa holan alani masalah na gelleng.

7. Aha do na diulahon Jesus lao mangajari akka siseanna asa patuduhon serep ni roha?

⁷ Tatiru ma serep ni roha ni Jesus. Dipaboa Jesus do tu akka siseanna, ikkon dipatudu nasida do serep ni roha tikki dang sapandapot nasida. Di tikki i, jotjot do akka siseanna marsoal taringot ise na ussangap sian nasida. Alai, diurupi Jesus do nasida paubahon cara marpikkirna. Dipaboa Jesus ma tu nasida, ikkon dianggap nasida do ussangap halak na asing sian diri ni nasida sandiri. (Mat. 20:​25-28) Diajarhon Jesus do tu nasida songon dia carana patuduhon serep ni roha. Buktina di borngin andorang so mate ibana, dibahen Jesus ma “sitiruon”. Disussi ibana ma pat ni akka siseanna. Hape ulaon ni sahalak hatoban do i. (Joh. 13:​3-5, 12-16) Marhite sitiruon na dibahen Jesus i, dipatudu ibana do boha carana asa toktong kompak tu halak na asing nang pe sipata dang sapandapot. Molo dianggap nasida ussangap halak na asing, gabe ummura ma nasida manjalo pandapot ni na asing nang pe dang sesuai tu na di roha ni nasida.

8. Aha do manfaatna molo tapatudu serep ni roha tikki dang sapandapot hita dohot donganta? (Kolosse 3:13) (Ida gambar.)

⁸ Boha do carana asa toktong kompak hita tu akka dongan? Molo serep rohatta, gabe ummura ma di hita manalpuhon hasalaan ni na asing. (Jaha Kolosse 3:13.) Asing ni i, molo serep rohatta dang pittor muruk hita tikki dang sapandapot dohot nasida. Hasilna, toktong ma hita kompak tu akka donganta. (Ps. 4:4) Molo pe didokkon nasida hata na mambahen haccit rohatta, taingot ma hita pe jotjot do sala makkatai. (Pjm. 7:​21, 22) Pikkirhon ma sukkun-sukkun on, ‘Uppetting do di au mambuktihon na sittong pandapottu sian apala hubungakku dohot donganku?’ Berupaya ma hita asa olo manjalo pandapot ni dongan na asing. Jala unang ma tataringoti masalah i di ari na naeng ro. Molo taulahon i, gabe dame ma roha dohot pikkiranta.

9. Songon dia serep ni roha boi mangurupi hamu tikki pasaehon sada parsoalan? (Poda 17:9)

⁹ Serep ni roha boi do tong mangurupi hamu pasaehon sada parsoalan. Unang ma berdebat hamu holan lao mambuktihon na sittong do pandapotmuna. (Jaha Poda 17:9; 1 Kor. 6:7) Ingot ma massai penting do hubunganmuna tu dongan na asing. Godang do akka dongan naung marhasil pasaehon parsoalan dohot dongan na asing. Carana, denggan do i dihatai nasida jala diingot nasida ma tujuanna i ma lao mardame. (Ps. 34:14) Molo songon i situasimuna, boi do ra didokkon hamu tu donganta i songon on, ‘Dang olo au gabe sega hubungatta alani masalah on. Boi do makkatai hita satokkin?’ Unang ma maila hamu mangakkui kesalahanmuna jala minta maaf ma hamu molo gabe haccit rohana dibahen hamu. Asing ni i molo minta maaf donganta i tu hamu, rade ma hamu manalpuhon hasalaanna. (Luk. 17:​3, 4) Ingot ma, tujuanmuna makkatai dang na lao mambuktihon ise na sittong dohot na sala. Alai asa toktong denggan hubunganmuna dohot ibana.—Poda 18:24.

NANG PE BERBEDA SIFATTA

10. Aha do muse na boi mambahen hita gabe maol kompak tu akka dongan?

¹⁰ Boasa boi i gabe tantangan? Olo do ra maol hita toktong kompak tu akka dongan na berbeda sifatna sian hita. Ra, adong kebiasaan manang sikapna na mambahen hita dang nyaman. Hape songon i pe ibana, ala hea do ra dibahen na so denggan tu ibana, latar belakangna, manang kebudayaanna. Asing ni i, olo do ra maol hita kompak tu akka dongan ala lomo rohatta makkata-hatai hape ibana dang lomo rohana, manang sebalikna.

11. Boasa boi kompak Jesus tu akka halak na berbeda sifatna sian ibana?

¹¹ Tatiru ma kesabaran ni Jesus. Olo do Jesus kompak tu akka halak na berbeda sifatna sian ibana. Misalna, berbeda hian do sifat ni Jesus tu Apostel Jakobus dohot si Johannes. Molo Jesus, serep do rohana. Rade do ibana maninggalhon surgo jala ro tu tano on. (Plp. 2:​5-8) Hape molo si Jakobus dohot si Johannes, lomo do rohana gabe na ussangap. Buktina, hea do dipangido nasida tu Jesus asa hundul nasida di labbung ni Jesus molo dung mamaretta Jesus di Harajaonna. (Mrk. 10:​35-37) Nang pe songon i, sabar do Jesus menghadapi nasida dohot akka apostel na asing.

12. Boasa boi Jesus sabar tu akka apostelna?

¹² Dang diharappon Jesus ikkon sempurna akka siseanna. Diboto Jesus do dang holan si Jakobus dohot si Johannes na songon i. Akka sisean na asing pe, lomo do tong roha ni nasida asa gabe halak na ussangap. (Mrk. 9:34) Jesus dipagodang-godang di kebudayaan na sarupa dohot nasida. Tikki i, godang do akka pamimpin agama na manjujui akka halak asa mangalului hasangapon tu diri ni nasida sandiri. Jadi diattusi Jesus do boasa songon i cara marpikkir ni akka sisean i. Nang pe songon i, sabar do Jesus tu nasida. Dang diharappon Jesus pittor boi nasida manguba cara marpikkir ni nasida. Alana nungnga bagas i marurat di pikkiran ni nasida.—Mrk. 10:​42-45.

13. Boasa kesabaran boi mangurupi hita asa toktong kompak tu akka dongan? (Epesus 4:2)

¹³ Boha do carana asa toktong kompak hita tu akka dongan? Tacoba ma berupaya mangattusi akka sifat ni nasida dohot kebiasaan ni nasida, nang pe i dang cocok tu rohatta. (Poda 14:29) Memang dang halak na jahat hita dohot akka donganta i, alai marragam do akka sifatta dohot kebiasaanta. Las hian do rohatta molo olo halak na asing manjalo hahurangatta. (Jaha Epesus 4:2.) Jadi ikkon masuk akkal do hita. Unang ma tapaksahon halak na asing ikkon songon na di rohatta. Misalna, sabar ma hita tu donganta na parila manang na so pola godang makkatai. Sabar ma tong hita tu donganta na lomo hian rohana makkata-hatai. Memang dang boi sude halak gabe ale-aletta. Alai berupaya ma hita asa kompak tu akka dongan na berbeda sifatna sian hita.

14. Molo sabar hita, aha do na taida sian akka donganta?

¹⁴ Molo sabar hita tu akka donganta, gabe boi ma hita mangida akka sifat ni nasida na denggan. Molo taulahon i, dang gabe mandao hita sian akka dongan na berbeda sifatna sian hita. Songon si Jakobus dohot si Johannes, lomo do roha ni nasida asa gabe halak na ussangap. Alai sian pangidoan ni nasida i patuduhon, na porsea do nasida tu Harajaon ni Debata. Diboto Jesus do i jala diargai ibana do haporseaon ni nasida. Hita pe, molo berupaya hita mangalului akka na denggan sian donganta berarti na maniru Jesus do hita disi. Songon Jesus na maniru Bapakna, Jahowa.

15. Ise do na boi mangurupi hita asa toktong denggan hubungatta dohot akka dongan na berbeda sifatna sian hita?

¹⁵ Alai na uppetting sian i sude, tapangido ma bantuan sian Jahowa asa boi toktong denggan hubungatta dohot akka dongan na berbeda sifatna sian hita. Asing ni i, tapikkirhon ma akka situasi na boi mambahen gabe jut rohatta. Jala tatangiakkon ma tu Jahowa asa diurupi hita toktong tenang tikki masa i. Taingot ma, Jahowa do Sitoppa hita. Jadi pasti diboto Ibana do marragam do akka sifatta. Tikki martangiang hita tu Jahowa, pos ma rohatta pasti diurupi Ibana do hita asa patuduhon akka sifat na tahaporluhon. Jala tikki adong situasi na mambahen hita dang sabar, pittor tapangido ma tondi parbadia sian Jahowa. Asa diurupi hita mangendalihon diritta.—Luk. 11:13; Gal. 5:​22, 23.

TIKKI ADONG DONGANTA NA MARSAHIT MANANG NA MENGALAMI GANGGUAN MENTAL

16. Situasi aha do na boi terjadi tikki adong sitaonon na dihadapi akka donganta?

¹⁶ Boasa boi i gabe tantangan? Sipata, dang mura menghadapi akka dongan na marsahit manang na mengalami gangguan mental. Misalna, dang olo nasida makkatai tu hita, mura tersinggung, manang reaksi ni nasida mambahen hita gabe tarsonggot. Jala olo do ra hata manang tindakan ni nasida mambahen hita dang nyaman manang mambahen haccit rohatta. (Job 6:​2, 3) Alai taingot ma, dang sai taboto situasi na dihadapi akka donganta. Jadi unang ma taharappon ikkon songon na di rohatta i nasida.

17. Aha do na boi taparsiajari sian cara ni Jesus maradoppon si Bartimeus?

¹⁷ Tatiru ma haburjuon dohot asi ni roha ni Jesus. Massai burju do Jesus jala asi do rohana mangida akka halak na susa, nang pe dang ditanda ibana nasida. Misalna, taparrohahon ma songon dia Jesus maradoppon dua bawa na mapitung. Sada sian nasida, margoar si Bartimeus. Tikki dibege si Bartimeus na lewat Jesus, gogo ma soarana manjou Jesus. Gabe disuru piga-piga halak na disi ma asa sip si Bartimeus. Alai ala lomo rohana dipamalum Jesus, sai torus do dijou ibana Jesus. Bahkan sappe dipagogo ibana soarana. Olo do ra adong piga-piga halak na disi gabe muruk tu si Bartimeus. Alai molo Jesus, ‘asi do rohana’ jala lomo rohana pamaluppon si Bartimeus. (Mat. 20:34; Mrk. 10:​46-52) Lambok do Jesus tikki makkatai tu si Bartimeus jala dipuji do ibana alani haporseaonna. Dung i, dipamalum Jesus ma ibana jala gabe boi ma ibana marnida.

18. Aha do na ikkon taulahon tikki adong donganta na susa? (1 Tessalonik 5:14)

¹⁸ Boha do carana asa toktong kompak hita tu akka dongan? Tapatudu ma haburjuon dohot asi ni roha. Molo adong sifat i di hita, pasti gabe olo ma hita ‘patoguhon’ roha ni akka dongan na marsak manang na marsahit. (Jaha 1 Tessalonik 5:14.) Taingot ma, dongan na burju i ikkon rade do mangurupi tarlumobi “tikki masa sitaonon”. (Poda 17:17) Jadi tikki adong donganta na susa, tapatudu ma asi ni roha tu nasida. Alai adong do muse na ikkon taulahon. Taurupi ma nasida asa tenang, tadok ma hata na patoguhon roha ni nasida, jala talehon ma bantuan na dihaporluhon nasida.

19. Boha do caratta patuduhon haburjuon dohot asi ni roha tu akka donganta? (Ida gambar.)

¹⁹ Memang dang boi tapamalum sahit ni donganta i. Alai berupaya ma hita mangattusi perasaanna dohot situasina. (Mat. 7:12; 1 Ptr. 3:8) Carana, sabar ma hita manangihon ibana. Molo cocok, tadok ma hata na boi mangapuli rohana. (Poda 12:25) Alai unang ma tadok di rohatta, nungnga taboto sude situasina. (Poda 18:13) Asing ni i, sabar ma hita jala unang ma taharappon ikkon songon na di rohatta i ibana.—Eps. 4:32.

20. Naeng gabe dongan na songon dia do hamu?

²⁰ Pasti las do rohatta ala boi dapotta akka dongan na burju di organisasi ni Jahowa. Alai taingot ma jolma na so sempurna do hita jala boi do masa akka na so denggan di ngolutta. Olo do sipata tabahen haccit roha ni na asing. Alani i, mandok mauliate do hita ala toktong olo akka dongan jonok tu hita, serep do roha ni nasida, sabar tu hita, burju, jala patuduhon asi ni roha tu hita. Jadi berupaya ma hita asa gabe dongan na burju na patuduhon akka sifat na denggan.