Toktong ma Setia Nang pe Diuji Haporseaotta

1-2. Aha do na masa tikki mangajari Jesus di Kapernaum?

SADA tikki mangajari ma Jesus di Kapernaum. Didok ibana ma tu akka halak na disi, “Molo dang diallang hamu daging ni Anak ni jolma i jala dang diinum hamu mudarna, dang dapotmuna hangoluan.” Didok Jesus do muse, “Manang ise na mangallang dagingku dohot na manginum mudarhu dapotna ma hangoluan na saleleng ni lelengna, jala paheheokku ma ibana di ari parpudi.” (Joh. 6:​53, 54) Godang do sian akka sisean ni Jesus i na so lomo rohana tu hata na didok Jesus i. Didok nasida do, “Dang tarjalo hatana i. Ise ma na olo manangihon i?”—Joh. 6:60.

² Dung mambege hata ni Jesus i, gabe godang ma nasida na maninggalhon Jesus. Na so porsea do nasida tu Jesus? Sasittongna sebelum na mangajari i Jesus, nungnga hea diida nasida Jesus mambahen akka mukjizat. Jala didok nasida do, “Tutu, ibana do Panurirang na naeng ro tu portibi on.” (Joh. 6:14) Jadi sebenarna porsea do nasida tu Jesus, termasuk ma akka apostelna. Alai ala dang diattusi nasida aha lapatan ni hata ni Jesus i, gabe ditinggalhon nasida ma ibana.

3. Songon dia do reaksi ni akka apostel ni Jesus mambege hata ni Jesus i, jala boasa? (Ida gambar.)

³ Alai molo akka apostelna dang dohot maninggalhon Jesus. Tikki disukkun Jesus boasa dang dohot akka apostelna i maninggalhon ibana, didok si Petrus do, “Ale Tuan, tung tu ise ma hami lao? Akka hata na niajarhonmi do na parohon hangoluan na saleleng ni lelengna. Nungnga porsea hami jala nungnga huboto hami ho do Nabadia ni Debata.” (Joh. 6:​68, 69) Olo do ra dang diattusi si Petrus dohot akka apostel na asing aha lapatan ni hata ni Jesus tikki didok, ikkon diallang nasida do dagingna jala diinum mudarna. Alai nang pe songon i, tetap do nasida setia tu Jesus. Boasa? Alana porsea do nasida molo Jesus i ‘Kristus, na sinuru ni Debata’.—Luk. 9:​20, 35.

4. Aha do na boi manguji haporseaotta tu Jahowa?

⁴ Adong do piga-piga situasi na boi manguji haporseaotta tu Jahowa. Contohna, songon dia do reaksitta tikki adong pemahaman na disesuaihon taringot ayat ni Bibel manang adong cara na terbaru taringot ulaonta marbarita? Situasi na asing muse, tikki masa sitaonon tu hita. Olo do ra gabe sukkun-sukkun rohatta boasa dang pittor dipaso Jahowa sitaonon i? Songon dia do reaksitta tikki adong dongan kompakta di huria manang halak na adong tanggung jawabna di huria mambahen na so adil tu hita?

5. Boasa ikkon tapatogu haporseaotta? Bahen ma contoh. (Kolosse 1:23)

⁵ Pikkirhon ma contoh on: Ikkon togu do fondasi ni sada bangunan asa boi martahan tikki adong gempa. Suang songon i ma, ikkon togu do haporseaotta tu Jahowa asa boi toktong setia tikki adong situasi na manguji haporseaotta. Jadi ikkon torus do tapatogu haporseaotta tu Jahowa asa boi hita tetap setia tu Ibana, dang soal aha pe na masa di ngolutta.—1 Kor. 15:58; jaha Kolosse 1:23.

6. Aha do na mangurupi akka apostel asa toktong setia tu Jesus?

⁶ Aha do na mangurupi akka apostel asa toktong setia tu Jesus? Pos do roha ni akka apostel i na layak do Jahowa disomba ala Ibana do Sitoppa saluhutna. Pos do roha ni nasida molo Jesus i Anak ni Debata, jala molo dioloi nasida Jesus boi ma nasida mangolu “saleleng ni lelengna”. Asing ni i, pos do roha ni nasida na las do roha ni Jahowa tu sude naung diulahon Jesus. Suang songon i ma, asa boi hita tetap setia tu Jahowa nang pe adong situasi na manguji haporseaotta, ikkon taparsiajari do taringot Jahowa. Di artikel on, adong tolu na lao taparsiajari taringot Jahowa: (1) Jahowa do Sitoppa saluhutna. (2) Jahowa do Pangarang ni Bibel. (3) Didukung Jahowa do akka naposona saonari. Jadi molo pos rohatta tu tolu na didok nakkin, boi ma hita tetap setia dang soal aha pe na manguji haporseaotta.

JAHOWA DO SITOPPA SALUHUTNA

7. Aha do na didok di Pangungkapon 4:11 taringot Jahowa, jala songon dia ayat i boi mangurupi hita tikki menghadapi akka situasi na manguji haporseaotta?

⁷ Jaha Pangungkapon 4:11. Ayat on paposson rohatta na tutu do Jahowa i Sitoppa saluhutna. Jala on ma sada alasanna boasa layak tasomba Jahowa. Molo tarimangi balga ni huaso ni Jahowa, gabe lam pos do rohatta na boi do urupanna hita tikki menghadapi akka situasi na manguji haporseaotta. Alai berupaya do Sibolis lao mambahen akka jolma asa porsea na so tutu adong Debata. Bahkan adong do piga-piga ilmuwan na mandok, na adong sandiri do hangoluan on, dang na ditoppa. Jadi ikkon pos do rohatta na Jahowa i do Sitoppa saluhutna jala holong do rohana tu hita. Boasa? Asa unang ragu hita na tutu do adong Debata jala boi do urupanna hita tikki adong situasi na manguji haporseaotta.—Heb. 11:6.

8-9. Aha do na ikkon diulahon hamu molo mulai ragu hamu Jahowa i Sitoppa saluhutna? (Ida gambar.)

⁸ Molo mulai ragu hamu na Jahowa i do Sitoppa saluhutna, adong do na ikkon diulahon hamu. Lului ma informasi sian publikasitta na boi mambuktihon na tutu do Jahowa i Sitoppa saluhutna. Boi do dapotmuna informasi na patoguhon haporseaonmuna di brosur Benarkah Kehidupan Diciptakan? dohot Asal Mula Kehidupan—Lima Pertanyaan yang Patut Direnungkan. Boi do muse dapotmuna informasi na asing di jw.org di bagian “Adong do na Mambahen On?” Sahalak donganta na poso na margoar si Jessica, na tinggal di Amerika Serikat mandok, “Dung hujaha brosur Asal Mula Kehidupan, gabe lam pos do rohakku na adong do Sipanoppa na massai malo. Sebenarna nga huboto taringot on. Alai dung hujaha brosur i, gabe lam pos ma rohakku.” Asing ni i, godang do halak na mandapot manfaat dung manjaha bukku Mangolu Saleleng ni Lelengna di pelajaran 6 dohot 7. Ra nga hea i dijaha hamu. Alai molo dijaha hamu i muse, godang do manfaat na boi dapotmuna.

⁹ Tikki belajar pribadi hamu, lului ma akka bukti na patuduhon na tutu do adong Debata. Akka bukti i boi do patoguhon haporseaonmuna na tutu adong Jahowa, jala mangurupi hamu asa lam takkas mananda Ibana. (Rom 1:20) Boi do i muse dipakke hamu lao mangurupi halak na asing na mungkin ragu na tutu adong Debata. Jadi intina, nungnga godang dilehon Jahowa akka bukti lao patuduhon na Ibana do Sitoppa saluhutna.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

JAHOWA DO PANGARANG NI BIBEL

10. Boasa massai penting Bibel di hita? (2 Timoteus 3:​16, 17)

¹⁰ Jaha 2 Timoteus 3:​16, 17. Bibel, i ma bukku na marisi hata ni Jahowa na dilehon tu jolma. Boi do i mangalusi akka sukkun-sukkun na massai penting di ngolutta. Disi boi ma taboto aha do sakkap ni Jahowa jala aha na dihalomohon rohana ikkon taulahon. Pos do rohatta molo Jahowa i Pangarang ni Bibel. Alani i ma Bibel ma sada bukku na massai penting di ngolutta. Jadi tikki manjaha Bibel, lomo do rohatta asa taattusi aha na tajaha i jala ikkon berupaya do hita lao mangulahon na didok di Bibel.

11. Boasa porsea hita Jahowa do Pangarang ni Bibel?

¹¹ Boasa porsea hita na Jahowa do Pangarang ni Bibel? Adong godang alasanna. Misalna, akka peristiwa na disurat di Bibel tutu do terjadi. (Luk. 3:​1, 2) Sesuai do muse isi ni Bibel tu ilmu pengetahuan alam. (Job 26:7) Nang pe berupaya Sibolis lao mangabbati asa unang adong be Bibel, alai Bibel ma na unggodang dicetak dibandingkon bukku na asing jala dibahen do i di godang bahasa. Adong 40 bawa na manurat Bibel jala disurat do i hira-hira 1.600 taon. Alai nang pe songon i, sadalan do sude isi ni Bibel. Nang pe naung marribu taon na salpu disurat Bibel, alai nasehatna tetap dope marlakku tu hita sahat tu saonari. (Poda 13:20; 15:21; Mat. 7:12) Alasan na asing boasa porsea hita tu Bibel, ala godang do akka surirang na disurat di Bibel i nungnga terjadi. (Jos. 23:14) Jadi takkas ma sian Debata do Bibel!

12. Molo mulai ragu hita Debata do Pangarang ni Bibel, aha do na ikkon taulahon?

¹² Molo mulai ragu hita Debata do Pangarang ni Bibel, aha do na ikkon taulahon? Martangiang ma hita tu Jahowa jala tapaboa ma songon dia perasaanta. Dung i, tapangido ma bantuanna jala tabahen ma riset. I ma na diulahon donganta na poso na margoar si Jordan. Saksi Jahowa do natua-tuana. Didok ibana, “Dang pittor porsea au tu aha na didok natua-tuakku manang na didok halak na asing. Alai tikki ragu au, hubahen ma riset sian publikasitta lao mangalului alus ni sukkun-sukkunki asa unang ragu be au.” Molo torus do tapapos rohatta na Jahowa do Pangarang ni Bibel, gabe boi ma lam togu haporseaotta.—1 Kor. 3:​12, 13.

DIDUKUNG JAHOWA DO AKKA NAPOSONA SAONARI

13. Aha do na ikkon taulahon molo mulai ragu hita taringot ise do naposo ni Jahowa saonari on?

¹³ Molo ragu hamu na Saksi Jahowa do organisasi na dipillit Jahowa saonari on, adong do na ikkon diulahon hamu. Pikkirhon ma akka sukkun-sukkun on: ‘Ise do na berupaya mangihutton prinsip ni Bibel di ngoluna saonari on? Organisasi na dia do na ajaranna sesuai tu na didok di Bibel?’ (2 Tim. 4:​3, 4) ‘Ise do na mangulahon sakkap ni Jahowa saonari on?’—Mat. 7:​20, 21.

14. Boasa boi tadok holan Saksi Jahowa do na mangulahon na didok di Mateus 24:14?

¹⁴ Lomo do roha ni Debata asa sude halak di liat portibi on mambege barita na uli sebelum ro ujung ni portibi on. Alani i pikkirhon ma on, ‘Ise do na marbarita na uli saonari on?’ (Mat. 24:14) Takkas do taboto alusna. Dipakke Debata do naposona, i ma Saksi Jahowa lao pasahatton barita na uli. Holan Saksi Jahowa do na pasahatton barita na uli taringot Harajaon ni Debata di lobi sian 240 negeri. Jala nungnga lobi sian 100 taon on diulahon. Takkas ma ulaon marbarita na uli do ulaon na uppetting di naposo ni Debata.—Mat. 28:​19, 20.

15. Songon dia do cara ni Saksi Jahowa pabadiahon goar ni Debata saonari? (Mateus 6:9; Jesaya 43:10)

¹⁵ Jaha Mateus 6:9 dohot Jesaya 43:10. Ditanda do hita gabe Saksi Jahowa sesuai tu goar ni Debata, i ma Jahowa, jala bangga do hita disi. Godang do halak na di portibi on na so mamboto goar ni Debata. Alai molo hita, tabahen do terjemahan ni Bibel na adong goar ni Debata sesuai tu teks aslina. Goar ni Bibel i, i ma Bibel Terjemahan Tano na Imbaru. Adong do lobi sian 7.000 hali goar ni Debata disurat disi.

16. Boasa boi tadok holan Saksi Jahowa do na mangulahon paretta na disurat di Johannes 13:​34, 35? (Ida gambar.)

¹⁶ Jaha Johannes 13:​34, 35. Godang do halak saonari on na so marsada jala dang marsihaholongan. Alai berbeda do molo naposo ni Jahowa. Nang pe sian marragam bangso dohot sian marragam latar belakang, alai toktong do hita marsada jala marsihaholongan. Hea do hamu berkunjung tu huria na asing? Molo hea, pasti diida hamu do akka dongan disi patuduhon holong jala marsada. Takkas ma, dipakke Jahowa do Saksi Jahowa lao pasautton sakkapna saonari on. Molo sai taingot na didukung Jahowa do naposona, on boi do mangurupi hita asa toktong setia nang pe adong situasi na manguji haporseaotta.

TOKTONG MA SETIA TU JAHOWA

17-18. Aha do tantangan na boi masa di ngolutta, alai songon si Petrus, aha do na boi tadokkon?

¹⁷ Ala mangolu di ari parpudi, godang do hasusaan na masa di ngolutta. (2 Tim. 3:​1, 13) Jala olo do ra adong tantangan na asing na tahadapi. Misalna, olo do adong petunjuk sian organisasi na so masuk akkal di rohatta. Asing ni i, olo do adong donganta sahaporseaon na mambahen hita gabe susa. Jala sipata, dang taboto aha na ikkon taulahon tikki masa i manang boasa masa i tu hita.

¹⁸ Nang pe godang situasi na mambahen lungun rohatta jala marsak, alai boi do hita toktong setia tu Jahowa molo pos rohatta Jahowa do Sitoppa saluhutna, Ibana do Pangarang ni Bibel, jala Saksi Jahowa do naposona. Songon na didok si Petrus tu Jesus, hita pe boi do tadok tu Jahowa, “Tung tu ise ma hami lao? Akka hata na niajarhonmi do na parohon hangoluan na saleleng ni lelengna.”