Pakke ma Prinsip ni Bibel Mangalatik Panggora ni Rohatta

1-2. (a) Aha do na dilehon Jahowa tu si Adam dohot si Hawa? (b) Aha do na porlu diulahon nasida lao patuduhon na diargai nasida sudena i?

MOLO mesin, diprogram do i asa boi mangulahon na dipangido jolma. Jala molo binatang, holan mangihutton naluri do nasida. Alai molo jolma, dang songon i ditoppa Debata. Dilehon do tu nasida hak lao mamillit jala boi mambahen keputusan sandiri. Silehon-lehon na luar biasa do on jala massai arga. Didok di Bibel, ditoppa do si Adam mirip tu Debata. (1 Mus. 1:​26, 27) Dilehon do tu ibana dohot si Hawa hak lao mamillit jala boi mambahen keputusan sandiri.

² Dang dilehon Jahowa godang hukum tu si Adam dohot si Hawa. Holan on do na diparettahon Jahowa: Denggan diurus nasida tano on, marpinoppari huhut digohi nasida tano on, jala diihutton nasida akka naung ditottuhon Jahowa taringot na boi dohot na so boi diulahon nasida. (1 Mus. 1:28; 2:​16, 17) Sasittongna, dang maol mangulahon paretta i. Molo unduk nasida, on patuduhon na holong do roha ni nasida tu Jahowa, lomo roha ni nasida mambahen las rohana, jala diargai nasida sude na dilehon Jahowa, termasuk hak lao mamillit.—Poda 23:15.

3. Aha do na patuduhon dang diargai si Adam dohot si Hawa hak ni nasida lao mamillit?

³ Didok di Bibel, dang denggan dipakke si Adam dohot si Hawa hak ni nasida lao mamillit. Dialo nasida do Jahowa. Boasa? Alana, holan diri ni nasida do na dipikkirhon nasida. Dang holong roha ni nasida tu Jahowa jala dang diargai nasida silehon-lehonna. (1 Mus. 3:​1-7) Akibatna, gabe susa ma sude pinopparna sahat tu saonari.—Rom 5:12.

4. (a) Songon na didok di Galatia 6:​5, aha do na ikkon taulahon? (b) Silehon-lehon aha do muse na lao tabahas di artikel on?

⁴ Ganup ari, ikkon tabahen do keputusan. Jala sipata, dang sai mura mambahen i. (Jaha Galatia 6:5.) Adong do keputusan na balga jala adong do keputusan na gelleng. Alai, songon dia do carana asa boi keputusanta i mambahen las roha ni Jahowa? Tapangido ma bantuan sian Jahowa. (Poda 16:3; Jer. 10:23) Tatiru ma Jesus. Nang pe sempurna ibana, alai dipangido ibana do bantuan sian Jahowa. (Heb. 5:7) Tarlumobi ma hita, ala dang sempurna hita, ikkon tapangido do bantuan sian Jahowa. Aha do muse na dilehon Jahowa lao mangurupi hita mambahen keputusan na denggan? Panggora ni roha. Saonari, tabahas ma taringot i.

AHA DO PANGGORA NI ROHA I?

5. (a) Aha do panggora ni roha i? (b) Songon dia do panggora ni roha mangurupi hita? (Rom 2:​14, 15)

⁵ Tikki ditoppa hita, dilehon Jahowa do tu hita kemampuan lao mamboto dia na sittong dohot na sala. Didok ma i panggora ni roha. Sude do jolma adong panggora ni rohana, bahkan akka halak na so mamboto hukum ni Debata. (2 Kor. 4:2) Boi do panggora ni roha i songon hakim na pasingotton hita, jala boi paboahon sittong do pikkiranta dohot tindakanta manang na dang. (Jaha Rom 2:​14, 15.) Panggora ni roha i boi do tong pasingotton hita asa unang taulahon na sala, jala manjujui hita asa taulahon na sittong. (1 Sam. 26:​8-11) Nang pe dilehon tu hita hak lao mamillit, alai olo do sipata keputusan na tabahen dang sesuai tu lomo ni roha ni Jahowa. Alani i, ikkon berupaya do hita mambahen keputusan na palasson rohana. Disi ma berfungsi panggora ni roha i. Gabe taboto ma, sittong do keputusan na naeng tabahen i manang na dang.

6. Boasa panggora ni rohatta boi sala?

⁶ Ala dang sempurna hita, panggora ni rohatta pe dang sempurna. Didok di Bibel, boi do panggora ni rohatta gabe “guga”, “ramun”, “sega”, jala “jahat”. (1 Kor. 8:12; Tit. 1:15; 1 Tim. 4:2; Heb. 10:22) Alani aha? Olo do ra alani caratta dipagodang-godang, budayatta, manang keinginan na sala. Panggora ni roha sisongon i dang boi mangurupi hita mambahen keputusan na denggan. Dipatudos ma i songon timbangan naung sega na porlu dipadenggan. Alani i, ikkon torus do panggora ni rohatta dilatik asa boi mangurupi hita mambahen keputusan na denggan. (1 Ptr. 3:16) Songon dia carana?

CARA MANGALATIK PANGGORA NI ROHATTA

7-8. (a) Boha do cara mangalatik panggora ni rohatta? (b) Boha do prinsip ni Bibel boi mangurupi hita mambahen las roha ni Jahowa? Bahen ma tudosan. (Ida gambar.)

⁷ Boha do carana mangalatik panggora ni rohatta? Ikkon taratur do hita manjaha Bibel jala berupaya ma hita mamboto dia na sittong dohot na sala di adopan ni Jahowa. Alani i, ikkon taparsiajari do akka hukum na dilehon Jahowa. Alai songon naung dibahas di artikel sebelumna, dang sai adong hukum tu ganup situasi di ngolutta. Jadi, ikkon talului do prinsip ni Bibel asa taboto boha cara pandang dohot perasaan ni Jahowa tu godang situasi na taadopi.—Jes. 55:9.

⁸ Bayakkon ma on: Adong ma sasahalak na naeng lao tu sada inganan, alai ikkon mangalewati gurun. Di gurun i, dang adong dalan manang tanda petunjuk jalan. Memang molo diida ibana posisi ni mataniari manang bintang, boi do ra diboto ibana tudia ibana ikkon mardalan. Alai, pasti ummura do di ibana molo adong peta. Peta boi patuduhon akka inganan na gabe patokanna tikki mardalan. Misalna songon dolok, sunge, manang akka inganan na asing na ikkon dilewati. Molo diida ibana peta i, gabe diboto ibana ma sittong do dalan na dilewati ibana manang na dang. Dos songon peta i do Bibel. Boi do Bibel mangurupi hita mangulahon tujuanta, i ma mambahen las roha ni Jahowa. Jala akka prinsip ni Bibel boi dipatudos songon akka inganan na gabe patokan di dalan nakkin. Jadi molo tapakke prinsip ni Bibel lao mangalatik panggora ni rohatta, boi ma hita toktong mambahen las roha ni Jahowa.

9. Aha do muse na boi mangurupi hita mangalatik panggora ni rohatta? (Rom 9:1)

⁹ Asa boi denggan talatik panggora ni rohatta, ikkon tapangido do tondi parbadia ni Jahowa. (Jaha Rom 9:1.) Boasa? Alana, tondi parbadia boi mangurupi hita mangattusi cara pandang ni Debata taringot godang situasi di ngolutta. Boi do tong tondi parbadia mambahen hita rade jala margogo mangulahon lomo ni roha ni Jahowa. (Plp. 2:13) Alai, boha ma carana asa dapotta tondi parbadia i?

10. Boha do carana asa dapotta tondi parbadia ni Jahowa? (Lukas 11:​10, 13)

¹⁰ Martangiang ma mangido tondi parbadia. (Jaha Lukas 11:​10, 13.) Pos do rohatta, pasti lehonon ni Jahowa do tondi parbadiana tu hita. (Joh. 3:34) Lehononna do i tu akka halak na olo mangihutton Ibana. (Poda 1:23; Jak. 1:5) Aha do muse na boi mangurupi hita mangalatik panggora ni rohatta?

11. (a) Aha do tujuan ni ngolutta? (b) Boasa massai penting mangalatik panggora ni rohatta?

¹¹ Toktong ma berupaya mambahen las roha ni Jahowa. (Poda 8:​34, 35) Mambahen las roha ni Jahowa do tujuan ni ngolutta. Molo torus taingot tujuanta i, boi ma denggan talatik panggora ni rohatta. Ikkon tatiru do cara marpikkir ni Jahowa, jala ikkon sai tapikkirhon perasaanna. Massai penting do mangalatik panggora ni rohatta, tarlumobi di jamanta saonari. Alana, godang do situasi na maol taadopi. Jala dang adong dipaboa di Bibel taringot akka situasi i. Misalna taringot hiburan, karejo, sikkola, manang hubungatta dohot halak na asing. Jadi, aha do na porlu taulahon asa keputusanta i mambahen las roha ni Jahowa?—2 Kor. 1:12.

12. Boha do carana asa panggora ni rohatta mangurupi hita mangulahon na sittong? (Epesus 5:10)

¹² Tarimangi ma na tajaha di Bibel. (Ps. 49:3) Tikki tajaha Bibel, ikkon talului do akka prinsip na patuduhon cara marpikkir ni Jahowa. (Jaha Epesus 5:10.) Molo taulahon i, boi ma panggora ni rohatta mangurupi hita mambahen keputusan na denggan, nang pe dang sai mura mangulahon i. (Poda 2:​4-9, 11-13) Asing ni i, akka prinsip ni Bibel boi mangalatik panggora ni rohatta jala mangurupi hita asa toktong mangulahon lomo ni roha ni Jahowa.—Heb. 5:14.

13. Aha do na so boi taulahon? Bahen ma contoh.

¹³ Unang jolo tabahen keputusan, baru pe talului prinsip na mendukung keputusanta i. Unang ma tatiru halak Israel na toktong tinggal di Juda dung hancur Jerusalem taon 607 SM. Tikki i, didok nasida tu si Jeremia, “Sai anggiat ma dipaboa Jahowa Debatami tu hami dalan na ikkon sidalanannami jala aha na ikkon diulahon hami.” (Jer. 42:​3-6) Sasittongna, nungnga dibahen nasida keputusan. Hape keputusan i dang sesuai tu petunjuk ni Jahowa. Nang pe songon i, dang olo nasida manguba keputusan i. Akibatna, gabe godang ma sitaonon na diadopi nasida. (Jer. 42:​19-22; 43:​1, 2, 4) Aha ma parsiajaranna tu hita? Andorang so tabahen keputusan, ikkon jolo talului do akka prinsip ni Bibel. Molo taulahon i, taboto ma aha na dipangido Jahowa jala boi ma tabahen keputusan na hombar tusi.

14. Boasa ikkon taihutton prinsip ni Bibel tikki naeng tabahen keputusan?

¹⁴ Tabahen ma keputusan na sesuai tu akka prinsip ni Bibel. (Mat. 7:​24-29; Jak. 1:​23-25) Molo taulahon i, on patuduhon na olo do hita ditogu-togu tondi parbadia. Hasilna, torus ma dilehon Jahowa tondi parbadiana i tu hita. (Ul. 5:32) Alai molo dang olo hita ditogu-togu tondi parbadia, berarti na taalo do tondi parbadia i. (Eps. 4:30; Jes. 63:10; Ul. 7:51) Jala dang olo be annon Jahowa mangalehon tondi parbadiana tu hita. (Ps. 51:11; 1 Tes. 5:19) Akibatna, susa ma hita. Alana, porlu hian do hita diurupi tondi parbadia.—Eps. 3:16.

CARA MANGALULUI PRINSIP NI BIBEL NA COCOK TU SITUASITTA

15-16. (a) Boha do cara mangalului prinsip ni Bibel na cocok tu situasitta? (b) Akka prinsip aha do na boi mangurupi parsiajar Bibelta asa unang marisap be ibana?

¹⁵ Tabahen ma riset sian publikasitta. Asa boi tabahen keputusan na sesuai tu prinsip ni Bibel, ikkon jolo taboto do songon dia cara mangalului prinsip na cocok tu situasitta. Misalna, boha do molo adong parsiajar Bibelta na maol pasohon hasomalanna marisap? Ra didok rohana, ‘Kan dang adong dipaboa taringot marisap di Bibel. Jadi, sian dia ma taboto na sala do na marisap i?’ Lao mangurupi ibana mandapot prinsip na cocok tu situasina, boi do tapakke Panduan Riset untuk Saksi-Saksi Yehuwa. Dung i, tapatudu ma bagian “Tembakau dan Merokok”. Di bagian i, adong artikel na marjudul “Bagaimana Pandangan Allah Soal Merokok?” (Ida Menara Pengawal 1 Juni 2014.) Akka prinsip aha do na boi dapotna sian artikel i?

¹⁶ Adong lima prinsip ni Bibel na boi dapotna sian artikel i: (1) Unang ma olo hita gabe hatoban ni manang aha pe na boi mambahen hita mate. (Rom 6:16) (2) Ikkon tahindari do sude na mambahen ramun dagingta. (2 Kor. 7:1) (3) Lomo do roha ni Jahowa asa tasomba Ibana sian nasa ngolutta. (Mat. 22:37) (4) Unang ma tabahen gabe bahaya halak na asing. (Mat. 22:39; 1 Kor. 10:24) (5) Boi do lehonon ni Jahowa gogo tu hita lao mangulahon na sittong. (Plp. 4:13) Memang, dang adong dipaboa di Bibel taringot marisap. Alai, akka prinsipna boi mangurupi parsiajar Bibelta asa mamboto boha pandangan ni Jahowa taringot i.

17. Akka prinsip ni Bibel na dia do na cocok tikki naeng mambahen acara pernikahan?

¹⁷ Akka prinsip ni Bibel na dia do na cocok tikki naeng mambahen acara pernikahan? Talului ma akka prinsip i di Panduan Riset. Di bagian “Pernikahan dan Resepsi”, adong piga-piga artikel na mambahas akka prinsip ni Bibel na boi tapikkirhon. Misalna, adong onom prinsip: (1) Ikkon pasangappon Jahowa do sude acara i. (1 Kor. 10:​31, 32) (2) Ikkon tama do pakkeatta, sopan, jala dang mambahen halak na asing tartuktuk. (1 Tim. 2:9; 1 Ptr. 3:​3, 4) (3) Unang ma tatiru akka halak di portibi on na patudu-tuduhon na adong di ibana. (Joh. 17:14; Jak. 1:27; 1 Joh. 2:​15, 16) (4) Ikkon taratur do acarana. (1 Kor. 14:40) (5) Unang gabe marpestai sahat tu na mabuk akka halak di acara resepsi i. (Gal. 5:21) (6) Ikkon adong do na martanggung jawab lao mengawasi acara i.—Joh. 2:​8, 9.

18-19. (a) Publikasi aha do muse na boi mangurupi hita? (b) Boha do carana mamakke publikasi i lao mangalului akka prinsip taringot perayaan? (Ida kotak “Diboto Hamu do Aha Prinsipna?”)

¹⁸ Publikasi na asing na boi mangurupi hita, i ma Akka Ayat na Mangurupi Halak Kristen. Di publikasi on, adong do dibahen daftar ni akka ayat na mambahas marragam topik. Di ganup topik, adong do dibahen sukkun-sukkun dohot akka ayat na mangurupi hita mandapot prinsip ni Bibel. Misalna, olo do ra sukkun-sukkun rohatta boi do hita dohot tu sada perayaan manang na daong. Molo songon i, boi do taida topik “Akka Perayaan”, jala taida ma bagian “Perayaan na so boi diulahon halak Kristen”.

¹⁹ Di bagian i, adong sukkun-sukkun: “Boasa dang boi tarayahon akka perayaan na adong hubunganna tu agama na so sittong? (1Kor 10:21; 2Kor 6:​14-18; Eps 5:​10, 11).” Di toruna, adong contoh akka perayaan sisongon i. Dung i, di bagian “Ari raya nasional”, adong akka prinsip na porlu tapikkirhon tikki diajak hita dohot tu perayaan na adong hubunganna tu sejarah politik, memperingati perang, manang mamuji-muji akka halak na dianggap penting di portibi on. Mandok mauliate do hita ala diparade organisasi ni Jahowa do akka publikasi na mangurupi hita mangalatik panggora ni rohatta.

TORUS MA TALATIK PANGGORA NI ROHATTA

20. Aha do manfaatna molo denggan talatik panggora ni rohatta?

²⁰ Mandok mauliate situtu do hita tu Jahowa ala dilehon do tu hita hak lao mamillit. Jadi, taargai ma i jala denggan ma i tapakke. Talatik ma panggora ni rohatta asa boi tabahen keputusan na sesuai tu lomo ni roha ni Jahowa jala pasangappon Ibana. Alani i, torus ma tapangido tondi parbadia ni Jahowa jala sai taihutton ma petunjuk sian Ibana. Asing ni i, tapakke ma prinsip ni Bibel lao mangalatik panggora ni rohatta. Sai anggiat ma denggan tapakke sude silehon-lehon ni Jahowa i. Jala taida ma songon dia Hata ni Jahowa mangurupi hita di ngolutta.—2 Tim. 3:​16, 17; Heb. 4:12.