Aha do Manfaat ni Prinsip ni Bibel?

1-2. (a) Nandigan do Bibel disurat? (b) Boasa bermanfaat dope Bibel sahat tu saonari?

NUNGNGA marribu taon Bibel disurat. Bukku na parjolo disurat hira-hira 3.500 taon naung salpu. Jala bukku na parpudi sae disurat hira-hira 2.000 taon naung salpu. Nang pe songon i, bermanfaat dope “hata ni Debata i” sahat tu saonari. (Heb. 4:12; 2 Tim. 3:​16, 17) Jala marjuta halak mandok, boi do Bibel mangurupi nasida mangatasi akka masalah ni nasida.

² Boasa bermanfaat dope Bibel sahat tu saonari? Adong dua alasanna. Na parjolo, sian “Debata na mangolu i” do sude na tarsurat di Bibel. Ibana do Sitoppa saluhut jala Ibana do na umbisuk sian manang ise pe. (1 Tim. 4:10; Rom 16:​26, 27) Na paduahon, akka prinsip na adong di Bibel marlakku sian jaman tu jaman. Alani i ma boi do prinsip ni Bibel i bermanfaat sahat tu andigan pe, jala boi dipakke lao mangatasi masalah manang aha pe.

3. Aha do na lao tabahas di artikel on?

³ Di artikel on, lao tabahas ma: Aha do prinsip ni Bibel i? Aha do manfaat ni i tu hita saonari? Jala songon dia do asa dapotta i tikki taparsiajari Bibel? Dung i, tabahas ma muse songon dia do Jesus mangurupi hita asa lam taattusi manfaat ni prinsip ni Bibel.

AHA DO LAPATAN NI PRINSIP NI BIBEL?

4. Aha do lapatan ni prinsip ni Bibel?

⁴ Prinsip ni Bibel, i ma dasar lao mambahen hukum. Molo taboto prinsip ni Bibel, boi ma taattusi songon dia pandangan ni Jahowa. Sipata, boi do takkas taboto prinsip ni sada hukum. (Mat. 22:37) Aha do beda ni prinsip dohot hukum? Unggodang do manfaat ni prinsip dibandingkon hukum. Biasana molo hukum marlakku holan di sada tikki manang di situasi tertentu. Alai molo prinsip, marlakku do i manang sadihari pe jala di marragam situasi. (Ps. 119:111) Asing ni i, dang hea muba sada prinsip manang gabe ketinggalan jaman.—Jes. 40:8.

5. Aha do beda ni hukum dohot prinsip? Bahen ma tudosan. (Ida gambar.)

⁵ Asa lam taattusi aha beda ni hukum dohot prinsip, taida ma tudosan on. Adong ma sahalak ina na mandok tu gellengna, ‘Unang tiop kompor.’ Sada paretta do i manang hukum. Alai prinsipna: Unang tiop na mohop, alana bahaya do i. Prinsip on marlakku dang holan tu kompor. Alai, termasuk do tong tu akka alat na mohop, songon setrika. Jala prinsip i marlakku dang holan di jabu. Alai, marlakku do tong i manang didia pe. Memang dung balga gellengna i, dang porlu be didokkon omakna i tu ibana, ‘Unang tiop kompor.’ Alai tikki dipakke ibana kompor i, pasti hati-hati do ibana. Alana diboto ibana, mohop do i jala boi bahaya molo dang manat.

AHA DO MANFAAT NI PRINSIP NI BIBEL?

6. (a) Aha do na diparade Jahowa tu hita? (b) Aha do buktina na pos roha ni Jahowa tu hita?

⁶ Ala holong roha ni Jahowa tu hita, dilehon Ibana do hukum. Tujuanna, asa unang hona bahaya hita. (Jak. 2:11) Jala diurupi Ibana do hita mangattusi prinsip ni hukum i. Memang, dang sai dipaboa Jahowa hukum di ganup situasi ni ngolutta. Alani i ma dilehon Ibana prinsip asa taboto dia na sittong. Gabe boi ma tabahen keputusan na denggan, nang pe dang adong hukum taringot situasi na taadopi. Ala dilehon Jahowa prinsip, on patuduhon na pos do rohana tu hita. Dilehon Ibana do tu hita kesempatan lao patuduhon na holong rohatta tu Ibana, jala lomo rohatta mangoloi Ibana.—Gal. 5:13.

7. Aha do manfaat ni prinsip ni Bibel tu hita? Bahen ma tudosan. (Ida gambar.)

⁷ Asa taboto manfaat ni prinsip ni Bibel, taparrohahon ma tudosan on. Biasana di dalan, godang do dibahen rambu-rambu lalu lintas. Adong do rambu-rambu i na songon hukum. Misalna, rambu taringot batas kecepatan maksimum manang adong tanda “Stop”. Molo dilanggar rambu i, pasti adong do hukumanna. Alai, adong do rambu i na songon prinsip. Rambu sisongon i mangurupi akka na berkendara mamboto bahaya na boi terjadi. Misalna, tanda tikungan tajam manang godang dakdanak na menyeberang. Tikki taida tanda sisongon i, ikkon manat do hita berkendara. Jala tikki ro udan manang adong kabut, ikkon lebih berhati-hati do hita mamboan kendaraan. Dos songon i ma, di Bibel adong do dibahen hukum dohot prinsip. Ala adong hukum, gabe taboto ma aha na boi dohot na so boi taulahon. Alai molo prinsip mangurupi hita mamboto cara pandang ni Jahowa. Gabe boi ma tahindari akka na dihasogohon rohana.

8. Songon na dipaboa di Rom 12:​1, 2, aha do manfaatna molo talului prinsip ni Bibel?

⁸ Adong do muse manfaat na asing molo talului jala taulahon prinsip ni Bibel. Gabe taboto ma cara pandang ni Jahowa. Alani i tikki tajaha Bibel, talului ma aha parsiajaranna tu hita. Pikkirhon ma boasa dipaboa Jahowa taringot i di Bibel, jala aha do manfaat ni i di hita. Molo taulahon i, gabe boi ma hita marhobas tu Debata ‘sian nasa pikkiranta’. Jala gabe taboto ma “lomo ni roha ni Debata na denggan, na sittong, jala na palasson rohana”.—Jaha Rom 12:​1, 2.a

9. Aha do muse manfaatna molo taihutton prinsip ni Bibel? (Heber 5:​13, 14)

⁹ Molo taihutton prinsip ni Bibel, gabe lam mirip ma hita tu Jahowa. Boi ma keputusanta mambahen las rohana, jala lam jonok ma hita tu Ibana. (Jaha Heber 5:​13, 14.) Biasana molo dakdanak, ikkon sai dipaboa do aha na boi dohot na so boi diulahon ibana. Dioloi ibana pe i ala na mabiar do ibana dihukum. Alai molo Jahowa, dang dibahen Ibana songon i tu hita. Pos do rohana, pasti tabahen do keputusan na sesuai tu lomo ni rohana. Jala las hian do rohana molo tabahen keputusan sisongon i.—Ps. 147:11; Poda 23:​15, 26; 27:11.

BOHA DO CARA MANGALULUI PRINSIP NI BIBEL?

10. Aha do na boi taulahon asa taboto prinsip ni Bibel?

¹⁰ Asa taboto prinsip ni Bibel, boi do tajaha akka kisah na adong di Bibel. Dung i, rimangi ma songon dia pikkiran dohot perasaan ni Jahowa taringot kisah i, jala aha alasanna dibahen Jahowa sada hukum. Molo taboto alasanna, lam taattusi ma cara marpikkir ni Jahowa. Alai, ikkon tapangido do bantuan ni Jahowa. Jala berupaya ma mangalatik cara marpikkirta. (Poda 2:​10-12) Tapikkirhon ma sukkun-sukkun on: ‘Boasa dibahen Jahowa hukum on? Molo dang lomo roha ni Jahowa tu sada ulaon, boha do perasaanna tu ulaon na asing na mirip tusi? Aha do na huparsiajari sian kisah ni Bibel on, jala boha do carana mangulahon i?’ Berupaya ma hita mamboto alasan ni Jahowa mambahen sada hukum, jala parsiajaran aha na tadapot sian kisah ni Bibel. Molo taulahon i, boi ma keputusanta sesuai tu lomo ni roha ni Jahowa.

11. Tikki pasahatton Jamita di Dolok, songon dia do Jesus mangurupi hita mamboto prinsip ni sada hukum? (Ida gambar.)

¹¹ Tikki pasahatton Jamita di Dolok, diurupi Jesus do hita mamboto prinsip ni sada hukum. Tabahas ma tolu contohna. Di ganup contoh, jolo dipaboa Jesus do hukumna. Dung i, dipatorang ibana ma aha alasanna dibahen hukum i manang prinsipna. Molo tarimangi na diajarhon Jesus i, taboto ma marlakku dope i tu hita saonari, jala boi mangurupi hita mambahen keputusan na denggan.

12. Aha do prinsip ni hukum na dipaboa di Mateus 5:​21, 22? (Ida gambar.)

¹² Jaha Mateus 5:​21, 22. “Unang hamu mambunu.” Aha do prinsip ni hukum on? Dang lomo roha ni Jahowa molo sogo rohatta mangida na asing. Jala dang lomo rohana molo dang denggan hatatta, pambahenatta, manang cara pandangta tu halak na asing. Jesus mandok nang pe dang mambunu sasahalak, alai molo sogo rohana mangida na asing, nungnga dilanggar ibana prinsip ni hukum i. Jala ikkon dihukum do “halak na sai muruk tu donganna”, kasar hatana, dohot na mangaleai. Boasa? Alana, boi do sikap sisongon i mambahen sasahalak gabe mambunu.—1 Joh. 3:15.

13. Boha do hita mangihutton prinsip di Mateus 5:​21, 22 saonari? (Ida gambar.)

¹³ Songon dia do hita mangihutton prinsip di Mateus 5:​21, 22 saonari? Unang ma torus sogo rohatta manang dendam tu sasahalak. (3 Mus. 19:18; Job 36:13) Boasa? Alana molo songon i perasaanta, boi do hata manang tindakanta mambahen haccit rohana. (Poda 10:12) Misalna, gabe targoda do ra hita margosip manang memfitnah ibana. Gabe sega ma reputasina. (Poda 20:19; 25:23) Saonari, godang do akka halak mamakke media sosial, blog, Internet, manang aplikasi na asing lao pasahatton barita manang mangirim pesan. Alai andorang so adong dope sudena i, nungnga dipaboa Jesus prinsip na mangurupi hita asa manat mamakke i. Memang, dang olo hita mambunu sasahalak. Alai, boi do hata manang pesan na takirim mambunu manang manghancurhon reputasina.

14. Aha do prinsip ni hukum na dipaboa di Mateus 5:​27, 28? (Ida gambar.)

¹⁴ Jaha Mateus 5:​27, 28. “Unang hamu mangalakkup.” Aha do prinsip ni hukum on? Sogo do roha ni Jahowa molo taulahon seks na so patut. Alai dang holan i. Sogo do tong rohana molo tapikkiri ulaon seks na so patut. Didok Jesus, molo adong sahalak bawa naung menikah na sai mangida sahalak borua [na so istrina] huhut marsakkap na so denggan, nungnga mardosa ibana disi. Jadi molo tubu pikkiran sisongon i, ikkon hatop do i tabolokkon. Jala ikkon marsitutu do hita asa unang sai mamikkiri i be. (Mat. 5:​29, 30) Marlakku do tong prinsip on tu akka donganta na so menikah dope.

15. Boha do hita mangihutton prinsip di Mateus 5:​27, 28 saonari? (Ida gambar.)

¹⁵ Songon dia do hita mangihutton prinsip di Mateus 5:​27, 28 saonari? Dang boi adong pikkiran na rorang manang ulaon seks na so patut di hita. (2 Sam. 11:​2-4; Job 31:​1-3) Ikkon tahindari do sude jenis ni pornografi. Unang ma tadok di rohatta, ‘Kan holan mangida do au, dang huulahon.’ Jala unang ma taihutton cara marpikkir ni akka halak di portibi on. Didok nasida, ‘Dang sala manonton piga-piga jenis ni pornografi, holan hiburan do i.’ Di jaman ni Jesus, dang adong dope perangkat elektronik, film, manang poto. Alai, nungnga dipaboa Jesus tu hita prinsip na patuduhon songon dia perasaan ni Jahowa tu akka gambar manang video na rorang. Sian prinsip i, gabe taboto ma sogo do roha ni Jahowa tu sude ulaon seks na so patut na adong saonari. Misalna, mangirim pesan, poto, manang video na rorang. Prinsip on boi do mangurupi akka naung menikah asa setia tu pasanganna. (Mal. 2:15) Jala boi do tong on mangurupi sude halak Kristen naung menikah dohot na so menikah dope. Molo diihutton nasida prinsip on, boi ma dihindari nasida akka ulaon seks na so patut.—Poda 5:​3-14.

16. Aha do prinsip ni hukum na dipaboa di Mateus 5:​43, 44? (Ida gambar.)

¹⁶ Jaha Mateus 5:​43, 44. “Ikkon haholonganmuna do donganmuna jolma.” Aha do prinsip ni hukum on? Dipangido Jahowa do asa tahaholongi sude halak. Di jaman ni Jesus, godang do halak Jahudi na so mangihutton prinsip on. Jala didok roha ni nasida, diloas hukum i do nasida marsogo ni roha tu musuna. Alai, dang songon i maksud ni hukum i. Alana diboto Jesus, lomo do roha ni Jahowa asa tahaholongi sude halak, dang soal sukuna manang latar belakangna.—Mat. 5:​45-48.

17. Boha do hita mangihutton prinsip di Mateus 5:​43, 44 saonari? (Ida gambar.)

¹⁷ Songon dia do hita mangihutton prinsip di Mateus 5:​43, 44 saonari? Tahaholongi ma sude halak. Unang ma dohot hita tu porang manang konflik na terjadi saonari. (Jes. 2:4; Mik. 4:3) Asing ni i, burju ma hita tu sude halak, dang soal sukuna, negarana, manang agama ni nasida. (Ul. 10:​34, 35) Jala taampuni ma akka halak na mambahen haccit rohatta dohot halak na tahaholongi.—Mat. 18:​21, 22; Mrk. 11:25; Luk. 17:​3, 4.

TOKTONG MA IHUTTON PRINSIP NI BIBEL

18. (a) Aha do na ikkon torus taulahon? (b) Aha do na lao tabahas di artikel na mangihut?

¹⁸ Mandok mauliate situtu do hita tu Jahowa ala dang dibahen hita songon dakdanak. Lomo do roha ni Jahowa asa tabahen keputusan mangihutton akka prinsip ni Bibel. (1 Kor. 14:20) Jadi tikki naeng mambahen keputusan, sai marsitutu ma hita ‘mangalului lomo ni roha ni Jahowa’. (Eps. 5:17) Taulahon pe i dang ala na mabiar hita dihukum, alai ala holong do rohatta tu Jahowa. Adong do muse na dilehon Jahowa lao mangurupi hita. Aha ma i? Panggora ni roha. Tabahas ma taringot i di artikel na mangihut.