Berupaya ma Hamu asa Boi Tardidi

1. (a) Aha do manfaatna molo tardidi hita? (b) Aha do na lao tabahas di artikel on?

NUNGNGA dilehon hamu dirimuna tu Jahowa jala tardidi? Molo nungnga, keputusan na massai denggan do i! Nungnga dipangido hamu panggora ni roha na ias sian Debata. (1 Ptr. 3:21) Jala gabe teladan do hamu tu akka halak na so tardidi dope. Alai boha molo dang tardidi dope hamu? Pasti holong do rohamuna tu Jahowa, jala lomo do rohamuna mangulahon lomo ni rohana. Diboto hamu do asa boi diampuni akka dosamuna jala boi marale-ale tu Jahowa, ikkon tardidi do hamu. (Ul. 2:​38-40) Alai, adong do ra na mangabbati hamu asa tardidi. Aha ma na boi mangurupi hamu? Di artikel on, lao tabahas ma (1) boasa adong piga-piga halak na so olo dope tardidi, (2) boasa ikkon sai taingot nungnga jonok ari ni Jahowa, jala (3) aha do manfaatna molo pittor dibahen hamu keputusan asa tardidi.

BOASA ADONG NA SO OLO DOPE TARDIDI

2. Boasa adong piga-piga halak na so olo dope tardidi?

² Adong do piga-piga halak na so olo dope tardidi ala mabiar. Lomo do roha ni nasida naeng melayani Jahowa. Alai mabiar nasida dang boi mambahen las roha ni Jahowa. Molo songon i dihilala hamu, jaha ma akka ayat na boi patoguhon rohamuna. Godang do akka ayat di Bibel na patuduhon, dang diharappon Jahowa asa sempurna hamu. Jala las do rohana molo dibahen hamu na terbaik tu Ibana. (Ps. 103:​13, 14; Kol. 3:23) Molo mabiar hamu ro tantangan, pangido ma asa diurupi Jahowa hamu gabe barani, songon panurat Psalmen na mandok, “Jahowa do di labbungku, dang mabiar au. Aha ma na boi bahenon ni jolma tu au?”—Ps. 118:6.

3. Aha do muse na mambahen piga-piga halak dang olo dope tardidi? (Ida sampul.)

³ Adong do muse na so olo tardidi ala didok roha ni nasida dang godang dope parbinotoan ni nasida. Alai, ikkon jolo diboto hamu do sude isi ni Bibel asa boi tardidi hamu? Dang songon i. Taida ma contoh sian Bibel. Hea do sada tikki dibahen Jahowa gempa asa boi malua si Paulus dohot si Silas sian penjara. Dung i, marbarita ma nasida tu panjaga ni penjara dohot keluargana. Gabe diboto panjaga ni penjara dohot keluargana i ma Debata do na mambahen si Paulus dohot si Silas malua. Jala gabe diboto nasida ma hasittongan taringot Jahowa dohot Jesus. Ujungna ‘laos di tikki i, tardidi ma nasida sude’. (Ul. 16:​25-33) Jadi molo nungnga ditanda hamu Jahowa, holong rohamuna tu Ibana, diboto hamu akka ajaran dasar sian Bibel, nungnga bertobat hamu, jala bertekad hamu mangoloi Jahowa, nungnga boi hamu tardidi.—Mrk. 12:30.

4. Aha do muse alasanna umbahen na adong piga-piga halak na so olo dope tardidi? (Ida gambar.)

⁴ Adong do tong na merasa maol hian mambahen perubahan asa boi tardidi. Memang, denggan do molo manat dipikkirhon hamu keputusan aha na lao bahenonmuna. (Luk. 14:​27-30) Adong do muse na sai marsak mamikkirhon pengorbanan aha na ikkon dibahen nasida. On ma na dihilala si Candace. Mulai sian na gelleng, diajarhon natua-tuana do tu ibana hasittongan. Alai dang hea diulahon ibana i. Dung magodang, marsiajar Bibel ma muse ibana. Didok ibana, “Huboto do aha na ikkon huulahon asa las roha ni Jahowa. Alai, lomo do tong rohakku mangulahon akka na ditawarhon portibi on. On ma na mambahen au maol muba.” Na asing merasa dang boi nasida mangulahon akka aturan ni Jahowa. Mabiar do nasida annon dung tardidi, diulahon nasida dosa na balga jala dipakaluar sian huria. Molo songon i perasaanmuna, aha do na ikkon diulahon hamu?

5. Molo ragu dope hamu lao tardidi, aha do na porlu dipikkirhon hamu? (Mateus 13:​44-46)

⁵ Molo naeng manuhor sada barang hita, pasti taida do sadia argana. Alai dang holan i. Tapikkirhon do tong manfaat ni barang i. Molo umbalga do manfaatna sian argana, biasana tatuhor do barang i. Dos songon i ma, tikki naeng tabahen keputusan lao tardidi, pasti tapikkirhon do akka perubahan aha na ikkon tabahen. Alai dang holan i. Tapikkirhon do muse sadia balga manfaatna molo marale-ale hita tu Jahowa. Taringot on, adong dua tudosan na dipaboa Jesus tu hita. (Jaha Mateus 13:​44-46.) Sarupa do na diulahon bawa di dua tudosan i. Digadis ibana do sude artana asa boi manuhor na ummarga sian i. Hamu pe songon i do. Nungnga dapotmuna hasittongan taringot tu Harajaon. I do na ummarga sian sasude. Jadi molo ragu hamu lao tardidi, rimangi ma dua tudosan i. Sukkun ma on tu dirimuna: ‘Pos do rohakku na massai arga hasittongan na huparsiajari? Arga do di au hubunganku tu Jahowa, harapan na dilehon tu au, dohot akka dongan na makkaholongi au?’ Alusmuna tu akka sukkun-sukkun i boi mangurupi hamu mamboto aha na ikkon diulahon hamu asa boi tardidi.

6. Aha do na boi mangurupi hita asa taulahon na taparsiajari?

⁶ Dipatorang Jesus di tudosanna taringot sahalak panabur, roha ni sasahalak do na mambahen olo ibana mangulahon na diparsiajarina. Dipaboa Jesus muse, adong do piga-piga “halak na burju jala na tulus rohana” na olo manjalo barita na uli. (Luk. 8:​5-15) Molo ragu dope hamu mangulahon na diparsiajari hamu, unang ma menyerah. Pangido ma bantuan sian Debata asa dilehon tu hamu “roha na imbaru” lao mangoloi Ibana. Pangido ma tong tu Ibana asa lomo rohamuna marsiajar jala mangulahon i.—Hes. 18:31; 36:26.

7-8. Boasa adong piga-piga na poso na so tardidi dope? (Ida gambar.)

⁷ Godang do akka na poso na makkaholongi Jahowa. Alai, adong do piga-piga sian nasida na so olo mambahen perubahan asa tardidi. Boasa? Ala terpengaruh sian halak na asing. Misalna, adong do piga-piga pengaruh na so denggan sian akka guru saonari. Didok akka guru i, dang pola boha diulahon akka siswa i lomo ni roha ni nasida, nang pe maralo i tu aturan ni Debata. Alai, bahaya do molo diihutton hata ni nasida i. (Ps. 1:​1, 2; Poda 7:​1-5) Jadi asa unang gabe marjea hamu, ulahon ma na didok panurat psalmen on: “Unggodang do parbinotoakku sian sude gurukku, ai huparsiajari do akka sipaingotmu.”—Ps. 119:99.

⁸ Adong do ra natua-tua na so mangurupi gellengna mambahen cita-cita rohani. Justru dijujui do gellengna i asa marsikkola na timbo jala mandapot karejo na denggan. Hape boi do i mangabbati gellengna lao tardidi. Boha do perasaanmuna molo dibahen natua-tuamuna songon i tu hamu? Hatai ma taringot i tu nasida. Pos ma rohamuna, dang soal sadia umurmuna, boi do hamu gabe ale-ale ni Jahowa.—Poda 20:11.

9. Boasa adong piga-piga halak na menunda asa tardidi?

⁹ Sasittongna, adong do piga-piga halak na memenuhi syarat lao tardidi. Alai, ditunda nasida do i asa boi rap tardidi dohot halak na asing. Misalna, lomo roha ni nasida asa rap tardidi dohot donganna manang keluargana. Memang, dang sala molo rap tardidi hamu dohot halak na dihaholongi hamu. Alai, unang ma gabe sundat hamu tardidi holan alani paimahon halak na asing. Ingot ma, pandidionmuna i dang bergantung tu halak na asing. Alana, hamu sandiri do na marjanji mangalehon dirimuna tu Jahowa.—Rom 14:12.

INGOT MA NUNGNGA JONOK ARI NI JAHOWA

10. Aha do na mambahen piga-piga halak dang olo dope tardidi?

¹⁰ Asing ni naung tabahas nakkin, adong dope alasan na asing na mambahen piga-piga halak dang olo dope tardidi. Aha ma i? Didok roha ni nasida, leleng nai do ro ari ni Jahowa i. Alai, marbisuk do molo songon i cara marpikkirta? Ingot ma, hea do didok Jesus tu akka siseanna songon on, “Toktong ma hamu rade. Ai di tikki na so panagamanmuna do ro Anak ni jolma i.”—Luk. 12:40.

11. Songon na dipaboa di Psalmen 119:​60, aha do na ikkon taulahon jala boasa?

¹¹ Ala holong rohatta tu Jahowa, gabe taronjar ma rohatta mangalehon diri tu Ibana. Lam tatanda Jahowa, lam taronjar ma rohatta pittor mangulahon akka parettana. (Jaha Psalmen 119:60.) Jala dipaboa si Jakobus do muse boasa ikkon hatop taulahon paretta ni Jahowa: Alana dang taboto songon dia ngolutta sogot. Jadi molo boi do ‘taulahon na denggan’ saonari, pittor taulahon ma i, unang be tapaleleng-leleng.—Jak. 4:​13-17.

12. Aha do na taparsiajari sian tudosan ni Jesus taringot akka parkarejo di ladang anggur?

¹² Hea do dipaboa Jesus tudosan taringot akka parkarejo di ladang anggur. Dipaboa Jesus, adong do piga-piga halak na karejo holan sajom. Alai, sarupa do upa na dilehon tu nasida dohot halak na karejo sadari manipat. Boasa holan sajom nasida karejo? Didok nasida, “Dang adong na olo manggaji hami.” Sasittongna dang na malas nasida, ala na so adong do na manjou nasida karejo. Buktina dung dijou nasida, pittor karejo do nasida. (Mat. 20:​1-16) Aha ma parsiajaranna? Saonari pe, nungnga dijou Jesus hita asa gabe siseanna jala dohot marbarita. Alani i, pittor taulahon ma na didok Jesus i.

13. Sian pengalaman ni istri ni si Lot, aha do na taparsiajari?

¹³ Adong do piga-piga halak na marpikkir, annon ma nasida mambahen perubahan dung naeng ro ari ni Jahowa. Hape molo dipaleleng-leleng nasida mambahen perubahan, olo do gabe maol nasida mangulahon i. Alani i ma dipasingot Jesus hita, “Ingot ma istri ni si Lot.” (Luk. 17:​31-35) Diboto istri ni si Lot do na lao diripasson Jahowa nama Kota Sodom dohot Gumora. Alai, dang rela ibana maninggalhon akka artana. (1 Mus. 19:​23-26) Sian pengalamanna i, taboto ma nungnga ditottuhon Debata sahat tu andigan boi akka jolma mambahen perubahan. Molo dung juppang tikki naung ditottuhon Ibana i, dang adong be kesempatan lao muba.—Luk. 13:​24, 25.

14. Aha do manfaatna mamparrohahon akka surirang naung saut saonari?

¹⁴ Saonari, godang do taida surirang ni Bibel na digohi. Memang tikki terjadi surirang i, olo do ra dang hona tu hamu dampakna. Alai tikki diida hamu i terjadi di akka inganan na asing, gabe taronjar do rohamuna mambahen akka perubahan jala pittor tardidi. Taida ma contoh di abad na parjolo. Dijujui Apostel Petrus do halak Kristen di tikki i asa “marroha”. Alana “nungnga jonok ujung ni saluhutna”. (1 Ptr. 4:7) Ra “ujung ni saluhutna” na dimaksud si Petrus disi, i ma taringot Jerusalem dohot bagas joro na lao dihancurhon. Sasittongna, surat ni si Petrus i dibahen tu halak Kristen na tinggal dao sian Jerusalem. Jadi tikki terjadi surirang i, dang hona tu nasida dampakna. (1 Ptr. 1:1) Alai tikki diida nasida terjadi surirang i, gabe lam pos ma roha ni nasida pasti saut do tong akka janji ni Jahowa na asing. Dos songon i ma hamu. Parrohahon ma akka surirang naung masa saonari. Molo diida hamu nungnga lam jonok ari ni Jahowa i, pasti taronjar do rohamuna mambahen perubahan jala pittor tardidi.

15. Aha do na ikkon taulahon asa rade hita tikki ro ari ni Jahowa? (2 Petrus 3:​10-13)

¹⁵ Di suratna na paduahon, dipaboa si Petrus do aha na ikkon taulahon asa rade tikki ro ari i. Memang tikki dibahen si Petrus surat i, leleng nai dope ari i. Alai dipaingot si Petrus do halak Kristen di tikki i, asa toktong paima-imahon jala “sai mangingot haroro ni ari ni Jahowa”. (Jaha 2 Petrus 3:​10-13.) Hita pe, sai taingot ma ari i jala sai rade ma hita. Berupaya ma hita asa ‘badia pangalahotta jala marsitutu manomba Debata’. Pasti las do roha ni Jahowa molo taulahon i. Alai, umbalga do muse las ni rohana molo talehon diritta tu Ibana jala tardidi.

UNANG MA PALELENG-LELENG HAMU LAO TARDIDI

16. Andigan do tikki na pas asa tardidi hamu? (2 Korint 6:​1, 2) (Ida gambar.)

¹⁶ Saonari ma bahen hamu keputusan asa tardidi. (Jaha 2 Korint 6:​1, 2.) I ma na diulahon sahalak pejabat na sian Etiopia. Dung pajuppang ibana dohot si Pilippus, gabe diboto ibana ma barita na uli. Dukkon i, pittor tardidi ma ibana. Dang didok ibana di rohana, ‘Jolo huparsiajari ma muse akka na asing. Pasti adong do muse annon aek disan.’ Justru didok ibana do tu si Pilippus, “Dang boi dope au tardidi?” (Ul. 8:​26, 27, 35-39) Sitiruon na massai denggan do ibana di hita! Dukkon tardidi pejabat Etiopia i, “ditorusson [ibana] ma pardalananna jala marlas ni roha do ibana”.

17. Aha do na ikkon diingot hamu?

¹⁷ Olo do ra mabiar hamu, maol dihilala hamu mambahen akka perubahan, manang dang adong na manjujui hamu asa tardidi. Alai ingot ma, pasti urupan ni Jahowa do hamu asa boi tardidi. (Rom 2:4) Dung tardidi hamu annon, pasti las hian do rohamuna. Alana, nungnga las roha ni Jahowa dibahen hamu. Dang dipaingot-ingot hamu be akka naung ditinggalhon hamu di tikki “naung salpu”. (Plp. 3:​8, 13) Alani i, boi ma fokus hamu tu “akka na lao ro”, i ma sude janji ni Jahowa tu halak na mangalehon diri tu Ibana jala tardidi.—Ul. 3:19.