Aha do Lapatan ni Tardidi?

1. Sian dia do taboto molo ajaran taringot tu pandidion i sada ajaran dasar sian Bibel?

LAS hian do rohatta mangida akka halak na baru tardidi. Songon i do tong perasaan ni halak Kristen tikki diida nasida godang halak na tardidi di ari Pentakosta taon 33 M. Di tikki i, dipasahat Apostel Petrus ma jamita na patorakkon massai penting do pandidion i. (Ul. 2:​38, 40, 41) Jala didok Apostel Paulus, “ajaran taringot tu pandidion” termasuk do i “ajaran na parjolo taringot tu Kristus”. (Heb. 6:​1, 2) Jadi, sada ajaran dasar sian Bibel do pandidion i jala ikkon takkas do taattusi taringot i. Boasa?

2. Boasa ikkon takkas taattusi ajaran ni Bibel taringot pandidion?

² Asa boi martahan sada jabu tikki ro udan haba-haba, ikkon togu do fondasina. Dos songon i ma, asa boi togu haporseaotta, ikkon takkas do taattusi akka ajaran na gabe dasar ni haporseaotta. Termasuk ma i taringot pandidion. Alani i, dang soal nungnga leleng hita tardidi manang dang tardidi dope, ikkon taboto do boasa massai penting pandidion i. Jadi di artikel on, lao tabahas ma akka sukkun-sukkun on: Aha do lapatan ni pandidion? Songon dia do pandidion i diulahon? Jala boasa ikkon tardidi hita di bagasan goar ni Ama, Anak, dohot tondi parbadia?

LAPATAN NI PANDIDION

3. Aha do lapatan ni pandidion?

³ Tikki tardidi hamu, on patuduhon (1) porsea do hamu tu na didok Bibel taringot Debata Jahowa dohot Jesus Kristus, (2) nungnga bertobat hamu sian sude dosamuna, (3) dibahen hamu do perubahan asa boi melayani Jahowa, (4) diakkui hamu do holan marhite Jesus do hamu boi dipalua, jala (5) nungnga marjanji hamu tu Debata na lao ulahononmuna do lomo ni rohana di organisasina. Jadi tikki marjanji hamu tu Jahowa jala tardidi, mulai ma hamu mardalan di dalan tu hangoluan na salelengna.

4. Tikki dibonompon hamu tu aek dung i kaluar muse, manggombarhon aha do i? (Ida gambar.)

⁴ Tikki tardidi hamu, dibonompon do hamu tu bagasan aek dung i kaluar ma hamu sian i.a Tikki dibonompon tu aek dung i kaluar, sarupa ma i songon na dikubur dung i dipahehe. (Bandingkon tu Kolosse 2:12.) Jadi, pandidion i manggombarhon akka perubahan naung dibahen hamu di ngolumuna. Boasa didok songon i? Alana tikki dibonompon hamu tu bagasan aek, on manggombarhon nungnga ditinggalhon hamu pangalahomuna na leleng i. Jala dung kaluar hamu sian aek, on patuduhon uppetting nama di hamu mangulahon lomo ni roha ni Jahowa sian manang aha pe.

5. Boasa upayatta lao tardidi boi dipatudos songon mambangun parau na balga? (1 Petrus 3:​18-21)

⁵ Jaha 1 Petrus 3:​18-21. Godang do upaya na porlu dibahen hamu asa boi tardidi. Dipatudos ma i songon ulaon ni si Noak tikki mambahen parau. Molo baru marsiajar Bibel dope hamu, ra didok rohamuna balga hian do perubahan na ikkon dibahen hamu. Jala dihilala hamu hira na maol hian do mangulahon i, songon si Noak na mambahen parau na balga. Alai ikkon dibahen hamu do memang akka perubahan i? Ido. Boasa? Ingot ma muse si Noak. Dipaboa Debata do tu ibana songon dia carana mambahen parau i, jala diihutton si Noak do sudena i. On patuduhon porsea do si Noak tu Debata jala diurupi Debata do ibana. Ujungna marhasil ma si Noak mambahen parau i, jala malua sian Aek na Sumar. Jadi dos songon si Noak, hamu pe boi do marhasil mangulahon “sude paretta ni Debata”.—1 Mus. 6:22.

6. Aha do maksud ni si Petrus tikki didok ibana pandidion i boi “paluahon hamu”?

⁶ Didok Apostel Petrus di ayat 21, pandidion i boi “paluahon hamu”. Alai dung tardidi, dang na berarti boi pittor malua hita jala pittor disesa sude dosatta. Holan mudar ni Jesus do na boi manesa sude dosatta. (1 Joh. 1:7) Alai, ikkon tardidi do hita. Alana paretta ni Jahowa do i. Jala tikki tardidi hita, tapangido do tu Debata asa dilehon tu hita “panggora ni roha na denggan”. Las do roha ni Jahowa mengampuni hita ala adong tobusan. Alani i, boi ma pandidion i “paluahon [hita]”, lapatanna boi ma hita mangolu salelengna.

SONGON DIA DO PANDIDION I DIULAHON

7. Songon dia do pandidion i diulahon?

⁷ Didok di Bibel, tikki tardidi sasahalak, ikkon dibonompon do ibana tu bagasan aek. Memang, dang pola godang aturan na asing na didokkon di Bibel taringot pandidion. Alai dipaboa do akka aha na porlu taparrohahon. Misalna, adong do akka prinsip na boi mangurupi akka na lao tardidi asa diboto nasida pakkean na songon dia na boi dipakke. Jala diurupi do tong akka na mangida asa diboto songon dia sikap ni nasida saleleng pandidion. (1 Kor. 14:40; 1 Tim. 2:9) Biasana sintua do na mandidi sasahalak. Alai unang ma gabe pasangappu tabahen tu sintua i. (1 Kor. 1:​14, 15) Jala sah do pandidion i, dang soal otik manang godang na mangida.—Ul. 8:36.

8. Sukkun-sukkun aha do na dipasahat tu akka na lao tardidi, jala aha do tujuanna? (Ulaon ni Apostel 2:​38-42) (Ida gambar.)

⁸ Didok di Bibel, ikkon ‘tapaboa do haporseaotta tu na asing asa boi hita selamat’. (Rom 10:​9, 10) Sada cara lao mangulahon i, tardidi ma hita. Alani i ma adong dua sukkun-sukkun tu akka na lao tardidi. Sukkun-sukkun na parjolo: “Nungnga muba hamu sian akka dosamuna, nungnga dilehon hamu dirimuna tu Jahowa, jala nungnga diihutton hamu dalan haluaon na dilehon marhite Jesus Kristus?” Tujuan ni sukkun-sukkun on, i ma lao mambuktihon molo akka na lao tardidi i nungnga mambahen akka perubahan asa boi tardidi. Jala didok si Petrus do hata na sarupa tu akka halak na lao tardidi di ari Pentakosta. Sukkun-sukkun na paduahon: “Diboto hamu do molo nungnga tardidi hamu, gabe ditanda halak ma hamu Saksi Jahowa jala gabe bagian ni organisasi ni Jahowa?” Tujuan ni sukkun-sukkun on, i ma lao paingotton hita asa tagohi janjitta tu Jahowa. Taihutton ma tudu-tudu sian organisasina jala melayani Ibana rap dohot akka dongan. Sarupa ma on tu na diulahon akka halak na tardidi di abad na parjolo. (Jaha Ulaon ni Apostel 2:​38-42.) Dung dialusi na lao tardidi i olo, memenuhi syarat ma nasida asa tardidi.

9. Aha do na ikkon diulahon sude halak asa boi mambahen las roha ni Debata?

⁹ Andorang so marsiajar Bibel hamu, ra dang diulahon hamu dosa na balga jala burju do hamu. Manang Saksi Jahowa do ra natua-tuamuna jala diurupi do hamu asa makkaholongi Jahowa. Alai, porlu dope hamu bertobat jala tardidi asa las roha ni Debata. Dang soal songon dia latar belakangta, ikkon taakkui do jolma na mardosa dope hita. Jala on mambahen dang boi marale-ale hita tu Debata. (Ps. 51:5) Alai dung taparsiajari taringot Jahowa, tapillit do mangulahon lomo ni rohana, dang lomo ni rohatta sandiri. Bertobat do hita sian akka dosatta jala dang taulahon be akka ulaon na mambahen sogo rohana. Dukkon i, holan lomo ni roha ni Jahowa ma na taulahon. Molo nungnga taulahon sudena i, boi ma hita tardidi.—Ul. 3:19.

10. Boasa ikkon tardidi muse hamu nang pe nungnga hea hamu tardidi di agamamuna najolo?

¹⁰ Ra nungnga tardidi hamu di agamamuna najolo. Alai, ikkon tardidi do muse hamu asa boi gabe Saksi Jahowa. Boasa? Alana, najolo dang sittong dope pangattusionmuna taringot Debata Jahowa dohot Jesus. Jala nang pe nungnga marjanji hamu di tikki i tu Debata, alai dang sesuai dope i tu lomo ni roha ni Jahowa. I ma na didok Apostel Paulus tu akka halak di Epesus. Sebelumna nungnga tardidi nasida, alai dang adong dope pangattusion ni nasida taringot Kristus. Alani i, dipangido si Paulus ma asa tardidi muse nasida.b (Ul. 19:​1-5) Saonari pe, asa boi sah pandidion i, ikkon sittong do pangattusionta taringot lomo ni roha ni Debata.

“DI BAGASAN GOAR NI AMA, ANAK, DOHOT TONDI PARBADIA”

11. Aha do lapatan ni tardidi “di bagasan goar ni Ama, Anak, dohot tondi parbadia”? (Mateus 28:​18-20)

¹¹ Diparettahon Jesus do tu akka siseanna asa tardidi “di bagasan goar ni Ama, Anak, dohot tondi parbadia”. (Jaha Mateus 28:​18-20.) Aha do lapatan ni i? Di Bibel, biasana hata “goar” lapatanna reputasi ni sasahalak. Jala boi do tong maksudna jabatan dohot huaso ni sasahalak. Alani i tikki tardidi hita di bagasan goar ni Jahowa dohot Jesus, berarti taakkui do nasida na marhuaso jala marhak lao paboahon aha na ikkon taulahon. Jala tikki tardidi hita di bagasan goar ni tondi parbadia, berarti rade do hita mangihutton tudu-tudu sian tondi parbadia i. Saonari, tabahas ma taringot i.

12. Aha do lapatan ni tardidi di bagasan goar ni Ama? (Pangungkapon 4:11) (Ida gambar.)

¹² Di bagasan goar ni Ama. Taakkui do molo Jahowa i Silehon Hangoluan. Ibana do Bapakta, Debata Pargogo na So Hatudosan, jala Sitoppa saluhutna. (Jaha Pangungkapon 4:11.) Taakkui do muse Ibana Sitangihon tangiang. Tapakke do goarna tikki martangiang hita. (Ps. 65:2) Jala tapaboa do taringot Ibana tu na asing. Alai adong dope na ikkon taakkui taringot goar ni Ama i. Di ari Pentakosta, nungnga diboto akka halak na manangihon si Petrus taringot Jahowa. Alai ikkon diakkui nasida do molo Jahowa i Silehon haluaon marhite Jesus Kristus.—Rom 5:8.

13. Aha do lapatan ni tardidi di bagasan goar ni Anak? (Ida gambar.)

¹³ Di bagasan goar ni Anak. Taakkui do molo Jesus i Anak ni Debata na Sasada i. Ibana do “dalan”. Lapatanna, holan marhite ibana do boi hita marale-ale tu Jahowa. (Joh. 14:6) Asing ni i, taakkui do Jesus i Panobus. Nungnga mate ibana humokkop hita asa dapotta hangoluan. Ala taboto sudena on, gabe taronjar ma rohatta lao maniru ibana ganup ari, dang holan tikki na tardidi i hita. (1 Joh. 2:6) Alani i do tong semangat hita marbarita songon ibana. Dang taloas manang aha pe mangabbati hita marbarita. (Luk. 4:43) Bahkan rade do hita dianiaya asa toktong setia melayani Jahowa. (2 Tim. 3:12) Taakkui do muse Jesus i “ulu ni huria”. Alani i, rade do hita unduk tu akka halak na dipillit ibana lao manguluhon jala manjaga akka siseanna.—Eps. 4:​8, 11, 12; 5:23.

14. (a) Aha do lapatan ni tardidi di bagasan goar ni tondi parbadia? (Ida gambar.) (b) Pandidion na songon dia do muse na ikkon dibahen tu akka na miniahan? (Ida kotak “Pandidion tu Akka na Miniahan”.)

¹⁴ Di bagasan goar ni tondi parbadia. Porsea do hita tu na didok Bibel taringot tondi parbadia. Taakkui do molo tondi parbadia i dang sada pribadi manang bagian sian debata sitolu sada. Alai huaso ni Debata do i. Jala taakkui muse, dipakke Jahowa do tondi parbadia i lao mangurupi akka panurirang dohot panurat ni Bibel. Alani i taratur ma hita manjaha Bibel jala taulahon ma na tajaha i. (2 Ptr. 1:​20, 21) Asing ni i, dang olo hita mangulahon dosa na balga. Alana, boi do i mambahen dang dilehon Jahowa be tondi parbadiana tu hita dohot tu huria.—Eps. 4:30.

15. Aha do na ikkon toktong taulahon?

¹⁵ Molo nungnga tardidi hamu, toktong ma ingot boasa olo hamu tardidi.c Toktong ma gohi janjimuna tu Jahowa tikki na dilehon hamu dirimuna tu Ibana jala tardidi. Alai boha do molo dang tardidi dope hamu? Aha do na mangabbati hamu asa tardidi? Di artikel na mangihut, tabahas ma aha na porlu diulahon hamu asa boi tardidi.