Parade ma Dirimuna Mangadopi Akka Tantangan Dung Tardidi Hamu

1-2. Aha do na ikkon taulahon asa rade hita mangadopi akka tantangan? Bahen ma tudosan.

SALELENG mangolu di portibi na dirajai Sibolis on, pasti sai adong do tantangan na taadopi. I do tong na didokkon Jesus tu akka siseanna. Didok ibana, “Sai adong do na mambahen sega haporseaon ni jolma.” (Mat. 18:7) Misalna, adong do ra donganta na mambahen haccit rohatta. Jadi porlu do taparade diritta lao mangadopi akka tantangan i asa toktong hita jonok tu Jahowa.

² Pikkirhon ma tudosan on. Jotjot do hita dipaingot asa taparade diritta andorang so masa bencana alam. Aha do na ikkon taulahon? Ikkon taboto do bencana aha na boi masa di inganatta. Porlu do on taboto tarlumobi molo baru pinda hita tu sada inganan. Dung i, ikkon tabahen do rencana asa rade hita mangadopi bencana i. (Poda 21:5) Dos songon i ma, ikkon taboto do akka tantangan aha na boi masa tu hita jala aha na porlu taulahon mulai sian saonari. Molo taulahon songon i, gabe ummura ma hita mangadopi i jala gabe toktong ma hita setia tu Jahowa. (Ps. 17:5) Saonari tabahas ma tolu tantangan na boi masa tu hita, jala aha na ikkon taulahon asa rade hita mangadopi i.a

ADONG AKKA DONGAN NA MAMBAHEN HACCIT ROHAMUNA

3. Tantangan aha do na boi masa tu hita?

³ Diingot hamu do tikki parjolo sahali ro hamu tu parpunguan? Tikki diida hamu masihaholongan akka naposo ni Jahowa, gabe pos ma rohamuna on do hasittongan. (Joh. 13:35; Kol. 3:12) I ma na dihilala si Blanca.b Alai dung tardidi ibana, toppu ma adong tantangan na diadopi ibana. Didok si Blanca, “Adong ma sahalak donganta borua na kasar tu au. Jala hea do hubege diparoa-roa ibana akka dongan di huria. Dang hurippu masa songon on. Alana na huboto marsitutu do Saksi Jahowa asa mardame jala masihaholongan.” Memang, marsitutu do akka donganta lao patuduhon akka sifat ni Jahowa. Alai dang sempurna dope hita. (Eps. 4:​23, 24; 1 Joh. 1:8) Jadi, sai adong do akka dongan na mambahen haccit rohatta. (Jak. 3:8) Jala alani on, adong do piga-piga donganta na so olo be manomba Jahowa.

4. Aha do na boi mangurupi hita asa lam mura memaappon akka dongan? (Epesus 4:32)

⁴ Pasti sai adong do dongan na mambahen haccit rohamuna. Alani i, ikkon diparade hamu do dirimuna mulai sian saonari. Songon dia carana? Ingot ma na didok di Epesus 4:32. (Jaha.) Molo burju hamu jala dipatudu hamu asi ni roha, gabe denggan ma hubunganmuna tu halak na asing. Asing ni i, berupaya ma hamu asa rade manalpuhon hasalaan ni akka dongan. Asa lam mura diulahon hamu i, ingot ma on: Jotjot do dipangido hamu tu Jahowa asa diampuni hamu. Jala memang sai rade do Ibana mengampuni hamu. (Mat. 6:12) Molo sai diingot hamu i, pasti gabe taronjar do rohamuna lao mengampuni halak na asing.

5. Prinsip ni Bibel na dia do na boi mangurupi hita molo adong dongan na mambahen haccit rohatta? (Poda 19:11) (Ida gambar.)

⁵ Jaha Poda 19:11. Didok di Bibel, “Molo marbisukc halak, dang mura ibana muruk.” Ayat on ma na mangurupi si Rima. Nungnga tardidi ibana saleleng piga-piga taon. Didok ibana, “Molo adong dongan na mambahen haccit rohakku, pittor huingot do Poda 19:11. Hucoba ma mangarimangi situasina dohot latar belakangna. Jala berupaya do au mamikkirhon boasa diulahon ibana songon i. Asing ni i, hutogihon do ibana asa rap marbarita hami. Gabe lam hutanda ma ibana.” Tatiru ma na diulahon si Rima on. Berupaya ma hita asa lam tatanda akka dongan. Molo taulahon i, gabe lam mura ma hita memaappon nasida.

6. Aha do na porlu taulahon asa denggan hubungatta tu akka dongan?

⁶ Aha do muse na porlu diulahon hamu asa denggan hubunganmuna tu akka dongan di huria? Tikki bergaul hamu dohot akka dongan, fokus ma tu akka sifat ni nasida na denggan. (Bandingkon tu Poda 10:12; Rom 12:10; Plp. 2:​2, 3) I ma na diulahon sahalak donganta na baru tardidi na margoar si Mark. Ala jotjot ibana bergaul dohot akka dongan di huria, gabe lam takkas ma diida ibana hahurangan ni nasida. Aha do na mangurupi si Mark asa unang sappe tartuktuk? Didok ibana, “Molo hubandingkon kesalahan ni akka dongan tu hajahaton ni akka halak di portibi on, dang sadia dope kesalahan ni akka dongan i. Alani i, dang olo au fokus tu hahurangan ni nasida.” Jadi tiru ma si Mark. Molo berfokus hamu tu sifat ni nasida na denggan, gabe denggan ma hubunganmuna tu akka dongan di huria.

SAI DIINGOT HAMU AKKA NAUNG DITINGGALHON HAMU

7. Aha do na mambahen adong na naeng mulak muse gabe bagian sian portibi on?

⁷ Dung gabe Saksi Jahowa hamu, pasti las hian do rohamuna ala dang bagian sian portibi on be hamu. Ra didok rohamuna, ‘Dang mungkin mulak be iba tusi!’ Alai tikki masa sitaonon, olo do ra gabe diingot hamu akka naung ditinggalhon hamu andorang so gabe Saksi hamu. Bahkan olo do ra naeng diulahon hamu i muse. (Bandingkon tu 4 Musa 11:​4-6.) Misalna, adong do piga-piga dongan naung maninggalhon karejona na denggan ala godang habis tikkina tusi. Adong do muse na ditinggalhon akka donganna ala marsiajar Bibel ibana. Adong do tong naung marhasil maninggalhon kebiasaan na dihasogohon roha ni Jahowa. Molo sappe tatinggalhon do Jahowa alani sudena i, pasti lungun hian do rohana. Jadi manang aha pe na masa, bertekad ma hamu asa unang gabe bagian sian portibi on muse hamu. Attong, aha ma na porlu diulahon hamu?

8. Aha do na taparsiajari sian si Abraham dohot si Sara?

⁸ Di Bibel, dipaboa do taringot akka naposo ni Jahowa na gabe sitiruon di hita. Misalna, si Abraham dohot si Sara. Tikki disuru Jahowa nasida maninggalhon Kota Ur, dioloi nasida do i jala gabe tinggal di kemah do nasida. (Heb. 11:​8, 9) Tabo do ngolu ni nasida di Ur. Alana mamora jala aman do kota i. “Autsugari sai diingot nasida inganan na ditinggalhon nasida i”, olo do ra gabe naeng mulak muse nasida tusi. Alai dang diulahon si Abraham dohot si Sara i, alana fokus do nasida tu janji ni Jahowa.—Heb. 11:​15, 16.

9. Boha do pandangan ni Apostel Paulus tu akka naung ditinggalhon ibana? (Pilippi 3:​7, 8, 13)

⁹ Godang do pengorbanan na dibahen si Paulus asa boi gabe sisomba Jahowa. Andorang so gabe halak Kristen ibana, diparsiajari ibana do taringot Patik ni halak Jahudi jala si Gamaliel do guruna. (Ul. 22:3) Sasittongna, boi do dapot ni si Paulus jabatan na sangap di akka pamimpin ni halak Jahudi. (Gal. 1:​13, 14) Alai dung dibege ibana barita na uli, ditinggalhon ibana ma sudena i. Tabo do ngoluna dung gabe halak Kristen? Daong. Dipukkuli do ibana, dipenjarahon, jala godang do halak Jahudi na marsogo ni roha tu ibana. (2 Kor. 11:​23-26) Molo sai dipikkiri ibana masalahna jala dibandingkon ibana ngoluna andorang so gabe halak Kristen, olo do ra gabe didok rohana nga sala be keputusan na dibahen ibana. Alai, berfokus do si Paulus tu pasu-pasu na lao jaloonna jala sada hasangapon do di ibana boi gabe siihutton Jesus. Jadi pos do roha ni si Paulus, umbalga do pasu-pasu na dapotna sian akka pengorbanan na dibahen ibana.—Jaha Pilippi 3:​7, 8, 13.

10. Aha do na ikkon sai taingot? (Markus 10:​29, 30) (Ida gambar.)

¹⁰ Aha do na boi taparsiajari sian si Paulus? Hea do hamu mamikkiri akka naung ditinggalhon hamu najolo? Molo hea, ingot ma boasa ditinggalhon hamu sudena i. (Pjm. 7:10) Dung i, ingot ma sude pasu-pasu naung dijalo hamu dung mananda hasittongan. Boi hamu marale-ale tu Sitoppa langit dohot tano on. (Poda 3:32) Godang do akka dongan sahaporseaon na makkaholongi hamu. (Jaha Markus 10:​29, 30.) Jala adong do harapanmuna di ari na naeng ro! (Jes. 65:​21-23) Molo jotjot dirimangi hamu sudena on, pasti dang sai dipikkiri hamu be akka naung ditinggalhon hamu.

11. Aha do na boi diparsiajari hamu sian pengalaman ni si Rosemary?

¹¹ Taida ma pengalaman ni sahalak donganta borua na margoar si Rosemary. Dung marumur 50-an do ibana tardidi. Hea do ibana masihol tu akka naung ditinggalhon ibana najolo. Didok ibana, “Tikki baru-baru gabe Saksi au, masihol do au mangarayahon Natal. Alana biasana marpungu do au dohot keluargakku. Hulehon ma hadiah tu nasida. Tikki dibukka akka gellengku dohot pahoppukku hadiah Natal i, las hian ma rohakku.” Aha do na diulahon si Rosemary lao mangatasi perasaanna i? Didok ibana, “Alai ganup taon, hutogihon do keluargakku asa rap marpungu hami. Hulehon ma hadiah tu nasida jala hupaboa ma na holong rohakku tu nasida.” Adong do tantangan na asing na diadopi si Rosemary. Didok ibana, “Dung gabe Saksi Jahowa au, dang olo be akka donganku mardongan tu au. Jadi sipata masihol hian do au tu nasida jala gabe kesepian do au.”d Aha ma na mangurupi si Rosemary? Dibahen ibana ma jadwal asa boi rap marbarita dohot akka dongan sahaporseaon. Didok ibana, “Gabe godang ma donganku jala massai holong do rohakku tu nasida.” Aha do na boi diparsiajari hamu sian si Rosemary? Olo do ra masihol hamu tu akka na mambahen las rohamuna andorang so mananda hasittongan. Alai pos ma rohamuna, dapotmuna do annon akka na mambahen las rohamuna na boi manggattihon i sude. (Plp. 4:​8, 9) Jala ingot ma pasti unggodang do pasu-pasu na dilehon Jahowa sian pengorbanan na dibahen hamu.

ADONG DONGAN MANANG KELUARGATTA NA MANINGGALHON JAHOWA

12. Situasi aha do muse na boi gabe tantangan di hita?

¹² Dung gabe Saksi Jahowa hamu, pasti las do rohamuna ala dang bagian sian portibi on be hamu. Las do tong rohamuna ala boi bergabung tu organisasi na mangajarhon hasittongan, jala akka halakna pe berupaya mangulahon na sittong. (Jes. 65:14) Alai hea do ra dibege hamu adong sasahalak na mangulahon dosa na balga. Bahkan adong na sappe dipakaluar sian huria. (1 Kor. 5:13) Taida ma songon dia situasi sisongon i mempengaruhi sahalak donganta borua na margoar si Samar. Didok ibana, “Dang leleng dung tardidi au, adong ma sahalak sintua na mangulahon dosa na balga jala dipakaluar do ibana sian huria. Tarsonggot do au mambege i. Dang hurippu adong sahalak sintua mangulahon dosa na mambahen haccit roha ni Jahowa dohot akka dongan di huria.” Pos do rohatta, holong do roha ni akka dongan tu Jahowa jala berupaya do nasida mangulahon na sittong. (1 Kor. 13:​4, 7) Alai memang, sai adong do halak na dipakaluar sian huria ganup taon. Jala molo halak na dipakaluar i ale-alemuna manang halak na gabe sitiruon di hamu, pasti borat do i di hamu.

13. Aha do na boi mangurupi hamu asa toktong setia tikki adong dongan manang keluargamuna na maninggalhon Jahowa?

¹³ Aha do na boi mangurupi hamu asa toktong setia tikki adong dongan manang keluargamuna na maninggalhon Jahowa? Mulai sian saonari, patogu ma hubunganmuna tu Jahowa. (Jak. 4:8) Memang taratur do hita martangiang jala marsiajar Bibel dohot keluargatta manang dohot akka dongan di huria. Alai hita sandiri pe porlu do taratur martangiang jala marsiajar Bibel. (Ps. 1:2; 62:8) Jadi unang ma bergantung tu sasahalak hubunganmuna tu Debata.

14. Aha do na boi taparsiajari sian Apostel Petrus? (Johannes 6:​66-68)

¹⁴ Marsiajar ma hita sian Apostel Petrus. Sada tikki, godang do akka sisean na so olo be mangihutton Jesus. Alana dang diattusi nasida na diajarhon Jesus. Ra, si Petrus pe songon i do. (Jaha Johannes 6:​66-68.) Alai dang ditiru ibana akka halak i. Hasilna toktong do si Petrus setia tu Jesus. Dos songon i ma hita saonari. Nang pe adong halak na maninggalhon Jahowa, alai taingot ma holan organisasi ni Jahowa do na mangajarhon hasittongan. Gomos ma tiop hasittongan i jala toktong ma setia tu Jahowa. Si Samar naung dipaboa nakkin mandok, “Sai hupaingot do dirikku molo adong na mangulahon na sala di huria, dang na berarti Jahowa, organisasina, dohot akka dongan na asing sarupa songon ibana.”

15. Aha do na boi taparsiajari sian pengalaman ni si Emily?

¹⁵ Taida ma pengalaman ni si Emily. Saminggu dung tardidi ibana, ditinggalhon omakna ma nasida jala dipakaluar do omakna i sian huria. Didok si Emily, “Dang husangka songon i omakku. Borat hian do on di au jala masihol hian do au tu omakku.” Aha ma na mangurupi si Emily? Didok ibana, “Dipatogu bapakku dohot akka dongan do au. Nga songon keluargakku be nasida. Dang sahalakku mangadopi on. Sude do naposo ni Jahowa marsitaonon. Alani i penting hian do jonok tu akka dongan asa boi masipatoguan.” (1 Ptr. 5:9) Jadi mulai sian saonari, toktong ma jonok hita tu akka dongan andorang so ro sitaonon tu hita. Molo taulahon i, boi ma akka dongan mangurupi jala patoguhon hita.

16. Aha do na porlu taingot? (Ida gambar.)

¹⁶ Ingot ma, dipissang Jahowa do halak na dihaholongi Ibana. (Heb. 12:6) Sai tarpaima do Jahowa asa mulak muse sude na dipakaluar sian huria. (2 Ptr. 3:9) Jadi molo adong dongan manang keluargamuna na dipakaluar sian huria, pos ma rohamuna pasti berupaya do akka sintua mangurupi ibana asa mulak muse tu Jahowa.—2 Tim. 2:​24, 25.

17. Boasa dang porlu hita mabiar mangadopi akka tantangan?

¹⁷ Nungnga tabahas piga-piga tantangan na boi masa dung tardidi hamu. Alai unang mabiar hamu. Boi do toktong setia hamu tu Jahowa. Memang ikkon diparade hamu do dirimuna. Jala ingot ma sai rade do Jahowa mangurupi hamu asa toktong setia hamu tu Ibana. Nungnga diurupi Jahowa hamu saleleng on, jala pasti urupanna do hamu torus. (1 Ptr. 5:10) Pasti lehononna do tu hamu gogo asa boi hamu sabar jala martahan mangadopi akka tantangan. Molo olo hamu diurupi Jahowa, boi ma hamu toktong jonok tu Ibana dang soal aha na masa.—Ps. 119:165; Rom 8:​38, 39.