Tangiakkon ma Halak na Asing

1. Sian dia do taboto na massai penting tangiangta di Jahowa?

HADIAH na luar biasa do tangiang. Pikkirhon ma on: Dilehon Jahowa do tugas tu akka suru-suruan. (Ps. 91:11) Dilehon Ibana do tong tugas na massai penting tu Anakna. (Mat. 28:18) Alai taringot manangihon tangiangta, dang dilehon Jahowa tugas on tu manang ise pe. Jahowa do na langsung manangihon tangiangta. I do alana didok di Bibel, Ibana do “Sitangihon tangiang”.—Ps. 65:2.

2. Aha do na tatiru sian Apostel Paulus taringot manangiakkon halak na asing?

² Memang tikki martangiang, boi do tapaboa sude arsak ni rohatta tu Jahowa. Alai ikkon taingot do tong manangiakkon halak na asing. I ma na diulahon Apostel Paulus. Godang do sitaononna, jala ditangiakkon ibana do i tu Jahowa. (2 Kor. 11:23; 12:​7, 8) Alai ditangiakkon ibana do tong halak na asing. Misalna tikki dibahen ibana surat tu huria di Epesus, didok ibana do, “Toktong do hutangiakkon hamu.” (Eps. 1:16) Asing ni i, ditangiakkon si Paulus do akka donganna sada-sada. Contohna si Timoteus. Didok ibana, “Mandok mauliate do au tu Debata. . . . Sai huingot do ho di tangiakku arian nang borngin.”—2 Tim. 1:3.

3. Aha do sipata na mambahen lupa hita manangiakkon halak na asing?

³ Sipata olo do lupa hita manangiakkon halak na asing. Boasa songon i? On ma na didok sahalak donganta borua na margoar si Sabrina.a Didok ibana, “Sibuk do hita sude. Ala sai adong masalah na taadopi, olo do holan diritta na tatangiakkon.” Boha do molo hamu? Molo songon i do tong na dihilala hamu, boi do artikel on mangurupi hamu. Di artikel on, lao tabahas ma (1) boasa penting manangiakkon halak na asing, jala (2) songon dia carana mangulahon i.

BOASA PENTING MANANGIAKKON HALAK NA ASING?

4-5. Aha do na patuduhon na “balga do pengaruh” ni tangiangta tu halak na asing? (Jakobus 5:16)

⁴ ‘Balga do pengaruhna’ molo tatangiakkon halak na asing. (Jaha Jakobus 5:16.) Adong do pengaruh ni tangiangta tu situasi ni halak na asing? Adong. Parrohahon ma akka contoh on. Diboto Jesus do na lao disoadahon si Petrus ibana. Alai didok Jesus, “Nungnga hubahen pangidoakku tu Debata taringot tu ho asa unang mago haporseaonmu.” (Luk. 22:32) Asing ni i, diboto si Paulus do molo tatangiakkon halak na asing, balga do pengaruh ni i tu nasida. Tikki ditudu si Paulus mangulahon na sala jala dipenjarahon di Rom, didokkon ibana do tu si Pilemon, “Dipangido rohakku do paluaonna au alani akka tangiangmuna.” (Plm. 22) Tutu do masa songon na ditangiakkonna i. Dipalua ma si Paulus sian penjara jala boi ma ibana marbarita na uli muse.

⁵ Memang tikki tatangiakkon halak na asing, dang na berarti ikkon dilehon Jahowa sude na tapangido i. Alai taingot ma, sian akka tangiang na tapasahat, boi do diboto Jahowa sadia penting pangidoatta i. Jala sipata dialusi Ibana do i. Alani i, toktong ma martangiang hita tu Jahowa. Pos ma rohatta, pasti bertindak do Jahowa lao mangalusi akka tangiangta.—Ps. 37:5; 2 Kor. 1:11.

6. Tikki tatangiakkon na asing, gabe boha do perasaanta tu nasida? (1 Petrus 3:8)

⁶ Patuduhon ‘asi ni roha’ do hita molo tatangiakkon na asing. (Jaha 1 Petrus 3:8.) Molo marasi ni roha sasahalak, pasti diparrohahon ibana do sitaonon na diadopi halak na asing, jala lomo rohana mangurupi nasida. (Mrk. 1:​40, 41) I ma na diulahon sahalak sintua na margoar si Michael. Didok ibana, “Tikki hutangiakkon aha na porlu di halak na asing, gabe boi ma hubayakkon sitaonon na diadopi nasida. Jala on mambahen gabe lam holong rohakku tu nasida. Huhilala gabe lam jonok do hubunganku tu nasida, nang pe mungkin dang disadari nasida i.” Sahalak sintua na asing na margoar si Richard mandok, “Dung tatangiakkon na asing, gabe rade ma hita mangurupi ibana.” Didok ibana muse, “Tikki talehon bantuan na dihaporluhon ibana, hira na hita do tong na mangalusi tangiangta i.”

7. Molo tatangiakkon na asing, gabe boha do pandanganta taringot tu masalahta? (Pilippi 2:​3, 4) (Ida gambar.)

⁷ Molo tatangiakkon na asing, dang holan diritta be na sai tapikkiri. (Jaha Pilippi 2:​3, 4.) Ala mangolu di portibi na dirajai Sibolis do hita, sai adong do masalah na taadopi. (1 Joh. 5:19; Pgk. 12:12) Jadi molo jotjot hita manangiakkon na asing, gabe dipaingot ma hita, “akka dongan [sahaporseaotta] na di liat portibi on pe manaon sitaonon na songon i do”. (1 Ptr. 5:9) Sahalak donganta perintis na margoar si Katherine mandok, “Ala hutangiakkon halak na asing, gabe huboto ma adong do tong sitaonon na diadopi nasida. Ala huingot on, dang masalahki be na sai hupikkiri.”

PORLU DO NASIDA TATANGIAKKON

8. Akka ise do na boi tatangiakkon?

⁸ Akka ise do na boi tatangiakkon? Tatangiakkon ma akka donganta na marsahit, akka donganta na poso na direhe-rehei manang dipaksa mangulahon na sala di sikkola, manang akka donganta naung matua. Asing ni i, godang do tong akka donganta na ditentang keluargana manang pamaretta. (Mat. 10:​18, 36; Ul. 12:5) Adong do piga-piga donganta na ikkon mangungsi ala terjadi kerusuhan di inganan ni nasida. Adong do muse na marsitaonon ala hona bencana. Memang dang tatanda akka donganta on. Alai molo tatangiakkon nasida, on patuduhon na taihutton do paretta ni Jesus asa “marsihaholongan”.—Joh. 13:34.

9. Boasa ikkon tatangiakkon akka donganta na manguluhon di organisasi dohot istri ni nasida?

⁹ Boi do tong tatangiakkon akka donganta na manguluhon di organisasi. Misalna, Punguan na Mangaradoti Organisasi dohot na mangurupi nasida, Panitia Cabang, akka pengawas di kantor cabang, pengawas wilayah, sintua, dohot parhobas. Sai adong do sitaonon na diadopi akka donganta on. Nang pe songon i, bekerja keras do nasida lao mangurupi hita. (2 Kor. 12:15) Misalna, sahalak pengawas wilayah na margoar si Mark mandok, “Ala dao au sian natua-tuakku, gabe khawatir do au mamikkiri nasida. Alana, nungnga matua nasida jala marsahit-sahit. Memang diurus itokku dohot laekku do nasida. Alai, lungun do hurasa alana dang boi godang na huulahon lao mangurupi nasida.” Dang sai taboto sitaonon aha na diadopi akka donganta on. Alani i sai tatangiakkon ma nasida. (1 Tes. 5:​12, 13) Asing ni i, tatangiakkon ma tong istri ni akka donganta on. Alana, nungnga setia nasida mangurupi suamina asa boi toktong mangulahon tugas ni nasida.

10-11. Molo dang spesifik tangiangta tikki manangiakkon akka dongan, olo do Jahowa manangihon i? Patorang ma.

¹⁰ Songon naung tabahas, jotjot do tatangiakkon akka donganta nang pe dang sai tapaboa goar ni nasida. Misalna, olo do ra tapangido tu Jahowa asa diurupi Ibana akka donganta na dipenjara dohot akka na marhabot ni roha. Sahalak sintua na margoar si Donald mandok, “Godang do akka donganta na marsitaonon. Jadi sipata, dang ikkon spesifik tangiangta asa boi tatangiakkon sude donganta.”

¹¹ Las do tong roha ni Jahowa manangihon akka tangiang sisongon i! Alana, dang sai taboto aha na dihaporluhon akka donganta. Jadi, dang sala molo sipata dang spesifik tangiangta. (Joh. 17:20; Eps. 6:18) Akka tangiang sisongon i patuduhon na ‘tahaholongi do sude dongan sahaporseaotta’.—1 Ptr. 2:17.

TATANGIAKKON MA AKKA DONGANTA SADA-SADA

12. Molo manat taparrohahon na dihaporluhon akka donganta, gabe songon dia do tangiangta?

¹² Manat ma parrohahon akka donganta. Asing ni manangiakkon akka donganta secara kelompok, denggan do tong molo tatangiakkon nasida sada-sada. Pikkirhon ma: Adong do sasahalak di huriamuna na marsahit na parah? Adong do donganta na poso na lungun rohana ala dipaksa mangulahon na sala di sikkola? Adong do natua-tua na holan sahalakna “mangajar-ajari jala mamodai [gellengna] hombar tu lomo ni roha ni Jahowa”? (Eps. 6:4) Molo manat diparrohahon hamu akka na dihaporluhon donganmuna, gabe lam holong ma rohamuna tu nasida. Jala gabe taronjar ma rohamuna lao manangiakkon nasida.b—Rom 12:15.

13. Aha do na porlu taulahon asa boi tatangiakkon akka donganta na so tatanda dope?

¹³ Paboa ma goar ni akka donganta tikki martangiang. Tatangiakkon ma akka donganta bahkan na so hea dope pajuppang dohot hita. Misalna, pikkirhon ma akka donganta na dipenjara di Eritrea, Krimea, Rusia, dohot Singapura. Boi do tajaha goar ni akka donganta i di jw.org.c Sahalak pengawas wilayah na margoar si Brian mandok, “Biasana, husurat do goar ni akka donganta na dipenjara, jala hujaha ma i marsoara. Ala huulahon songon i, gabe boi ma huingot goar ni nasida jala boi hutangiakkon.”

14-15. Aha do na porlu taulahon asa spesifik tangiangta?

¹⁴ Spesifik ma tangiangmuna. Si Michael, na dipaboa nakkin mandok, “Tikki hujaha di jw.org taringot akka donganta na dipenjara, gabe hubayakkon ma boha do pakkilalaanku molo au gabe nasida. Pasti marsak do au mamikkirhon istrikku dohot akka na dihaporluhon ibana. Ala hurimangi taringot i, gabe huboto ma aha na lao hutangiakkon taringot akka suami na dipenjarahon.”—Heb. 13:​3, surat na di toru.

¹⁵ Molo tabayakkon songon dia situasi ni akka donganta na dipenjara, gabe taboto ma muse aha na lao tatangiakkon taringot nasida. Misalna, tatangiakkon ma asa burju panjaga ni penjara tu nasida. Jala asa boi toktong diulahon akka donganta i ibadat ni nasida tu Jahowa saleleng dipenjara. (1 Tim. 2:​1, 2) Asing ni i, tatangiakkon ma sai anggiat gabe dipatogu roha ni akka dongan di huria ala mangida toktong setia akka donganta na dipenjara. Manang tatangiakkon ma asa olo halak manangihon barita na uli ala mamparrohahon pangalaho ni donganta na dipenjara i. (1 Ptr. 2:12) Taulahon ma tong songon i tikki naeng tatangiakkon akka donganta na asing na marsitaonon. Pikkirhon ma songon dia situasi na diadopi nasida ganup ari. Jadi molo manat taparrohahon aha na dihaporluhon akka donganta, tapaboa goar ni nasida di tangiangta, jala spesifik tangiangta, on patuduhon na ‘balga do holong ni rohatta tu nasida’.—1 Tes. 3:12.

CARA PANDANG NA SITTONG TARINGOT MARTANGIANG

16. Aha do na porlu taingot asa sittong cara pandangta taringot martangiang? (Mateus 6:8)

¹⁶ Songon naung tabahas, molo tatangiakkon akka donganta, boi do ra gabe muba situasi ni nasida. Alai, ikkon denggan do cara pandangta taringot tu martangiang. Taingot ma, tikki martangiang hita, unang ma tadok di tangiangta hira na so diboto Jahowa situasina. Manang, unang ma taajari Jahowa taringot aha na lao sibahenonna. Alana, diboto Jahowa do sude situasi na masa di ngolutta. Ai diboto Jahowa do akka aha na dihaporluhon naposona, bahkan andorang so tapangido i tu Ibana. (Jaha Mateus 6:8.) Attong molo songon i, boasa ikkon tatangiakkon halak na asing? Memang nungnga tabahas be piga-piga alasanna di artikel on. Alai asing ni i, molo tatangiakkon halak na asing, on patuduhon na parduli do hita tu nasida. Jala las hian do roha ni Jahowa tikki diida Ibana akka naposona maniru holongna.

17-18. Boasa penting manangiakkon halak na asing? Bahen ma tudosan.

¹⁷ Nang pe dang pittor muba situasi ni akka donganta dung tatangiakkon nasida, alai on patuduhon na holong do rohatta tu nasida. Jala las do roha ni Jahowa mangida i. Songon on ma tudosanna: Bayakkon ma adong sada keluarga, jala adong dua gellengna. Marsahit ma anakna. Dung i, didokkon boruna ma tu bapakna, “Bereng jo bapa, marsahit abang!” Sasittongna, diboto bapakna do i. Jala pasti denggan do diurus bapakna anakna i asa malum. Alai ala dibege bapakna i pangidoan ni boruna, gabe las hian ma rohana. Alana on patuduhon na holong do roha ni boruna i tu abangna.

¹⁸ I ma na dihalomohon Jahowa asa taulahon. Dipangido Ibana do asa parduli hita tu akka donganta jala tatangiakkon nasida. Molo taulahon i, on patuduhon na holong do rohatta tu nasida, dang holan tu diritta. Jala diparrohahon Jahowa do i. (2 Tes. 1:3; Heb. 6:10) Asing ni i, songon naung tabahas nakkin, boi do sipata tangiangta manguba situasi ni halak. Alani i, toktong ma tatangiakkon halak na asing.