Cara asa Tangiangta Mambahen Hita Lam Jonok tu Jahowa

1-2. (a) Aha do sipata na mambahen dang tapaboa isi ni rohatta tu Jahowa? (b) Sian dia do taboto na olo Jahowa manangihon akka tangiangta?

HEA do hamu merasa hira na sarupa torus isi ni tangiangmuna, jala dang dipaboa hamu songon dia perasaanmuna tu Jahowa? Pasti hea do hita songon i. Ala sibuk do hita, olo do ra gabe jeppek tangiangta. Manang maol do ra tahilala paboahon sude na di rohatta on tu Jahowa. Alana didok rohatta, dang tama hita jonok tu Ibana.

² Dipaboa di Bibel na uppetting di Jahowa, i ma tulus ni rohatta tikki martangiang, dang akka hata na tadokkon. Alana, “pangidoan ni halak na lambok roha” do na ditangihon Jahowa. (Ps. 10:17) Jala lomo do rohana manangihon sude isi ni tangiangta i. Alana parduli do Ibana tu hita.—Ps. 139:​1-3.

3. Aha do na lao tabahas di artikel on?

³ Ra, sukkun-sukkun do rohatta: Boasa olo hita paboahon sude na di rohatta tu Jahowa tikki martangiang? Songon dia do carana asa tangiangta mambahen lam jonok hita tu Jahowa? Aha do na boi taparsiajari sian tangiang ni akka naposo ni Jahowa na disurat di Bibel? Jala aha do na porlu taulahon molo dang taboto aha na lao tadokkon tu Jahowa tikki martangiang? Saonari, tabahas ma alus ni akka sukkun-sukkun on.

PABOA MA SUDE NA DI ROHATTA TU JAHOWA

4. Boasa olo hita paboahon sude na di rohatta tu Jahowa? (Psalmen 119:145)

⁴ Molo taanggap do Jahowa i ale-ale na parduli tu hita, gabe olo ma hita paboahon sude na di roha dohot pikkiranta tu Jahowa. Songon i ma na diulahon panurat Psalmen 119. Berupaya do ibana asa toktong jonok hubunganna tu Jahowa. Sai adong do sitaonon na diadopi ibana. Jala adong do akka halak na paboahon akka na so tutu taringot ibana. (Ps. 119:​23, 69, 78) Asing ni i, sipata metmet do rohana ala mangulahon na sala. (Ps. 119:5) Nang pe songon i, dang ragu ibana paboahon sude na di rohana tu Jahowa.—Jaha Psalmen 119:145.

5. Boasa unang tapaloas manang aha pe mangabbati hita martangiang tu Jahowa? Bahen ma tudosan.

⁵ Bahkan dipangido Jahowa do tu akka halak naung mangulahon dosa na balga asa martangiang tu Ibana. (Jes. 55:​6, 7) Jadi, unang ma tapaloas manang aha pe mangabbati hita martangiang tu Jahowa. Bayakkon ma molo naeng mardalani hamu tu sada inganan. Alai dang hea dope hamu tusi, jala dang diboto hamu dalanna. Adong ma sasahalak na mamboto dalan lao tusi. Olo do hamu manukkun tu ibana? Manang, maila do hamu? Dos songon i ma hita. Molo di sada tikki dang taboto aha na lao taulahon manang molo nungnga taulahon dosa, martangiang ma hita tu Jahowa.—Ps. 119:​25, 176.

BOHA DO CARANA MANGULAHON I?

6-7. Aha do na porlu taulahon asa boi tapaboa sude perasaanta tu Jahowa? Bahen ma contoh. (Ida surat na di toru.)

⁶ Tikki martangiang, tapaboa ma sude na di roha dohot pikkiranta tu Jahowa. Molo taulahon i, gabe lam jonok ma hita tu Ibana. Attong, boha do carana mangulahon i?

⁷ Tarimangi ma akka sifat ni Jahowa.a Molo lam jotjot tarimangi akka sifatna, gabe lam mura ma hita paboahon perasaanta tu Ibana. (Ps. 145:​8, 9, 18) Taida ma pengalaman ni donganta si Kristine. Kasar do bapakna tu ibana. Didok ibana, “Maol do hubayakkon Jahowa i songon Bapak na makkaholongi au. Jala tikki huulahon na sala, huhilala dang holong be rohana tu au.” Sifat ni Jahowa na dia do na dirimangi si Kristine? Didok ibana, “Jotjot do hurimangi taringot holong ni Jahowa na manoktong i. Jala gabe pos ma rohakku, holong do rohana tu au. Huboto do sai didongani Jahowa do au. Bahkan tikki huulahon na sala, toktong do holong rohana tu au jala urupanna do au. Tikki hurimangi taringot on, gabe mura ma au paboahon perasaanku tu Jahowa, termasuk ma tikki las rohakku manang tikki lungun hian rohakku.”

8-9. Aha do manfaatna molo tapikkiri hian aha na lao tatangiakkon? Bahen ma contoh.

⁸ Pikkirhon hian ma aha na lao ditangiakkon hamu. Andorang so martangiang, boi do dirimangi hamu akka sukkun-sukkun on: ‘Masalah aha do na huadopi saonari? Adong do halak na so humaappon dope? Situasi aha do na baru-baru on terjadi di ngolukku, jala aha do na naeng hupangido tu Jahowa taringot i?’ (2 Raj. 19:​15-19) Asing ni i, taihutton ma contoh tangiang na diajarhon Jesus tu hita. Tapikkiri hian ma aha na lao tatangiakkon taringot goar ni Jahowa, Harajaonna, dohot lomo ni rohana.—Mat. 6:​9, 10.

⁹ Taida ma pengalaman ni donganta na margoar si Aliska. Marsahit kanker otak do suamina jala dang leleng be ngoluna. Alani situasina i, didok si Aliska ma, “Marsak hian do hurasa. Alani ponjot ni pikkiranku, sappe dang huboto be lao mandokkon manang aha tikki martangiang.” Aha do na diulahon si Aliska? Didok ibana, “Andorang so martangiang, jolo hupikkiri hian do aha na lao hudokkon. Alani i, gabe dang holan taringot dirikku dohot sahit ni suamikku be na hutangiakkon. Asing ni i, gabe lam tenang do hurasa. Jala gabe boi ma hutangiakkon taringot akka na asing tu Jahowa.”

10. Aha do manfaatna molo dang buru-buru hita tikki martangiang? (Ida gambar.)

¹⁰ Unang ma buru-buru tikki martangiang. Memang molo satokkin hita martangiang, boi do i mambahen jonok hubungatta tu Jahowa. Alai molo leleng hita martangiang,b gabe boi ma tapaboa sude perasaanta tu Jahowa. I ma na diulahon si Elijah, suami ni si Aliska na dipaboa nakkin. Didok ibana, “Di bagasan sadari, huupayahon do asa piga-piga hali martangiang. Jala ala leleng au martangiang, gabe lam jonok ma au tu Jahowa. Pos do rohakku, pasti ditangihon Jahowa do au sappe sae au makkatai.” Jadi coba ma on: Lului ma tikki dohot inganan na cocok asa boi hamu leleng martangiang, dang adong na mangganggu, bahkan boi marsoara hamu tikki martangiang. Jala jotjot ma ulahon hamu i.

RIMANGI MA AKKA TANGIANG NA DISURAT DI BIBEL

11. Aha do manfaatna molo tarimangi tangiang ni akka naposo ni Jahowa na disurat di Bibel? (Ida kotak “Sarupa do Perasaanmuna tu Perasaan ni Nasida?”)

¹¹ Pasti adong do manfaatna molo dirimangi hamu tangiang dohot ende ni akka naposo ni Jahowa na disurat di Bibel. Molo dirimangi hamu songon dia cara ni nasida paboahon perasaanna tu Jahowa, gabe boi ma ditiru hamu nasida. Jala gabe boi ma diboto hamu songon dia cara ni nasida mamuji Jahowa tikki martangiang. Asing ni i, gabe diboto hamu ma tangiang ni akka naposo ni Jahowa na sarupa situasina tu hamu.

12. Tikki tajaha akka tangiang na disurat di Bibel, sukkun-sukkun aha do na porlu tapikkirhon?

¹² Tikki tajaha akka tangiang na disurat di Bibel, coba ma pikkirhon on: ‘Ise do na martangiang on, jala songon dia do situasina di tikki i? Sarupa do perasaanna tu situasikku saonari? Aha do na huparsiajari sian tangiangna i?’ Asa boi tadapot alus ni akka sukkun-sukkun i, porlu do ra tabahen riset. Alai pos ma rohatta, pasti adong do manfaat ni i. Saonari, tabahas ma piga-piga contoh tangiang.

13. Aha do na boi taparsiajari sian si Hanna taringot martangiang? (1 Samuel 1:​10, 11) (Ida sampul.)

¹³ Jaha 1 Samuel 1:​10, 11. Tikki na martangiang i si Hanna, adong do dua sitaonon na borat na diadopi ibana. Na parjolo, dang boi ibana marianakkon. Na paduahon, sai direhe-rehei si Pininna, imbangna, do ibana. (1 Sam. 1:​4-7) Dipasahat ibana do sude perasaanna tu Jahowa, jala leleng do ibana martangiang. Hasilna, gabe lubbang ma pakkilalaanna. (1 Sam. 1:​12, 18) Molo adong sitaonon na diadopi hamu saonari, aha do na boi ditiru hamu sian si Hanna? “Pasahat ma [sude holso ni rohamuna] tu Jahowa.” Molo diulahon hamu songon i, pasti gabe lubbang do pakkilalaanmuna.—Ps. 55:22.

14. (a) Aha do muse na taparsiajari sian si Hanna? (b) Molo tarimangi akka ayat di Bibel, aha do pengaruh ni i tu tangiangta? (Ida surat na di toru.)

¹⁴ Di pudian ni ari, tubu ma anak ni si Hanna, i ma si Samuel. Piga-piga taon dukkon i, dipasahat ibana ma anakna i tu Sintua Malim Eli. (1 Sam. 1:​24-28) Dung i, martangiang ma si Hanna. Mandok mauliate do ibana tu Jahowa ala takkas diida ibana songon dia Jahowa mamparrohahon jala mangurupi akka naposona na setia.c (1 Sam. 2:​1, 8, 9) Memang, dang sae dope masalah ni si Hanna. Nang pe songon i, lomo ni roha ni Jahowa do na sai dipikkiri ibana, dang holan masalahna i. Aha ma parsiajaranna di hita? Taingot ma sude bantuan na dilehon Jahowa tu hita saleleng on. Molo taulahon i, sanggup ma hita mangadopi sitaonon manang aha pe na masa.

15. Aha do na boi taparsiajari sian tangiang ni Panurirang Jeremia? (Jeremia 12:1)

¹⁵ Jaha Jeremia 12:1. Hea do metmet roha ni Panurirang Jeremia ala diida ibana hira na sonang torus ngolu ni halak na jahat. Jala metmet do tong rohana tikki direhei dongan sabangsona ibana. (Jer. 20:​7, 8) Nang pe songon i, dang hea ragu si Jeremia tu hatigoran ni Jahowa. Dipaboa ibana ma perasaanna tu Jahowa. Bahkan tikki diida si Jeremia songon dia Jahowa manghukum akka halak na mangalo tu Ibana, gabe lam pos do rohana tu hatigoran ni Jahowa. (Jer. 32:19) Dos songon i ma hita saonari. Olo do ra metmet rohatta tikki taida hira na sonang torus ngolu ni halak na jahat manang tikki direhei hita. Alai songon si Jeremia, tapaboa ma perasaanta tu Jahowa. Jala pos ma rohatta, pasti dipatudu Jahowa do hatigoranna i di tikki na pas.

16. Aha do na taparsiajari sian tangiang ni halak Lepi? (Psalmen 42:​1-4) (Ida gambar.)

¹⁶ Jaha Psalmen 42:​1-4. Halak Lepi do na manurat ende on. Jala di tikki i, ditawan do ibana. Lungun hian do rohana ala dang boi rap dohot halak Israel na asing manomba Jahowa di bagas joro. Alai ala martangiang ibana, gabe disadari ibana ma nang pe ditawan, boi dope ibana mamuji Jahowa. (Ps. 42:5) Asing ni i, gabe diurupi do ibana mangingot songon dia Jahowa manjaga ibana saleleng on. (Ps. 42:8) Dos songon i ma hita saonari. Olo do ra metmet rohatta ala dang boi kaluar sian jabu, ra ala marsahit manang dipenjara alani haporseaotta. Alani akka situasi i, olo do ra dang stabil perasaanta. Alani i, tapaboa ma sude perasaanta tu Jahowa marhite tangiang. Tikki taulahon i, gabe boi ma taattusi boasa songon i perasaanta. Jala gabe taboto ma aha na ikkon tautamahon di ngolutta. Molo toktong hita martangiang, gabe boi ma tetap tenang hita jala martahan mangadopi situasitta.

17. (a) Aha do na taparsiajari sian tangiang ni Panurirang Jona? (Jona 2:​1, 2) (b) Aha do manfaatna molo taingot piga-piga ayat sian Bibel? (Ida surat na di toru.)

¹⁷ Jaha Jona 2:​1, 2. Di bagasan butuha ni dekke na balga do Panurirang Jona pasahatton tangiang on. Tikki i, dang dioloi ibana paretta ni Jahowa. Alai pos do rohana, pasti tangihonon ni Jahowa do tangiangna. Tikki na martangiang i, dipakke si Jona do akka hata na sarupa songon na disurat di bukku Psalmen.d On patuduhon nungnga diboto ibana akka ayat i. Ala dirimangi ibana sudena i, gabe pos ma rohana pasti urupan ni Jahowa do ibana. Aha do parsiajaranna tu hita? Berupaya ma hita mangingot akka ayat di Bibel. Molo taulahon i, tikki masa sitaonon boi ma pittor taingot akka ayat i. Jala gabe tarapul ma rohatta tikki martangiang hita tu Jahowa.

TOKTONG MA MARTANGIANG ASA JONOK TU JAHOWA

18-19. Tikki dang taboto aha na lao tadokkon tu Jahowa di tangiangta, aha do na taparsiajari sian Rom 8:​26, 27? Bahen ma contoh.

¹⁸ Jaha Rom 8:​26, 27. Alani marsakna, olo do sipata dang taboto aha na lao tadokkon tu Jahowa tikki martangiang. Alai di tikki sisongon i, boi do tondi parbadia “mangurupi hita paboahon na di bagasan rohatta” tu Jahowa. Songon dia carana? Marhite tondi parbadia, ditogu-togu Jahowa do akka panurat ni Bibel asa manuratton godang tangiang. Jadi tikki dang taboto aha na lao tadokkon tu Jahowa, dianggap Jahowa ma akka tangiang na disurat di Bibel i songon pangidoatta, jala olo do dialusi Ibana i.

¹⁹ On ma na mangurupi donganta na margoar si Yelena sian Rusia. Ditakkup do ibana ala martangiang dohot manjaha Bibel. Marsak hian do dihilala ibana jala gabe maol ma ibana martangiang. Didok ibana, “Huingot ma, tikki marsak au jala dang huboto aha na lao hudokkon tu Jahowa di tangiakku, dianggap Jahowa do tangiang ni akka naposona najolo . . . songon pangidoanku. . . . Gabe tarapul ma rohakku nang pe borat hian sitaonokku.”

20. Tikki marsak hita, boha do carana paradehon roha dohot pikkiranta lao martangiang?

²⁰ Molo marsak hita, olo do ra gabe maol hita konsentrasi tikki martangiang. Alani i, porlu do taparade roha dohot pikkiranta andorang so martangiang. Misalna, tabege ma rekaman audio bukku Psalmen. Manang tatiru ma Raja Daud, tasurat ma perasaanta. (Ps. 18, 34, 142; superskripsi.) Alai memang, dang gabe sada aturan i di hita. (Ps. 141:2) Jadi, tabahen ma cara na dia na umcocok di hita.

21. Boasa olo hita paboahon sude na di rohatta tu Jahowa?

²¹ Sasittongna, diboto Jahowa do sude na di rohatta nang pe dang tadokkon manang aha tu Ibana. Pasti dipatogu do rohatta mamboto on. (Ps. 139:4) Alai molo tapaboa sude perasaanta tu Jahowa, las hian do rohana. Alana, on gabe bukti na porsea do hita tu Ibana. Alani i, unang ma ragu hamu martangiang tu Jahowa. Taparsiajari ma akka tangiang na disurat di Bibel. Martangiang ma hita sian nasa rohatta. Tapaboa ma tu Jahowa akka na mambahen las rohatta dohot na mambahen lungun rohatta. Ingot hamu ma, Ale-ale na setia do Jahowa i. Pasti sai dongananna do hamu!