Dua Anggota Baru Punguan na Mangaradoti Organisasi

DI TANGGAL 5 OKTOBER 2024, adong ma dibahen pengumuman na istimewa di pertemuan tahunan: Donganta si Jody Jedele dohot si Jacob Rumph nungnga dilantik gabe anggota ni Punguan na Mangaradoti Organisasi ni Saksi Jahowa. Dua donganta on nungnga setia melayani Jahowa saleleng martaon-taon.

Donganta si Jedele tubu di Missouri, Amerika Serikat, jala Saksi Jahowa do natua-tuana. Di inganan ni nasida tinggal, otik do Saksi Jahowa. Alani i, godang do akka dongan sian marragam negara na ro tusi lao marbarita na uli. Gabe godang ma ditanda ibana akka dongan. Boi do diida si Jedele na marsihaholongan jala marsada akka donganta i, jala balga do pengaruh ni on di ibana. Dung i, tardidi ma ibana di tanggal 15 Oktober 1983. Tikki i, remaja dope ibana. Las hian do rohana marbarita na uli. Jala dung tamat sikkola, merintis ma ibana di bulan September 1989.

Tikki dakdanak dope Donganta si Jedele, hea do diboan natua-tuana ibana dohot itona tu Betel. Gabe lomo ma roha ni nasida naeng melayani di Betel. Jala di pudian ni ari, melayani di Betel do nasida. Di bulan September 1990, diundang ma Donganta si Jedele tu Betel Wallkill. Mulana, karejo di Departemen Pembersihan do ibana. Dung i, di bagian Layanan Medis.

Di tikki i, adong do piga-piga huria na marbahasa Spanyol na makkaporluhon godang donganta bawa. Alani i, pinda ma Donganta si Jedele tu sada sian akka huria i jala diparsiajari ibana ma bahasa Spanyol. Dang leleng dukkon i, pajuppang ma ibana dohot si Damaris, sahalak perintis di wilayah i. Dung i, menikah ma nasida jala rap melayani di Betel do nasida.

Di taon 2005, dang di Betel be nasida ala naeng mangurus natua-tua ni nasida. Tikki i, merintis biasa do nasida. Hea do Donganta si Jedele gabe instruktur di Sikkola Dinas Perintis. Jala hea do ibana mangurupi di Panitia Penghubung Rumah Sakit dohot Panitia Pembangunan Regional.

Di taon 2013, diundang ma muse nasida tu Betel lao mangurupi ulaon pembangunan di Warwick. Dukkon i, diundang ma tong nasida asa melayani di Patterson dohot di Wallkill. Hea do Donganta si Jedele mangurupi Departemen Rancang/Bangun Setempat dohot Layanan Informasi Rumah Sakit. Di bulan Maret 2023, ditugasson ma ibana mangurupi Panitia Dinas. Tikki diingot ibana akka tugas na hea dilehon tu ibana, didok ibana ma, “Memang tikki dilehon tugas na baru tu hita, olo do sipata khawatir hita. Alai taingot ma, sai taandalhon ma Jahowa. Alana, boi do Jahowa mambahen hita gabe manang aha pe na dihalomohon rohana.”

Donganta si Rumph tubu di Kalifornia, Amerika Serikat. Tikki dakdanak dope ibana, penyiar na so aktif do omakna. Alai, berupaya do omakna mangajarhon hasittongan tu ibana. Saksi Jahowa do oppung boruna. Jala ganup taon, lao do ibana manjuppangi oppungna i. Diurupi oppungna do si Rumph asa lam taronjar rohana lao mananda Jahowa. Tikki marumur 13 taon ibana, marsiajar Bibel ma ibana. Jala tardidi ma ibana di tanggal 27 September 1992. Tikki i, remaja dope ibana. Di pudian ni ari, gabe penyiar na aktif ma muse omakna. Bapakna dohot akka adekna pe mambahen kemajuan jala tardidi.

Tikki poso dope Donganta si Rumph, boi do diida ibana marlas ni roha akka donganta na merintis. Jadi dung tamat ibana sikkola, merintis ma ibana di bulan September 1995. Di taon 2000, pinda ma ibana tu Ekuador alana dihaporluhon do godang parbarita disi. Disi ma pajuppang ibana dohot si Inga, sahalak perintis sian Kanada. Dukkon i, menikah ma nasida. Dung menikah, melayani di sada kota di Ekuador do nasida, di sada kelompok na otik penyiarna. Saonari, nungnga godang penyiar di huria i.

Dung i, ditugasson ma nasida gabe perintis istimewa. Jala di pudian ni ari, gabe pengawas wilayah. Di taon 2011, diundang ma nasida tu Sikkola Gilead kelas 132. Dung wisuda, ditugasson ma nasida di piga-piga negara jala godang do tugas na diulahon nasida. Misalna, melayani di Betel, gabe utusan injil, jala gabe pengawas wilayah. Asing ni i, hea do Donganta si Rumph gabe instruktur di Sikkola tu Parbarita Harajaon.

Alani pandemi COVID-19, mulak ma Donganta si Rumph dohot istrina tu Amerika Serikat. Diundang ma nasida melayani di Betel Wallkill, jala dilatik ma Donganta si Rumph di Departemen Dinas. Dung i, ditugasson ma nasida muse tu kantor cabang Ekuador. Jala gabe Panitia Cabang do Donganta si Rumph disi. Di taon 2023, ditugasson ma nasida tu Warwick. Di bulan Januari 2024, ditugasson ma Donganta si Rumph mangurupi Panitia Dinas. Tikki diingot ibana akka tugas na dilehon tu ibana, didok ibana ma, “Manang didia pe hita melayani, dang ingananna na mambahen tugasta istimewa, alai akka halak na rap melayani dohot hita do.”

Pasti mandok mauliate do hita ala nungnga bekerja keras akka donganta on. Jadi, torus ma taargai nasida.—Plp. 2:29.