Na Dihukum Debata do Umbahen na MARSITAONON HITA?

PAKPANG DO SI LUZIA. Tikki gelleng marsahit polio do si Luzia. Gabe dang boi ibana mardalan. Tikki marumur 16 taon ibana, didok bosna ma tu ibana, “Alani jugulmu do makana pakpang ho dibahen Tuhan i, dialo ho do attong omakmu.” Sai diingot si Luzia do hata ni bosna i sappe martaon-taon jala massai lungun do rohana.

DUNG MARSAHIT KANKER OTAK SI DAMARIS, disukkun bapakna ma ibana, “Boasa ma gabe songon on ho? Pasti adong do na sala dibahen ho. Alani i ma dihukum Tuhan i ho!” Gabe lungun ma roha ni si Damaris mambege hata ni bapakna i.

Mulai sian najolo nga porsea akka halak, na dihukum Debata do umbahen na marsahit sasahalak. Songon na didok di bukku Manners and Customs of Bible Lands, porsea do akka halak di jaman ni Jesus, “molo marsahit sasahalak, na dihukum Debata do ibana alani dosana sandiri manang dosa ni keluargana”. Asing ni i, bukku Medieval Medicine and the Plague pe mandok, marratus taon dung jaman ni Jesus, “didok piga-piga halak, Debata do na mambahen sahit di godang inganan lao manghukum akka halak alani dosa ni nasida”. Jadi tikki mate marjuta halak di Eropa di abad 14 alani sahit, hukuman sian Debata do i? Manang alani bakteri do i, songon na didok akka peneliti kesehatan? Alani i olo do ra gabe sukkun-sukkun roha ni halak, ‘Toho do dibahen Debata akka halak marsahit, lao manghukum nasida alani dosa ni nasida?’a

PIKKIRHON MA: Molo Debata do na mambahen jolma marsahit jala susa lao manghukum nasida, boasa ma dipamalum Jesus akka na marsahit? Na mangalo Jahowa do Jesus disi? (Mateus 4:23, 24) Hape dang hea maralo na diulahon Jesus tu lomo ni roha ni Jahowa. Alani i ma didok ibana, “Toktong do huulahon lomo ni rohana,” jala “huulahon do songon na diparettahon Damang i”.—Johannes 8:29; 14:31.

Asing ni i Bibel mandok, ‘Tigor do sude dalan’ ni Jahowa. (5 Musa 32:4) Misalna molo adong sahalak parjahat di pesawat, dang mungkin dibahen Debata madabu pesawat i holan lao manghukum sahalak parjahat i. Hape adong do di pesawat i akka na burju. Najolo pe adong sahalak naposo ni Debata na margoar si Abraham. Didok ibana dang mungkin Debata “pamatehon halak na sittong rap dohot halak na jahat”. Didok ibana do muse, “Dang tarbahen Ho i!” (1 Musa 18:23, 25) Jala didok do di Bibel, “Dang tarbahen ni Debata na sittong i mangulahon na jahat.”—Job 34:10-12.

NA DIDOK BIBEL

Dang ala na dihukum Debata umbahen na marsitaonon hita. Takkas do dipaboa Jesus taringot on tu akka siseanna tikki diida nasida sahalak bawa na mapitung sian mulai tubu. “Disukkun akka siseanna ma Jesus, ‘Guru, alani dosa ni ise do umbahen na mapitung ibana sian mulai tubu? Alani dosana do manang dosa ni natua-tuana?’ Dialusi Jesus ma, ‘Dang alani dosana manang dosa ni natua-tuana, alai masa pe songon i asa idaon ni akka jolma do aha na boi diulahon Debata marhite ibana.’”—Johannes 9:1-3.

Pasti tarsonggot do roha ni akka sisean ni Jesus mambege hata i. Alana di tikki i godang do na mandok, Debata do na mambahen bawa i gabe mapitung alani dosana manang dosa ni natua-tuana. Jadi dipamalum Jesus ma bawa i. Marhite i dipatudu ibana ma tu nasida na sala do cara marpikkir ni nasida saleleng on. (Johannes 9:6, 7) Pasti tarapul do roha ni akka na marsahit dung mamboto dang Debata na mambahen nasida gabe songon i.

Akka Ayat na boi patoguhon rohatta

• “Dang boi ujion Debata marhite na jahat jala dang diuji Ibana manang ise pe.” (JAKOBUS 1:13) Satokkin nai lao salpuhonon ni Debata do akka “na jahat” na mambahen jolma susa saleleng on, songon sahit, hamatean, dohot sude na mambahen lungun rohatta.

• “Dipamalum [Jesus] do sude na marsahit.” (MATEUS 8:16) Tikki dipamalum Jesus halak na marsahit, on patuduhon songon i do na lao diulahon ibana molo nungnga mamaretta Harajaon ni Debata tu saluhut tano on.

• “Apusan ni Debata ma nasa ilu-ilu sian mata ni nasida. Dang adong be hamatean nang arsak ni roha, nang angguk-angguk, nang na haccit, dang disi be. Ai nungnga salpu na parjolo i.”—PANGUNGKAPON 21:3-5.

ISE DO NA MAMBAHEN HITA SUSA?

Jadi, boasa ma gabe susa hita jala marsitaonon? Saleleng marratus taon, sai dilului akka halak do alus ni sukkun-sukkun on. Molo dang Debata na mambahen hita susa, ise ma na mambahen hita susa? Dialusi ma on di artikel na mangihut.