Dihilala Debata do Songon dia Pakkilalaatta?

CARA NI DEBATA MANOPPA HITA

Sude do hita boi mangattusi songon dia pakkilalaan ni halak na asing. Carana tabayakkon ma songon dia pakkilalaatta molo sarupa situasitta songon situasi ni halak na asing. Sahalak pakar kesehatan mental na margoar Dr. Rick Hanson mandok, ‘Sude do jolma boi sapakkilalaan tu halak na asing.’

PIKKIRHON MA: Boasa boi jolma makkilala songon dia pakkilalaan ni donganna? Didok Bibel, ditoppa Debata do jolma mirip tu Ibana. (1 Musa 1:26) Ala ditoppa hita mirip tu Debata, gabe boi ma tatiru jala tapatudu akka sifat ni Debata. Jadi tikki olo sasahalak mangurupi donganna ala boi dihilala ibana songon dia pakkilalaan ni donganna i, on patuduhon na ditiru ibana do Debata Jahowa na parasi roha na boi makkilala songon dia pakkilalaatta.—Poda 14:31.

NA DIDOK BIBEL

Boi do dihilala Debata songon dia pakkilalaatta tikki marsitaonon jala dang lomo rohana mangida hita susa. Misalna tikki gabe hatoban halak Israel di Mesir jala susa nasida di padang belantara saleleng 40 taon, didok Bibel, ‘tikki susa nasida, marsak do pakkilalaan ni [Debata].’ (Jesaya 63:9) Sian on gabe taboto ma, diida Debata do hasusaan ni nasida. Alai dang holan i. Boi do tong dihilala Ibana songon dia pakkilalaan ni nasida tikki i. Alani i ma didok Bibel, “Takkas do huboto songon dia haccit ni sitaonon ni nasida.” (2 Musa 3:7) Didok Debata do muse, “Manang ise na manjama hamu, dos songon na manjama anak ni matakku do i.” (Sakaria 2:8) Jadi molo adong halak na mambahen na haccit tu hita, boi do dihilala Debata songon dia pakkilalaatta.

Ala hea hita mangulahon na sala, olo do ra gabe torus hita merasa bersalah jala didok rohatta dang patut hita mandapot asi ni roha ni Debata. Alai didok Bibel, “Umbalga do Debata sian rohatta jala diboto ibana do saluhutna.” (1 Johannes 3:19, 20) Umbotoan do Debata taringot diritta sian hita sandiri. Diboto Ibana do situasitta, na tapikkiri, dohot perasaatta. Boi do dihilala Ibana sude na tahilala.

Akka Ayat na boi patoguhon rohatta

• “Tikki jou-jou ho, Au Jahowa mangalusi ho. Tikki dipangido ho asa huurupi, alusakku ma, ‘Dison do Au!’”—JESAYA 58:9.

• “‘Ai takkas do huboto aha na lao bahenokku tu hamu,’ ninna Jahowa, ‘hadameon do na lao bahenokku tu hamu dang jea. Jala marjanji do Au na boi pos rohamuna na lao denggan do ngolumuna di ari na naeng ro. Jouonmuna ma Au. Ro nama hamu martangiang tu Au, jala tangihonokku do hamu.’”—JEREMIA 29:11, 12.

• “Disippan Ho do ilu-ilukku tu inganan ni aekmu. Tarsurat do i sude di bukkumi”—PSALMEN 56:8.

DIATTUSI JALA DIHILALA DEBATA DO SONGON DIA PAKKILALAATTA

Aha do manfaatna molo taboto boi do dihilala Debata songon dia pakkilalaatta tikki marsitaonon? Parrohahon ma pengalaman ni si Maria:

“Massai borat do sitaonokku. Alana, marsahit kanker do anakku saleleng dua taon. Ujungna mate do ibana tikki marumur 18 taon. Huhilala hira na so adil do na mangolu on. Gabe muruk ma au tu Jahowa, alana dang diurupi jala dang dipamalum Ibana anakki!

“Onom taon dukkon i, hupaboa ma perasaanku tu sahalak dongan sahuriaku. Burju do ibana. Hudok tu ibana, dang holong roha ni Jahowa tu au. Sabar do donganki manangihon au sappe marjom-jom. Dung i, dipaboa ibana ma 1 Johannes 3:19, 20 na mandok, ‘Umbalga do Debata sian rohatta jala diboto ibana do saluhutna.’ Dipapos ibana do rohakku na diattusi Jahowa do arsak ni rohakku.

“Nang pe songon i, sai muruk dope au tu Jahowa! Alai hujaha ma Psalmen 94:19 na mandok, ‘Tikki marsak situtu rohakku, diapuli Ho do au jala dibahen Ho do las rohakku.’ Pas hian do huhilala ayat on tu au! Ujungna boi ma hupaboa sude na di rohakku tu Jahowa. Pos do rohakku ditangihon jala diattusi Ibana do pakkilalaakku.”

Pasti tarapul do rohatta mamboto na diattusi jala dihilala Debata do sude na tahilala! Alai molo songon i, boasa ma gok sitaonon saonari? Na dihukum Debata do hita? Olo do Debata pasohon sude sitaononta? Dialusi ma sukkun-sukkun on di artikel na mangihut.