Ise do na Mambahen Hita Susa?

Molo dang Debata na mambahen hita susa, boasa ma godang na kelaparan, na pogos, masa porang, sahit, dohot bencana alam? Bibel paboahon adong tolu na mambahen jolma susa:

1. Parange na Egois, na Hisap, Dohot Sogo ni Roha. “Gabe susa do molo jolma na mangarajai jolma.” (Parjamita 8:9) Ala sude do hita dang sempurna, boi do halak na asing mambahen hita gabe susa. Jala boi do hita susa ala egois jala kejam halak tu hita.

2. Masa Akka na So Diharappon di Tikki na So Panagaman. Jotjot do hita susa ala “masa tu [hita] sude akka na so diharappon di tikki na so panagaman.” (Parjamita 9:11) Boi do hita gabe hona jea, ala pas hita di inganan dohot di tikki masa sada bencana. Jala boi do hita susa ala dang hati-hati manang silap halak na asing.

3. Sibolis do na Mangarajai Portibi on. Takkas do muse dipaboa di Bibel taringot ise na mambahen jolma susa. Didok, “Di bagasan huaso ni Sibolis do saluhut portibi on.” (1 Johannes 5:19) Mulana, suru-suruan ni Debata do Sibolis. Ala “dang hot ibana di hasittongan”, gabe Sibolis ma ibana. (Johannes 8:44) Dung i, godang ma suru-suruan na mangihutton Sibolis asa mangalo tu Debata ala holan diri ni nasida do na dipikkiri nasida. Ujungna gabe suru-suruan na jahat ma nasida. (1 Musa 6:1-5) Mulai sian i, marsitutu do nasida mempengaruhi akka jolma asa mangalo tu Debata. Tarlumobi ma di jamanta saonari, muruk situtu do Sibolis lao “mangaliluhon sude portibi on”. I do na mambahen gabe ‘marjea tano on’. (Pangungkapon 12:9, 12) Jahat jala kejam do Sibolis. Las do rohana mangida jolma susa jala marsitaonon. Jadi Sibolis do na mambahen hita susa, dang Debata.

PIKKIRHON MA: Holan parjahat na rittik jala na so marperasaan do na olo mambahen halak na so marsala gabe susa. Alai molo Debata didok Bibel, “holong do Debata.” (1 Johannes 4:8) Alani i ma, “dang tarbahen ni Debata na sittong i mangulahon na jahat. Jala dang ulahonon ni Pargogo na So Hatudosan i na sala!”—Job 34:10.

Olo do ra gabe sukkun-sukkun rohatta, ‘Sadia leleng nai do dipasombu Sibolis mambahen hita susa?’ Songon naung taboto, sogo do roha ni Debata mangida hajahaton jala lungun do rohana mangida hita susa. Alani i ma didok Bibel, “Pasahat hamu ma sude holso ni rohamuna tu Ibana, ai diparrohahon do hamu.” (1 Petrus 5:7) Holong do roha ni Debata tu hita jala tolap do Ibana pasohon sitaonon dohot ketidakadilan na tahilala. On ma na lao dibahas di artikel na mangihut.a