38 TOLU BAWA NI HALAK HEBER
Boi do Nasida “Mangittopi Api na Marsigorgor”
ADONG ma tolu bawa ni halak Heber na tinggal di Babel. Goar ni nasida, i ma si Hanania, si Misael, dohot si Azaria. Alai digatti halak Babel do goar ni nasida gabe si Sadrak, si Mesak, dohot si Abednego. Dongan ni si Daniel do nasida. Alai tikki menghadapi tantangan nasida, dang disi si Daniel lao mangurupi jala patoguhon nasida. Taida ma aha na masa.
Di sada tikki, dibahen Raja Nebukadnesar ma sada patung na massai balga. Timbona hira-hira 27 meter, jala tebalna hampir 3 meter. Alani i, dibahen raja i ma sada perayaan lao meresmihon patung i. Diparettahon raja i ma asa ro sude halak na karejo di pamarettaonna tu perayaan i, termasuk ma tolu bawa ni halak Heber i. Dung i marpungu ma nasida sude.
Adong ma sahalak sian pelayan ni raja na pasahatton boa-boa sian raja. Parjolo sahali lao dibege nasida ma musik. Ra dibahen pe musik i asa taronjar roha ni nasida lao manomba patung i. Dukkon i, “ikkon marsinggang jala marsomba do nasida tu patung” i. Alai takkas do diboto tolu halak Heber i taringot Patik ni Jahowa na mandok, na so boi disomba nasida patung. (2 Mus. 20:4, 5) Jadi, aha ma na lao diulahon nasida?
Godang do halak na mangida nasida tikki dipaksa lao manomba patung i. Molo dang olo, dipamate ma nasida
Tarbege ma soara ni musik. Dukkon i, pittor marsinggang jala marsomba ma sude halak na disi tu patung i. Alai dang olo tolu bawa ni halak Heber i marsinggang jala marsomba tu patung i. Dipakke piga-piga halak Kasdim ma i gabe kesempatan lao paroa-roahon nasida. Didok halak Kasdim i ma tu Raja Nebukadnesar, ‘Dang dipasangap nasida Ho, ale rajanami. Dang olo nasida manomba akka debatam, jala dang olo nasida marsomba tu patung mas na binahenmi.’ Gabe muruk situtu ma raja i, disuru ma asa diboan tolu halak Heber i tu jolona, jala disukkun ma tu nasida tutu do na didok halak Kasdim i manang na dang. Alai dang sanga dope dipaboa nasida alasanna, nungnga diancam raja i nasida. Dilehon raja i ma sahali nai kesempatan tu nasida lao manomba patung i. Molo dang olo nasida, ikkon disappatton do nasida tu api na marsigorgor. Jala didok raja i do muse, dang adong debata na boi menyelamatton nasida.
Alai tetap do setia nasida tu Jahowa. Didok nasida do tu Raja Nebukadnesar, “Ale rajanami, molo ikkon ditutung pe hami di api na marnala-nala i, tolap do Debatanami paluahon hami sian i jala paluahon hami sian tanganmu. Alai molo tung pe dang dipalua Ibana hami, porlu do botoonmu ale rajanami na so olo hami manomba akka debatami. Jala dang olo hami marsomba tu patung mas na binahenmi.” Gabe muruk situtu ma Raja Nebukadnesar mambege hata ni nasida i. Disuru ibana ma asa dibahen api i ummohop sian na somal. Dukkon i disuru ma muse asa diikkat tolu bawa i jala disappatton tu api i. Alani mohop ni api i, gabe mate tartutung do akka bawa na manappatton nasida i!
Alai dukkon i gabe mabiar situtu ma Raja Nebukadnesar. Diida ibana dang holan tolu halak na di bagasan inganan panutungan i, alai adong opat halak. Diida ibana do muse akka bawa i mardalan di tonga-tonga ni api i, alai dang manang mahua. Jala ‘hira anak ni debata do diida ibana bohi ni halak na paopatton i’. Dukkon i, dipajonok raja i ma tu inganan panutungan i, jala disuru ma nasida asa kaluar sian api i.
Longang situtu ma akka halak na adong disi mangida tolu bawa i kaluar sian inganan panutungan i. Dang manang mahua nasida, obuk dohot abit ni nasida pe dang matutung. Gari bau timus pe dang adong. Jala dang tarikkat be tangan ni nasida tikki kaluar sian i. Longang situtu do Raja Nebukadnesar mangida i. Gabe dipuji ibana do akka bawa i ala porsea nasida tu Jahowa. Didok raja i ma, “Ala porsea nasida tu [Jahowa], dialo nasida do paretta ni raja. Jala rade do nasida mate unang apala disomba nasida debata na asing, asing ni Debata ni nasida.”
Diparettahon raja i ma tu sude halak na adong di harajaonna asa dipamate manang ise pe halak na mangaleai goar ni Jahowa. Dukkon i, dilehon raja i ma tu tolu bawa i jabatan na untimbo sian sebelumna. Alai dang holan i pasu-pasu na didapot akka bawa i, adong muse pasu-pasu na umbalga na dilehon Jahowa tu nasida. Hira-hira 700 taon dukkon i, disurat si Paulus do taringot akka halak na “mangittopi api na marsigorgor”. Ra si Hanania, si Misael, dohot si Azaria do na dimaksud si Paulus di suratna i. Takkas ma, diingot Jahowa do kesetiaan ni nasida.
Jaha ma ceritana di:
Na lao dibahas:
Boha do cara ni si Hanania, si Misael, dohot si Azaria patuduhon habaranion?
Bagas ma Parsiajari
1. Aha do na didapot akka arkeolog di bekas Kota Babel najolo na patuduhon akurat do isi ni bukku Daniel bindu 3? (w23.07 31) A
© The Trustees of the British Museum. Licensed under CC BY-NC-SA 4.0. Source. Modifications: Box added.
Gambar A: Sada batu bata naung matutung jala adong goar ni si Nebukadnesar na diukir di atas ni batu i
2. Aha do lapatan ni goar na dilehon halak Babel tu tolu bawa ni halak Heber i? (dp 35 ¶14-wcgr)
3. Sian dia do taboto na porsea situtu do Raja Nebukadnesar tu debatana? (dp 69 ¶3-wcgr) B
Gambar B: Dibangun jala dipadenggan si Nebukadnesar do muse akka kuil ni dewa ni halak Babel
4. Boasa ‘akka halak na sian marragam bangso dohot bahasa’ olo manomba patung ni si Nebukadnesar, hape adong be do debata na disomba nasida? (Dan. 3:7; dp 73 ¶10-wcgr)
Pikkirhon ma Aha Parsiajaranna
Tikki dilehon tu tolu bawa ni halak Heber i sipanganon na maralo tu Patik, dang olo nasida mangallang i. Di pudian ni ari, toktong do nasida setia nang pe terancam ngolu ni nasida. Aha do na boi taparsiajari sian on? (Luk. 16:10) C
Gambar C
Tikki menghadapi penganiayaan, songon dia do hita boi maniru tolu bawa ni halak Heber lao patuduhon akka sifat on? (Dan. 3:16-18)
Serep ni roha
Lambok ni roha
Setia
Songon dia do caramuna maniru habaranion ni tolu bawa ni halak Heber?
Rimangi ma
Sian kisah on, aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Aha do na lao husukkun annon tu si Hanania, si Misael, dohot si Azaria molo nungnga dipahehe nasida?
Ida ma Muse on
Songon dia do naposo ni Debata boi netral jala toktong sopan saleleng upacara kenegaraan?
Bayakkon ma molo hamu sada sian tolu bawa ni halak Heber i.
“Diselamatkan dari Tanur Api!” (“Menggali Isi Alkitab” di jw.org/id)