Barani do Ibana Nang pe Gale

BAYAKKON ma situasina. Dibahen si Simson do keputusan na so denggan. Dipaboa ibana do rahasia na mambahen ibana massai gogo. Akibatna gabe susa ma ngoluna. Ditakkup halak Palistim ma ibana, dicungkil matana, jala diikkat ma ibana. Dung i, dipamasuk ma si Simson tu penjara jala dibahen gabe hatoban ni nasida. Alai nang pe nga mapitung si Simson, boi do dibege ibana soara ni halak Palistim na mangarehei ibana dohot Debatana, i ma Jahowa. Sasittongna bawa na barani do si Simson. Alai boha do dung mago gogona? Toktong do ibana barani?

Saleleng 20 taon, gabe panguhum di Israel do si Simson. Alai berbeda do si Simson sian akka panguhum na asing. Molo akka panguhum songon si Barak, si Gidion, dohot si Jepta, adong do akka tentara na dipimpin nasida lao mangalo musu ni Jahowa. Alai molo si Simson dang adong tentarana. Holan sahalakna do pamatehon godang halak Palistim! Boasa boi songon i?

Sada tikki, dipaboa suru-suruan do tu natua-tua ni si Simson, lao tubu ma sada anak di nasida. Jala lao gabe halak Nasir do anakna i saleleng ni ngoluna. Dang boi digusting obuk ni halak Nasir. Alani i ma dang hea digusting obuk ni si Simson. Molo toktong dioloi si Simson paretta i, bahenon ni Jahowa ma ibana massai gogo. Buktina, hea do diribak dua si Simson singa mamakke tanganna sandiri. Jala dilehon Jahowa do tu ibana gogo na luar biasa lao mangalo halak Palistim, i ma bangso na menindas halak Israel.

Ala nungnga godang halak Palistim na dipamate si Simson, gabe mabiar ma halak Israel, so tung balas dendam halak Palistim tu nasida. Jadi diikkat nasida ma si Simson jala dipasahat ma ibana tu halak Palistim i. Alai boi do dipalua si Simson tali i sian tanganna, songon bonang do tali i di ibana. Jala dipamate ibana do 1.000 halak Palistim mamakke osang-osang ni halode. Dang sadia leleng dukkon i, tikki di Kota Gasa si Simson, marpungu ma akka musuna saborngin manipat di jolo ni gerbang ni kota lao mambunu ibana manogotna i. Alai di tonga borngin, dungo ma ibana jala dicabut ma pintu gerbang ni kota i rap dohot tiang dohot palangna. Dibahen ibana ma i di pundakna jala diboan tu pussu ni dolok na di jonok ni Hebron. Hira-hira 60 kilometer ma daona sian Gasa!

Mulak-ulak do boi ditaluhon si Simson halak Palistim. Gabe boi ma dipatudu ibana na so marguna akka debata ni nasida i, songon Dagon. Alana dang boi akka debata ni nasida i mangurupi nasida manaluhon sahalak naposo ni Jahowa na setia. Alai dapot ni halak Palistim do cara lao manaluhon si Simson, i ma marhite sahalak borua na margoar si Delila.

Jatuh cinta do si Simson tu si Delila, alai dihianati si Delila do ibana. Dijalo si Delila do hepeng sian halak Palistim, jala disuru ma ibana mangalului aha na mambahen si Simson massai gogo. Sai torus do dipaksa ibana si Simson asa olo paboahon rahasiana. Ujungna gabe dang tahan be si Simson. Alani holongna tu si Delila, gabe dipaboa ibana ma rahasiana. Didok ibana, molo digusting obukna gabe mago ma gogona i. Jadi dipaima si Delila ma sahat tu na modom si Simson, dung i disuru ma halak manggusting obukna. Laos di tikki i, mago ma gogo ni si Simson. Bibel mandok, “Nungnga ditadikkon Jahowa be ibana.” Dung i, ditakkup halak Palistim ma ibana, dicungkil ma matana, jala dipamasuk tu penjara.

Dibahen nasida ma si Simson gabe panggiling ni gandum di penjara. Karejo na borat do on. Las hian do roha ni halak Palistim, jala dibangga-banggahon nasida do diri ni nasida ala boi dibahen nasida si Simson gabe hatoban. Alani i, naeng dibahen halak Palistim ma pesta na balga lao mamuji Dagon. Dung juppang tikkina, marpungu ma halak Palistim di sada bangunan na balga, jala adong hira-hira 3.000 halak di bagian parginjang ni bangunan i. Lomo do roha ni halak Palistim mambahen si Simson gabe siparekkelan. Di tikki i, nungnga lam ganjang obuk ni si Simson. Diboan nasida ma si Simson, jala dipajongjong ma ibana di tonga-tonga ni dua tiang na balga di bangunan i.

Dibahen si Simson ma tanganna tu dua tiang i, jala martangiang ma ibana asa dipaulak Jahowa muse gogona. Pasti disolsoli ibana do kesalahanna i. Didok ibana, ‘Ale Debata, ingot ma au. Bahen ma au gogo. Holan sahali on pe.’ Didok ibana muse, “Lok ma mate au dohot halak Palistim on!” Dung i gogo hian ma dionjar si Simson dua tiang i sappe margeser. Dang sanga dope halak Palistim mangabbati ibana, ruppak ma tiang i dohot bangunan i. Jala ditipa ma sude jolma na adong disi! Unggodang do na dipamate si Simson di ari parmatena i sian na dipamate ibana saleleng mangolu ibana.

Marratus taon dukkon i, didok si Paulus do di suratna molo si Simson sada sian akka halak na porsea. Tikki disurat si Paulus taringot akka halak na “dapotan gogo nang pe nungnga gale”, pasti diingot ibana do si Simson, sahalak panguhum na barani.—Heb. 11:​32-34.

Jaha ma ceritana di:

• Panguhum 13:1–16:31

Na lao dibahas:

Boha do cara ni si Simson patuduhon habaranion?

Bagas ma Parsiajari

1. 1. Boasa boi toktong gabe halak Nasir si Simson nang pe nungnga dijama ibana bakke ni na mate? (w05 15/1 30 ¶1–31 ¶1-wcgr)

   Alusmuna

2. 2. Boasa porlu tondi parbadia di si Simson asa boi mamboan pintu gerbang ni kota dohot tiangna, sian Gasa tu Hebron? (w04 15/10 15 ¶7-8-wcgr) A

   Alusmuna

   

3. 3. Olo do ra halak Israel si Delila. Boasa boi tadok songon i? (w05 15/3 28 ¶ 2-wcgr)

   Alusmuna

4. 4. Boasa dipangido si Simson tu Jahowa asa diloas ibana mambalos halak Palistim, nanggo holan mambalos ‘sada sian matana’? (Pangh. 16:28; it “Si Simson” ¶10-wcgr)

   Alusmuna

Pikkirhon ma Aha Parsiajaranna

• Ala torus disukkuni si Delila, ujungna gabe dipaboa si Simson ma rahasiana. Aha do na boi diparsiajari akka sintua dohot istri ni nasida taringot on? B

  Alusmuna

  

• Dibahen si Simson do kesalahan na balga, alai di pudian ni ari dibahen Jahowa do ibana margogo muse. Molo adong halak Kristen na mangulahon dosa na balga, aha do na boi ditiru ibana sian si Simson asa unang menyerah?

  Alusmuna

• Songon dia do caramuna maniru habaranion ni si Simson?

  Alusmuna

Rimangi ma

• Sian kisah on, aha do na boi huparsiajari taringot Jahowa?

  Alusmuna

• Aha do hubungan ni kisah on tu janji ni Jahowa taringot Paradeiso?

  Alusmuna

• Aha do na lao husukkun annon tu si Simson molo nungnga dipahehe ibana?

  Alusmuna

Ida ma Muse on

Ajari ma gellengmuna lao mamboto aha na mambahen si Simson gabe sada sian halak na massai gogo na hea mangolu di tano on.

“Roh Kudus Membuat Simson Kuat” (ijwis-IN artikel 14)

Aha dope na boi taparsiajari sian kisah ni si Simson?

“Andalhon ma Jahowa Songon si Simson” (w23.09 2-7)