21 SI SAMUEL
Sahalak Dakdanak na Barani Pasahatton Hata sian Jahowa
ADONG do persamaan ni si Samuel tu boru ni si Jepta dohot si Simson. Songon boru ni si Jepta, dilehon do si Samuel lao melayani tu Jahowa saleleng ngoluna alani janji na dibahen natua-tuana. (1 Sam. 2:11) Songon si Simson, gabe halak Nasir do si Samuel saleleng ngoluna. (Pangh. 13:7) Jala songon boru ni si Jepta dohot si Simson, porlu do tong habaranion di si Samuel.
Songon naung dijanjihon si Hanna tu Jahowa, diboan ibana ma anakna i tu tabernakel na adong di Silo lao melayani disi. Hira-hira tolu taon ma umur ni si Samuel di tikki i. Alai ganup taon, sai ro do si Hanna mangida si Samuel jala diboan do baju na baru lao pakkeon ni anakna i melayani di tabernakel. Disi ma si Samuel magodang, jala rap tinggal dohot Sintua Malim Eli naung matua. Ra, adong do piga-piga borua na melayani di tabernakel na dohot mangurupi lao manjaga si Samuel.
Di tikki i, godang do halak na mangulahon na jahat di tabernakel. Alai dang berupaya si Eli lao pasohon akka ulaon ni nasida i. Dua anakna, i ma si Hopni dohot si Pinehas pe tong do mangulahon akka na jahat. Mangulahon seks na so patut do nasida dohot akka borua na melayani di tabernakel. Jala dang holan i, dang diargai nasida pengaturan taringot mangalehon pelean. Di tikki ro akka halak mangalehon pelean, disuru nasida na dua do akka pangurupi ni malim lao mambuat na dumenggan sian pelean i lao di nasida. Hape, ikkon tu Jahowa do dilehon bagian na dumenggan i. Diboto si Eli do aha na dibahen akka anakna i. Alai dang tegas si Eli pasingotton nasida. Akibatna, dang ditangihon nasida ibana. Alai berbeda do molo si Samuel. Nang pe godang halak na jahat di sakalilingna, toktong do ibana mangulahon na denggan di jolo ni Jahowa jala lomo do roha ni akka halak mangida ibana. Dung dapot tikkina di Jahowa lao pasaehon masalah na adong di Silo, dipillit Jahowa do si Samuel lao pasahatton hatana.
Di tikki borngin, dungo ma si Samuel ala dibege ibana adong soara na manjou ibana. Didok roha ni si Samuel soara ni si Eli do i. Alani i, lao ma ibana manjuppangi si Eli. Alai disuru si Eli ma si Samuel mulak muse tu podomanna, ala dang adong dijou ibana si Samuel. Sappe tolu hali ma terjadi songon i. Gabe diboto si Eli ma Jahowa do na manjou si Samuel i. Alani i, didok si Eli ma tu si Samuel asa mulak muse tu podomanna. Jala molo dijou Jahowa muse ibana, ikkon didok si Samuel do, “Paboa ma aha na lao dohononmu, ale Jahowa. Rade do naposomon manangihon Ho.”
Dijou Jahowa ma muse si Samuel paopathalihon. Didok, “Samuel, Samuel!” Diulahon si Samuel do songon na didok si Eli i. Dialusi si Samuel ma, “Paboa ma aha na lao dohononmu. Rade do naposomon manangihon Ho.” Dipaboa Jahowa ma na lao dipasae Ibana sude masalah na adong di Silo. Jala lao dihukum Ibana do si Eli ala dang tegas pasingotton akka anakna na mangulahon na sala i. Lao hukumon ni Jahowa do tong keluarga ni si Eli, termasuk ma si Hopni dohot si Pinehas. Ikkon paboaon ni si Samuel do sude hata ni Jahowa i tu si Eli!
Modom ma si Samuel sahat tu manogot, alai dang dipaboa di Bibel atik na boi ibana renges modom. Dung bissar mataniari, dibukka ibana ma akka pintu ni tabernakel. “Mabiar do si Samuel paboahon parnidaan i tu si Eli.” Alai dijou si Eli ma si Samuel, jala disukkun ibana ma aha na didok Jahowa tu si Samuel. Boi do ra diida si Eli na mabiar si Samuel paboahon i. Alani i didok ibana, “Unang ma tabunihon i sian au nanggo sada hata pe.”
Nang pe dakdanak dope si Samuel, ikkon dipasahat ibana do barita panguhuman sian Jahowa tu Sintua Malim Eli
Pasti massai maol do on di si Samuel, ala nga dianggap ibana si Eli i songon oppungna sandiri. Asing ni i, sahalak sintua ni malim na dipasangap halak Israel do si Eli i. Alai toktong do barani si Samuel pasahatton hatana. Bibel mandok, ‘Dipaboa si Samuel ma sude tu si Eli.’ Dung dibege si Eli na lao dihukum Jahowa ibana dohot keluargana, pittor dipissang ibana do akka anakna i? Dang adong didok di Bibel taringot i.
Dipasu-pasu Jahowa do si Samuel ala barani ibana. Bibel mandok, “Didongani Jahowa do ibana.” Dipillit Jahowa do si Samuel lao pasahatton hatana. Jala “dang dipasombu [Jahowa] sada pe sian hata ni si Samuel i na so dipasaut”. Saut do sude hata ni si Samuel taringot si Eli dohot akka ianakkonna i. Jala saleleng marpulu taon, si Samuel do na dipakke Jahowa lao pasahatton petunjuk tu bangso Israel. Setia do ibana mandalatton tugasna gabe panurirang dohot panguhum. Mulai sian na gelleng, diurupi Jahowa do ibana asa barani. Jala torus do dipatudu ibana habaranion sahat tu ujung ni ngoluna.
Jaha ma ceritana di:
Na lao dibahas:
Boha do cara ni si Samuel patuduhon habaranion?
Bagas ma Parsiajari
1. Patorang ma songon dia do Kota Silo i. (w92 1/11 8-9-wcgr) A
Todd Bolen/BiblePlaces.com
Gambar A: Lokasi ni Silo najolo
2. Songon dia do parngoluon ni si Samuel di tabernakel? (ia 60-62 ¶9-13) B
Gambar B
3. Boasa didok “dang takkas dope ditanda si Samuel Jahowa” tikki gelleng dope ibana? (1 Sam. 3:7; w02 15/12 8 ¶5-6-wcgr)
4. Songon dia do surirang taringot keluarga ni si Eli dipasaut? (it “Si Eli, I” ¶5-7-wcgr)
Pikkirhon ma Aha Parsiajaranna
Aha do na boi diparsiajari akka na poso sian si Samuel taringot penting ni . . .
mangoloi? (1 Sam. 3:5)
sopan jala mangargai na asing? (1 Sam. 3:6-10)
boi diandalhon? (1 Sam. 3:15) C
Gambar C
Di situasi na songon dia do akka na poso porlu barani lao paboahon na sittong, jala songon dia do teladan ni si Samuel boi mangurupi nasida?
Songon dia do muse caramuna maniru habaranion ni si Samuel?
Rimangi ma
Sian kisah on, aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Aha do na lao husukkun annon tu si Samuel molo nungnga dipahehe ibana?
Ida ma Muse on
Di situasi na songon dia do akka na poso dohot naung dewasa porlu barani lao paboahon na sittong?
Nang pe akka halak na di sakaliling ni si Samuel dang mangoloi Jahowa, alai toktong do diulahon ibana na sittong.
“Samuel Memilih untuk Melayani Yehuwa” (ijwis-IN artikel 15)