18 SI GIDION
Barani jala Marbisuk
HALAK na barani porlu do marbisuk. Alana molo dang marbisuk ibana, boi do gabe diulahon ibana na sala manang na berbahaya. Halak na barani jala na marbisuk do si Gidion. Di jaman ni si Gidion, dang setia halak Israel tu Jahowa. Alani i, diloas Jahowa ma halak Midian menguasai luat ni nasida. Torus do diserang halak Midian nasida. Akibatna, gabe mabiar ma halak Israel karejo di ladang ni nasida. Molo si Gidion tetap do karejo, alai marbisuk do ibana. Buktina, di inganan pamoroan ni anggur do ibana mambatting gandum asa unang diida halak Midian.
Lam susa do halak Israel ala dikepung halak Midian. Alani i, dipangido nasida ma bantuan ni Jahowa. Jadi, disuru Jahowa ma panurirangna lao paboahon boasa ditinggalhon Jahowa nasida. Dung i, disuru Jahowa ma sada suru-suruan lao paboahon tu si Gidion naung dipillit do ibana lao paluahon naposona. Jadi dipangido si Gidion ma tanda lao patuduhon na tutu do Jahowa na manuru suru-suruan i. Alani i, dibahen suru-suruan i ma sada mukjizat. Adong ma api na kaluar sian batu manutung pelean na dipelehon si Gidion. Dung i dang tarida be suru-suruan i. Laos di borngin i, disuru Jahowa ma si Gidion lao mangaruppakkon mezbah manang inganan manutung pelean tu Baal dohot tiang sisombaon. Dung i, disuru Jahowa do si Gidion mambangun mezbah tu Jahowa, jala dilehon ma pelean tu Jahowa. Diulahon si Gidion do paretta ni Jahowa i. Alai ala mabiar ibana tu bapakna dohot tu akka halak na di kota i, tonga borngin do diulahon ibana i asa unang adong na mangida.
Dang leleng dung diruppakkon si Gidion mezbah ni Baal, marpungu ma halak Midian, halak Amalek, dohot halak na sian Timur. Ro ma nasida lao menyerang halak Israel, jala dikepung nasida ma Lembah Jisreel. Dung i songgop ma tondi parbadia tu si Gidion. Disuru ibana ma akka halak manjuppangi piga-piga marga ni Israel lao manogihon nasida asa dohot marporang. Alai marbisuk do tong si Gidion. Dipangido ibana do asa dibahen Jahowa dua mukjizat lao gabe bukti na tutu do didongani Jahowa ibana. Sabar do Jahowa tu si Gidion jala dioloi do pangidoanna. Bornginna i, tikki dipeakkon si Gidion ibbulu ni biru-biru di inganan pardegean, dibahen Jahowa do maraek ibbulu ni biru-biru i alani nambur, alai koring do tano di sakalilingna. Marsogotna i tikki borngin, dibahen Jahowa do koring ibbulu ni biru-biru i, alai maraek do tano na di sakalilingna.
Sebenarna, otik do tentara ni si Gidion molo dibandingkon tu tentara ni musu. Alai disuru Jahowa do asa diorui si Gidion tentarana i
Alani dua mukjizat i, gabe lam barani ma si Gidion. Dipapungu ibana ma 32.000 halak lao marporang rap dohot ibana mangalo 135.000 tentara ni musu. Tikki markemah halak Israel di jonok ni Mata Mual Harod, didok Jahowa do tu si Gidion pagodangku do tentarana i. Jadi disuru si Gidion ma asa mulak akka tentara na mabiar. Holan 10.000 ma na tinggal. Alai didok Jahowa do muse magodangku dope nasida. Alani i, disuru Jahowa ma si Gidion asa mamboan akka tentarana i tu mata mual jala mamparrohahon cara ni nasida minum. Manang ise tentara na langsung manukkap tu aek i tikki minum, ikkon disuru do mulak. Alai adong do sian akka tentara i na marbisuk. Asa boi diida nasida aha na masa di sakaliling ni nasida, tanganna do dibahen nasida mambuat aek i lao diinum. Sian sude akka tentara i, holan 300 halak do na tarpillit mandongani si Gidion marporang!
Nang pe saotik tentara ni si Gidion, alai barani do ibana jala siap lao marporang. Dung i, dibahen Jahowa do muse tanda na asing lao paposson roha ni si Gidion. Disuru Jahowa ma si Gidion asa sip-sip masuk tu perkemahan ni musu tikki borngin, jala diulahon si Gidion do i. Dung sahat disi, dibege ibana ma sahalak tentara ni musu paboahon nipina tu donganna. Didok donganna i ma, molo arti ni nipina i, na lao monang do halak Israel di parporangan i. Dung dibege si Gidion i, gabe lam barani ma ibana. Dukkon i, mulak ma ibana manjuppangi akka tentarana jala dilehon ma petunjuk tu nasida asa boi monang di parporangan i. Didok ibana ma, “Parrohahon hamu ma na huulahon, . . . jala ulahon hamu ma songon na hubahen.” Diboan nasida ma gucci na balga, obor, dohot tarompet na sian tanduk. Tikki dibahen si Gidion tanda, diombus nasida ma tarompet i jala diputtarhon ma gucci na balga i. Dung i marsurak ma nasida mandok, “Podang ni Jahowa dohot podang ni si Gidion!” Tikki dibege akka tentara ni musu soara i, gabe dirippu nasida ma naung dikepung nasida jala diserang. Gabe mabiar ma akka tentara ni musu i. Dung i dibahen Jahowa ma nasida marsipamatean. Holan 15.000 halak do na selamat. Ala melarikan diri do nasida.
Dung i, dilele si Gidion ma akka musu i jala dipamate ibana ma nasida dohot akka pamimpin ni nasida. Dihukum si Gidion do muse halak Israel na so olo mangalehon sipanganon tu ibana dohot tu akka tentarana tikki marporang nasida. Dukkon i, naeng dibahen halak Israel ma si Gidion gabe raja ni nasida. Alai serep do roha ni si Gidion. Didok ibana do, “Jahowa ma na gabe pamimpinmuna.” Dipasu-pasu Jahowa do si Gidion ala barani ibana jala marbisuk. Saleleng gabe panguhum si Gidion, dang adong porang di Israel, jala ganjang do umur ni si Gidion. Alai dang holan i. Marratus taon dukkon i, didok si Paulus do di suratna molo si Gidion sada sian akka halak na porsea.—Heb. 11:32.
Jaha ma ceritana di:
Na lao dibahas:
Boha do cara ni si Gidion patuduhon habaranion?
Bagas ma Parsiajari
1. Di nipina, diida sahalak tentara ma “sada roti barli na bulat”. Boasa on cocok manggombarhon tentara ni si Gidion? (Pangh. 7:13; it “Barli” ¶7-wcgr)
2. Boasa gabe mabiar halak Midian tikki mambege soara ni 300 tarompet na sian tanduk i? (it “Tanduk” ¶3-wcgr) A
Gambar A: Tanduk ni biru-biru jantan dibahen gabe tarompet lao mangalehon tanda
3. Aha do na ikkon diulahon si Gidion dohot akka tentarana lao manaluhon halak Midian? (w04 15/10 16 ¶9-10-wcgr) B
Gambar B: Dilele si Gidion halak Midian sahat tu Jogbehat na daona hira-hira 80 kilometer (dang takkas diboto sian dia jalurna)
4. Aha do hatorangan na dipaboa di Bibel na mambuktihon na tutu do kisah on? (w05 15/4 32-wcgr)
Pikkirhon ma Aha Parsiajaranna
Monang do halak Israel alani si Gidion. Alai serep do roha ni si Gidion jala lambok do ibana makkatai asa boi mardame tu na asing. (Pangh. 8:1-3) Songon dia do kepala keluarga dohot akka sintua boi maniru si Gidion tikki adong na jut rohana tu na diulahon nasida?
Di situasi na songon dia do hita ikkon barani alai tetap marbisuk? C
Gambar C
Songon dia do caramuna maniru habaranion ni si Gidion?
Rimangi ma
Sian kisah on, aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Aha do na lao husukkun annon tu si Gidion molo nungnga dipahehe ibana?
Ida ma Muse on
Molo mandapot tugas tambahan hamu di organisasi ni Jahowa, aha do na boi ditiru hamu sian si Gidion?
“Marbisuk do Halak na Serep Marroha” (w00 1/8 16-18 ¶11-15-wcgr)
Pakke ma komik sian cerita na dipaboa di Bibel lao mangurupi ianakkonmuna asa marpos ni roha tu Debata.