11 SI MUSA
“Lao ma Ho Manjuppangi si Firaun”
NUNGNGA marumur 80 taon be si Musa saonari, nga menikah ibana jala adong dua anakna. Nungnga 40 taon dukkon ditinggalhon ibana Mesir. Tinggal di Midian do ibana saonari jala gabe parmahan ni biru-biru ni simatuana. Dang mura mangulahon i, alana harsang do inganan i. Saleleng di Midian, nungnga muba be sifat ni si Musa. Najolo sai dirippu si Musa do, ibana na lao paluahon halak Israel, alai saonari dang songon i be na dipikkirhon ibana. Nga serep be rohana, jala diida Jahowa do i.
Tikki marmahan si Musa di Dolok Horeb (Sinai) diida ibana ma api na marsigorgor di tonga-tonga ni ramba na marsuga, alai dang matutung ramba i. Tikki dipajonok si Musa tu ramba i, makkatai ma Jahowa tu ibana marhite suru-suruanna. Disuru ma asa mulak si Musa tu Mesir lao paluahon naposona! Asa unang mabiar si Musa mulak tu Mesir, dipapos Jahowa ma rohana marhite paboahon lapatan ni goarna. Didok Jahowa, “Boi do Au Mambahen Manang Aha pe na Huhalomohon.” Jadi maksud ni Jahowa disi, boi do dibahen Ibana manang aha pe lao paluahon naposona, jala boi do dibahen Ibana nasida gabe bangso na gogo.
Nang pe songon i, ragu dope si Musa. Didok rohana, dang sanggup ibana mamboan halak Israel kaluar sian Mesir jala mabiar do ibana lao makkatai tu Raja Firaun. Asa pos roha ni si Musa, dilehon Jahowa ma huaso tu ibana lao mambahen mukjizat. Dipaboa do di Bibel, si Musa ma jolma na parjolo sahali boi mambahen mukjizat. Asing ni i, dipillit Jahowa do si Aron lao mangurupi si Musa makkatai tu si Firaun. Ujungna, olo ma si Musa manjalo tugas sian Jahowa lao mamimpin halak Israel kaluar sian Mesir.—Heb. 11:26.
Dung juppang si Musa dohot si Aron di Dolok Horeb, rap lao ma nasida tu Mesir lao makkatai tu si Firaun. Dipangido nasida ma asa dipaloas si Firaun halak Israel lao sian Mesir. Muruk hian ma si Firaun jala lam borat ma dibahen ibana karejo ni halak Israel. Dukkon i, disuru Jahowa do muse si Musa manjuppangi si Firaun, jala paboahon na lao bahenon ni Jahowa tulah tu halak Mesir. Tulah na parjolo, dibahen Jahowa ma aek di Sunge Nil gabe mudar. Alai tetap do dang olo si Firaun paloasson halak Israel kaluar sian Mesir. Jadi didok Jahowa ma muse tu si Musa, “Lao ma ho manjuppangi si Firaun.” Torus do dioloi si Musa hata ni Jahowa i jala barani do ibana paboahon sude tulah na lao bahenon ni Jahowa tu halak Mesir. Alai tong do ginjang roha ni si Firaun. Dang olo ibana manangihon hata ni Jahowa.
Mulai sian tulah na paopatton, holan halak Mesir do na hona dampak ni tulah i. Sian akka tulah na dibahen Jahowa i, takkas ma tarida dang marguna akka debata ni halak Mesir ala dang boi dipaso nasida akka tulah i. Si Firaun dohot akka tukkang sihir na adong disi pe, tong do dang boi pasohon akka tulah i. Nang pe songon i tong do dipajogal si Firaun rohana, dang dipaloas ibana lao halak Israel. Tikki terjadi tulah na pasiahon, gabe golap ma sude inganan di Mesir kecuali inganan ni halak Israel. Ujungna, dipaloas si Firaun ma halak i lao, alai dang leleng dukkon i muba ma muse rohana. Didok ibana ma tu si Musa, “Sotung ro be ho manjuppangi au. Molo ro dope ho muse, pamateonku ma ho.”
Mulak-ulak do si Musa pasahatton hata ni Jahowa tu si Firaun, raja na paling berkuasa di tikki i
Masa ma tulah na pasappuluhon. Mate ma sude anak siakkangan ni halak Mesir, termasuk ma anak siakkangan ni si Firaun. Jala mate do muse sude binatang na parjolo tubu. Marhite tulah i dipaila Jahowa ma si Firaun, pittor dijou si Firaun ma si Musa. Dung i lao ma si Musa manjuppangi si Firaun. On ma na parpudi sahali nasida pajuppang. Dipaloas si Firaun ma halak Israel lao, jala dipangido si Firaun ma tu si Musa asa dipasu-pasu Jahowa ibana. Ujungna kaluar ma halak Israel sian Mesir, persis ma i 430 taon dukkon sahat si Abraham di Tano na Dijanjihon. Tikki na lao i halak Israel, godang do halak sian bangso na asing na mangihutton nasida termasuk ma i halak Mesir. Alai muba ma muse roha ni si Firaun, dipapungu ibana ma akka tentarana lao mangalumba halak Israel!
Sahat ma halak Israel di topi ni Laut Merah. Tikki i mabiar hian do halak Israel ala dang boi nasida lao manang tudia pe. Martangiang ma si Musa mangido bantuan ni Jahowa. Dialusi Jahowa do tangiangna i marhite mukjizat na luar biasa. Dibahen Jahowa ma tarbola Laut Merah. Gabe boi ma mardalan halak Israel di tano na koring lao menyeberangi laut i. Tikki diida si Firaun i, dilumba si Firaun dohot akka tentarana ma nasida. Dung sahat sude halak Israel di seberang ni laut i, dibahen Jahowa ma mulak muse aek i songon na somal. Gabe mate ma si Firaun dohot tentarana, i ma tentara na unjago di tikki i!
Alani peristiwa i, gabe lam togu do haporseaon ni si Musa jala dang tarhalupahon ibana i. Mangolu dope ibana 40 taon nai lao mamimpin bangso ni Debata, jala mate ma ibana tikki marumur 120 taon. Gabe teladan do si Musa di hita saonari ala sai dipatudu ibana do haporseaon, holong, dohot habaranion.
Jaha ma ceritana di:
Na lao dibahas:
Sian peristiwa on, boha do cara ni si Musa patuduhon habaranion?
Bagas ma Parsiajari
1. Memang dang taboto ise goar ni si Firaun na gabe raja di jaman ni si Musa, jala dang dapot dope catatan sejarah ni halak Mesir taringot halak Israel na kaluar sian Mesir. Alai boasa boi pos rohatta na tutu do terjadi na disurat di Bibel i? (g04 8/4 7 ¶4–9 ¶1-wcgr)
2. Boasa mabiar akka halak tu si Firaun? (w14 15/4 8 ¶1-wcgr) A
PRISMA ARCHIVO/Alamy Stock Photo
Gambar A: Gambar ni si Firaun naung leleng na diukir di dinding
3. Boasa gabe dipaila debata ni halak Mesir alani Sappulu Tulah na dibahen Jahowa i? (it “Akka Dewa Dohot Dewi” ¶24-26-wcgr)
4. Tikki dibola Jahowa Laut Merah, sian dia do taboto na bidang do dalan na dilewati halak Israel? Jala sadia godang do jumlah ni halak Israel na menyeberangi laut i? (it “Kaluar Halak Israel sian Mesir” ¶46-51-wcgr) B
Gambar B: Gambar ni Laut Merah na diseberangi halak Israel najolo na tarida sian Sinai
Pikkirhon ma Aha Parsiajaranna
Songon dia do caratta maniru si Musa tikki merasa dang layak hita mangulahon tugas sian Jahowa? (2 Mus. 4:10; 7:6, 7)
Diurupi si Aron do si Musa asa barani mangulahon tugas na sian Jahowa. Aha do na boi tatiru sian si Aron tikki mangurupi akka dongan? (2 Mus. 4:14-16) C
Gambar C
Songon dia do caramuna maniru habaranion na dipatudu si Musa di kisah on?
Rimangi ma
Sian kisah on, on aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Aha do na lao husukkun annon tu si Musa molo nungnga dipahehe ibana?
Ida ma Muse on
Pikkirhon ma songon dia arti goar ni Debata, i ma Jahowa, boi mambahen akka dakdanak gabe barani.
Sian pengalamanna, aha do na diparsiajari si Musa taringot sifat ni Jahowa?
“Marsiajar Taringot Akka Dalan ni Jahowa” (w05 15/5 20-25-wcgr)