Marsak Alani Sitaonon—“Marragam do Sitaonon na Ro Manosak Hami”

SUDE do halak hea marsak, termasuk ma naposo ni Jahowa. Hea do didok panurat ni psalmen, “Marsak situtu rohakku.” (Psalmen 94:19) Jala hea do muse didok Jesus, holso ni roha boi do mambahen sasahalak gabe dang fokus manomba Jahowa. (Lukas 21:34) Boha do molo hamu? Marsak do hamu alani masalah keuangan, keluarga, manang kesehatan? Songon dia do Jahowa mangurupi hamu lao menghadapi i sude?

‘Gogo na Lobi sian Gogo ni Sahalak Jolma’

Tikki marsak hita, dang boi holan sahalakta lao mangatasi i. Alana didok Apostel Paulus do, ‘Marragam do sitaonon na ro manosak hami, marsak do hami, jala didabuhon do hami.’ Alai didok si Paulus do muse, ‘Dang tarhapit hami, sai adong do dalan haluaon, jala dang mate hami.’ Aha do na boi mangurupi hita asa toktong martahan? Gogo na sian Jahowa, Debata na marhuaso. Dilehon do ‘gogo na lobi sian gogo ni sahalak jolma’.—2 Korint 4:7-9.

Ingot ma muse songon dia hamu najolo hea mandapot ‘gogo lobi sian gogo ni sahalak jolma’. Contohna, tikki dibege hamu sada jamita, ra gabe lam diargai hamu do holong ni Jahowa tu hamu. Manang tikki diurupi hamu halak na asing mamboto taringot Paradeiso, gabe lam dipatogu do haporseaonmuna tu janji ni Jahowa. Jadi tikki marpungu dohot tikki marbarita, tadapot do gogo na boi mangurupi hita asa martahan manaon sude sitaonon. Tadapot do tong dame ni roha asa boi toktong marlas ni roha lao manomba Jahowa.

“Dai jala Ida ma na Burju do Jahowa”

Olo do ra didok rohamuna, pagodangku do ulaon na ikkon diulahon hamu. Misalna, dipangido Jahowa do asa tajumolohon ulaon Harajaonna jala toktong mangulahon akka ulaon na boi mambahen hita jonok tu Ibana. (Mateus 6:33; Lukas 13:24) Alai boha do molo adong tantangan, sahit, dohot masalah keluarga na mambahen hamu gabe loja? Manang gabe habis tikki dohot gogomuna alani karejomuna? Olo do ra gabe loja dihilala hamu ala pagodangku na ikkon diulahon hamu, hape dang tolap hamu lao mangulahon i sude. Bahkan olo do ra gabe didok rohamuna pagodangku na dituntut Jahowa sian hamu.

Diboto Jahowa do songon dia keadaanta. Dang hea dipangido Ibana lobi sian na boi talehon. Jala diboto do, alani sitaononta olo do gabe loja daging dohot pikkiranta. Alani i, porlu do di hita tikki asa boi malum.—Psalmen 103:13, 14.

Misalna, pikkirhon ma songon dia Jahowa patoguhon Panurirang Elia. Hea do metmet roha ni si Elia jala mabiar. Alani i, melarikan diri ma ibana tu padang belantara. Gabe muruk do Jahowa tu ibana jala disuru asa mulak lao mangulahon tugasna i? Daong. Justru sappe dua hali do disuru Jahowa suru-suruanna mangurupi si Elia. Lambok do suru-suruan i tikki mandungoi si Elia jala dilehon do ibana mangan. Alai 40 ari dukkon i, tong dope khawatir si Elia jala mabiar. Aha do muse na diulahon Jahowa? Na parjolo, dipatudu Jahowa do na sanggup Ibana melindungi si Elia. Na paduahon, “nanget jala lambok” do soara ni Jahowa tikki paposson rohana. Didok Jahowa do muse adong dope marribu halak na setia manomba Jahowa. Hasilna, gabe semangat ma muse si Elia lao mangulahon tugasna gabe panurirang. (1 Raja-Raja 19:1-19) Aha do parsiajaranna? Tikki marsak si Elia, sabar do Jahowa tu ibana jala asi do rohana. Dang hea muba Jahowa. Tu hita pe, pasti bahenon ni Jahowa do songon i.

Ikkon masuk akkal do hamu tikki mamikkirhon aha na boi dilehon hamu tu Jahowa. Unang ma bandingkon na diulahon hamu saonari tu na hea diulahon hamu najolo. Pikkirhon ma contoh on: Sahalak pelari naung leleng dang marlatik, pasti dang boi pittor mulak tu kebiasaanna marlatik songon najolo i. Ikkon marlatik do muse ibana. Alai ikkon dibahen ibana do tujuan na masuk akkal, alana porlu do tikki asa mulak muse gogona songon na uju i. Sarupa do halak Kristen songon pelari i. Porlu do dibahen nasida tujuan na jelas jala masuk akkal. (1 Korint 9:24-27) Asa boi jonok muse hamu tu Jahowa, coba ma bahen sada tujuan na ummura diulahon hamu saonari. Misalna, boi do diupayahon hamu asa ro tu parpunguan. Pangido ma tu Jahowa asa diurupi hamu mencapai tujuan i. Tikki berupaya hamu patoguhon hubunganmuna muse tu Jahowa, pasti boi do annon ‘didai hamu jala diida hamu na burju do Jahowa i’. (Psalmen 34:8, surat na di toru) Ingot ma, massai arga do di Jahowa sude na diulahon hamu lao patuduhon holongmuna tu Ibana.—Lukas 21:1-4.

“On ma na Mambahen Au Semangat Muse”

Songon dia do Jahowa patoguhon si June asa boi muse mulak tu Jahowa? Didok si June, “Torus ma au martangiang tu Jahowa asa diurupi. Tikki dipaboa parumaenku na adong parpunguan wilayah di kotanami, bertekad do au asa dohot tu parpunguan i, nang pe holan sadari. Las hian do rohakku ala boi muse rap dohot akka naposo ni Jahowa disi. On ma na mambahen au semangat muse, jala on do na huhaporluhon saleleng on. Saonari, nungnga mulak be au tu Jahowa jala las hian do rohakku. Gabe lam arga ma huhilala ngolukku. Jala husadari ma, dang boi au mandao sian organisasi ni Jahowa manang sahalakku menghadapi akka masalahku. Mandok mauliate do au ala adong dope kesempatan lao mulak tu Jahowa.”