BAGIAN 1
“Luluakku ma Akka na Mago”
Adong ma sada biru-biru na lalap mangallangi rumput. Dang disadari biru-biru i naung dao ibana sian punguanna. Saonari dang boi be diida ibana halak na marmahani ibana dohot biru-biru na asing. Hape nungnga mulai golap ari. Dang disadari biru-biru i naung sahat ibana di rura, hape godang do binatang buas di rura i. Alai ujungna, dibege biru-biru i ma soara ni parmahan i. Marlojong do parmahan i manjonoki biru-biru i, diabing ma ibana jala dipamasuk tu bagasan jubahna, dung i diboan mulak.
MULAK-ULAK do dipatudos Jahowa dirina songon parmahan na burju i. Di Bibel didok Jahowa do, “Au sandiri ma na lao mangalului akka biru-birukki. Au ma na lao manjaga nasida.”—Hesekiel 34:11, 12.
“Biru-Biru na Hujaga”
Ise do biru-biru ni Jahowa? Nasida, i ma akka halak na makkaholongi jala na manomba Jahowa. Didok di Bibel, “Beta marsomba ma hita tu Ibana. Beta marsinggang ma hita di jolo ni Jahowa Sitoppa hita. Ai Ibana do Debatanta, jala hita do bangso na diparmahani Ibana, hita do biru-biru na dijaga Ibana.” (Psalmen 95:6, 7) Songon biru-biru na mangihutton parmahan, las do roha ni naposo ni Jahowa mangihutton Siparmahan ni nasida. Alai na gabe so hea do nasida mangulahon na sala? Dang songon i maksudna. Sipata, olo do naposo ni Jahowa i songon biru-biru na “marserak” manang “na lilu”. (Hesekiel 34:12; Mateus 15:24; 1 Petrus 2:25) Alai nang pe songon i, tikki adong sasahalak na mandao sian Jahowa, sai berharap do Jahowa asa mulak muse ibana tu Jahwoa.
Porsea dope hamu molo Jahowa i Siparmahan di hamu? Songon dia do cara ni Jahowa patuduhon na Ibana do Siparmahan sahat tu saonari? Ida ma tolu bukti on:
Dilehon Jahowa do akka na boi patoguhon parale-aleotta tu Ibana. Didok Jahowa, “Modom-modom ma nasida disi, di panjappalan na lomak i. Diallang nasida ma duhut-duhut na lomak.” (Hesekiel 34:14) Sai dilehon Jahowa do akka na boi patoguhon parale-aleotta tu Ibana di tikki na pas. Hea do dihilala hamu na dialusi Jahowa tangiangmuna marhite sada artikel, jamita, manang video? Gabe pos do rohamuna na parduli Jahowa tu hamu?
Dijaga Jahowa do hita jala diurupi. Didok Jahowa do, “Boanokku ma mulak akka na lilu. Hubalut ma akka na lukka, jala patoguokku ma na gale.” (Hesekiel 34:16) Dipatogu Jahowa do akka naposona na gale manang na marsak. Tikki adong biru-biruna na haccit rohana dibahen dongan sahaporseaon, dibalut Jahowa do lukka ni nasida jala diurupi sahat tu na malum. Asing ni i, diboan Jahowa do mulak biru-biruna na mandao dohot na marmetmet ni roha.
Arga do hita di Jahowa. Didok Jahowa do, “Marserak do akka biru-birukki tu sude inganan. Alai, paluaokku do nasida sude. . . . Luluakku ma akka na mago.” (Hesekiel 34:12, 16) Molo adong sada pe biru-biruna na mago, diboto Jahowa do i. Luluanna do biru-biru i, jala las do rohana tikki juppangna i. Dang hea didok Jahowa, na so boi be biru-biruna i diurupi. (Mateus 18:12-14) Di Bibel didok Jahowa do naposona “biru-birukku, biru-biru na hujaga”. (Hesekiel 34:31) Hamu ma sada sian biru-biru ni Jahowa na dihaholongi Ibana.
Dang hea didok Jahowa, na so boi be biru-biruna na mago i diurupi. Las do rohana tikki juppangna i
“Bahen ma Muse Ngolunami Songon na Uju i”
Boasa dilului Jahowa hamu jala ditogihon asa mulak tu Ibana? Ala lomo rohana asa marlas ni roha hamu. Marjanji do Ibana, lao ‘usehononna pasu-pasu tu akka biru-biruna dos songon udan’. (Hesekiel 34:26) Alai dang holan janji on. Pasti nungnga hea dihilala hamu pasu-pasu sian Jahowa.
Coba ma ingot muse tikki parjolo sahali hamu mananda Jahowa. Contohna, songon dia do perasaanmuna tikki parjolo sahali mamboto goar ni Jahowa dohot janji taringot Paradeiso? Songon dia do perasaanmuna tikki marpungu dohot akka dongan sahaporseaon di parpunguan wilayah dohot di parpunguan regional? Songon dia do perasaanmuna tikki adong halak na olo mambege barita na uli na dipasahat hamu? Pasti las hian do rohamuna.
Boi do hilalaonmuna muse las ni roha sisongon i. Najolo, adong do naposo ni Jahowa na martangiang, “Ale Jahowa, togu ma hami muse mulak tu Ho, pittor mulak pe hami tu Ho. Bahen ma muse ngolunami songon na uju i.” (Andung-Andung 5:21) Ditangihon Jahowa do tangiang ni nasida i, jala mulak do muse nasida manomba Jahowa di bagasan las ni roha. (Nehemia 8:17) Bahenon ni Jahowa do tong songon i tu hamu.
Memang, dang sai mura tikki naeng mulak tu Jahowa. Lao tabahas ma piga-piga alasanna jala songon dia carana mangatasi i.