Lôk Héber 11:1—“Hémle i Yé Kandalnyu Ikété Mam Mut a Mbôdôl Ñem”

“Hémle i yé botñem i ngui mut a gwé le i jam a mbem li ga yon ibabé set i yé i bana mam ma nkwés bés nkaa le ngim mam i yé toi, to ibale i nene bé i mis.”—Lôk Héber 11:1, Ngobol Mbok Yondo.

“Ndi hémle i yé kandalnyu ikété mam mut a mbôdôl ñem, yo ki yon i yé mbôgi mam ma nene bé.” ”—Lôk Héber 11:1, Kaat Nyambe.

Ndoñi i kaat Lôk Héber 11:1

I pes kaat ini i nti ndoñi i i nlôoha kidik inyu unda kii i yé toi hémle, i ñunda ki bés le hémle i ta ndik bé i kal le me gwé hémle.

“Hémle i yé botñem i ngui mut a gwé le i jam a mbem li ga yon ibabé set.” Ikété bibañga bi kaat Lôk Héber 11:1 bi bi bi tilba ni hop u Grikia, i buk ini le “hémle” i nla ki kobla le botñem, bôdôl, i ba nkwoog nkaa. I nya hémle i i umne bé i ngii mam mut a nla bana ngôñ le ma yon; i yé “botñem i ngui.” I buk Grikia i nkobla hana le “botñem i ngui”a i nla ki kobla le “lipep li li ñéba le yom i yé i yés,” ngéda di gwé lipep li, di yé nkwoog nkaa le yom i yé i yés.

“Hémle i yé. . . bana mam ma nkwés bés nkaa le ngim mam i yé toi, to ibale i nene bé i mis.” Hémle i umne i mam ma nkwés bés nkaa. I mam ma ma yé maliga kayéle to ibale ma nene bé, ma yé ntiik i mis ma mut a nhémle mo.

Mam ma bi tagbe i ngéda kaat Lôk Héber 11:1 i bi tilba

Ñoma Paul a bi tila kaat i Lôk Héber inyu bikristen bi hiai hi bisu bi bi bé niñ i Yérusalem ni bitison bi bé ha ipañ. Munu pes ini, Paul a ñunda nseñ u hémle. Kiki hihéga a nkal le: “Mut a nla bé lémél Nyambe ibale a gwé bé hémle, inyule nu ni nu a nkôôge Nyambe bebee a nlama hémle le a yé ni le a nyila nu a mbom i bôt ba nyéñ toi nye.” (Lôk Héber 11:6) Ngéda Paul a bi mal toñol kii i yé hémle i kaat Lôk Héber 11:1, a bi sima bôlôm ni bôda ba kôba ba ba bi unda hémle. A bi toñol lelaa i bôt bana ba bi unda ni maboñok map le ba nhémle toi Nyambe.—Lôk Héber 11:4-38.