Filipi 4:13—“Me nla boñ mam momasôna ni njel Kristô”

“Inyu mam momasôna, me gwé ngui ni njel nu a nti me lipémba.”—Filipi 4:13, Bitilna bipubi. Ngobol Mbok Yondo. Matéô - Masoola

“Me nla boñ mam momasôna ni njel Kristô nu a nlédés me.”—Filipi 4:13, Bible en français courant.

Ndoñi i kaat Filipi 4:13

Bibañga bini ñoma Paul a tila bi nti bagwélél ba Djob botñem le ba ga kôhna ngui inyu boñ sômbôl i yé.

Ngim ngobol i Bibel i nkal le Kristô nyen a ti Paul ngui . Ndi ikété minlômbi mi bikaat mi Lôk Grikia, ba nléba bé buk ini le “Kristô” hana homa nunu. Jon ngandak Bibel munu ngéda yés i ngwélél bibuk kiki bo “nu a nti me lipémba” (Bitilna bipubi. Ngobol Mbok Yondo. Matéô - Masoola), “nu a nti me ngui” (Bible du semeur), ni “nu a yé lingen li ngui yem” (Nouvelle Bible Second). Njee ñoma Paul a bé pôdôl?

Minlôñ mi Bibel mi mbôk mi ñunda bés le Paul a bé pôdôl Nyambe. (Filipi 4:6, 7, 10) I minlôñ mi bisu mi kaat yé, Paul a tilna bôt ba Filipi le: “Nyambe nyen a yé . . . i ti bé ngui, a boñok le ni bana. . . ngui i boñ mam.” (Filipi 2:13) Yak i kaat i 2 Korintô 4:7, a tila le Nyambe nyen a bi ti nye ngui i sal nson wé. (Hégha ni 2 Timothy 1:8.) Mam mana mon ma ntinde bés i kal le Paul a bé pôdôl Nyambe kiki nu ‘nu a nti nye lipémba.’

Kii Paul a bé sômbôl kal ngéda a tila le a ga kôhna ngui “inyu mam momasôna”? I mam Paul a mpôdôl hana ma bé lama ba mangéda momasôna a bi tégbaha mu nson wé. Too a bééna ndik ndék bigwel moo too a bééna ngandak, a bé yi le Yéhôva a ga tééda nye. Paul a bi nigil i kon maséé ni libak jé.—2 Korintô 11:23-27; Filipi 4:11.

Bibañga bi Paul bi nla yak ti bagwélél ba Djob botñem i len ini. Nyambe a ga ti bo ngui inyu nihbe mandutu ni inyu ke ni bisu i boñ sômbôl yé. Nyambe a nla ti bo ngui i ni njel mbuu wé mpubi, bikristen bipe, ni Bañga yé le Bibel.—Lukas 11:13; Minson mi baôma 14:21, 22; Lôk Héber 4:12.

Mam ma bi tagbe i ngéda Paul a bé tila kaat Filipi 4:13

Bibañga bini bi yé i mamélél ma kaat Paul a tilna Bikristen bi Filipi. A bi tila kaat i bebee ni nwii 60-61 N.Y., i ngéda a bé i mok inyu ngélé bisu i Rôma. Inyu ngim ngéda, Bikristen bi Filipi bi bé la ha bé hôla Paul ni bigwel moo. Ndi ngéda Paul a bé tila bibañga bini, ba bé éble nye makébla inyu boñ le yom i héñél bañ nye.—Filipi 4:10, 14.

Paul a bi ti Bikristen bi Filipi mayéga inyu ñem wap likap a kal ki bo le a gwé mam ma mbéda nye. (Filipi 4:18) A bi gwélél ki i njel i inyu kal bo jam li li bé lama hôla bo mu niñ yap i bikristen. I jam li li bé le: Bikristen gwobisôna to ba gwé moni to ba nyep ba nla kon maséé ni mam ba gwé ibale ba mbôdôl Djob ñem.—Filipi 4:12.