Bôdôl Nyambe Nu ngui yosôna ñem

1. Kii i bi pémél Hiôb?

HIÔB a bi nimis bebee le mam momasôna: bon bé, mbôô wé, ni bilém gwé. Kiki i mam ma ma bi pémél nye, ngandak bôt i i bé ti nye lipém i bôdôl keñgle nye. Yak i bôt ba bé kadba le ba yé “mawanda mé” ba bi tômbôs nye ni bibuk gwap. Hala a bi tééñga nwaa wé ngandak kayéle a kal nye le: “Tiihe Nyambe, u wo!” (Hiôb 2:9; 15:​4, 5; 19:​1-3) I mam mabe ma, ma bé le ma tinde Hiôb i pééna le Yéhôva, bañga Nyambe, a nla sôñ bagwélél bé i ngéda ba mboma mandutu.

2-3. (a) I ngéda di nok ndutu, kii di nla bôdôl hoñol? (b) Kii kaat Hiôb i ga niiga bés?

² Ngim mangéda, yak bés di nla boma mandutu ma ma nla noode bés bañga bañga, ma hôlga bés i yi too di mbôdôl toi Yéhôva ñem. Di niñil i mangéda mabe, “ma bak ki nledek kiyaga.” (2 Timôtéô 3:1) I ngéda mandutu ma nkwél bés i nlélém ngéda, ma nla tômbôs bés, di kahal yak hoñol le d’a pamba bé. I mam ma, ma bi tinde bôt bahogi i badba too Yéhôva a ngi tôñôk bo.

³ Ibale yak we u ma nôgda hala, u tomb bañ. Hiôb a bi sôk nok le Yéhôva a ntjôô bé ba ba ntéñbe ni nye. Yak bés di nla nigil i bôdôl Tata wés nu ngii ñem bañga bañga. Inyu pam i boñ hala, kaat Hiôb i nla hôla bés. I nti bés manjom ima ma ma ntinde bés i bôdôl Yéhôva ñem hiki ngéda: Pog, Yéhôva nyen a yé Nwet ngiinda yosôna. Iba, a yé Nu ngui yosôna. Nyen a gwé mam i moo, yom i nkéñ bé nye i yônôs sômbôl yé, to i sôñ bagwélél bé.

SATAN A BI JÔP IPÔLA YAP

4. Kii i bi bôña i ngéda Yéhôva ni biañgel ba bi kodba?

⁴ Kel yada, “bon ba Nyambe” ba bi kodba i bisu bi Yéhôva i ngii. Bibel i nkal le: “Yak Satan a jôp ipôla yap.” (Hiôb 1:6) Hala a yé ngélé bisu le Bibel i gwélél i jôl lini le “Satan.” Bibel i nsébél nye hala inyule a yé “Nkolba” Nyambe nu bisu. Yéhôva a bi nwas ndik Satan le a ba mu boma i ndi ha ngéda i, a bi téñbe ha bé ni nye. A bi yila ñoo Yéhôva, a yila yak ñoo lihaa li Yéhôva nyoo ngii ni hana ’isi. Yéhôva a bi unda le Satan a bé ha bé i lihaa jé li ngii i ngéda a bi sima bibuk di nléba i kaat Bibôdle 3:15. Jon Satan a ta bé mu nsoñgi u biañgel bi bi yé mu lihaa li Yéhôva, bi Bibel i nsébél ki le “muda” nu a bé lama ti “mbôda.”

5. Kii boma nyoo ngii i niiga bés?

⁵ Yéhôva a nsômbôl le di yi i mam ma bi tagbe mu boma i, jon a bi boñ le ba tila mo ikété Bibel. Bibuk bi Satan bi bi tibil yaga unda le a gwé ñem mbe, a bak mut nsohi. (Hiôb 1:9; Béñge yak Masoola 12:10.) I boma i, i niiga bés yom ipe i i nhôgbaha bés: i ngéda Yéhôva a ngwélél ngui yé i mbuma ñañ, a mboñ hala ni telepsép. I niiga ki bés le Nu ngui yosôna nyen a ntééne bihégél gwé minwaa.

YÉHÔVA NYEN A TÉÉNE BIHÉGÉL GWÉ MINWAA

6. Mu boma i bi tagbe i ngii, lelaa Yéhôva a bi unda le a yé Nu ngui yosôna? (Hiôb 1:​7, 8)

⁶ Añ Hiôb 1:​7, 8. Yéhôva a bi unda le a yé Nu ngui yosôna, nyen a bé éga i boma i, a kidik kii i nlama bôña. A bi bat Satan le: “Baa u nyimbe ngwélél wem Hiôb?” A bé yi le Satan a nsômbôl boñ Hiôb béba, jon a bi bat nye hala. Di tehe lelaa Yéhôva a bi gwélél ngui yé ikeñi inyu hôla Hiôb.

7. Inoñnaga ni Hiôb 1:​10, 11, Kii Satan a bi kal inyu bagwélél ba Yéhôva?

⁷ Añ Hiôb 1:​10, 11. Yéhôva nyen a yé Nwet ngiinda yosôna ni Nu ngui yosôna, a gwé ngui i boñ kii yosôna a ngwés, a nyi yak kii i nlôôha ba loñge inyu hiki jam. (Yérémia 32:17; Daniel 4:35) To hala, Satan a bi kal le Yéhôva a mbep gwélél ngui yé. A kônde le Yéhôva a nti bôt ba binam gwom inyu lop bo le ndi ba gwélél nye, nlélém kiki a bi boñ ni Hiôb. Satan a bi kal ki le i bôt ba ngwélél Yéhôva ba ngwélél ndik nye inyu yéñe yap. Kii Yéhôva a bi boñ?

8-9. Mimbe minwaa Yéhôva a bi tééne Satan, inyuki? (Hiôb 1:12) (Béñge yak titii.)

⁸ Añ Hiôb 1:12. Yéhôva a bi ti Satan pôla le a unda le i yom a nkal i yé maliga, ndi a bi tééne nye minwaa. A bi tibil yaga béhe Satan le: “Ndi nyemede [Hiôb], u tihba bañ nye!” Yéhôva a bi tééne Satan minwaa i bisu bi biañgel gwobisôna bi bé mu boma i. Satan a bé bé le a boñ nya ipe, a bé bé le a lel minwaa Yéhôva a bi tééne nye. Yak i len ini, Satan a nla bé lel minwaa Yéhôva a ntééne nye. Jon Yéhôva a bi gwélél ngui yé inyu sôñ Hiôb ni i unda le a yé Nyambe nu gwéha ni nu a téé sép.

⁹ Manoodana ma Satan ma bisu ma bi wéha nye nyuu bañga bañga. Hiôb a bi ke ni bisu i bôdôl Tata wé nu ngii ñem. (Hiôb 1:22) Ndi Nkolba a bé ngi mal ni nye.

10. Inyuki Yéhôva a bi nwas le Satan a kônde noode Hiôb? (Hiôb 2:​2-6)

¹⁰ Añ Hiôb 2:​2-6. Lisañ lipe, Satan a bi noode ki Hiôb bañga bañga inyu boñ le a ndogbene Yéhôva. A bi kal le ibabé pééna, Hiôb a ga tiihe Djob inyu sôñ niñ yé. Inyu unda le Satan a mpot bitembee, Yéhôva a bi nwas nye le a témb a noode Hiôb. Ndi yak ha ki, Yéhôva a bi tééne Satan minwaa, a kal nye le: “U nol bañ nye!” Satan a bé bé le a boñ nya ipe, a bé bé le a lel minwaa ba bi tééne nye. Yak ha ki, di ntehe le Nu ngui yosôna le Yéhôva nyen a bééna mam i moo, a bi nwas bé le Satan a lel minwaa a bi tééne nye.

YÉHÔVA A BI MÉLÉS MANDUTU MA HIÔB

11. Kiki Yéhôva a bi mélés mandutu ma Hiôb, lelaa a bi sayap nye? (Hiôb 42:​10-13)

¹¹ Añ Hiôb 42:​10-13. Kiki Hiôb a bi unda le to kii i mbôña, a ga ti bé moo, Yéhôva a nwas ha bé le Satan a noode nye. Yéhôva nyemede nyen a bi yoñ makidik i mélés mandutu ma ngwélél wé. Yak ha ki, Nkolba a bééna bé ngui i kolba makidik ma Yéhôva, a bé bé to le a kéñ Yéhôva i sôñ Hiôb, to i sayap nye.

12. Ti hihéga hi hi ñunda lelaa mam ma nsôk i ngéda di mbôdôl Yéhôva ñem.

¹² Munu dilo di nsôk dini, Yéhôva a bi gwélél ngui yé inyu sôñ ngandak yé bagwélél. Kiki hihéga, i nwii 1945, bisônda bi Jaman bi bi nyégsa 230 Mbôgi Yéhôva i ke mbôñgô liké, li ba nsébél le liké li nyemb, ibôdôl i ndap mok i loñ Jaman letee ni i tuye, ndik inyu boñ le ba nol bo nyoo. Ndi i lôk kéé i yosôna i bi pei. I manoodana ma ngui ma, ma bi tinde bo i yoñ makidik ma ngui. Ba bi tila mo, ba kal le: “Manoodana ma ngui di bi boma, ma yé i mbus yés nano, ndi bés di bi tohlana kiki ba ba bi pei i juu li hié hikeñi; to numb, [di] numb bé hiida. . . . Ndi [di] yé nyonok ni ngui, ni lipémba li li nlôl ni Yéhôva.” Ba bi kônde le: “Kiki di mpei mu bee mbondo njéé i nya i yé hélha, ngôñ yés i yé ndik nano le di laa gwélél Yéhôva . . . i boga ni boga. Hala a ga ba bés bisai bi mbuma ñañ.”​—Béñge yak Daniel 3:27; 6:22.

13. Imbe botñem u nla bana i ngéda u mboma mandutu? (Béñge yak bititii.)

¹³ Yak bés ngim jam i nla pémél bés, di nôgda wengoñle di yé ikété bee mbondo njéé. (1 Pétrô 5:​8-10) Ngim mangéda, di yé le di lehel ñem, di kahal badba too mandutu més ma ga mal kel yada. Ha ngéda i, i yé loñge le di bigda ñañ u Hiôb. Di nla bôdôl Yéhôva ñem ni ñem wés wonsôna le a ga mélés mandutu més, a nla mélés mo nano tole i mbok yondo. Yéhôva a ntéé ngim ngéda inyu tjé nkoñ ’isi unu, a yé mbén i nwas le i ngéda i, i tagbe to linut jada!

YÉHÔVA A NGWÉS BAGWÉLÉL BÉ

14-15. Kii Yéhôva a nyéñ bôñôl bagwélél bé ba ba ntéñbe ni nye, inyuki? (Hiôb 14:15) (Béñge yak titii.)

¹⁴ Añ Hiôb 14:15. Tata wés nu ngii a ndiihe bagwélél bé ba ba téñbe ni nye. A nlôôha gwés bo kayéle ibale ba nwo, a nyamnda ni ngôñ i tugul bo. Ñ, Yéhôva a ga mélés njôghe di nok len i ngéda mut wés a nwo. I ngéda a ga tugul bôt, d’a hôya njôghe i, inyule ngand yon y’a ba yokel.​—Yésaya 65:17.

¹⁵ Hiôb a bé a ngi niñik munu nkoñ ’isi u Satan unu. Ndi Bibel i ñunda le Yéhôva a bi boñ le a témbna mbôô wé, a kôp ki nye bisai bi bi bé loo bi a bééna ndugi ilole Satan a noode nye. I bisai bi, bi bé ndik dinyo malép di mam Yéhôva a ga bôñôl nye i dilo di nlo. Yéhôva a bi unda le a ngwés le i bôt ba ntéñbe ni nye ba ba maséé kiyaga, ba nok ki mane ma niñ. Yéhôva a ga ti bobasôna pôla i niñ i boga ni boga i Paradis hana ’isi. (Masoola 21:​3, 4) Nwet ngiinda yosôna a gwé ngôñ i boñ hala. I yi hala i nhôgbaha bés ngandak i ngéda di mboma mandutu!

16. Imbe njom ipe di gwé i bôdôl Nwet ngiinda yosôna ñem?

¹⁶ Hiôb a bi niñ ntandaa ngéda ndi a bi sôk a wo. Ndi Yéhôva, Nwet ngiinda yosôna ni Nu ngui yosôna, a gwé ngui i tugul bawoga. (Ndiimba Mbén 32:39) Mut to wada a nla bé kéñ nye i tugul ba bobasôna a ngwés. A ga boñ hala i ntéak wé ngéda.​—Rôma 8:​38, 39.

BÔDÔL YÉHÔVA ÑEM NI ÑEM WOÑ WONSÔNA

17. Kii i ñunda le Satan a ga la bé tjé bagwélél ba Yéhôva kekikel?

¹⁷ Ñañ u Hiôb u nti bés manjom malam i bôdôl Yéhôva ñem. Di nti Yéhôva mayéga inyule a nwas bé Satan le a tjé litén jé! I len ini, didun di Mbôgi Yéhôva bôô di ntéñbe i gwélél Yéhôva, hala a ñunda le nyen a yé Nu ngui yosôna ni Nwet ngiinda yosôna. Di ma tehe ngandak ngélé le jôl gwét yo ki yo le ba ñôô inyu jôs i didun di bôt di, i ta i yémblak bé bo. (Yésaya 54:17) Mimpémba mi biane lôñ yada ni baéga bibase ba bi noode kéñ nson u bagwélél ba Yéhôva, ndi ba bi la bé inyule Yéhôva a yé ni bés. Ñ, yom yo ki yo i nla bé kéñ bés i añle bôt maliga inyu Yéhôva, ni i yis bôt le Satan a yé mut bitembee ni mut manola. To i bisu bi nyemb, d’a kon bé woñi i añle bôt maliga inyule to di nwo, Yéhôva a ga tugul nu ni nu a ntéñbe ni nye.​—Hôséa 13:14.

18. Inyuki di nkon bé dilo di nlo woñi?

¹⁸ Ñañ u Hiôb u yé toi maliga; i ngéda di ñôt pék mu, hala a nlédés hémle yés le Yéhôva a ga ba ni bés to kii i mpémél bés, di gwé bé le di kon woñi. I njiiha ikeñi, bagwélél ba Djob ba ga ba wengoñle ba gwé bé mut nu a nsôñ bo, Satan ni bôt bé ba ga ba wengoñle ba gwé ngui kiyaga. Ndi kiki i dilo di Hiôb, Yéhôva nyen a ga bana mam i moo, a ga nwas bé le Satan a tjé bagwélél bé. Ndék ngéda wee Yéhôva a mélés mandutu momasôna Satan a bi lona bôt ba binam. Ba ga leñ Satan ni mimbuu nwé mimbe i mok, i soñkum, inyu 1 000 nwii. (Lukas 8:31; Masoola 20:​1-3) Sôk i nsôk, Satan ni ba bobasôna ba ga nit nye ba ga tjiba. (Masoola 20:10) Kiki Yéhôva a bi kal, ño u Satan u ga nyagdana. Satan a ga tjiba ngélé yada inyu ngélé yosôna.​—Bibôdle 3:15; Rôma 16:20.

19. Bimbe bisai bi mbem i bet ba mbôdôl Yéhôva ñem ni ñem wap wonsôna (Béñge yak titii.)

¹⁹ Bés bagwélél ba Yéhôva di nyamnda ni ngôñ i ba peles, ni i niñ i boga ni boga. Di nla bé hégda ipam limbe likala niñ i ga ba ilam i mbok yondo. Yéhôva a nkal le: “Nuna-ki! Me mboñ mam momasôna yondo.” (Masoola 21:5) Kii hala a nkobla? I mbus dikôô di dikôô di nwii, bôt ba binam ba ga ba ha bé isi énél ibe i Satan ni mimbuu nwé mimbe. Di ga niñ ikété hogbe! Noode le hégda i jam lini: W’a yén ha bé péé juu inyu ngandak nduña! I bôt ba ga pei i Armagédôn ba ga tehe ngandak bihélha bi mam. Yéhôva a ga mélés makon i hisi hiosôna. Yak bôt bés, ba ba bi wo, ba ga tuglana. Ha ngéda i nyen di ga bana ntén niñ Tata wés nu ngii a bééna ngôñ le di bana ibôdôl i bibôdle!

20. Mambe makidik u nyoñ?

²⁰ Baa u yé i boma mandutu munu dilo di nsôk dini? Kee ni bisu i bôdôl Yéhôva ñem ni ñem woñ wonsôna, u nit ki kahap yé. Di unda le di ngwés Tata wés nu ngii, di unda ki le Satan a yé mut bitembee. Ñ, di kôli bem dilo di nlo ni makénd inyule di nyi le Tata wés nu ngii a nyamnda ni ngôñ i sayap bagwélél bé, ba ba ntéñbe ni nye, i nya i mbuma ñañ!