Hôlôs ‘likeñge joñ i niiga’ i likalô

1. Limbe likeñge di nlama hôlôs, inyuki? (2 Timôtéô 4:2) (Béñge yak titii.)

YÉSU a bi kal banigil bé le: “Ni yilha bôt banigil . . . , ni niigaga bo i nôgôl mam momasôna me bi ti bé oda le ni boñ.” (Matéô 28:​19, 20) I biniigana bi, bi ñunda le bikristen gwobisôna bi nlama niiga bôt bape. I maliga, Yéhôva nyen a ñôt bôt ba ba gwé “libak lilam,” yak biañgel bi nhôla bés i léba mintén mi bôt mi. (Minson mi baôma 13:48; Yôhanes 6:44; Masoola 14:6) Ndi to hala, yak bés di gwé yés ngaba mu. Di wan ndémbél ñôma Paul bo Barnabas ba bi yigle bés. Bibel i nkal le i ngéda ba bi jôp ikété ndap bibégés i Lôk Yuda i Ikônium, ‘ba bi pot i nya i yé le limut likeñi li Lôk Yuda ni li bôt ba Grikia li bi yila bahémle.’ (Minson mi baôma 14:1) Ibabé pééna, Paul bo Barnabas ba bi kônde lémés “likeñge jap i niiga.” (Añ 2 Timôtéô 4:2.) Hala a yé loñge le bikristen gwobisôna bi boñ nlélém.

2. Inyuki bikristen bihogi bi nhoñol le bi nla bé yi niiga?

² Bôt bahogi ba nhoñol le ba nla bé yi niiga inyule ba bi ke bé haa i suklu tole ba gwé bé ngap i tôbôtôbô. Yak ngim bôt Bibel i mpôdôl i bé hoñol hala. (Manyodi 4:10; Yérémia 1:6) Bape ba nhoñol le ba nyi bé niiga inyule ba ntehe bé nson wap u num matam malam kiki ini lôk kéé ipe. I yé maliga le bôt bobasôna bé bon ba ga emble ñañ nlam. To u niiga loñge lelaa, bôt bobasôna bé bon ba ga emble we. Kiki di mbôk di kal, Yéhôva ni biañgel bon ba mboñ le di tehe bôt ba ba gwé “libak lilam.” Ndi to hala, di nyéñ boñ kii yosôna di nla inyu tihba miñem nwap. Inyu hôla bés i boñ hala, i yigil ini i ga pôdôl manjel maa di nla gwélél inyu kônde lémés likeñge jés i niiga i likalô.

TÔÑ BÔT

3. Inyuki Yésu a bé la tihba miñem mi bôt?

³ Bibel i nkal le Yésu “a bé yi yom i bé ikété ñem u hiki mut.” (Yôhanes 2:25) I nlôñ u, u ñunda le Yésu a bé yi kii bôt ba bé hoñol, ni kii i bé tinde bo i boñ mam. Yésu a bé la tihba miñem mi bôt inyule a bé yi kii i bé kon bo ngôñ. A bé tehe le bôt ba bé je bé loñge i pes mbuu. Baéga base ba bé gwélél bilem bi loñ ni ngandak bikila inyu tét bo. (Matéô 9:36; 23:4) Yésu a bi pot i mam ma mu nkwel wé i ngii hikôa. Ngandak bôt i bé bebee i noñ Yésu inyule a bé pot toi mam ma bé béñge bo.

4. Lelaa di ñunda le di ntôñ bôt? (Béñge yak bititii.)

⁴ Di ñunda le di ntôñ bôt di mboma i likalô i ngéda di noode nok i mam ma ntééñga bo. I nkoñ ’isi u Satan unu won u mboñ le hiki mut di ntééne likalô a nok ndutu. Ibale di nhôya bé i jam li, hala a ga bane bés jam li ntomb i hôla bo. Kiki hihéga, baa ngim jam i ntip tagbe i libôga, i i ntééñga ngandak bôt? Baa bagwal ba ntôñ le ngim jam i nla pémél bon bap i suklu? Baa i yé ndutu i léba bôlô? Noode hégda lelaa bôt ba yé le ba nok ndutu munu ‘mangéda mabe’ mana, ba yik bé to mimbônga minlam Bibel i nti.​—2 Timôtéô 3:1; Yésaya 65:​13, 14.

5. Inyuki Yésu a bé maselna ni Farisai? (Matéô 11:​28-30)

⁵ Yésu a bé tôñ bôt, bôt ba nôgdaga hala inyule ba bé tehe maboñok mé. A bé maselna ngandak ni Farisai i i bé yan bôt, i tédék bo! (Matéô 23:13; Yôhanes 7:49) Yésu nye a bé unda bôt loñgeñem, a tinak bo lipém. A bé a gwé “ñem nwee ni suhulnyuu,” inyu hala nyen a bé loñge nniiga. (Añ Matéô 11:​28-30.) Yak bés di nlama unda bôt loñgeñem, di tinak bo lipém.

6. To ibale bôt ba ntjél emble bés, ba kolbaga bés, lelaa di nla unda bo loñgeñem, di tinak bo lipém?

⁶ Bôt bahogi ba ntjél emble bés tole ba nkolba bés. Kii ni di nlama boñ? Yésu a bi niiga ndik bé bés le di unbene bañ i bet ba nkolba bés. Ndi a bi kal yak le di ‘bôñôl ba ba ñoo bés loñge, di sayap ba ba ntiihe bés, di soohene ki ba ba nsol bés.’ (Lukas 6:​27, 28) I ga ba bés jam li ntomb i boñ hala ibale di mbigda le yak i bôt ba ntjél emble bés, ba nlama bana ngim manjom i i ntinde bo i boñ hala. I yé maliga le bahogi ba nkolba yaga bés bañga bañga, ndi bape ba yé ba boñ hala inyule ba mboma ngim mandutu mu lihaa jap, tole ba mboma mandutu mape ma ma gwé bé maada mo ki mo ni bés. I nla ki ba le di nlo i béba ngéda. To i ba laa, di waa bañ nôgôl i maéba mana le “bibuk [gwés] bi ba bilam ngéda yosôna, nnéhak ni bas, le ndi [di] yi lelaa [di] nlama timbhe hiki mut.” (Kôlôsé 4:6) Ibale di nkônôl bôt ngoo, di noodege nok bo, di ga pala bé unup, hala a ga hôla yak bés i ba bôt ba nyi niiga.

GWÉLÉL BAÑGA I NYAMBE

7. Kii Yésu a bé gwélél i ngéda a bé niiga? (Yôhanes 7:​14-16)

⁷ Yésu a bé gwélél bé yi yé yomede inyu niiga bôt. Ndi a bé gwélél Bañga i Nyambe, a toñlak yo i nya i ntomb, kayéle bôt ba bé la tééda ni bigda i mam a bé kal. Bibel i nkal le Yésu a bé niiga “kiki mut nu a gwé lipémba li Nyambe, ha kiki bayimbén bé.” Likeñge jé i niiga li bé hélés bôt kiyaga. (Markô 1:22; béñge note d’étude ini le “contrairement aux scribes.”) Bayimbén ba ngéda Yésu ba bé sima balét bakeñi i ngéda ba bé niiga, ndi Yésu nye a bé sima Bitilna bipubi. Kiki a bé Man Djob nu a bi niñ i ngii, a bé le a gwélél yi yé ikeñi inyu hélés bôt ni unda bo le ba nyi bé to yom. Ndi a bi boñ bé hala. Hiki ngéda a bé niiga bôt, a bé gwélél Bañga i Nyambe. (Añ Yôhanes 7:​14-16.) Yésu a bi yigle banigil bé ndémbél ilam kiyaga.

8. Lelaa Pétrô a bi nigle Yésu?

⁸ Yak banigil ba Yésu ba bé gwélél Bañga i Nyambe i ngéda ba bé niiga. Kiki hihéga, di wan nkwel Pétrô a bi ti i kel Pentékôt, i nwii 33 N.Y. Pétrô a bi boñ bé bisuklu bikeñi, ndi a bi tihba miñem mi bôt i ngéda a bi gwélél Bitilna inyu toñol mbañ Yésu a bi yônôs. (Minson mi baôma 2:​14-37) Mam ma bi sôk lelaa? “I bôt ba bi leege bañga yé ni maséé ba bi kôhna sôble, 3 000 di bôt di kôndba i kel i.”​—Minson mi baôma 2:41.

9. Inyuki di nlama gwélél Bañga i Nyambe i ngéda di niiga?

⁹ Yom ipe i nla bé tihba miñem mi bôt kiki Bibel. (Lôk Héber 4:12) Jon, yak bés di nlama gwélél yo i ngéda di niiga. Di gwé ngôñ i ‘añle bôt Bañga i Nyambe,’ he mahoñol més bé. (2 Timôtéô 4:2) Bingéngén 2:6 a nkal le: “Yéhôva nyen a nti pék; yi lôñni liyi bagal mam bi nlôl i nyo wé.” Inyu hala nyen i ngéda di ngwélél Bitilna inyu niiga, di nwas le Yéhôva nyemede nyen a pot. (Malaki 2:7) Di ngwés le bôt ba yi le i pék i yé ikété Bibel i nloo i bôt ba binam huum. Bibel i nlôl ni Nyambe, i nkal ki bés kii di nlama boñ inyu lémél Nhek wés ni i bana niñ i maséé.​—2 Timôtéô 3:​16, 17.

10. Kii di nla boñ inyu hôla nnigil Bibel i nok le i mam a nigil ma nlôl i Bañga i Nyambe?

¹⁰ I ngéda u nkôôba yigil Bibel, ôt pék inyu yi lelaa u ga unda nnigil i yom Bibel i niiga. Hôla nye i nok le to ibale bititii ni bividéô bi nlémés yigil, Bibel yon di nigil. Jon, añ balôm ba bipes bi Bibel ni nye, u hôla ki nye i ôt pék mu. I ngéda u ngwélél titii tole vidéô, hôla nye i tibil nok matiñ ma Bibel ba mpôdôl mu. U gwé bé le u pot ngandak, u gwé bé to le u añ ngandak minlôñ mi Bibel inyu hôla nye. Ndi ti nye ngéda i tibil nok hiki nlôñ Bibel ni ñañ, u nla yak tiimba añ nlôñ Bibel ni nye inyu boñ le a tibil nok wo. Ibale u mboñ hala, u ga hôla nye i nok le yigil kaat bé yon ni ntégbaha, to yigil bititii, to yigil bividéô; ndi a ga nok le u yé i unda nye i yom Bibel i niiga.​—1 Korintô 2:13.

11-12. (a) Lelaa di nla unda wongut i ngéda di niiga bôt? (Minson mi baôma 17:​1-4) (Béñge yak titii.) (b) Kii bôt bahogi ba nyi bé inyu Bibel, lelaa di nla hôla bo?

¹¹ Ibale nnigil Bibel a ntehe hala ndutu i neebe ngim biniigana, kee ni bisu i “añal bañga . . . ni wongut yosôna.” Bôt bobasôna bé bon ba mpala hol. I mbéda ngandak ngéda inyu banigil bahogi i neebe maliga bés di mal meya. U hôya bañ le Lôk Yuda i Tésalônika i bé hoo bé nok i mam Paul a bé niiga bo. To hala, Paul a bi waa bé tééne bo likalô, a toñlege bo Bitilna inyu hôla bo i hek pék. I mbus nyen bahogi ikété yap ba bi bôdôl tibil nok i mam a bé kal bo.​—Añ Minson mi baôma 17:​1-4.

¹² Di ñunda ki wongut i ngéda di mbat nnigil Bibel mambadga inyu pémés mahoñol mé, di nwahak le nyen a podok ngandak iloo bés. Boñ biliya i emble nye loñge loñge inyu nok i yom a nhoñol. I mbus, inyu hôla nye i nok mahoñol ma Yéhôva, tibil pohol ngim minlôñ mi Bibel u ga añ, u kwélél ki mu ni nye. U hôiga bañ le bôt bahogi ba ñañak bé Bibel i niñ yap, ba nyi bé to i yom i nkal. Inyu hôla nye, ti nye Bibel. U nla gwélél i homa nunu le “Majubul ma Bañga i Nyambe,” nu a yé i bibôdle bi Ngobol mbok yondo, inyu unda nye ngandak mam Bibel i mpôdôl, ma ma ñunda lelaa Bibel i yéne bés nseñ i len ini. U nla yak unda nye mbadga 15 inyu toñle nye lelaa Bibel i nla hôla bés i ba maséé len, éñél nye nlôñ Bibel wada tole ima, ni kwélél ki mu. I sem kwep, ibale u mpam i unda nnigil Bibel ipam limbe likala Bibel i yé nseñ, u ga la tihba ñem wé, a ga ba ki maséé i boñ mam a nigil.

BOÑ LE YÉHÔVA NYEN A KÔHNA LIPÉM

13. I ngéda di niiga, njee a nlama kôhna lipém? Ti hihéga.

¹³ Njômbi yés i yé le di hôla i bôt ba ñemble bés i yi Yéhôva ni i kôôge nye bebee. (Yakôbô 4:8) Di nla kal le nson wés u yé kiki mut nu a yé i unda mut numpe lambe ikété jiibe. A ngwélél lambe inyu unda nye njel, ndi he inyu unda nyemede bé. Hala nyen yak bés di nlama boñ i ngéda di niiga, di boñ le Yéhôva nyen a kôhna lipém, he bés bé.

14. Lelaa di nla hôla banigil Bibel i bana ngôñ i lémél Yéhôva?

¹⁴ I ngéda u ntégbaha yigil, hôla nnigil woñ i bana ngôñ i lémél Yéhôva. (Bingéngén 27:11) U kal ndik bañ nye le a boñ loñge, a keñgle béba. Ndi unda nye le i yom i yé nseñ i yé le a héñha maboñok mé inyu boñ le a lémél Yéhôva. Kiki hihéga, ibale nnigil a ntehe le i yé ndutu i tjôô ngim lem ibe, bat nye mambadga kiki bo: “Inyuki Yéhôva a ñoo i lem ibe ini? Inyuki Yéhôva a ngwés le u tjôô ngim jam i nlémél we? Inyuki hala a ñunda le Yéhôva a ngwés we?” Kiki w’a ke ni bisu i tinde nnigil Bibel i hoñol Yéhôva, hala nyen a ga tehe Yéhôva kiki loñge Tata kiyaga. Hala a ga ti nye ngôñ i lémél Nyambe wé.

KEE NI BISU I LÉMÉS LIKEÑGE JOÑ I NIIGA

15. Kii u nla boñ inyu kônde lémés likeñge joñ i niiga?

¹⁵ U nla soohe Yéhôva le a hôla we i wanba inyu yi kii u nla boñ le ndi u kônde lémés likeñge joñ i niiga. (1 Yôhanes 5:14) Inyu boñ le maboñok moñ ma kiha ni masoohe moñ, u nlama ôt nseñ ni bitelbene Yéhôva a nyoñ i makoda inyu niiga bés. I ngéda u nke i tégbaha yigil Bibel, u nla kal nhôôlak kristen le u kee ni we. I mbus, bat nye kii u nla kônde lémés. U hôya bañ le we u ntibil yi i yigil u nke i tégbaha, ndi nnigil Bibel nye a nyi bé yo loñge. Jon, badba kii a nla hoñol inyu ngim mam u ga niiga nye. I ngéda u mba u nigil ni nye, unda nye lelaa i mam a nigil ma yéne nye nseñ, u nla yak pôdôl nye mam malam Yéhôva a mbôn bés. Hala a nla tinde nye i ba liwanda li Yéhôva, a bana ki niñ i maséé.​—Tjémbi 1:​1-3.

16. Bimbe bisai di ga kôs ibale di nke ni bisu i lémés likeñge jés i niiga?

¹⁶ I ngéda di nhôla bôt bape i yi Yéhôva, di yé di ba maséé kiyaga. Di ga kônde ki ba maséé i mbok yondo i ngéda di ga hôla ngandak bôt ipe i yi Yéhôva. Jon di kee ni bisu i tôñ bôt, i gwélél Bañga i Nyambe ni i ti Yéhôva lipém i ngéda di ñañal ñañ nlam. Ibale di mboñ hala, di ga kônde lémés likeñge jés i niiga i likalô.