Bon ba yé “ngababum i nlôl yak Yéhôva”

KII i nlo we i mahoñol i ngéda u nok i buk ini le “ngababum”? U yé le u hoñol moni, disi tole yom ipe i i nlôôha ba mahee mut woñ lihaa, nu a ngwés we ngandak, a nti we. To i ba lelaa, ngababum i yé yom i nlôôha ba mahee, wemede u nyi le u nlama diihe yo ngandak.

Bibel i nkal le “bon ba yé ngababum i nlôl yak Yéhôva.” (Tjémbi 127:3) Ibabé pééna, yak bagwal ba ntehe bon bap kiki likébla li nlôl yak Yéhôva, jon ba mboñ kii yosôna ba nla inyu tééda bo i pes minsôn, i pes mahoñol, ni i pes mbuu.

Ndi ngoo le i len ini, bagwal bahogi ba ntehe bé bon bap kiki likébla li li nlôl yak Nyambe. (Yésaya 49:15; 2 Timôtéô 3:​1-3) Bape ba gwé yaga ngôñ i tééda bon bap, ndi ba mboma ngandak mandutu. Ndi mambe mandutu bagwal ba mboma ni? Kii Yéhôva a mbémél bo? Lelaa ba yé le ba néñés bon bap loñge?

MANDUTU

• Bôt ba libôk ni lihaa. Ngim bahoma, i ngéda bagwal ba gwé ngandak bon, bôt ba nti bo lipém ngandak. Lihaa tole bôt ba libôk ba nla nyégsa babiina i bana ngandak bon, ki le bebek ba nla bé to tééda i bon ba bobasôna.

• Woñi inyu dilo di nlo. I biloñ bihogi, boñge ba nwo ngandak inyule ba nje bé loñge, ba nkon ngandak, tole inyule madokta ma ta bé. Inyu hala nyen babiina bahogi ba ngwal ngandak bon inyu ba nkwoog nkaa le to ndék mu i ga la pei. Bape ba ngwal ngandak bon inyule ba nhoñol le ba ga tééda bo i ngéda ba ga un. Hala a mbéna bôña i biloñ i het ngomin a nlôl bé mimañ mi bôt i mahôla.

• I téé gwal. I bahoma bape, i nla ba ndutu inyu babiina bahogi i léba bee bi bi mboñ bo le ba téé gwal. Bape ba nla hoñol le i bee bi, bi yé le bi kônôs bo inyule ba nyo gwo hiki kel. Bape ki ba nla bé somb i bee bi inyule bi nhee diye ngandak.a

KII YÉHÔVA A MBÉMÉL BAGWAL?

Ni tééda bon banan i pes minsôn. Yéhôva a nti bagwal mbegee le ba tééda bon bap i pes minsôn. A mbem le bagwal ba ba bebee i sal ni ngui inyu ti bon bap bobasôna bijek, mambot ni homa liyééne. Yéhôva a mbem ki le bagwal ba niiga bon bap, ba ha ki bo i suklu. Inyu hala nyen bagwal bomede bon ba nlama néñés bon bap, ba ep bañ bo i ke i yééne haa ni bo. Ba nlama yak tégbaha ngéda ni hiki man wap inyu unda le ba ngwés bo, ba ntat bo, ba nsôñ ki bo. Ndi Yéhôva a nok bés ngandak, a mbem bé le bagwal ba ba ngwañ. Kiki hihéga, inyu néñés Man wé nugwéha, Yéhôva a bi pohol bagwal ba ba bé sal ngandak tolakii ba bé yep.​—Matéô 13:​55, 56; Lukas 2:24.

Litiñ li Bibel: “Ni maliga, ibale mut a ntééda bé bôt bé loñge, téntén bôt ba ndap yé lihaa, wee a ntañba hémle, a yé ki béba iloo mut nu a nhémle bé.”​—1 Timôtéô 5:8.

Yéhôva a nyi loñge loñge le bagwal ba gwé ngôñ ni mahôla i ngéda ba ñun. Njel yada bon ba yé le ba gwélél inyu unda le ba nti bagwal bap lipém i yé le ba tééda bo. (Manyodi 20:12; 1 Timôtéô 5:4) Ndi Yéhôva a ngwés le bagwal bon ba tééda bon bap, he bé le bon bon ba tééda bagwal bap.​—2 Korintô 12:14.

Tééda bon boñ i pes mbuu. Bagwal ba gwé ki mbegee i niiga bon bap i gwés Yéhôva ni i bégés nye. Inyu Yéhôva, i nlôôha ba nseñ le bagwal ba niiga bon bap i pes mbuu.​—Ndiimba Mbén 6:​6, 7.

Litiñ li Bibel: “Kena ni bisu i néñés bo ikété biniigana ni mabéhna ma Yéhôva.”​—Éfésô 6:4.

YÉHÔVA A NGWÉS LE NI NÉÑÉS BON BANAN LOÑGE

Ni hek pék. Ibale ni gwé ngôñ i bana bon, tiblana ôt pék. Kii ’héga, baa ni gwé moni mi mbéda inyu ti bo bijek, mambot? Tole baa ni ga bana ngéda inyu niiga bobasôna? Ibale ni nla bé, ni kwélél mu, ni tehe bon bañen ni yé le ni bana. Ni hôiga bañ le Yéhôva a mbem le ni yoñ ngéda i niiga hiki man nan. Yéhôva a nyi le ni nla bé boñ hiki jam ni gwé ngôñ inyule yak mimpuhge mi mam mi nla pémél hiki wada wés. (Ñañal 9:11) Ndi a ga sayap biliya gwobisôna ni mboñ inyu ba mintén mi bagwal a gwé ngôñ le ni ba.

Matiñ ma Bibel: “Bipék bi mut bôlô bi ga yon, ndi i bôt bobasôna ba mpabla i boñ mam, ba ga sôk ikété liyep.”​—Bingéngén 21:5.

“Njee ikété nan, ibale a nsômbôl oñ nkum ndap, a mbôk ndugi bé a yén ’isi, a ôt nsoñgi inyu tehe too a gwé gwom bi kôli inyu mélés wo?”​—Lukas 14:28.

Ni bii Yéhôva i bisu. Ni ba nkwoog nkaa le lihaa linan li mbii toi Yéhôva i bisu. Ibale ni gwé bon, yoña ngéda i niiga hiki wada wap i gwés Yéhôva. Hôlnana bo i tibil emble makoda. Kena ni bisu i tégbaha bibégés bi ndap lihaa. Ni kena bo i likalô hiki ngéda inyu uñgus bo. Yina le bé bon ni nlama néñés bon banan, ni ti bañ bo man nan nu mañ, bôt ba lihaa, tole mut numpe nye ki nye le nyen a néñés bo. Hala a mbat ngandak ngéda ni ngandak bôlô inyu hôla bon banan i gwés Yéhôva, ndi bisai u bat bé!

Litiñ li Bibel: “Me gwé bé maséé mape ma ma nloo mana le: me nok le bon bem ba ntéñbe i kil ikété maliga.”​—3 Yôhanes 4.b

Ni bôdôl Yéhôva ñem. Ibale ni nsômbôl bana bon tole ibale ni gwé bon, yina le matiñ ma Yéhôva mon ma nlôôha ba nseñ iloo bilem bi mbok tole bilem bi loñ.

Ibale ni nkit le ni mbana bé ngandak bon, ni ba nkwoog nkaa le Yéhôva a ga tééda bé i ngéda ni ga un. Ni nlama bé tehe bon bana kiki “bon ba retraite.” Ni kon bañ woñi le ni ga ba bébotama. Yéhôva a mbôn le a ga tééda bé. I ngéda a mbôn jam, a nyônôs ndik jo.​—Yôsua 23:14.

Matiñ ma Bibel: “Bôdôl Yéhôva ñem ni ñem woñ wonsôna, u nigbene bañ yi yoñ wemede. Yéñ mahoñol mé ikété mam momasôna u mboñ, a ga boñ le mam ma kee loñge i niñ yoñ.”​—Bingéngén 3:​5, 6.

“Me bé mañge, nano me ñun, ndi me maa bé tehe Nyambe a ntjôô mut a téé sép, to tehe bon bé ba nyagal bijek.”​—Tjémbi 37:25.

“Jon kena ni bisu i yéñ ndugi Ane lôñni telepsép i Nyambe, ndi yak mana mam mape momasôna m’a kôndba bé.”​—Matéô 6:33.

Bon ba yé tik makébla Yéhôva a bi ti bagwal. Yéhôva a yé maséé kiyaga i ngéda bagwal ba nyoñ ndun ni bon bap kiki nyemede Yéhôva a ngwés! Ba nlama yoñ ndun ni bon bap i pes minsôn, i pes mahoñol, ni i pes mbuu. Ba yoñ makidik inyu yi bon bañen ba ga gwal, ba noñ yak matiñ ma Yéhôva iloo bilem bi mbok tole bilem bi loñ. I ngéda ba mboñ hala, ba ñunda le ba ndiihe bon bap kiki likébla, hala wee “ngababum i i nlôl ni Yéhôva.”