Baa u yé nkôôbaga inyu mandutu u nla boma i mbus sôble?

1-2. Mambe mam di yé le di boñ inyu ba nkôôbaga ibale di mboma mandutu i mbus sôble yés? Ti hihéga.

I NKOÑ ’ISI u Satan, di nyi le di ga boma mandutu. Yésu a bi béhe banigil bé le: “Ngandak mam y’a ba ndigi i i ga boñ le bôt ba baage.” (Matéô 18:7) Ni mabéhna ma i mahoñol, di nlama bôñha inyu yémbél i mandutu ma. Ikété mandutu ma, di nla sima ngimanôgla ipôla lôk kéé.

² Di yoñ le hihéga: Ntôñ u Yéhôva u mbéna kal bés le di kôôba inyu bikuu bi nla kwél bés. Lelaa di nla pam i boñ hala? Jam li bisu li yé le, di nlama yéñ yi bimbe bikuu bi nla kwo mu nkoñ wés, hala a nlôôha ba nseñ ibale di ntip bol mu libôga li. I ngéda di mal yi i bikuu bi, di nlama bôñha inyu yi kii di nlama boñ inyu hiki kuu. (Bingéngén 21:5) Nlélém ni bés, i yé loñge le di yi mambe mandutu di nla boma i mbus sôble yés, hala a nhôla bés i kôôba nano inyu boñ le di yémbél mo i ngéda ma ga lo. Ibale di mboñ hala, i mandutu ma, ma ga lôôha bé pôgôs bés, ma ga ôbôs bé to maada més ni Yéhôva. (Tjémbi 17:5) Nano, di béñge mandutu maa di nla boma, ni lelaa di nla kôôba inyu boñ le di yémbél hiki ndutu mu.a

MANKÉÉ A MBOÑ WE JAM LI LI NLÉMÉL BÉ WE

3. Imbe ndutu u nla boma ikété likoda?

³ Baa u ngi bigdaga i kel bisu u bi ke i likoda li Mbôgi Yéhôva, u tehe gwéha i i yé ipôla yap? Kii u bi nôgda? Baa u bé nkwoog nkaa le u nléba maliga? (Yôhanes 13:35; Kôlôsé 3:12) I jam li jon Blancab a bi nôgda. Ndi ngim jam i bi tééñga nye i mbus sôble yé. A nkal le: “Sita yada i bi boñ me jam libe kiyaga. Me bi yimbe yak le a yé muda hilégé. Me bé bem bé i nya jam i, ba bi niiga me le Mbôgi Yéhôva i mboñ biliya i ba bôt ba nsañ ni bôt ba ba ngwéhna.” I yé maliga le lôk kéé i mboñ biliya i lémés libak jap li bikristen, ndi ba ta bé peles. (Éfésô 4:​23, 24; 1 Yôhanes 1:8) Jon i nla pam le wada wap a boñ ngim jam tole a kal ngim jam i i nla mbabaa we. (Yakôbô 3:8) Ngoo le i nya mandutu i, i ma boñ le lôk kéé ihogi i waa gwélél Yéhôva.

4. Kii i nla hôla we i ba nkôôbaga ibale yani, mankéé a ñunbaha we? (Éfésô 4:32)

⁴ Kii u nla ni bôdôl boñ nano inyu kôôba ibale yani, manyuñ a mboñ we ngim jam i i mbabaa we? Bana lem i nôgôl maéba ma ma yé i kaat Éfésô 4:32. (Añ.) Ibale u mboñ kii yosôna u nla inyu éba bôt bape loñgeñem ni ñem ngôô, u ga keñgle ngandak mindañ. Bana lem i nwéhél bôt bape ni ñem woñ wonsôna i ngéda ba mbabaa we. Kii i nla hôla we i boñ hala? Hoñol ngélé yañen u ma bat Yéhôva le a nwéhél we, ndi yak nye a nwéhél we. (Matéô 6:12) I ngéda u nhoñol ipam limbe likala Yéhôva a nwéhél we, hala a ga ba jam li ntomb i nwéhél bôt bape.

5. Limbe litiñ li Bibel li nla hôla we i ngéda mut a mbabaa we? (Bingéngén 19:11) (Béñge yak bititii.)

⁵ Añ Bingéngén 19:11. Bibel i nkal le i ngéda di nyi wan mam,c di noodege nok bôt bape, hala a ga hôla bés i hônba bo i ngéda ba mbabaa bés. I litiñ li jon li bi hôla Rima, nu a yé nsôblege, hala a yé ndék nwii nano. A nkal le: “I ngéda lôk kéé i mboñ ngim jam i i mbabaa me, me mpala bigda Bingéngén 19:11. I mbus, me ôt pék mu mam ba bi boma i niñ yap, me noode yak nok inyuki ba mboñ hala. Me nke ki i likalô ni bo. I ngéda me mboñ hala, hala a nhôla me i kônde yi bo.” Kinje maéba malam! Nano nyen u nlama tibil yi lôk kéé yoñ i bôlôm ni i bôda. Ibale u nigil i yi bo, u ga nok bo loñge loñge, hala a ga ba ki jam li ntomb i nwéhél bo ibale ba mbabaa we.

6. Kii i nla hôla we i ba liwanda ni lôk kéé i likoda joñ?

⁶ Limbe jam u nla boñ inyu bana maada malam ni lôk kéé i likoda? Mu kiki u nigil i yi lôk kéé yoñ i bôlôm ni i bôda, soho bok mis moñ mu bilem gwap bilam. (Béñge yak Bingéngén 10:12; Rôma 12:10; Filipi 2:​2, 3) I jam li jon mankéé Mark, nu a bi tip sôblana, a bi boñ. Yimbe kii i bi hôla nye. I ngéda a bi bôdôl tégbaha ngandak ngéda ni lôk kéé, a bi bôdôl tehe bibomb gwap. Kii i bi hôla nye le i bibomb bi, bi lôôha bañ tééñga nye? A nkal le: “Me bi sôk nok le, me bé lôôha bok mis mu disii di dihôha ba bé boñ. I ngéda me bé me hégha dihôha di, ni i mam i bôt ba ngwélél bé Yéhôva ba mboñ, me bi pam i nok le me nlama bé bok mis mu dihôha di lôk kéé, ndi me nlama béñge bilem gwap bilam.” Ibale yak we u mboñ hala, w’a bana maada malam ni lôk kéé i likoda joñ.

U MBÔDÔL TAM I MAM U BI YÉK I MBUS

7. Kii i nla boñ le di kahal tam i mam di bi yék i mbus?

⁷ I ngéda u bi yi maliga, u bé maséé ngandak le u ntohla nkoñ ’isi u Satan. U bé le u badba le: ‘Baa mut a nla tam i mam a nyék munu nkoñ ’isi unu?’ Ndi i ngéda mandutu ma nai, u nla kahal hoñol ngim mam u bi tjôô i ngéda u bi bôdôl gwélél Yéhôva, ñem woñ u témb mu. (Béñge yak Ñañga bôt 11:​4-6.) Kiki hihéga, lôk kéé ihogi i bi tjôô bôlô i i bé ti bo ngandak moni, ndi i yoñok bo ngéda ngandak. Bape, i ngéda ba bi bôdôl nigil Bibel, mawanda map ma ñem nyuu ma bi kôm bo mbus. Bape ki ba bi tjôô ngim lem ibe, i i bé lémél bo. Kinje ngoo ibale kristen i nwas le i gwom a bi yék bi tinde nye i ke haa ni Yéhôva! Kii u nla bôdôl boñ nano le ndi yani, to ibale mandutu ma nai lelaa, u témb ha bañ mu gwom u bi yék?

8. Kii ndémbél i Abraham bo Sara i niiga bés?

⁸ Ikété Bibel, di gwé dihéga di bagwélél ba Yéhôva ba ba bé le ba bôdôl tam i mam ba bi yék i mbus. Kiki hihéga, Abraham bo Sara ba bi nôgôl Yéhôva, ba yék loñge tison le Ur, ba ke i yééne i mandap ma mabadô. (Lôk Héber 11:​8, 9) Ni maliga, ba bé le ba bôdôl hoñol niñ ilam ba bééna i Ur, ndi “ibale ba kida i hoñol” tole ba héléé i bigda niñ ilam ba bi yék, hala a bé le a tinde bo i témb ni mbus. Ndi ba bi bok mis mu mam ma bé bo i bisu.​—Lôk Héber 11:​15, 16.

9. Lelaa ñôma Paul a bé tehe i mam a bi yék i mbus? (Filipi 3:​7, 8, 13)

⁹ Ñôma Paul a bi tjôô ngandak mam inyu gwélél Yéhôva. Ilole a nyila kristen, a bi nigil mbén i Lôk Yuda yak malét nkeñi le Gamaliel. (Minson mi baôma 22:3) I suklu i, i bé le i ti Paul pôla i yila mut nkeñi ikété base i Lôk Yuda. (Galatia 1:​13, 14) Ndi i ngéda a bi neebe ñañ nlam, a bi yék i mam ma momasôna i mbus. Baa a bi boma bé ndutu yo ki yo i ngéda a bi yila kristen? A bi boma ngandak mandutu. Ba bi bép nye, ba ha nye i mok, litén jé jomede li oo nye. (2 Korintô 11:​23-26) Ibale a kida i béñge lelaa niñ yé i bé ilole a nyila kristen, ki a bi hoñol le a nimis ngandak mam. Ndi Paul a bi bok mis mé mu nsima nkeñi a bééna i gwélél Kristô ni mu bom ikeñi i bé bem nye. Paul a bé nkwoog nkaa le i bisai bi, bi nloo bisesema gwobisôna a bi boñ huum.​—Añ Filipi 3:​7, 8, 13.

10. Kii di nlama hoñol hiki ngéda? (Markô 10:​29, 30) (Béñge yak bititii.)

¹⁰ Bimbe biniigana di nla ôt? Ibale u mbôdôl hoñol i mam u bi tjôô inyu yila kristen, hoñol yak inyuki u bi tjôô mo. (Ñañal 7:10) Hégha mam u bi tjôô ni bisai u gwé nano ibôdôl kii u nyi maliga. U gwé maada ma bas bas ni Nwet ngiinda yosôna. (Bingéngén 3:32) U gwé lihaa likeñi li lôk kéé ni nkoñ ’isi wonsôna li li ngwés we kiyaga. (Añ Markô 10:​29, 30.) Yéhôva a mbôn ki we ngandak mam malam i dilo di nlo! (Yésaya 65:​21-23) Ibale u gwé lem i hoñol bisai u nkôs mu kii u ngwélél Yéhôva, w’a tam bé mam u bi yék i mbus.

11. Kii ndémbél i Rosemary i niiga we?

¹¹ Sita Rosemary a bi sôblana i ngéda a bééna yom kiki bo 50 ma nwii. A nkal le: “I bibôdle, hala a bé tééñga me le me nla ha bé tégbaha ngand Kristak, inyule i bé ti me pôla i tégbaha loñge ngéda ni lihaa jem. Me bé gwés me nti bôt bem ba lihaa makébla. Hala a bé lémél me ngandak i tehe boñge isi e i Kristak, ba bak maséé i yibil makébla me bé biine bo.” Ndi kii i bi hôla Rosemary le a béñge ha bañ i mam a bi yék i mbus? A nkal le: “Me bi yéñ manjel mape inyu tégbaha mangéda malam ni lihaa jem. Hiki nwii, me bé me pohol to himbe hilo inyu kodba ni lihaa jem, me tinak bo makébla, me kalak bo inyuki me ngwés bo.” Rosemary a bi bana ki ndutu ipe. A nkal le: “I ngéda me bi yi maliga, mawanda mem ma bi tjôô me. Ngim mangéda, ba bé yiñba me, me nôgdaga binyuu.”d Kii i bi hôla nye ha ngéda i? A bi bôdôl héñha bisita a bé pam ni bo i likalô. A nkônde le: “Hala a bi hôla me i bana mawanda mape, ma me ngwés ngandak, me diihege.” Kii ndémbél i Rosemary i nla niiga we? Bebek le u bi nimis ngim yom i i bé kônha we maséé ilole u nyi maliga, ndi nano, u nla yaga héñha yo ni yom ilam ipe i i nlémél Nyambe. (Filipi 4:​8, 9) U hôiga bañ i jam lini: I mam Yéhôva a nti we ma nloo ma u bi nimis huum.

BAPE BA NKÔM YÉHÔVA MBUS

12. Ikété likoda, limbe jam li nla ba ndutu i neebe?

¹² I ngéda u bi yila Mbôgi Yéhôva, hala a bi ti we hogbe i nyodi munu nkoñ ’isi u Satan unu, u jôp mu ntôñ u bôt ba ngwés maliga, ba boñok loñge. (Yésaya 65:14) Ndi to hala, i nla pam le mut nu u ndiihe mu ntôñ u Yéhôva a boñ béba ikeñi. Ngim mangéda, ba nhéya bahogi i ntôñ. (1 Korintô 5:13) Yimbe lelaa hala a bi tééñga sita Samar. A nkal le: “Ndék ngéda ndigi i mbus sôble yem, mañ wada u bi kwo i béba ikeñi, ba héya yak nye i ntôñ. Hala a bi tééñga me ngandak inyule me bé hégda bé to ndék le mañ u nla boñ béba ikeñi, a bane yak likoda ngok baagene.” I yé maliga le di mbôdôl lôk kéé i bôlôm ni i bôda ñem, di nyi le ba ngwés Yéhôva kiyaga. (1 Korintô 13:​4, 7) Ndi ngoo le hiki nwii, bahogi ba mpam i ntôñ. Hala a nla lôôha ba ndutu inyu yoñ ibale i mankéé nu a mpam i ntôñ a bak liwanda joñ li ñem nyuu, tole mankéé nu u yoñok kiki ndémbél.

13. Lelaa di nla kôôba nano i téñbe i gwélél Yéhôva, to ibale liwanda jés tole mut wés lihaa a ntjôô nye?

¹³ Nano, kii u nla boñ ibale liwanda joñ tole mut woñ lihaa a nkôm Yéhôva mbus? Kee ni bisu i lédés maada moñ ni Yéhôva. (Yakôbô 4:8) Bigda le u ngwélél bé Yéhôva inyu ngim mut. Inyu hala nyen tolakii di mbéna gwélél Yéhôva ni lihaa jés, yak ni likoda, di nlama bana wés wés ntjega inyu soohe ni inyu añ Bibel.​—Tjémbi 1:2; 62:8.

14. Kii ndémbél i Pétrô i niiga bés? (Yôhanes 6:​66-68)

¹⁴ Di nla ôt biniigana bipe mu yom Pétrô a bi boñ i ngéda ngandak banigil i bi waa noñ Yésu. Ibabé pééna, Pétrô nyemede a bi lama ba nhelek ha ngéda i. Ndi béñge i jam a bi kal i kaat Yôhanes 6:​66-68. (Añ.) Iloole a kida i béñge i mam bôt bape ba bé boñ, Pétrô a bi bok mis mé mu maliga Yésu a bi niiga nye. Jon Pétrô a bi waa bé noñ Yésu. Nlélém ni bés i len ini, to ibale bôt bape ba ntjôô Yéhôva, hala a nkobla bé le i mam ntôñ u niiga bés ma ta bé maliga. Téñbe ni i maliga ma! Sita Samar nu di mbôk di pôdôl a nkal le: “Me mbéna bigda hiki ngéda le, i ta bé inyule mut wada a mboñ béba, jon ba nlama ôm likoda jolisôna nsohi, tole ntôñ u Yéhôva.”

15. Kii ndémbél i Emily i niiga we?

¹⁵ Di yoñ le hihéga hi Emily. Sonde yada ndigi i mbus le a bi kôs sôble, nyañ a bi tjôô lihaa jé, a pam yak i ntôñ. Emily a nkal le: “Me bé hégda bé to kel yada le mama yem a nla boñ i nya jam i. Hala a bé me ndutu ikeñi kiyaga, mama yem a bé yiñba me ngandak.” Kii i bi hôla Emily i yémbél i ndutu i? A nkal le: “Me ta bé metama. Papa yem a ngwés me ngandak, a nyoñ ki ndun ni me. Yak bilôk bikéé ikété likoda bi nyoñ me kiki mut wap lihaa. I yé maliga le hiki wada wés a mboma mé mé mandutu. Jon i yé nseñ le di bana lem i gwéhna, ni i nidna.” (1 Pétrô 5:9) U gwé bé ngôñ i bem le bikuu bi kwoo inyu lédés maada moñ ni lôk kéé i bôlôm ni bôda. Boñ hala ibôdôl nano. Ha ngéda i, to kii i mpémél we, u ga nôgda bé le u yé wetama.

16. Kii di nlama bé hôya? (Béñge yak titii.)

¹⁶ U hôya bañ le Yéhôva a nkodol i bet a ngwés. (Lôk Héber 12:6) A gwé ngôñ le ba bobasôna ba bi pam i ntôñ, ba témb i nyeni. (2 Pétrô 3:9) Jon, ba nkwoog nkaa le ibale mut woñ lihaa tole liwanda joñ li mpam i ntôñ, mimañ mi ga boñ kii yosôna mi nla inyu hôla nye i témb yak Yéhôva.​—2 Timôtéô 2:​24, 25.

17. Di nla ba nkwoog nkaa ni kii?

¹⁷ Di ntehe ndik ndék mandutu mut a nla boma i mbus sôble yé. I yé maliga le mandutu mahogi ma nla kônha we woñi ndék, ndi u sehla bañ. U nla boñ ngandak mam inyu bôñha. U hôya bañ le u gwé nhôla nunkeñi le Yéhôva Nyambe. A ma hôla we, a ngi hôlga we, a nsômbôl ki hôla we i boga ni boga! (1 Pétrô 5:10) A ga ti we ngui, a hôla ki we i nihbe to imbe ndutu u mboma. Ibale u nke ni bisu i neebe mahôla ma Yéhôva, ndutu yo ki yo i ga ôbôs bé maada moñ ni nye!​—Tjémbi 119:165; Rôma 8:​38, 39.